“Faauta o Au o le Malamalama Lea e Tatau Ona Outou Tuu i Luga”
Tatou te tuu i luga le malamalama o le Alii pe a tatou pipiimau ia tatou feagaiga ma pe a tatou lagolago i lo tatou perofeta soifua.
I le mau molimau i lenei konafesi, ou te faaopoopo atu i ai ma la’u molimau faaaposetolo e faapea, o Iesu Keriso o le Alo o le Atua, o lo tatou Alii ma le Faaola, o le Togiola o fanau uma a lo tatou Tama. E ala i Lana Togiola, o Iesu Keriso ua mafai ai e i tatou, pe afai tatou te agavaa, ona toefoi atu i le afio’aga o lo tatou Tama o i le Lagi ma mafuta faatasi ai ma o tatou aiga mo le faavavau.
E le o misi le Faaola mai a tatou faigamalaga o le olaga nei. Mo le lua aso ua tuanai atu, sa tatou faalogo ai ia te Ia o fetalai e ala mai i Ana taitai filifilia ina ia mafai ona tatou faalatalata atili atu ia te Ia. E faafia ona Ia lagolagoina i tatou, i Lona alofa mama a’ia’i ma le alofamutimutivale, pe a tatou feagai ma faafatiatama’i o le olaga. O loo faamatala e Nifae: “Sa avea le Atua ma o’u lagolago; sa ia taitaia a’u e ala mai i o’u puapuaga. … Ua Ia faatumuina a’u i lona alofa.”
E iloagofie lena alofa pe a tatou lagolagoina le tasi ma le isi i Lana galuega.
Tatou te lagolagoina lo tatou perofeta soifua i le konafesi aoao, ma le Au Peresitene Sili, o le Korama a Aposetolo e Toasefululua, Au Pulega Aoao, ma Taitai o le Ekalesia. O le lagolago o lona uiga ia tuu i luga se isi tagata, ia avatu ia i latou la tatou gaua’i, ia faamaoni i lo latou faatuatuaga, ia galulue e faatino a latou upu. Latou te saunoa e ala i musumusuga a le Alii; latou te malamalama i faafitauli o i ai nei, le fāiifo o le amiolelei o le sosaiete ma taumafaiga faateleina a le fili e faatama’ia le fuafuaga a le Tamā. O le tuuina i luga o o tatou lima, ua tatou tuuto atu ai la tatou lagolago, e le mo na o lena taimi ae i o tatou olaga i aso taitasi.
O le lagolagoina e aofia ai le tuu i luga o o tatou peresitene o sieki ma epikopo, taitai o korama ma faalapotopotoga, faiaoga, e oo lava i faatonu o tolauapiga ia tatou uarota ma siteki. E faapei o le aiga, tatou te tuu i luga a tatou ava ma a tatou tane, o fanau, o matua, aiga lautele, ma tuaoi. Pe a tatou tuu i luga le tasi ma le isi o loo tatou faapea atu, “O lea ou te i ai ii mo oe, ae le na o le tuu i luga o outou aao ma lima pe a ‘tautau’ ae ia avea ma faamafanafana ma malosiaga i lou itu.”
O le manatu faavae o le tuu i luga e faavae i se mau. I le Vai o Mamona, sa tuuto atu ai tagata faatoa papaptiso o le Ekalesia, “e tauave avega a le tasi [ma le isi], ina ia māmā; … [ia] faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma.”
I tagata sa Nifae na fetalai i ai Iesu: “Ia tuu i luga lo outou malamalama ina ia susulu atu i le lalolagi. Faauta o au o le malamalama lea e tatau ona outou tuu i luga.” Tatou te tuu i luga le malamalama o le Alii pe a tatou pipiimau ia tatou feagaiga ma pe a tatou lagolago i lo tatou perofeta soifua a o ia saunoa mai i afioga a le Atua.
Na saunoa Peresitene Russell M. Nelson, a o i ai i le Korama a Aposetolo e Toasefululua, “O lo tatou lagolagoina o perofeta o se tautinoga patino lea o le a tatou faia le mea sili tatou te mafaia e tausi ai a latou faamuamua faaperofeta.”
Ina ia tuu i luga le perofeta o se galuega paia. Tatou te le na ona nofonofo fifilemu ae puipuia faamo’imo’i o ia, mulimuli i ana fautuaga, aoao atu ana upu, ma tatalo mo ia.
Na saunoa le Tupu o Peniamina, o le Tusi a Mamona, i lona nuu, “Ua pei lava a’u o outou, e oo i ai vaivaiga eseese uma o le tino ma le mafaufau; peitai ua filifilia a’u … e le aao o le Alii … ma sa faasaoina e lona mana lē mafaatusalia, e auauna atu ia te outou ma le manatu atoa, mafaufau, ma le malosi atoa ua tuu mai e le Alii ia te au.”
E faapena foi, i lona matua ua 100 tausaga, sa tausisia ma faasaosaoina Peresitene Nelson e le Alii. Na sii mai e Peresitene Harold B. Lee, i le taimi a o avea o se tasi o le Au Peresitene Sili, le faataitaiga a Mose o tu i le tumutumu o le mauga i Refiti. “E ono faasolo ina vaivai lima o [le Peresitene o le Ekalesia],” na ia saunoa ai. “Atonu e iu ina faatautau i nisi o taimi ona o le mamafa o ona tiutetauave; ae a ma’ua uuina ona aao, ma a’o ma taitai i lalo o lana taitaiga, i ona tafatafa, o le a lē manumalo faitotoa o seoli e faasaga ia te oe ma faasaga ia Isaraelu. O lou saogalemu ma lo matou saogalemu e faalagolago lea pe tatou te mulimuli pe leai ia i latou o e ua tofia e le Alii e pulefaamalumalu i lana ekalesia. Ua silafia e ia pe o ai e finagalo e pulefaamalumalu i lana ekalesia, ma o le a ia le faia lava se mea sese.”
E utuvai mai Peresitene Nelson i le tele o tausaga o le auaunaga i le Alii. O lana tofamamao, tele o le poto masani, faautautaga, ma le mauaina pea lava pea o faaaliga ua matuai fetaui lelei mo o tatou aso. Na Ia saunoa: “O Le Ekalesia a Iesu Keriso o le Au Paia o Aso e Gata Ai o loo saunia ai le lalolagi mo le aso o le a “tumu ai le lalolagi i le malamalama o Ieova” (Isaia 11:9). … Ua faamamanaina lenei galuega i se folafolaga mamana na faia i le 200 tausaga ua mavae. E na o le iva lava ona upu: ‘O Lo’u Atalii Pele Lenei. Faalogo ia te Ia!’ [tagai i le Iosefa Samita — Talafaasolopito 1:17).”
Na saunoa foi Peresitene Nelson: “E le’i i ai lava se taimi i le talafaasolopito o le lalolagi [i lo le taimi nei] ua sili atu ona taua patino le iloa e uiga i lo tatou Faaola ma le fitoitonu i le agaga o tagata soifua uma. Mafaufau i le vave tele o le a fo’ia ai fetaua’iga faatauma’oi i le lalolagi atoa—ma feteenaiga i o tatou olaga patino—pe afai tatou te filifili uma e mulimuli ia Iesu Keriso ma gaua’i atu i Ana a’oa’oga.”
Uso e ma tuafafine, e manaomia lo tatou faia o le tele o ni si’i a’e ae faaitiitia le muimui, ia tele le tuu i luga o le upu a le Alii, Ona ala, ma Lana perofeta, o lē na saunoa: “O se tasi o a tatou luitau aupito sili i le taimi nei, o le iloatino o le eseesega o upumoni a le Atua ma meataufaasese a Satani. O le pogai lena na lapataiina ai i tatou e le Alii ia ‘tatalo e le aunoa, … ina ia mafai ona [tatou] manumalo ia Satani, ma … sao ese mai lima o auauna a Satani ua sapasapaia lana galuega’ [Mataupu Faavae ma Feagaiga 10:5; faaopoopo le faamamafa].”
O Aperila na te’a nei, sa ma maua ai ma Sister Rasband le faamamaluga o le auai faatasi ma lo tatou perofeta faapelepele ma Sister Nelson mo le toefaapaiaga o le Malumalu o Manti Iuta.
Sa faaofo e Peresitene Nelson tagata uma ina ua ia ulufale atu i le potu. Sa na o ni nai tagata toalaiti o i matou na iloa o le a susū mai. O lona i ai, sa ou lagona vave ai lava le malamalama ma le tiutetauave faaperofeta o loo ia tauaveina. O le vaaiga o le olioli i foliga o tagata ina ua vaaitino i le perofeta, o le a tumau e faavavau ia te au.
I le tatalo o le toefaapaiaga, na aioi atu ai Peresitene Nelson i le Alii e faapea, o Lona maota paia o le a mafai moni ai ona tuu i luga i latou uma o le a ulu atu i le malumalu “ina ia latou maua ai faamanuiaga paia ma tumau agavaa ai ma faamaoni i a latou feagaiga … ia avea lenei fale o se fale o le filemu, se fale o le mafanafana, ma se fale o faaaliga patino mo i latou uma e ulu mai ma le agavaa i nei faitotoa.”
Tatou te manaomia uma le siitia i luga e le Alii ma le filemu, ma le mafanafana, ma le mea aupito sili i lo mea uma, o faaaliga patino e faafetaia’ia ai le fefe, pogisa, ma finauga ua lilofia ai le lalolagi.
A o lei amataina le sauniga, sa matou tutu i fafo i le la ma Peresitene ma Sister Nelson e matamata i le faatulagaga matagofie. E loloto noataga faaleaugatuaa o Peresitene Nelson i lea eria. O ona matua-matutua e toavalu na faamautu i vanu o loo siosiomia ai le malumalu, e faapei foi o nisi o o’u augatama. O le tamā o lo’u tamāmatua o Andrew Anderson, sa i ai i le autufuga o uluai paionia o e sa galulue i le 11 tausaga e faamae’a le Malumalu o Manti, o le lona tolu ai lea i Atumauga Papa.
A o matou tutu ma Peresitene Nelson, sa matou maua le avanoa e tuu ai i luga ma lagolago le perofeta a le Atua i le faamanatuina o le toefaapaiaga o le maota paia o le Alii. O se aso o le a le galo lava ia te au.
“O le a tatou fauina malumalu e faamamalu ai le Alii,” na saunoa ai Peresitene Nelson i lena aso paia. “Ua fauina mo tapuaiga ae lē o se fiafaalialia. Tatou te osia feagaiga paia e faavavau le taua i totonu o nei puipui paia.” O loo tatou faapotopotoina Isaraelu.
O Peresitene Nelson ma perofeta na muamua atu ia te ia sa sapasapaia malumalu paia i o latou aao. O le taimi nei, i le salafa o le lalolagi, ua 350 maota paia o le Alii ua faagaoioia, faasilasila mai, pe o faagasolo foi le fauina. Talu mai le avea ai ma perofeta, ua 168 malumalu ua fofogaina mai e Peresitene Nelson.
“I o tatou taimi,” na ia saunoa ai, “o se tuufaatasiga atoa, faamaeaina, ma atoatoa o tisipenisione uma, ki, ma mana e tatau ona sosoo faatasi (tagai i le Mataupu Faavae ma Feagaiga 128:18). Mo nei faamoemoega paia, ua anoanoai ai nei malumalu paia i le lalolagi. Ou te toe faamamafa atu faapea, o le fauina o nei malumalu atonu e le suia ai lou olaga, ae o lau auaunaga i totonu o le malumalu o le a mautinoa lava le suia ai o lou olaga.”
“O le Faaola ma Lana aoaoga faavae o le fatu tonu lea o le malumalu,” le tala lea a Peresitene. “O mea uma o loo a’oa’oina i totonu o le malumalu, e ala i a’oa’oga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau.”
“O i latou uma e tapuai i totonu o le malumalu,” na saunoa Peresitene Nelson, “o le a maua le mana o le Atua atoa ma agelu ua i ai le ‘tausiga i o latou luga’ [Mataupu Faavae ma Feagaiga 109:22]. I le avea ai ma se tamaitai po o se alii ua maua faaeega paia po o se talavou e auai i le malumalu ma ua faaauupegaina i le mana o le Atua, e faapefea ona faateleina lou talitonuga mautinoa i le iloaina e te le tau feagai ma le olaga na o oe? E faapefea ona e mauaina le lototele mai le iloaina o le a fesoasoani moni agelu ia te oe?”
O agelu e aapa mai e tuu i tatou i luga o loo faamatalina i tusitusiga paia ina ua tootuli Iesu Keriso ma le lotomaualalo i le Faatoaga o Ketesemane. E ala i Ona mafatiaga na Ia saunia ai se Togiola e le i’u. “O iina,” ua ta’ua ai e Peresitene Nelson, “na tupu ai le faatinoga aupito maoae e tasi o le alofa i talafaasolopito uma ua faamaumauina. … O iina i Ketesemane, sa ‘mafatia ai le [Alii] i tiga o tagata uma ina ia … mafai ona salamo tagata uma ma o mai ia te ia’ [Mataupu Faavae ma Feagaiga 18:11].”
“Ia e aveese lenei ipu mai ia te au,” na ole atu ai Iesu Keriso, “a e aua le faia o lo’u loto, a o lou finagalo.
“Ona faaali mai ai lea ia te ia o se agelu mai le lagi, ua faamalosi ia te ia.”
O loo i ai agelu o loo siosiomiaina i tatou i aso nei. Na saunoa Peresitene Nelson, “[I totonu o le malumalu,] o le a e a’oa’o i le auala e vavae ai le veli i le va o le lagi ma le lalolagi, i le auala e ōle atu ai mo agelu a le Atua ia faatasi ma oe.”
E aumaia e agelu le malamalama. Le malamalama o le Atua. Na fetalai Iesu i Ana Aposetolo sa Nifae, “Faauta o au o le malamalama lea e tatau ona outou tuu i luga.” A o tatou lagolagoina lo tatou perofeta, ua tatou molimau atu ua tofia o ia e lo tatou Faaola, o ia “o le malamalama … o le lalolagi.”
Le pele Peresitene Nelson, e avea ai ma sui o tagata ma uo o le Ekalesia a le Alii i le lalolagi atoa, ua matou lagona le faamanuiaina e tuu i luga au aoaoga, e tuu i luga lau faataitaiga o le soifua ai faaKeriso, ma tuu i luga lau molimau naunautai i lo tatou Alii ma le Faaola, le Togiola o i tatou uma.
Ou te tuuina atu la’u molimau faaaposetolo o Iesu Keriso “o le malamalama … o le lalolagi.” I le avea ai ma Ona soo, se’i o tatou taufai “tuu i luga” Lona malamalama. I le suafa o Iesu Keriso, amene.