E Aoga Le Olaga Nei!
E ui i luitau e feagai ma i tatou uma, ua mamanuina e lo tatou Tama alofa le fuafuaga o le fiafia e lei faamoemoe tatou te toilalo ai.
Mo le tele o tausaga sa tofia ai au e avea o se faiaoga o aiga i se tuafafine olomatua i la’u uarota. Sa lei faigofie lona olaga. Sa tele ni ona faafitauli tau i le soifua maloloina ma sa feagai ma se olaga o tiga ona o se faalavelave na tupu i lona laitiiti i le malaetaalo. Sa tatala lana faaipoipoga i le 32 o ona tausaga ma se fanau laiti e tausi ma vaaia, sa toefaaipoipo o ia i le 50 o ona tausaga. Sa maliu lana tane lona lua ina ua 66 ona tausaga, ma sa ola lenei tuafafine i nisi tausaga faaopoopo e 26 o se tina ua oti lana tane.
E ui i luitau o lona olaga atoa, ae sa faamaoni o ia i ana feagaiga e oo i le iuga. O lenei tuafafine o se su’egafa tuuto, auai e le aunoa i le malumalu, ma o se āogafa ma o se tusitala o talafaasolopito o aiga. E ui ina sa tele ona tofotofoga faigata, ma e aunoa ma se fesili sa ia lagona le faanoanoa ma le tuuatoatasi i nisi o taimi, ae sa laufofoga fiafia ma e i ai sona uiga patino tausaafia manaia.
E iva masina talu ona maliu o ia, sa maua e se tasi o ona atalii se aafiaga matagofie i le malumalu. Sa ia aoaoina e ala i le mana o le Agaga Paia o loo i ai se feau a lona tina mo ia. Sa la talanoa ma ia, ae e le o se faaaliga vaaia po o ni upu na lagonaina. Na oo mai lenei feau e le mafaaseseina i le mafaufau o le atalii mai lona tina: “Ou te manao ia e iloa e aoga le olaga faitino, ma ou te manao ia e iloa ua ou malamalama nei i le mafuaaga na tutupu ai mea uma [i lo’u olaga] i le ala na tutupu ai—ma e lelei mea uma.”
E sili atu ona ofoofogia lenei feau pe a mafaufau le tagata i lona tulaga ma faigata sa onosa’ia e lenei tuafafine ma manumalo ai.
Uso e ma tuafafine, e aoga le olaga nei! Na mamanuina ina ia aoga! E ui i luitau, lototiga, ma faigata e feagai ma i tatou uma, na mamanuina e lo tatou Tama alofa, poto, ma atoatoa le fuafuaga o le fiafia e lei faamoemoe tatou te toilalo ai. O Lana fuafuaga ua saunia ai se ala mo i tatou e tula’i a’e ai i luga atu o o tatou toilalo faaletino. Sa fetalai mai le Alii, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata.”
Ae ui o lea, afai e tatau ona avea i tatou o ni ē faamanuiaina i le “galuega ma le mamalu,” o le Alii e oo foi i le “tino ola pea ma le ola e faavavau,” e tatau la ona a’oa’i ma aoao i tatou, ma ui atu i le afi a le tunu auro—o nisi taimi e oo i le si’ui e gata ai lo tatou malosi. Ina ia matuai aloese atoatoa mai faafitauli, luitau, ma faigata o lenei lalolagi, o le laa ese lea mai le faagasologa lea e matuai tatau ai mo le olaga nei ia aoga.
O lea la, e le tatau ona tatou tete’i pe a oo mai taimi faigata i o tatou luga. O le a tatou fetaiai ma tulaga e tofotofo ai i tatou ma tagata o le a tatou mafai ai ona faata’ita’i le alofa mama moni ma le onosai. Ae e manaomia ona tatou onosai i lalo o o tatou faigata ma ia manatua, e pei ona fetalai mai le Alii:
“Ma ʼai se tasi e tuu i lalo lona ola i loʼu faamoemoe, mo loʼu igoa, o le a toe maua e ia, o le ola lava e faavavau.
“O lea, aua tou te fefefe i o outou fili [po o a outou faafitauli, luitau, po o tofotofoga o lenei olaga …, na fetalai mai ai le Alii, ma o le a ou tofotofoina outou i mea uma, pe tou te mau i a’u feagaiga … ina ia mafai ona outou agavaa.”
Pe a tatou lagona le popolevale po o le atuatuvale e uiga i a tatou faafitauli pe lagona faapea atonu e tele atu faigata o lona olaga nai lo isi, e mafai ona tatou manatua le mea na fetalai mai ai le Alii i le fanauga a Isaraelu:
“Ia e manatua le ala uma na taitaiina mai ai oe e Ieova le Atua i nei tausaga e fagafulu i le vao, ia na faatigaina ai oe, ma tofotofo ia te oe, e iloa ai mea o i lou loto, pe e te tauusiusi i ana poloaiga, pe leai.”
E pei ona sa aoao atu e Liae i lona atalii o Iakopo:
“Sa e mafatia i puapuaga ma le faanoanoa tele. … Ae ui o lea, … o le a faapaiaina [e le Atua] ou puapuaga mo ou manuia. … O le mea lea, ua ou iloa ua togiolaina oe, ona o le amiotonu o lou Togiola.”
Ona o lenei olaga o se nofoaga e tofotofo ai le olaga ma “a tu mai se ao uliuli ma lamatia ai i tatou,” e aoga le manatua o lenei fautuaga ma le folafolaga o loo maua i le Mosaea 23 e faatatau i luitau o le olaga: “E ui i lea—soo se tasi e tuu atu lona faalagolago i [le Alii] o ia lava lea o le a sii a’e i le aso gataaga.”
A o o’u talavou, sa ou oo ai lava i se tiga tele faalelagona ma le maasiasi na oo mai o se taunuuga o ni faatinoga amioletonu a se isi, lea na aafia ai mo le tele o tausaga lo’u lava ta’uaogaina ma lo’u lagona o le agavaa i luma o le Alii. Ae ui o lea, ou te tuuina atu la’u molimau patino e mafai e le Alii ona faamalosia i tatou ma lagolagoina i tatou i soo se faigata e tuu aloaia mai tatou te o’o i ai i le taimi o la tatou malaga puupuu i lenei lalolagi o faigata.
Ua tatou masani i le aafiaga o Paulo:
“Ina ne’i faamaualuga a’u i, le silisili ese o mea na faaalia mai [ua ou mauaina], sa tuuina mai ia te a’u le mea matuitui i le tino, o le agelu a Satani e tu’i mai ia te au, ina ne’i o’u faamaualuga.
“Na ou aioi faatolu atu i le Alii ona o lea mea, ina ia alu ese ia te au.
“Na ia fetalai mai ia te au, “O lo’u nei alofa tunoa e lava lea e fesoasoani ia te oe, aua o le vaivai e faaatoatoaina ai lo’u mana.” O lea ua tele ai lava lo’u fiafia i mea ua ou vaivai ai, ina ia tumau i o’u luga le mana o Keriso.”
Tatou te le iloa pe o a “mea matuitui i le tino” o Paulo. Na ia filifili e aua nei faamatalaina pe o se ma’i i le tino, se vaivaiga faalemafaufau pe faalelagona, po o se faaosoosoga. Ae e le manaomia fua ona tatou iloa lena auiliiliga ia iloa ai sa tauivi o ia ma sa aioi atu i le Alii mo se fesoasoani, ma o le iuga, o le malosiaga ma le mana o le Alii o mea ia sa fesoasoani ia te ia.
E faapei o Paulo, o le fesoasoani a le Alii na i’u ai ina faamalosia au faalelagona ma faaleagaga, ma mulimuli ane ou iloaina ina ua mavae le tele o tausaga, sa avea pea a’u i taimi uma o se tagata ta’uaogaina ma le agavaa mo faamanuiaga o le talalelei. Sa fesoasoani le Faaola ia te au e faatoilalo o’u lagona o le le agavaa ma tuuina mai le faamagaloga faamaoni i le tagata faatausuai. Na i’u ina ou malamalama o le Togiola a le Faaola o se meaalofa patino mo au, ma e alolofa atoatoa lo’u Tama Faalelagi ma Lona Alo ia te au. Ona o le Togiola a le Faaola, ua aoga ai le olaga nei.
E ui sa i’u ina faamanuiaina atu i le iloaina o le ala na laveaiina ai a’u e le Faaola ma sa tu pea i o’u autafa i le aluga o na aafiaga, ae ua manino lo’u malamalama faapea o le tulaga le manuia o tausaga o lo’u talavou o la’u malaga ma aafiaga patino, o le faaiuga e le mafai ona muai iloa lona taunuuga e oo i ai i latou na mafatia ma tumau pea ona mafatia ai mai amioga amioletonu a isi.
Ua ou iloaina o aafiaga o le olaga—lelei ma leaga—e mafai ona aoao ai i tatou i lesona taua. Ua ou iloa nei ma tuu atu la’u molimau e aoga le olaga nei! Ou te faamoemoe e avea o se taunuuga o le tauaofai o aafiaga o lo’u olaga—lelei ma leaga—ua ou maua ai le mutimutialofa mo i latou e aafia fua ae ta’umamaina, ona o faatinoga a se isi ma le lagona o’oo’o mo e ua mafatia.
Ou te faamoemoe ma le lotofaamaoni, e avea o se taunuuga o aafiaga o lo’u olaga—lelei ma leaga—ua sili atu lo’u agalelei i isi, faia isi e faapei ona faia e le Faaola, ua sili atu le malamalama mo le tagata agasala, ma ua atoatoa lo’u amiosa’o. A oo ina tatou faalagolago i le alofatunoa o le Faaola ma tausi a tatou feagaiga, e mafai ona avea i tatou o ni faataitaiga o aafiaga o’oo’o o le Togiola a le Faaola.
Ou te faasoa atu se faataitaiga faaiu e aoga le olaga nei.
O le uso o le tina o Elder Hales, o Lois VanderBosch, ma lona tina o Klea VandenBosch.
Sa lei faigofie le malaga a lo’u tina i le olaga nei. Na te lei mauaina ni faaneeneega po o ni mamalu faalelalolagi ma na te lei mauaina avanoa faaleaoaoga i luga atu o le aoga maualuga. Sa pisia o ia i le ma’ipipili a o laitiiti, ma taunuu ai i le tiga ma le le manuia o lona vae agavale i lona olaga atoa. Ina ua tagata matua, sa feagai o ia ma le tele o faigata ma tulaga luitau faaletino ma mea tautupe, ae sa faamaoni i ana feagaiga ma sa alofa i le Alii.
Ina ua 55 tausaga o lo’u tina, na maliu le isi o’u tuafafine matua, ma sa tuua sana pepe teine e valu masina le matua, le tama a lo’u tuafafine, ua leai se tina. Ona o ni mafuaaga eseese, sa i’u ai ina tausia e lo’u Tina le tama a lo’u tuafafine mo le isi 17 tausaga, o le tele o taimi i lalo o tulaga faigata tele. Peitai, e ui i nei aafiaga, sa ia tautuaina lona aiga ma le fiafia ma le naunautai, tuaoi, ma tagata o le uarota, ma sa avea o se fai sauniga i le malumalu mo le tele o tausaga. I nai tausaga mulimuli o lona soifua, sa mafatia ai lo’u Tina i se ituaiga o ma’i o le mafaufau, sa tele ina fememea’i, ma sa taofimau ai i se nofoaga mo tagata matutua. O le mea e faanoanoa ai, sa na o ia i le taimi na maliu faafuasei ai.
I ni nai masina talu ona maliu o ia, sa fai ai sa’u miti ou te lei faagaloina lava. I la’u miti, sa ou nofo i lo’u ofisa i le Maota o le Pulega a le Ekalesia. Sa ulufale mai lou Tina i le ofisa. Na ou iloa lava na sau mai le lalolagi o agaga. O le a ou manatuaina pea o’u lagona na i ai. E le’i i ai sana tala na fai mai, ae sa susulu mai ia te ia le lalelei faaleagaga ou te le’i vaai i ai muamua ma e faigata ia te au ona faamatala.
O ona foliga ma lona tagata sa matuai maoae lava! Ou te manatua la’u tala na fai atu ia te ia, “Tina, e ese lou lalelei!” e faasino i lona mana faaleagaga ma le matagofie. Sa ia iloa au—ae e lei i ai foi se tala. Sa ou lagonaina lona alofa mo au, ma sa ou iloa foi i lena taimi o loo fiafia o ia ma ua faamaloloina mai ona tuatuano’a ma luitau o le olaga ma o loo faatalitali ma le naunautai i “se toetu mamalu.” Ua ou iloa mo lou Tina, sa aoga le olaga nei—ma e aoga foi mo i tatou.
O le galuega ma le mamalu o le Atua “o le aumaia o le tino ola pea ma le ola faavavau o le tagata.” O aafiaga o le olaga nei, o se vaega o le malaga lea e mafai ai ona tatou tuputupu ae ma alualu i luma i lena tino ola pea ma le ola e faavavau. E lei auina mai i tatou iinei ia toilalo, ae ia manuia i le fuafuaga a le Atua mo i tatou.
E pei ona sa aoao mai e le Tupu o Peniamina, “Ma e le gata i lea, Ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata.” I se isi faaupuga, e aoga le olaga nei!
Ou te molimau atu a o tatou mauaina sauniga o le talalelei, ulu atu i feagaiga ma le Atua ona tausia lea o na feagaiga, salamo, auauna atu i isi, ma tumau e oo i le iuga, e mafai foi e i tatou ona maua le faamautinoaga ma le faatuatuaga atoatoa i le Alii e aoga le olaga nei! Ou te molimau atu ia Iesu Keriso ma o lo tatou lumanai mamalu faatasi ma lo tatou Tama Faalelagi, ua mafai ona o le alofatunoa ma le Togiola a le Faaola. I le suafa o Iesu Keriso, amene.