Tulimatai ia Iesu Keriso ma Lana Talalelei
Pe a tatou le amanaiaina faalavefau o le lalolagi ae tulimatai atu ia Keriso ma Lana talalelei, ua faamaonia lo tatou manumalo.
I le 1996, sa manumalo ai le ‘au soka a alii Nigeria i le pine’auro i Taaloga a le Olimipeka na faia i Atlanta, i le Iunaite Setete. Ina ua uma le taaloga faaiu, sa faatumulia e le motu o tagata fiafia ia magaala o aai ma taulaga uma i Nigeria; o lenei atunuu e 110 miliona tagata na vave ona suia i se faafiafiaga tele i le ta o le lua i le taeao! Sa pepesi le olioli, fiafia, ma le taufai sagisagi a o ‘aai, pepese ma sisiva ia tagata. O le taimi lena, sa soofaatasi ai Nigeria, ma sa femitai le au Nigeria uma i le avea ai o se [tagata] Nigeria.
A o le’i faia le Olimipeka, sa feagai lenei ‘au ma le tele o luitau. Ina ua amata le taamilosaga, sa faamutaina la latou lagolago tautupe. Sa auai lava le ‘au e aunoa ma anomea talafeagai, o nofoaga e toleni ai, meaai, po o auaunaga mo le tataina o lavalava.
Jerome Prevost/Getty Images
I se tasi taimi, sa na o ni nai minute le latou mamao mai le aveesea mai tauvaga, ae sa manumalo le au Nigeria i mea uma e ui sa foliga mai e le manuia. O lea tulaga taua na suia ai la latou manatu ia i latou lava. Faatasi ai ma se talitonuga fou, ma faatasi ai ma le galulue (malosi) o tagata taitoatasi ma faatasi o se ‘au, ma le naunautai le ma’alofia, sa latou le amana’iaina ma le lotogatasi faalavefau ae tulimatai atu i le manumalo. O lea tulimataiga na latou maua ai ni pine auro, ma sa faaigoaina ai e le au Nigeria i latou o le “Au Na Moemiti I Ai.” O loo faaauau pea ona ta’ua le Au Na Moemiti I Ai i le Olimipeka o le 1996 i taaloga a Nigeria.
David Cannon/Allsport/Getty Images
O le taimi lava na aoaoina ai e le ‘au soka a Nigeria ia ‘aua nei amanaia le tele o mea faalavefau latou te fetaiai ae tulimatai i le latou sini, sa faamanuiaina i latou i talaatu o le mea sa latou manatu e mafai—ma maua ai le olioli tele. (E faapei foi o i matou uma i Nigeria!)
I se ala foi faapena, a tatou le amanaiaina faalavefau a le lalolagi ma tulimatai atu ia Keriso ma Lana talalelei, e mautinoa lava lo tatou faamanuiaina i talaatu o mea e mafai ona tatou mafaufauina atoatoa ma ia lagonaina le olioli silisili. E pei ona aoao mai Peresitene Russell M. Nelson: “Afai o le taulaiga o o tatou olaga e i luga o … Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.”
Ou te tatalo o le a fesoasoani mai le Agaga Paia ia i tatou taitoatasi e gauai atu i le valaaulia a Peresitene Nelson e tulimatai o tatou olaga ia “Iesu Keriso ma Lana talalelei” ina ia mafai ai ona tatou maua le olioli ia Keriso, “tusa lava pe o a mea o tutupu—pe le o tutupu foi—i o tatou olaga.”
E faamatala e ni tala o i le Tusi a Mamona ni tagata o e na suia o latou olaga e ala i le tulimatai atu ia Iesu Keriso ma Lana talalelei.
Mafaufau ia Alema le Itiiti. Sa ia fouvale ma tau faasagatau o ia i le Ekalesia. Sa tatalo ma anapogi lona tamā, o Alema. Sa faaali atu se agelu ma valaauina Alema le Itiiti ia salamo. O le taimi lena, na amata ai ona mafatia Alema “i tiga o se agaga lava ua faasalaina.” I ona taimi sili ona faigata, sa ia manatua ai le aoao atu o lona tamā e faapea, o le a afio mai Keriso e togiola mo agasala a le lalolagi. A o ia manatuaina nei mafaufauga, sa ia augani atu i le Atua mo le alofamutimutivale. Na avea le olioli ma taunuuuga, o se olioli na ia faamatalaina e sili atu ona tele! Na oo mai le alofamutimutivale ma le olioli ia Alema ona sa tulimatai atu o ia ma lona tamā i le Faaola.
Mo matua e i ai fanau ua sē ese, ia lototetele! Nai lo le taumanatunatu pe aisea e le sau ai se agelu e fesoasoani i lau tama ia salamo, ia silafia ua tuuina e le Alii se agelu i le olaga nei i lona ala: o le epikopo, se isi taitai o le Ekalesia, po o se uso po o le tuafafine o auaunaga. Afai e te anapogi pea ma tatalo, afai e te le faatulagaina se taimi faatulagaina po o se taimi mo le Atua e tali mai ai, ma afai e te talitonu o loo faaloaloa atu e Ia Lona aao e fesoasoani mai, ona—le pine lea—ona e maua le Atua ua pa’i atu i le loto o lau tama pe a filifili lau tama e faalogo. E afua lenei mea ona o Keriso o le olioli—o Keriso foi o le faamoemoe; o Ia o le folafolaga “o mea lelei e oo mai.” O le mea lea talitonu ia Iesu Keriso mo lau tama, aua o Ia o le malosiaga o matua uma o tamaiti uma.
O le taimi lava na ia iloa ai le olioli ia Keriso, sa ola Alema le Itiiti ma lena olioli. Ae na faapefea ona ia tausisia lena ituaiga o olioli e oo lava i taimi o faigata ma tofotofoga? Ua ia ta’ua:
“Mai i lena taimi e oo mai i le taimi nei, o loo o’u galue e aunoa ma se malolo, ina [ia] mafai ona ou aumai o agaga i le salamo; ina ia mafai ona ou aumai i latou e tofo i le olioli tele lea sa ou tofo i ai. …
“… Ma … ua tuuina mai e le Alii ia te a’u le olioli e silisili ona tele i le fua o aʼu galuega. …
“Ma sa lagolagoina au aʼo ou i ai [i] tofotofoga ma faalavelave o ituaiga eseese uma.”
O le olioli ia Keriso sa amata mo Alema ina ua ia faaaoga le faatuatua ia te Ia ma tagi atu mo le alofamutimutivale. Ona faatino lea e Alema lona faatuatua ia Keriso, e ala i le fesoasoani atu i isi ia tofo i le olioli lava lea e tasi. O nei galuega faifaipea na aumaia ai ia Alema le olioli tele, e oo lava i tofotofoga ma faalavelave o soo se ituaiga. Ua outou vaai la, “e fiafia le Alii i taumafaiga,” ma o taumafaiga e tulimatai atu ia te Ia e aumaia ai faamanuiaga.” E tusa lava foi i tofotofoga ogaoga e mafai ona “faatumuina i le olioli ia Keriso.”
O se isi vaega i le Tusi a Mamona o e na avea Iesu Keriso ma Lana talalelei ma tulimata’iga o o latou olaga ma maua ai le olioli, o i latou sa faavaeina le aai o Helama—o se nofoaga e mafai ona tausia ai a latou fanau ma olioli ai i le faaaogaina saoloto o la latou tapuaiga faalelotu. O lenei nuu amiotonu na ola i ni olaga lelei sa faapologaina i latou e se vaega faomea ma sa latou aveesea le aiā tatau faavae a tagata soifua i le faaaogaina o la latou tapuaiga faalelotu. E i ai taimi e tutupu ai mea leaga i tagata lelei.
“Ua silafia e le Atua ua tatau ona aoai i lona nuu, ioe, na te tofotofoina lo latou onosai ma lo latou faatuatua.
“A e ui i lea—ai se faalagolago ia te ia, e faaeaina o ia i le aso gataaga. Ioe, ma sa faapea lava ona faia i lenei nuu.”
Na faapefea e lenei nuu ona onosaia o latou faigata ma puapuaga? E ala i le tulimata’i atu ia Keriso ma Lana talalelei. O mea na faalavelaveina ai i latou; e le’i avea ma o latou faasinomaga; ae na latou iloaina i latou lava o se atalii/afafine o le Atua, o se atalii/afafine o le feagaiga, ma o se soo o Iesu Keriso. A o latou manatuaina i latou lava, ma valaau atu i le Atua, sa latou mauaina le filemu, malosi, ma i’u ai ina maua le olioli ia Keriso:
“Sa sasaa atu e Alema ma lona nuu … o latou loto i [le Atua]; ma sa silafia e ia mafaufauga o o latou loto.
Ma sa oo ina oo mai le siufofoga o le Alii ia te i latou i o latou puapuaga, ua fetalai mai: Inā ea ia o outou ulu ma ia faamafanafanaina outou; ona ua Ou iloa le feagaiga na outou faia mai ia te aʼu; ma o le a Ou osifeagaiga ma oʼu tagata ma laveai i latou mai le pologa.”
I le tali mai, na “faamāmā [e le Alii] avega … i luga o [o latou] tauau. … ioe, sa faamalosia i latou e le Alii ina ia mafai ona latou tauave ma le faigofie a latou avega, ma sa latou gauaʼi atu ma le fiafia ma le onosai i le finagalo atoa o le Alii.” Matau, na tuu atu e nei Au Paia o latou puapuaga, mafatiaga, ma faigata e tofatumoanaina i le olioli ia Keriso! Ona oo ai lea i le taimi, ua tatau ai, sa Ia faaali atu ia Alema le ala mo le solaaga, ma—sa taitai i latou i le saogalemu—e Alema, o se perofeta a le Atua.
A o tatou tulimata’i atu ia Keriso ma mulimuli i Lana perofeta, o le a taitaiina foi i tatou ia Keriso ma le olioli o Lana talalelei. Sa aoao mai e Peresitene Nelson: “O le olioli e mamana, ma o le taulai atu i le olioli e aumai ai le mana o le Atua i o tatou olaga. E pei o mea uma, o Iesu Keriso o lo tatou faataitaiga sili, ‘o lē na onosai i le satauro, ona o le olioli sa tuu i ona luma’ [Eperu 12:2].”
Na maliu talu ai nei lo’u tina; sa o se mea na faateia ai. Ou te alofa i lo’u tina ma ou te lei fuafua e maliu talavou o ia. Ae o lona maliu, na matou maua ai ma lo’u aiga le faanoanoa ma le olioli. Ua ou iloa, ona o Ia, e le’i maliu o ia—o loo ola o ia!. Ma ua ou iloaina ona o Keriso ma ki o le perisitua ua toefuatai mai e ala i le Perofeta o Iosefa Samita, o le a ma toe faatasi ai ma ia. O faanoanoaga i le maliu ai o lo’u tina, ua tofatumoanaina i le olioli ia Keriso! Ua ou iloaina o le “mafaufau faaselesitila” ma le “faamuamua o le Atua” e aofia ai le tulimata’i atu i le olioli o loo maua ia Keriso.
O loo Ia valaaulia mai ma le alofa, “Ia outou o mai ia te au, o outou uma o e tigaina ma mafatia i avega, o a’u foi e malolo ai outou.” I le suafa o Iesu Keriso, amene.