Faaogatusaina o Tatou Loto ma Lona [Finagalo]
O le mulimuli i le finagalo o le Alii i o tatou olaga o le a tatou mafai ai ona maua le penina aupito sili ona taua i le lalolagi—o le malo o le lagi.
I se taimi patino, sa fetalai ai le Faaola e uiga i se faipisinisi sa sailia “penina ‘anagata.” I aluga o le sailiga a le tagata faipisinisi, sa ia maua ai se tasi “e sili ona taugata.” Ae peitai, ina ia maua le penina maoae, sa tatau i lenei alii ona faatau ese atu ana meatotino uma, lea sa ia faia loa lava ma le fiafia.
E ala i lenei faataoto puupuu ma le ‘anoa, sa matagofie le aoao atu a le Faaola e faapea o le malo o le lagi e faatusa i se penina ‘anagata, o le ‘oa taua moni e tatau ona manaomia i lo isi mea uma. O le mea moni faapea na vave loa lava ona faatau ese atu e le faipisinisi ana meatotino uma ina ia maua ai lena penina taua, ua ta’u manino mai ai e faapea e tatau ia i tatou ona faaogatusa o tatou mafaufau ma manaoga ma le finagalo o le Alii ma faia mea uma e mafai ona tatou fai ma le naunautai i le taimi o la tatou malaga i le ola nei ina ia maua ai faamanuiaga e faavavau o le malo o le Atua.
Ina ia agavaa mo lenei taui sili, e tatou te manaomia moni, faatasi ma isi mea, ona tuu atu la tatou taumafaiga silisili e faataatia ese ai tulimataiga manatu faapito uma, ma lafoai soo se mea faalavefau o loo taotaomia ai i tatou mai le tuuto atoa atu i le Alii ma Ana ala maualuluga ma sili ona paia. Na ta’ua e le Aposetolo o Paulo nei tulimataiga faapaiaina o le “ua tatou maua le finagalo o Keriso.” E pei ona faataitaia e Iesu Keriso, o lona uiga “o le faia pea o mea e fiafia i ai [le Alii]” i o tatou olaga, po o le pei ona fai mai ai nisi tagata i aso nei, o le “faia lea o mea e aoga mo le Alii.”
I se tulaga faaletalalelei, o le “[faia] pea o mea e fiafia i ai [le Alii]” e faatatau i le gauai atu o o tatou loto i le finagalo o le Alii. Sa aoao mai ma le manatunatu loloto o le Faaola le taua o lenei mataupu faavae a o Ia aoaoina Ona soo:
“Aua ou te lei alu ifo mai le lagi e fai lo’u lava loto, a o le finagalo o le ua auina mai a’u.
“O lenei foi le finagalo o le Tama o le ua auina mai a’u, ia le māumau lava se tasi ua ia foaiina mai ia te a’u, a ia ou toe faatuina o ia i le aso gataaga.
“O lenei foi le finagalo o le ua auina mai a’u, ia maua le ola e faavavau e i latou uma o e vaai i le Atalii, ma faatuatua ia te ia, ou te toe faatuina foi i latou i le aso gataaga.”
Sa faataunuuina e le Faaola se faamatuu atu i se tulaga atoatoa ma le paia i le Tama, e ala i le faatagaina o Lona finagalo ia tofatumoanaina i le finagalo o le Tama. Na Ia fetalai foi, “O Ia o le na auina mai a’u o loo faatasi ma a’u: e le tuua au e toatasi e le Tama; aua ou te faia pea lava o mea e lelei ia te ia.” I le aoaoina o le Perofeta o Iosefa Samita e uiga i le mamafatu ma mafatiaga o le Togiola, sa fetalai ai le Faaola:
“Aua faauta, o Aʼu, o le Atua, na mafatia i nei mea mo tagata uma, ina ia latou lē mafatia pe afai latou te salamo; …
“O le mafatia lea na oo ai ia te a’u lava, o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou lē inuina le ipu oona, ma ma’e’e’e—
“E ui i lea, ia i ai i le Tama le viiga, ma sa ou inu ma faauma ai a’u tapenapenaga mo le fanauga a tagata.”
I le taimi o la tatou malaga puupuu i le olaga nei, e tele taimi tatou te tauivi ai ma mea ua tatou manatu ua tatou iloa, o mea ua tatou manatu e sili, ma mea ua tatou faapea lava e aoga mo i tatou, e ese mai i le malamalama i mea ua silafia lelei e le Tama Faalelagi, o mea e sili e faavavau, ma mea e aoga moni mo fanau i totonu o Lana fuafuaga. E mafai ona matuai lavelave lenei tauiviga tele, aemaise pe a mafaufau i valoaga o loo i ai i tusitusiga paia mo o tatou taimi: “Ia e iloa foi lenei mea, o ona aso e gata ai … e avea tagata ma e e alolofa ia i latou lava, … ua tele le manao i mea faafiafia ae leai se manao i le Atua.”
O se tasi faailoga o lena mea e ta’u mai ai le faataunuuina o lenei valoaga o le mea ua faateleina le lilifa i ai o le lalolagi i le taimi nei, ua talia e le toatele naua, o tagata ua matuai faamalieina ia i latou lava ma tautino e le aunoa, “Po o le a lava, ou te ola lava a’u i a’u mea moni, pe ou te faia foi le mea e aoga mo a’u.” E pei ona fai mai le Aposetolo o Paulo, ua latou “saili a latou lava mea, ae le o mea a Iesu Keriso.” O lea ituaiga o mafaufauga e tele ina ta’uamiotonuina e “faamaoni” e i latou o e nopia’i i tulimataiga manatu faapito, o faamuamua faaletagata lava ia, pe mananao e ta’uamiotonuina ituaiga patino o amioga ia e tele taimi e le fetaui ai ma le fuafuaga alofa a le Atua ma Lona finagalo mo i latou. Afai tatou te tuu atu o tatou loto ma mafaufau e talia lenei ituaiga o mafaufauga, e mafai ona tatou fatuina ni ‘alā e tautevateva ai mo i tatou lava, a o taumafai ia maua le penina e sili ona taugata na saunia ma le alofa e le Atua mo Ana fanau—le ola e faavavau.
E ui ina moni faapea e tofu malaga i tatou i se malaga faaleso’o taitoatasi i luga o le ala o feagaiga, ma tauivi e tuu o tatou loto ma mafaufau ia totonugalemu ia Keriso Iesu, e tatau ona tatou faaeteete ma mataala e le aunoa ia le faaosoosoina e talia lenei ituaiga o filosofia faalelalolagi i o tatou olaga. Na saunoa Elder Quentin L. Cook e faapea “o le faamaoni e faapei o Keriso o se sini e sili atu ona taua nai lo le moni.”
A’u uo pele, pe a tatou filifili ia avea le Atua ma tosinaga aupito mamana i o tatou olaga nai lo a tatou tulimata’iga manatu faapito, e mafai ona tatou alualu i luma i lo tatou tulaga faaleso’o, ma faateleina ai lo tatou malosi e tuufaatasia ai o tatou mafaufau ma loto ma le Faaola. I se isi itu, a tatou le faatagaina ala o le Atua e manumalo i o tatou olaga, e tuua na o i tatou lava, ma e aunoa ma le taitaiga musuia a le Alii, e mafai ona tatou ta’uamiotonuina toetoe o mea uma tatou te fai pe le faia foi. E mafai foi ona tatou faia ‘alofaga mo i tatou lava e ala i le faia o mea i a tatou lava ala, ma faapea ai, “O lea e na ona ou faia o mea i la’u lava ala.”
Sa i ai se taimi, a o ta’utino mai e le Faaola Lana mataupu, sa i ai nisi tagata, aemaise lava o le au Faresaio faafia-amiotonu, na teena Lana savali ma fai atu ma le totoa, o i latou o fanau a Aperaamo, e ta’u mai ai o lo latou gafa o le a tuu atu ai ia i latou ni avanoa faapitoa i le silafaga a le Atua. O lena manatu na taitai ai i latou e faalagolago i lo latou lava atamai ma lē talitonuina ai i mea sa aoao atu e le Faaola. O le tali atu a le au Faresaio ia Iesu o se molimau manino lea o o latou uiga faafiapopoto, na leai ai se avanoa i o latou loto mo afioga a le Faaola ma ala o le Atua. I le tali atu i ai, sa tautino atu ai ma le poto ma le lototoa e Iesu e faapea, afai o i latou o ni fanau moni o le feagaiga a Aperaamo, semanu ua latou faia galuega a Aperaamo, aemaise ai ia manatua o le Atua o Aperaamo lea sa tu i o latou luma ma aoao atu i latou i upumoni i lena lava taimi.
Uso e ma tuafafine, pei ona mafai ona outou vaai, o le faatinoina o nei mafaufauga lavelave “o le mea e lelei mo au” faasaga i le faiga “o le mea e lelei mo le Alii” e le o se faiga fou ua tulagaese i o tatou aso. O se manatu ua loa ona sopoia seneturi, ma ua tele ina faatauasoina ai e ua popoto i o latou lava mata ma ua faafenumia’i ma faa’ivavā ai le toatele o fanau a le Atua. O lea ituaiga o mafaufauga, o le mea moni, o se togafiti tuai a le fili; o se ala taufaasese lea e ta’ita’i ese atu ai ma le faaeteete fanau a le Atua mai le ala moni ma le faamaoni o feagaiga. E ui o tulaga patino e pei o kenera, faataatiaga faalefaafanua, ma luitau faaletino ma faalemafaufau i la tatou malaga, i mea e taua moni, o loo i ai se avanoa i totonu tatou te saoloto ai e filifili pe o le a tatou filifili pe leai foi e mulimuli i le mamanu ua saunia e le Alii mo o tatou olaga. O le mea moni, “Sa Ia faailoga le ala ma taitai le auala, ma itu uma [ua maioio].”
I le avea ai ma soo o Keriso, tatou te mananao e savavali i le ala na Ia faailogaina mo i tatou i le taimi o Lana misiona i le ola nei. E le gata ina tatou mananao e faia Lona finagalo ma mea uma o le a faamalieina ai o Ia, ae saili foi e faaa’oa’o ia te Ia. A o tatou taumafai malosi ia faamaoni i feagaiga uma ua tatou ulu i ai ma ola ai “i upu uma e luai mai i le fofoga o le Atua,” o le a puipuia i tatou mai le afaina fua i agasala ma mea sese a le lalolagi—mea sese o manatu ma aoaoga faavae o le a taitaiese ai i tatou mai na penina aupito sili ona taua.
Sa musuia patino lava a’u i le auala na aafia ai i lena faamatuu atu faaleagaga i le Atua ia olaga o soo faamaoni o Keriso a o latou filifili e faia mea e finagalo i ai le Alii. Ou te iloa se alii talavou sa le mautonu e uiga i le alu i se misiona, na lagona le musuia e alu ma auauna atu i le Alii ina ua ia faalogo i se taitai sinia o le Ekalesia, na ia faasoa maia lana lava molimau patino ma le aafiaga paia o le auauna atu o se faifeautalai.
I ana lava upu, o lea alii talavou, lea ua mae’a mai lana misiona, na ia fai mai ai: “A o ou faalogologo i le molimau a se Aposetolo a le Faaola o Iesu Keriso, sa mafai ona ou lagonaina le alofa o le Atua mo a’u, ma sa ou manao ai e faasoa atu lena alofa i isi. I lena taimi, sa ou iloa ai e tatau ona ou auauna atu i se misiona e ui i lo’u fefe, masalosaloga, ma atugaluga. Sa ou lagonaina atoatoa le talitonu i faamanuiaga ma folafolaga a le Atua i Ana fanau. O le asō, o a’u o se tagata fou; ua i ai sa’u molimau e moni lenei talalelei ma o le Ekalesia a Iesu Keriso ua toefuatai mai i le lalolagi.” Na filifili e lenei alii talavou le ala o le Alii ma sa avea ai o se faaa’oa’o o se soo moni i ona itu uma.
Na tonu i se tamaitai talavou e lē faaluafesasia ona tulaga faatonuina ina ua talosagaina o ia e fai ona ofu i se tulaga e le tausaafia, ina ia fetaui ai ma le vaega o le pisinisi a le kamupani o faigā sitaili lea sa faigaluega ai. O le malamalama o lona tino o se meaalofa paia mai lo tatou Tama Faalelagi ma o se nofoaga e mafai ona mau ai le Agaga, sa musuia o ia ina ia ola i se tulaga e maualuga atu nai lo le lalolagi. Sa le gata ina ia mauaina le talitonuga mautu a i latou o e sa vaai atu ia te ia o ola i le upumoni o le talalelei a Iesu Keriso, ae sa ia faasaoina foi lana galuega, lea sa faaletonu mo se taimi. O lona naunautaiga e fai le mea sa faamalieina ai le finagalo o le Alii, nai lo le mea e lelei mo le lalolagi, na tuu atu ai i ana feagaiga le talitonuga i le lotolotoi o ana filifiliga faigata.
Uso e ma tuafafine, o loo faafetaia’ia pea lava pea i tatou i faaiuga faapena i la tatou malaga i aso taitasi. E moomia ai se loto e toa ma le naunautai e tu ai, ma tulitulimatai se vaaiga faamaoni ma le agamalu e faailoa ai le i ai o vaivaiga o le tino i o tatou olaga, lea e mafai ona faalavelaveina ai lo tatou gafatia e faamatuu atu i tatou lava i le Atua, ma i’u ai ina tonu e talia Lana auala nai lo o tatou lava ala. O le suega laualuga o lo tatou avea ai ma so’o, e maua i lo tatou naunautaiga e lafoai ma faamaamulu o tatou tagata tuai ma faamatuu atu o tatou loto ma o tatou agaga atoa i le Atua ina ia avea ai Lona finagalo mo tatou.
O se tasi o taimi aupito sili ona mamalu i o tatou olaga e tulai mai pe a tatou iloaina le olioli lea e oo mai pe a faia e le aunoa mea na pe a tasi ma tutusa ma mea e “lelei mo le Alii” ma “mea e lelei mo i tatou.” Ina ia lēmatatalaina ma lēfesiligia le avea o le finagalo o le Alii ma o tatou lava, e manaomia ai le tulaga faalesoo malualii ma le totoa! I lena taimi paia, e avea ai i tatou ma ni e ua faapaiaina i le Alii, ma ua tatou gauai atu atoatoa o tatou loto ia te Ia. O lena gauai atu faaleagaga, e faapea, e matagofie, mamana, ma faigofie ona suia ai.
Ou te molimau atu o le mulimuli i le finagalo o le Alii i o tatou olaga o le a tatou mafai ai ona maua le penina aupito sili ona taua i le lalolagi—o le malo o le lagi. Ou te tatalo ia taitasi i tatou, i o tatou taimi ma avanoa, o le a mafai ona tautino atu, faatasi ai ma le talitonuga i feagaiga, i lo tatou Tama Faalelagi ma le Faaola o Iesu Keriso e faapea “o le mea e lelei mo Lua Afio, e lelei foi mo a’u.” Ou te fai atu ai nei mea i le suafa o Iesu Keriso, amene.