Saili ia te Ia ma Lou Loto Atoa
Afai na saili e Iesu Keriso se taimi filemu e fesootai ai ma le Atua ma ia faamalosia e Ia, o se mea atamai foi mo i tatou le faia faapea.
I nai tausaga talu ai, na ma auauna atu ai ma loʻu toalua o ni taitai misiona i Tokyo, Iapani. I se asiasiga mai i le matou misiona a Elder Russell M. Nelson i lena vaitaimi, na fesili ai se tasi o faifeautalai ia te ia, pe o le a se tali lelei pe a fai mai se tagata ia i latou, e matuai pisi tele i latou [e le avanoa ai] e faalogo ia i latou. Faatasi ai ma si faatautū teisi, na saunoa ai Peresitene Nelson, “Ou te fesili i ai pe sa matuai pisi i latou mo se meaai o le aoauli ona aoao lea o i latou e i ai so latou tino ma se agaga, ma e pei o le a oti le tino pe a le fafagaina, e faapena foi o latou agaga pe a le fafagaina i le afioga lelei a le Atua.”
E mataina le matauina o le upu Iapani mo le “pisi,” isogashii, e maua mai i ni matatosi se lua (忙). O le matatosi i le agavale o lona uiga o le “loto” po o le “agaga,” ae o le matatosi i le taumatau o lona uiga o le “oti”—atonu o fautua mai, e pei ona aoao mai Peresitene Nelson, o le pisi tele [ua le avanoa ai] e fafaga o tatou agaga e mafai ona oo atu ai i le oti faaleagaga.
Ua silafia e le Alii—i lenei lalolagi televave, tumu i mea faalavefau ma le vevesi—o le maua o se taimi lelei mo Ia o se tasi lea o luitau tele o ō tatou aso. I le fetalai mai e ala i le perofeta o Isaia, na Ia tuuina mai ai upu nei o fautuaga ma lapataiga lea e mafai ona faatatau i aso lē mautonu ua faapea ona tatou ola ai:
“O le liliu mai ma le filemu e faaolaina ai outou; o le filemu ma le faatuatua o lo outou malosi lea: a ua outou le mafafai.
“A ua outou fai mai, E leai; a e sosola matou i solofanua; o le mea lea tou te sosola ai lava: ma, Matou te tietie i mea tele vavave; o le mea lea e tele vavave ai i latou o e tuliloa ia te outou.”
I se isi faaupuga, e ui ina faalagolago lo tatou faaolataga i le liliu atu e le aunoa ia te Ia ma filemu mai popolega o le lalolagi, tatou te le mafafai lava. Ma e ui foi ina o le a oo mai lo tatou faatuatua mai se malosiaga e atinaeina i taimi filemu e nofonofo ai ma le Alii i le mafaufau loloto ma le manatunatu loloto, tatou te le mafafai lava. E le mafai aisea? Aua tatou te fai mai, “Leai, matou te pisi tele mo isi mea”—sosola i a tatou solofanua, fai atu ai foi. O le mea lea, o le a tatou taumamao atili ai lava mai le Atua; o le a tatou finafinau e o saoasaoa pea; ma o le saoasaoa lava o le tatou o, o le televave foi lena o le a mulimuli mai ai le tuliloaga a Satani.
Atonu o le pogai lea ua augani faafia mai ai Peresitene Nelson ia i tatou ina ia faaavanoa se taimi mo le Alii i o tatou olaga—”i aso taitasi ma aso uma.” Ua ia faamanatu mai ia i tatou, “o taimi filemu o taimi paia ia—taimi o le a faafaigofie ai faaaliga faaletagata lava ia ma faatumau ai le filemu.” Ae na ia fautua mai, ina ia lagona le siufofoga filemu o le Alii, “e tatau foi ona e filemu.”
Ae o le filemu, e tele mea e manaomia ai nai lo na o le faaavanoa o se taimi mo le Alii—e manaomia ai le lafoai o o tatou mafaufauga masalosalo ma le fefe, ae taulai atu o tatou loto ma mafaufau ia te Ia. E pei ona aoao mai Elder David A. Bednar, “O le apoapoaiga a le Alii ‘ia filemu’ e aofia ai le tele o isi mea nai lo le na ona lē tautala pe lē minoi foi.” Sa ia fautua mai, “O le ia filemu, atonu o se auala lea e faamanatu mai ai ia i tatou ia taulai atu ma le le faavaivai i le Faaola.”
O le ia filemu o se faatinoga o le faatuatua ma e manaomia ai taumafaiga. Fai mai le Lectures on Faith , “A galue se tagata i le faatuatua, ua galue o ia e ala i se taumafaiga faalemafaufau.” Na tautino mai e Peresitene Nelson: “O la tatou taulaiga e tatau ona tāmau i le Faaola ma Lana talalelei. E faigata faalemafaufau le taumafai malosi e vaai atu ia te Ia i mafaufauga uma . Ae a tatou faia, e ō ese o tatou masalosaloga ma popolega.” O le saunoa ai e uiga i lenei manaomia ona taulai atu o tatou mafaufau, na saunoa ai Peresitene Tavita O. McKay: “Ou te manatu ua itiiti so tatou gauai atu i le taua o le mafaufau loloto, o se mataupu faavae o le tuuto. … O le manatunatu loloto, o se tasi o faitotoa … e sili foi ona paia tatou te ui atu ai i le afioaga o le Alii.”
E i ai se upu i le faaIapani, o le mui, mo a’u, ua maua [e lenei upu] le aano sili ona tumu i le faatuatua, ma mafaufau loloto i ai o le uiga o le ia filemu. E aofia ai ni matatosi se lua (無為). O le [matatosi] i le agavale o lona uiga o le “noa” po o le “meanoa,” ae o le [matatosi] i le taumatau o lona uiga o le “ia faia.” A tuu faatasi o lona uiga “e lē faia.” A faauiga moni lava, e mafai ona faauigasese ai le upu ia faapea, “ia leai se mea e faia” i le ala lava e tasi e mafai ona faauigasese ai le “ia filemu” e faapea ia “le tautala pe minoi.” Ae peitai, e pei o le fasifuaitau, “ia filemu,” e i ai sona uiga maualuga atu; mo a’u o se faamanatu ia faatelegese ma ia ola ma se nofouta tele atu faaleagaga.
A o auauna ai i le Au Peresitene o le Eria a Asia i Matu faatasi ma Elder Takashi Wada, na ou iloa ai o lona faletua o Sister Naomi Wada, o se tagata atamai i tusitusiga faaIapani. Sa ou fesili atu ia Sister Wada pe mafai ona ia tusia mo a’u ia matatosi faaIapani mo le upu mui. Sa ou manao e tautau le tusitusiga [faaIapani] i luga o le puipui e avea o se faamanatu ina ia filemu ma taulai atu i le Faaola. Sa ou te’i ina ua le ioe o ia i lenei talosaga foliga faigofie.
O le aso na sosoo ai, i le iloaina atonu na ou le malamalama i le pogai na musu ai o ia, sa faamalamalama mai ai e Elder Wada, o le tusiga o na matatosi o le a manaomia ai se taumafaiga tele. O le a manaomia ona mafaufau ma manatunatu loloto o ia i le manatu faavae ma matatosi seia oo ina malamalama o ia i le uiga i le loloto o lona agaga ma mafai ona avatu faaupuga i nei uunaiga mai le loto faatasi ma tosi taitasi o lana pulumu. Sa ou maasiasi ona sa ou talosagaina faasamasamanoa o ia e faia se mea matuai faigata. Sa ou talosagaina o ia e faaoo atu a’u faatoesega ia te ia mo lo’u valea ma faailoa atu i ai ua ou aveesea mai la’u talosaga.
E mafai ona outou vaai faalemafaufau i lo’u te’i ma le agaga faafetai ina ua oo i le taimi ou te tuua ai Iapani, na faameaalofa mai e Sister Wada, i lona lava lotomalie, ia te a’u lenei vaega matagofie o tusitusiga ua faaalia ai matatosi faaIapani o le upu mui. Ua tautau nei ma le iloagofie i luga o le puipui o lo’u ofisa, e faamanatu mai ai ia te a’u ia filemu ma saili le Alii i aso uma ma lo’u loto, mafaufau, manatu, ma le malosi atoa. Na ia mauaina lelei i lenei gaoioiga lē manatu faapito, nai lo nisi lava upu le uiga o le mui, po o le filemu. Nai lo o le tusia ma le lē mafaufau i ai ma ona o se tiute ia matatosi, sa ia faia ana tusitusiga faatasi ma le faamoemoega atoa o le loto ma le manatu tonu i ai.
E faapena foi, e finagalo le Atua ia tatou faia o tatou taimi faatasi ma Ia ma lena lava ituaiga o tuuto mai le loto. A tatou faia o lena, e avea a tatou tapuaiga o se faailoaga lea o lo tatou alofa mo Ia.
E moomoo o Ia ia tatou fesootai ma Ia. I se tasi o mea na tupu, ina ua uma ona ou faia le tatalo amata i se fonotaga ma le Au Peresitene Sili, na faliu mai Peresitene Nelson ia te a’u ma fai mai, “A o e tatalo, sa ou mafaufau i le tele o le talisapaia e le Atua pe a tatou faaavanoa le taimi mai a tatou fuafuaga pisi e faailoa atu ai o Ia.” Sa o se faamanatu faatauvaa ae mamana i le telē o le uiga i le Tama Faalelagi pe a tatou malōlō e fesootai atu ia te Ia.
E ui lava i Lona manao tele i lo tatou gauai atu, o le a Ia le faamalosia i tatou e o mai ia te Ia. Na fetalai atu le Alii toetu ia sa Nifae, “Ua faafia ona ou manao e faapotopoto mai outou e pei ona ofaofatai mai e se matuamoa lana toloai, ae outou le mananao i ai.” Na sosoo ai lea ma Lana valaaulia ma le faamoemoe lea foi e faatatau ia i tatou i aso nei: “Ua faafia ea ona ou manao e faapotopoto mai outou e pei ona ofaofatai mai e se matuamoa lana toloai i lalo o ona apaau, pe afai tou te salamo ma foi mai ia te au ma le faamoemoe atoa o le loto.”
O le talalelei a Iesu Keriso ua tuu mai ai ia i tatou ia avanoa e toe foi atu ai ia te Ia e le aunoa. O nei avanoa e aofia ai tatalo i aso uma, suesue i tusitusiga paia, o le sauniga o le faamanatuga, o le aso Sapati, ma tapuaiga i le malumalu. Ae a pe a tatou aveesea nei avanoa paia mai a tatou lisi “o mea e fai” ma tuu i luga o a tatou lisi “o mea e le faia”—o lona uiga ia faalatalata atu ia i latou ma le manatunatu loloto ma le taulaiga tutusa e pei ona faia e Sister Wada i lana tusitusiga?
Atonu e te mafaufau, “e leai sou taimi mo lena mea.” E tele ina ou mafaufau foi faapena. Ae sei ou fautua atu e faapea, o le mea atonu e manaomia e le o se taimi ia tele ae ia tele atu le nofouta e uiga ma taulai atu i le Atua i taimi ua uma ona tatou faataatia ese mo Ia.
Mo se faataitaiga, pe a tatalo, ae a pe a tatou faaitiitia le taimi e tautala ai ae faatele le taimi i le na o le faatasi lava ma le Atua; ma afai tatou te tautatala, ia tuu atu ni faailoaga loloto ma fitoitonu o le agaga faafetai ma le alofa?
Na fautua mai Peresitene Nelson ia le na ona tatou faitau i tusitusiga paia ae ia tofo i ai. O le a se eseesega o le a faia pe afai tatou te faalaitiiti le faitau ae faatele le tofo i ai?
Ae a pe afai tatou te faia ni mea se tele e saunia ai o tatou mafaufau e fetagofi atu i le faamanatuga ma mafaufau loloto ma le fiafia i faamanuiaga o le Togiola a Iesu Keriso i le taimi o lenei sauniga paia?
I le Sapati, i le faaEperu o lona uiga o le “malolo,” ae a pe a tatou malolo mai isi mea e popole ai ae faaavanoa le taimi e saofai filemu ai faatasi ma le Alii ma tuu atu o tatou tuuto ia te Ia?
I le taimi o a tatou tapuaiga i le malumalu, ae a pe a tatou faia se taumafaiga e sili atu ona pulea ia gauai atu pe nofonofo teisi i totonu o le potu selesitila e manatunatu filemu ai?
A itiiti lo tatou taulai i le faia ae tele i le faamalosia o a tatou sootaga i feagaiga ma le Tama Faalelagi ma Iesu Keriso, ou te molimau atu o nei taimi paia taitasi o le a faatamaoaigaina, ma o le a tatou maua le taitaiga e manaomia i o tatou olaga patino. O i tatou, e pei o Mareta i le tala i le Luka, e matele ina popole ma ua pupū i mea e tele. Ae peitai, a o tatou fesootai ma le Alii i aso taitasi, o le a fesoasoani o Ia ia tatou iloa mea e sili ona manaomia.
Na faaavanoa foi e le Faaola le taimi mai Lana auaunaga e filemu ai. Ua tumu tusitusiga paia i faataitaiga o le solomuli atu o le Alii i se nofoaga tuufua—o se mauga, o le togavao, o se nofoaga gaogao po o le maliu “ese teisi”—e tatalo i le Tama. Afai na saili e Iesu Keriso se taimi filemu e fesootai ai ma le Atua ma ia faamalosia e Ia, o se mea atamai foi mo i tatou le faia faapea.
A o taulai atu o tatou loto ma mafaufau i le Tama Faalelagi ma Iesu Keriso, ma faalogo i le leo filemu, itiiti o le Agaga Paia, o le a tatou maua le manino sili atu e uiga i mea e sili ona manaomia, atinae se agaalofa loloto atu, ma maua le malologa ma le malosi ia te Ia. O le mea e ese ai, o le fesoasoani i le Atua e faatelevave Lana galuega o le faaolataga ma le faaeaga e ono manaomia ai ona tatou faateletelegese. O le minoi i taimi uma atonu e faaopoopo atu ai i le “vāvāō” i o tatou olaga ma taofia ai i tatou i le mauaina o le filemu o loo tatou sailia.
Ou te molimau atu afai tatou te toe foi soo atu i le Alii ma le faamoemoe atoa o le loto, o le filemu ma le faatuatua o le a tatou iloa ai o Ia ma lagona Lona alofa e le iu, faalefeagaiga mo i tatou.
Sa folafola mai e le Alii:
“Faalatalata mai ia te a’u ma o le a Ou faalatalata atu ai ia te outou; saili mai ia te a’u ma le filiga ma o le a outou maua ai a’u.”
“E saili mai outou ia te au, tou te maua foi, pe a outou saili mai ia te au ma o outou loto atoa.”
Ou te molimau atu e moni lenei folafolaga. I le suafa o Iesu Keriso, amene.