Sa Le’i Pe Lava le Agi o le Matagi
E mafai ona tatou fesoasoani i isi e alualu i luma i a latou malaga ia maua faamanuiaga a le Atua.
I le 2015, i le setete o Pernambuco, Pasila, e toa 62 sui o le Sosaiete o Loia a le J. Reuben Clark na galulue faatasi ma le Ofisa o le Loia a le setete i le suesueina o lu’i faaletulafono a tagata na nofoia ni fale mo tagata matutua eseese se fa. Mo le lima itula i se tasi o Aso Toonai, na faatalanoaina ai e nei loia le silia ma le 200 o tagata na nofoia ta’i toatasi, o i latou taitoatasi na tuulafoaia ma faagaloina e le lalolagi.
I le taimi o a latou faatalanoaga, na latou maua ai ni solitulafono na faia e faasaga i ao sinasina na nonofo ai, e pei o le lafoaia, leaga ona taulima, ma le faaaogaina sese o tupe. O le poutu autu o lenei sosaiete o loia o le tausia lea o ē matitiva ma lē tagolima. I le na’o le lua masina mulimuli ane, na faamanuiaina ai tuuaiga a loia e faasaga i tagata na nafa ma le vaaiga o tagata matutua.
O le latou fesoasoani o se faataitaiga tonu lea o le aoaoga a le Tupu o Peniamina, “pe a outou auauna atu i o outou uso-a-tagata, ua na o lo outou auauna atu lava lea i lo outou Atua.”
O se tasi o tagata na aumau ai sa ou faatalanoaina patino i le taimi o le galuega faatino le totogia o se tamaitai agalelei e 93 tausaga le matua na igoa ia Lusia. O le faafetaia ai o le matou tautua, sa ia alaga tausua mai, “Ta faaipoipo!”
O le faateia na ou tali atu ai: “Vaai i o i le tamaitai talavou aulelei lale! O ia o loʻu toʻalua ma o le loia a le malo.
Sa vave ona ia fai mai: “E a la? E talavou, aulelei o ia ma e faigofie ona toe faaipoipo. Pau le mea o i a te a’u o oe!”
Sa le’i foiaina uma faafitauli a tagata nofoia lelei i lena aso. E le masalomia lava sa faaauau ona latou oo i faigata mai lea taimi i lea taimi, e pei o sa Iareto i a latou vaa i le malaga luitauina i le laueleele folafolaina, “sa tanumia ai i latou i le loloto o le sami, ona o galu mauga sa fati i o latou luga.”
Ae o lena Aso Toonai, sa iloa ai e i latou na nofoia le fale tausi tagata matutua, e tusa lava po o le a le faagaloina o i latou e le lalolagi, sa silafia patino i latou e se Tama Faalelagi alofa, o Lē e tali mai e oo lava i tatalo e sili ona faatauvaa.
Na faaāfua e le Matai o matai “se matagi malosi” e tulei sa Iareto agai atu i faamanuiaga folafolaina. E faapena foi, e mafai ona tatou filifili e auauna atu o se agi a se savili faatauvaa i aao o le Alii. E pei lava ona “sa le’i pe lava le agi a le matagi” ia sa Iareto agai atu i le laueleele folafolaina, e mafai ona tatou fesoasoani i isi ia agai i luma i a latou malaga ia maua faamanuiaga a le Atua.
O ni nai tausaga ua mavae, ina ua faatalanoaina i ma’ua ma Chris, si a’u avā pele, mo lo’u tofiga o se epikopo, sa saunoa mai le matou peresitene o le siteki ia ou mafaufau ma le agaga tatalo i ni suafa e fautua atu o ni o’u fesoasoani. Ina ua faafofoga i suafa na ou fautuaina atu, sa ia fai mai e tatau ona ou iloa ni nai mea e uiga i se tasi o uso.
Muamua, o le uso e le mafai ona faitau. Lona lua, e le’i i ai sana taavale na te faaaoga e asiasi ai i le au paia. Lona tolu, na te faaaogaina i taimi uma—taimi uma—se tioata o le la i le lotu. E ui lava i popolega faamaoni o le peresitene, sa malosi lo’u lagona e tatau ona ou fautuaina atu pea o ia o so’u fesoasoani, ma lagolagoina au e le peresitene o le siteki.
O le Aso Sa sa lagolagoina ai i matou ma o’u fesoasoani i le sauniga faamanatuga, sa iloa lelei i foliga o le au paia le tete’i. Sa agai lemu mai lenei uso pele i luga o le tulaga, lea sa malosi ai le atagia i lana matatioata o le susulu o moli sa i luga a’e.
A o saofai o ia i ou tafatafa, sa ou fesili i ai, “Uso, e i ai se faafitauli i lau vaai?”
“Leai,” na ia fai mai ai.
“Aisea la e te faaaoga ai tioata o le la i le lotu?” Sa ou fesili atu ai. “La’u uo, e mananao le au paia e vaai i ou mata, ma e ao ona mafai ona e vaai lelei foi ia i latou.”
I lena lava taimi, sa ia aveesea ai lana matatioata ma sa le’i toe faaaogaina lava i le lotu.
Sa tautua lenei uso peleina i o’u tafatafa seia oo ina faamalolo a’u o se epikopo. O le aso, o loo faaauau pea ona ia tautua faamaoni i le Ekalesia, ma o se faatataiga o le tuuto ma le tautino atu i le Aili o Iesu Keriso. Ae peitai, o tausaga ua mavae, sa avea o ia o se faimata pogisa sa lei iloa na saofai ma faagaloina i nofoauumi o le falesa. E tele ina ou tomanatu, “E toafia ni uso ma ni tuafafine faamaoni o saofafai faagaloina ma i tatou i le asō?”
Pe tatou te lauiloa pe faagaloina, e mautinoa lava o le a oo mai tofotofoga ia i tatou taitoatasi. A o tatou liliu atu i le Faaola, e mafai ona Ia “faapaiaina [o tatou] puapuaga mo [lo tatou] manuia” ma fesoasoani ia i tatou e tali atu i o tatou tofotofoga i se ala e faafaigofie ai lo tatou alualu i luma faaleagaga. Pe mo ni tagata e nonofo i se fale mo tagata matutua, se tagata na faamasino sese o le Ekalesia, po o soo se isi lava tagata, e mafai ona avea i tatou [ma lena] “matagi sa le’i pe lava le agi,” e aumaia le faamoemoe ma taitai atu isi i le ala o feagaiga.
Sa fofogaina atu e lo tatou perofeta peleina, o Peresitene Russell M. Nelson, se valaaulia matagofie ma musuia i le autalavou: “Ou te toefaamautu malosi atu ai ua poloaiina e le Alii ia alii talavou agavaa uma lava, ma malolosi ia sauniuni mo, ma auauna atu i se misiona. Mo alii talavou o le Au Paia o Aso e Gata Ai, o le galuega faafaifeautalai o se tiutetauave faaleperisitua. … Mo outou tuafafine talavou ma malolosi, o se misiona o se avanoa mamana foi, ae tuu i le faitalia.”
O aso uma lava, e faitau afe alii ma tamaitai talavou e tali atu i le valaau faaperofeta a le Alii e ala i le auauna atu o ni faifeautalai. Tou te atamamai, ma e pei ona saunoa Peresitene Nelson, e mafai ona “tele atu la outou uunaiga i le lalolagi nai lo soo se isi lava tupulaga ua mavae atu!” Oi ioe, e le faapea o le uiga o lena mea o le a avea outou ma tagata silli ona lelei i le taimi tou te tuvae ai i totonu o le nofoaga autu e aoao ai faifeautalai.
Nai lo o lena, atonu e te lagona le pei o Nifae, “sa taitai [outou] e le Agaga, ona sa [tou] lē muaʼi iloa muamua mea e tatau ona [tou] faia. E ui i lea sa [tou o] atu.”
Atonu tou te lagona le le mautonu e pei ona sa i ai Ieremia ma manao ai e faapea atu, “Ou te le iloa ona tautala, aua o au o le tama itiiti.”
Atonu foi e te vaai i a outou lava faaletonu patino ma manao ai e tagi atu e pei ona sa faia e Mose: “Lo‘u Alii e, o a’u o le tagata e le iloa fai lauga … : ua le matala lo’u gutu, ua le matala foi lo’u laulaufaiva.”
Afai o soo se tasi o outou alii ma tamaitai talavou peleina ma malolosi o i ai se manatu faapenei i le taimi nei, ia manatua ua tali mai le Alii, “Aua e te faapea, o a’u o le tama itiiti: aua o i latou uma ou te auina atu i ai oe.” Ma ua Ia folafola mai, “O lenei, alu ia oe; o a’u foi ou te faatasi ma lou gutu, ou te aoao atu foi ia te oe i upu e te tautala atu ai.”
O lou suiga mai lou tagata natura i le tagata faaleagaga o le a tupu i “lea fuaitau i luga o lea fuaitau, ma lea mataupu i luga o lea mataupu” a o outou taumafai ma le naunautai e auauna ia Iesu Keriso i totonu o le misiona e ala i le salamo i aso taitasi, usiusitai a’ia’i, ma galue malosi e “su’e i taimi uma, aoao le salamo, ma papatiso tagata liliu mai.”
E ui ina e faia se pine o le igoa, o nisi taimi e te ono lagona ai le le manatulia po o le faagaloina. E ui i lea, e ao ona e iloa o loo i ai sou Tama Faalelagi atoatoa, o lē e silafia lelei oe, ma se Faaola, o le e alofa ia te oe. O le a i ai ni ou taitai misiona o ē, e ui i o latou le atoatoa, o le a auauna atu ia te oe o “le matagi sa le’i pe lava le agi” i le taialaina o oe i lau malaga o le liua patino.
I le “nuu o tafe ai le suasusu ma le meli” o le a e auauna atu ai i lau misiona, o le a e toe fanauina ai faaleagaga ma avea o se soo o Iesu Keriso i le olaga atoa, a o e faalatalata atu ia te Ia. E mafai ona e iloa ai e le o galo lava oe.
E ui o ni isi e ono “loa” ona faatalitali mo le toomaga, ona ua “leai lava se tagata” e mafai ona fesoasoani atu i lena taimi, ua aoaoina i tatou e le Alii o Iesu Keriso, e leai se tasi e galo ia te Ia. I le isi itu, o Ia o le faataitaiga atoatoa o le saili atu o le tasi i taimi uma o Lana auaunaga i le olaga nei.
O i tatou taitoatasi—ma i latou e siomia i tatou—e fetaiai ma a tatou lava afā o le tetee ma galu fafati o tofotofoga e lofia ai i tatou i aso uma. Ae, “[o le a] le pe lava le agi o le matagi agai atu i le laueleele na folafolaina … ; ma sa faapea [o le a] uunaia i [tatou] i luma atu o le matagi.”
E mafai ona avea i tatou taitoatasi ma se vaega o lenei matagi—o le matagi lava lea e tasi na faamanuiaina ai sa Iareto i la latou malaga, o le matagi lava foi lea e tasi, faatasi ai ma le tatou fesoasoani, o le a manuia ai ē ua le manatuliaina ma faagaloina ia taunuu i o latou lava laueleele folafolaina.
Ou te molimau atu o Iesu Keriso o lo tatou Fautua i le Tama. O Ia o se Atua soifua ma e avea o se savili malosi o le a le aunoa ona taiala i tatou i le ala o feagaiga. I le suafa o Iesu Keriso, amene.