Noatia ia Iesu Keriso: Avea ma Masima o le Lalolagi

Saunia e Elder José A. Teixeira

O Le Au Peresitene o Fitugafulu

A o tatou tumau i le noatia i le Alii, o le a atagia faalenatura mai lava i o tatou olaga Lona malamalama, ma o le a avea i tatou ma masima o le lalolagi.

Na aoao mai le Faaola e faapea, a “valaauina i tatou i [Lana] talalelei tumau-faavavau, ma osifeagaiga ma se feagaiga tumau-faavavau, e faitauina [i tatou] o le masima o le lalolagi.” E faia le masima i ni elemene se lua e noatia faatasi. E le mafai ona tatou masima na o i tatou; afai e tatau ona avea i tatou ma masima o le lalolagi, e tatau ona noatia i tatou i le Alii, ma o le mea lena ua ou vaaia a o ou fegalegaleai faatasi ma tagata o le Ekalesia i le salafa o le lalolagi—ua ou vaaia tagata faamaoni o le Ekalesia ua noatia i le Alii, ua tuuto atu i a latou taumafaiga e auauna atu i isi ma avea ma masima o le lalolagi.

O lou tuuto lē maluelue o se faataitaiga susulu. E talisapaia ma faapelepele lau auaunaga.

Ua faaalia e o tatou talavou le lototele ma le tuuto ofoofogia. Ua latou taliaina ma le naunautai le galuega o talafaasolopito o aiga, ma o a latou asiasiga faifai pea i le maota o le Alii o se molimau lea i lo latou tuuto. O lo latou naunautai e tuuto atu le taimi ma le malosi e auauna atu ai i misiona i le salafa o le lalolagi ua atagia mai ai se faatuatua loloto ma tumau. E le na ona latou auai ae o loo taitaia le ala i le avea ai ma soo e noatia ai ia Iesu Keriso. O la latou auaunaga e susulu atu ai le malamalama ma le faamoemoe, e ootia ai le anoanoai o olaga. Ia te outou, le autalavou o le Ekalesia, matou te faailoa atu lo matou faafetai mai le loto mo la outou auaunaga musuia. E le na o outou o le lumanai o le Ekalesia ae o lona taimi nei foi. O outou moni lava o le masima o le lalolagi!

Ou te alofa i le Alii o Iesu Keriso ma lagona le faamanuiaina i le avanoa e auauna faatasi ai ma outou i le Ekalesia a le Alii. O lo tatou lotogatasi ma le malosi, e faavae i lo tatou faatuatua faatasi, ua faamautinoa mai ai ia i tatou e le tuua lava na o i tatou i lenei faigamalaga. E mafai ona faaauau pea ona tatou fausia faatasi le malo o le Atua ua maua’a i le auaunaga, alofa, ma le faatuatua le maluelue.

Ina ua aoao atu Iesu Keriso i tafatafa o le Sami o Kalilaia, sa tele ona ia faaaogaina elemene o aso uma sa masani ai lana aofia e faailoa atu ai upumoni loloto faaleagaga. O se tasi o na elemene o le masima. Na tautino atu e Iesu, “O outou o le masima o le lalolagi,”o se faamatalaga e mauoa i le uiga ma le taua, aemaise lava mo tagata o Ona taimi o e na malamalama i le taua tele o le masima.

O le galuega i ona po anamua o le seleseleina o le masima i le Algarve, le itulagi i saute o lo’u atunuu o Potukale, e oo i tua atu i le faitau afe o tausaga i le vaitaimi o le Malo o Roma. O le mea e ofo ai, o metotia sa faaaogaina e le au galulue i le masima, sa lauiloa o le marnotos, ua i ai si suiga laitiiti talu mai lena taimi. O nei ‘autufuga tuuto e faaaogāina auala masani, e faatino atoa ai a latou galuega i lima, ua faatumauina ai se talatuu lea na tumau ai i le tele o seneturi.

O lenei metotia anamua ua seleseleina ai le mea ua ta’ua o le “fuamātala o le masima.” Ina ia talisapaia atoatoa le faagasologa lavelave o le seleseleina o le fuamātala o le masima, e tāua ona malamalama i le siosiomaga e maua ai. O le vao’utu’utu faataufusi o le masima i le talafatai o Algarve ua maua ai tulaga lelei mo le gaosiga o le masima. E tata’i mai le vai o le sami i ni vailepa papa’u, ua ta’ua o ulo masima, lea e tuu ai ia miti’ia e le lā aasa. A o miti’ia le vai, e faia e le fuamātala o le masima ni onetioatamalō i le laualuga o ulo masima. O nei onetioatamalō e matua’i maeu le mamā ma e tulaga ese lona manutinuti. E faasee ma le faaeteete e marnotos ia onetioatamalō mai le laualuga o le vai e faaaoga ai meafaigaluega faapitoa, o se faagasologa e manaomia ai le tomai maoae ma le sa’o atoatoa. I Potukale, o lenei masima lelei e ta’ua o le “kulimi masima” aua e mafai ona asu lemu ese e pei o le kulimi ua fefete ane i le pito i luga o le susu. O lenei masima maaleale e faapelepeleina i lona mamā ma le tofolelei tulaga ese, ma avea ai o se mea tāua i le faatufugaga o taumafataga.

E pei lava ona faia e marnotos se taumafaiga tele ina ia mautinoa ai ua latou seleseleina le tulaga aupito maualuga o le masima, e tatau foi ia i tatou, i le avea ai o ni tagata o le feagaiga a le Alii, ia tatou faia pea le mea sili ina ia avea ai lo tatou alofa ma faataitaiga, i le tele e mafai ai, o se faatusa e lē ponā o lo tatou Faaola, o Iesu Keriso.

I le lalolagi anamua, o le masima sa sili atu nai lo le na o se mea faamanogi—sa avea o se mea taua e faasaoina ai ma o se faatusa o le mamā a’ia’i ma le feagaiga. Na iloa e tagata e tāua le masima mo le faasaoina o meaai ma le faaleleia atili o le tofolelei. Sa latou malamalama foi i aafiaga matautia o le lē māi o le masima, po o le leai o se tofolelei e ala i le faaleagaina pe ua vāīa.

E pei foi ina mafai ona aveesea le taua o le masima, e mafai foi ona aveesea lo tatou taua faaleagaga pe afai e faasamasamanoa lo tatou faatuatua ia Iesu Keriso. Atonu tatou te foliga tutusa i fafo, ae a aunoa ma se faatuatua malosi i totonu, e leai so tatou gafatia e faia ai se eseesega i le lalolagi ma aumaia ai le mea sili ia i latou o loo siomia ai i tatou.

Ia, e mafai faapefea la ona tatou faatonutonuina lo tatou malosi ma taumafaiga e faia ai se eseesega ma avea ma suiga e manaomia e le lalolagi i aso nei? E mafai faapefea ona tatou faasaoina le avea ma soo ma faaauau pea ona avea ma se faatosinaga lelei?

O loo lagona pea i lo’u mafaufau upu a lo tatou perofeta pele: “E finagalo le Atua ia tatou galulue faatasi ma fesoasoani le tasi i le isi. O le mafuaaga lena ua Ia auina mai ai i tatou i le lalolagi i ni aiga ma faatulaga i tatou i totonu o uarota ma siteki. O le mafuaaga lena ua Ia talosagaina ai i tatou ia tautua ma auauna atu le tasi i le isi. O le mafuaaga lena ua Ia talosagaina ai i tatou ia ola i totonu o le lalolagi ae le o ni ō o le lalolagi.”

Pe a faatumulia o tatou olaga i le faamoemoe ma le auaunaga, tatou te aloese mai le le fiafia faaleagaga; i le isi itu, pe a aveesea o tatou olaga mai le faamoemoega paia, auaunaga anoa i isi, ma avanoa paia mo le mafaufau loloto ma le tomanatunatu, e faasolosolo malie lava ona tatou mōmōle i a tatou lava gaoioiga ma le manatu faapito, ma lamatia ai i le aveesea o lo tatou tofolelei. O le vaifofo i lenei mea o le faaauau pea ona aafia i le auaunaga—o le auai ma le naunautai i galuega lelei ma le faaleleia atili o i tatou lava ma le sosaiete o loo tatou ola ai.

Ou uso e ma tuafafine pele, o se faamanuiaga ua tatou maua uma i le asō le avea ai ma ni ō o le Ekalesia a Iesu Keriso ma maua le avanoa e auauna atu ai i Lana Ekalesia. E ono eseese o tatou tulaga, ae e mafai uma e i tatou ona faia se eseesega.

Manatua ia marnotos, le au galulue i le masima; latou te faaaogaina meafaigaluega faigofie e selesele ai onetioatamalō sili ona lelei, o le masima sili ona lelei! E mafai foi ona tatou faia ni mea faigofie ia, faatasi ai ma taumafaiga faifai pea i gaoioiga laiti ma anoa, e mafai ona faalolotoina ai lo tatou avea ma soo ma le tuuto ia Iesu Keriso. O auala faigofie nei e fa ae loloto e mafai ona tatou taumafai ai ia avea ma masima o le lalolagi:

Tausisia le tuu o le maota o le Alii i le totonugalemu o lo tatou tuuto. O le taimi nei ua latalata atu malumalu nai lo se isi lava taimi muamua, o le faamuamuaina o tapuaiga e le aunoa i le maota o le Alii o le a fesoasoani ia i tatou e taulai atu ai i mea e sili ona taua ma faatumauina ai le taulai atu o o tatou olaga ia Keriso. I totonu o le malumalu, tatou te maua ai le fatu o lo tatou faatuatua ia Iesu Keriso ma le agaga o lo tatou tuuto atu ia te Ia.
O le faautauta i a tatou taumafaiga e faamalolosia isi e ala i le ola faatasi i le talalelei. E mafai ona tatou faamalolosia o tatou aiga e ala i taumafaiga faifai pea ma le faamoemoe e aumai mataupu faavae o le talalelei i o tatou olaga ma i o tatou aiga.
Ia naunau e talia se valaauga ma auauna atu i le Ekalesia. O le auaunaga i a tatou faapotopotoga i le lotoifale, e mafai ai ona tatou lagolagoina le tasi ma le isi ma tuputupu a’e faatasi ai. E ui e lē faigofie i taimi uma le auauna atu, ae e tauia i taimi uma.
Ma le mulimuli, faaaogaina o meafaigaluega o fesootaiga faatekinolosi ma se faamoemoega. I aso nei, o meafaigaluega faaeletonika o fesootaiga ua mafai ai ona tatou fesootai o se mea e le’i masani ai muamua. E pei o le toatele o outou, ou te faaaogaina nei meafaigaluega e fesootai ai ma uso ma tuafafine i le Ekalesia ma faatasi ma lo’u aiga ma uo. A o ou fesootai atu ia i latou, ou te lagona le latalata atili atu ia i latou; e mafai ona matou feauaunaa’i i taimi e moomia ai pe a le mafai ona auai patino. O nei meafaigaluega e le masalomia lava o se faamanuiaga, ae e mafai foi ona toso ese ai i tatou mai le loloto o fegalegaleaiga anoa ma iu ai ina tosoina i tatou i mausa e faamaumau ai o tatou taimi i gaoioiga e leai se aoga. O le taumafai e avea ma masima o le lalolagi e aofia ai le tele o mea e sili atu nai lo na o se faasolo e le gata o ni atavitio i luga o se lau e ono inisi.

A o tatou tausia le maota o le Alii e totonugalemu i o tatou olaga, faamalolosia ma le loto i ai isi e ala i le ola ai i le talalelei, talia valaauga e auauna atu, ma faaaoga meafaigaluega faaeletonika ma se faamoemoega, e mafai ona tatou faasaoina lo tatou malosi faaleagaga. E pei lava ona i ai i le masima i lona tulaga sili lē ponā le mana e faaleleia ma faasaoina ai, e faapena foi lo tatou faatuatua ia Iesu Keriso pe a fafagaina ma puipuia e ala i lo tatou tuuto atu i auaunaga ma le alofa faaKeriso.

A o tatou tumau i le noatia i le Alii, o le a atagia faalenatura mai lava i o tatou olaga Lona malamalama, ma o le a avea i tatou ma masima o le lalolagi. I lenei taumafaiga, e le gata ina tatou faatamaoaiga ai o tatou olaga ae faamalolosia ai foi o tatou aiga ma o tatou nuu. Tau ina ia tatou taumafai malosi e faatumau lenei noatia i le Alii ma aua lava nei aveesea lo tatou tofolelei, ma ia avea ma onetioatamalō itiiti ma laiti o le masima o loo finagalo le Alii e avea ai i tatou. I le suafa o Iesu Keriso, amene.