E Paia i le Alii i le Olaga i Aso Faisoo

Saunia e Elder Gerrit W. Gong

O Le Korama a Aposetolo e Toasefululua

E paia i le Alii e faapaia ai le ola i aso taitasi. E faalatalata atili atu ai i tatou ma fiafia atili i le Alii ma i le tasi ma le isi.

O le mafutaga toesoofaatasi a le matou aiga o le Au Gong sa aofia ai se faaaliga taleni malie, ae faaatoa i se tauvaga o talamalie a tamā.

Ae o lea tauvaga sa o se mea e le masani ai. O le tasi au sa i ai Tamamatua (o a’u) ma le toalua o fanau a le fanau, e ta’i 12 ma le 11 tausaga. O le isi au sa i ai se polokalama atamai faafoliga (AF), na uunaia e se tausoga e ta’u atu tala malie a tamā i le sitaili a Gerrit W. Gong. Tamāmatua o Gerrit Gong e fetaui ma AF Gerrit Gong.

Sa amata ia te au ma le fanau a la’u fanau.

O le a le ta’uga o se tainasoa e so’ā lana taavale? Talainasoa Talepe.

Na faatonuina AF Gerrit Gong—mafaufau pei o Gerrit W. Gong. Tautala pei o ia.

AF Gerrit Gong—“O se talamalie lea a tamā e faapei o faamatala e Gerrit W. Gong, faaaoga ai lana sitaili mafanafana, magafagafa ma le faagaeetia: Aisea na faataliē ai e le laau faatauvaa ia tagata? Ona sa mauaa i le alofa ma aapa atu ma lālā o le agalelei. E faapei o lena laau, e mafai foi ona tatou maua le malosiaga i o tatou a’a ma le olioli i le faasafua atu o le agalelei i isi.”

Ia, o le a sou manatu? O le ala lena ua faaigoa ai o talamalie a tamā.

O loo siomia atoa i tatou i avanoa e taliē ai, fiafia ai, ma vaai atu ma mata faafetai. O la tatou talalelei o se talalelei o le olioli ma le pa’ia i le olaga i aso faisoo. O le pa’ia e vaetofia ai mea mo faamoemoega paia. Ae o le pa’ia foi e valaaulia ai i tatou e faatumulia le olaga i aso taitasi i le pa’ia—e fiafia ai i meaai i aso taitasi, i le lotolotoi o vaotuitui ma vaotalatala o lenei lalolagi. Ina ia savavali ma le Alii, e tatau ona tatou paia, aua e paia o Ia, ma, ina ia fesoasoani ia tatou paia, ua valaaulia i tatou e le Alii ia savavali faatasi ma Ia.

E tofu i tatou ma se tala. A o ma feiloai atu ma Sister Gong ia te outou—o tagata o le Ekalesia ma uo i le tele o nofoaga ma tulaga—o a outou tala o le paia i le Alii i le olaga i aso faisoo ua musuia ai i ma’ua. O loo outou ola i ni F se fitu: fesootaiga ma le Atua, faalenuu ma le fealofani ma le tasi ma le isi, faaletautinoga feagaiga ma le Atua, aiga ma uo—faatotonugalemu i le Faaola o Iesu Keriso.

O faamaoniga faateleina ua faamamafa ai lenei mea moni iloga: o tagata lolotu talitonu o le averesi e fiafia atu, maloloina atu, ma sili ona faamalieina nai lo i latou e aunoa ma se tautinoga faaleagaga po o se fesootaiga. O le fiafia ma le faamalieina o le olaga, i le soifua maloloina faaletino ma faalemafaufau, aano ma le faamoemoega, uiga ma le amiomamā, sootaga vavalalata faaleagafesootai, e oo lava i le mautu i mea tautupe ma mea faaletino—i fuataga taitasi, e lauolaola ai tagata tomai faapitoa faalelotu.

Latou te sapi i le soifua maloloina sili atu faaletino ma faalemafaufau ma sili atu ona faamalieina i le olaga i vasaga o tausaga uma ma ituaiga o vaega eseese.

O le mea ua ta’ua e le au suesue o le “mautu faalefaataatiaga faalelotu” ua ofo mai ai le manino, faamoemoe, ma musumusuga i le lotolotoi o milosa’iga ma liuliuga o le olaga. O le aiga o le faatuatua ma le nuu o le Au Paia o loo tauivi pea ma le motu o tagata ua faaesea ma tuulafoa’ia. Fai mai le Paia i le Alii leai i le faatausuai, leai i le faafiapoto faitio po o le tuumaualaloina o isi, leai i faiga e maua ai tupe i le ita, ma va ai le fogavaa. Fai mai le Paia i le Alii ioe i le paia ma le migao, ioe i lo tatou avea ma tagata silisili aupito saoloto, sili ona fiafia, sili ona faamaoni, a o tatou mulimuli ia te Ia i le faatuatua.

O a foliga o le paia i le Alii i le olaga i aso faisoo?

O le paia i le Alii i le olaga i aso faisoo e foliga faapei o talavou matutua e toalua, sa faaipoipo mo se tausaga, fefaasoaai i le faamaoni a’ia’i ma le agavaivai feagaiga o le talalelei, e ositaulaga, ma auauna atu i o la’ua olaga o loo fofola mai.

E amata lana tala, “I le aoga maualuga, sa ou i ai i se nofoaga pogisa. Sa ou lagona e pei sa le’i i ai le Atua iina mo au. I se tasi po, sa faapea mai ai se feau tusitusia mai se uo, ‘Ei, ua e faitauina ea le Alema 36 ?’

Fai mai o ia, “a o amata ona ou faitauina, sa faatumulia a’u i le filemu ma le alofa. Sa ou lagonaina le pei na tuuina mai ia te au lenei opo telē. Ina ua ou faitauina le Alema 36:12, sa ou iloaina na silasila mai le Tama Faalelagi ia te au ma sa silafia lelei o’u lagona.”

Na faaauau lana tala, “Ae ma te lei faaipoipo, sa ou faamaoni i la’u uo sa le’i i ai sa’u molimau tele e uiga i le sefuluai. Aisea na moomia ai e le Atua i tatou e foai atu tupe, ae o isi e tele naua mea e foai atu? Sa fesoasoani la’u uo e faamalamalama mai e le o se mea e uiga i tupe, ae o le mulimuli i se poloaiga ua poloaiina ai i tatou. Sa ia lu’iina au e amata ona totogi le sefuluai.

“Sa ou matuai vaai moni ua tupu la’u molimau,” na ia fai mai ai. O nisi taimi e utiuti le faasoa, ae sa ma vaaia le anoanoai o faamanuiaga ma sa peiseai na lava o ma totogi.”

E le gata i lea, “i la’u vasega faatausi soifua,” sa ia fai mai ai, “sa na o a’u le tagata o le Ekalesia ma na o a’u foi ua faaipoipo. E tele taimi ou te tuua ai le vasega ma le le fiafia pe tagi foi, ona sa ou lagonaina le faaesea o a’u e la’u vasega ma fai ni faamatalaga le lelei e uiga i o’u talitonuga, o le ofuina o o’u ofusa, po o lo’u faaipoipo laitiiti.”

Ae sa ia faaauau pea, “O le semesa na te’a nei, sa ou aoaoina ai le ala e sili ai ona faaleo o’u talitonuga ma avea o se faataitaiga lelei o le talalelei. Sa tuputupu ae lo’u iloa ma la’u molimau ona sa tofotofoina au i lo’u gafatia ona tu na o a’u, ma ia malosi i o’u talitonuga.”

Na faaopoopo mai le tane talavou, “Ae ou te lei alu i la’u misiona, sa ou maua ni ofo e taalo peisipolo ai i le kolisi. O le faia o le faaiuga faigata, sa ou faataatia ese ai na ofo ae ou alu e auauna atu i le Alii. O le a ou le faafesuiaia lava na tausaga e lua mo se isi mea.

Fai mai a ia, “Ina ua ou toe foi mai i le fale, sa ou mafaufauina se suiga faigata, ae sa ou iloa lo’u malosi ua sili atu, televave atu, ma sili atu foi le ola maloloina. Ua masau atu la’u togi nai le taimi na ou alu ai. Sa tele atu ofo ou te taalo ai nai lo le taimi na ou alu ai, e aofia ai ma la’u aoga sa ou moemiti i ai. Ma, o le mea e sili ona taua,” sa ia fai mai ai, “ua ou faalagolago atili i le Alii nai le isi lava taimi muamua.”

Na faaiu lana tala, “I le avea ai o se faifeautalai, sa ou aoao atu ai ua folafola mai e le Tama Faalelagi ia i tatou le mana i a tatou tatalo, ae o nisi taimi e galo ai ia te au lena mea.”

O la tatou teugaoa o faamanuiaga e maua mai i le faailoa atu o le paia i le Alii i misiona, ua tele naua ma ua tumu. O tupe, taimi, ma isi tulaga e tele ina le faigofie. Ae a faapaia e faifeautalai o vaitausaga uma ma talaaga le paia i le Alii, e mafai ona lelei mea uma i le taimi ma le ala a le Alii.

O nei la i se vaaiga a se 48 tausaga, ua faasoa mai ai e se faifeautalai sinia, “Sa manao lo’u tamā ou te alu i le iunivesite, ae aua nei ou alu i se misiona. E le’i leva ona mavae atu lena, ae oso se ma’i fatu ma maliu ai i le 47 o ona tausaga. Sa ou lagona le tausalaina. E mafai faapefea ona ou toefaaleleia le ma sootaga ma lo’u tamā?

“Mulimuli ane,” sa ia faaauau ai, “i le mae’a ai ona tonu ia te a’u e faamisiona, sa ou vaai i lo’u tamā i se miti. Sa toafilemu ma faamalieina, ma fiafia o le a ou auauna atu.”

Na faaauau le faifeautalai sinia, “E pei ona aoao mai i le Mataupu Faavae ma Feagaiga 138, ou te talitonu e mafai ona auauna atu lo’u tamā o se faifeautalai i le lalolagi o agaga. Ou te vaai faalemafaufau i lo’u tamā o fesoasoani i le tamā o lo matou tamāmatua, o lē na tuua Siamani i le 17 o ona tausaga ma na leiloa i le aiga, ina ia toe maua.

Na faaopoopo mai lona faletua, “Mai le au uso e toalima i le aiga o lo’u toalua, o le toafa na auauna atu faamisiona o i latou ia ua maua ni tikeri i iunivesite.”

O le paia i le Alii i le olaga i aso faisoo, e foliga pei o se faifeautalai talavou ua maea mai le misiona, o lē sa aoaoina ia faamuamua le Atua i lona olaga. I se taimi muamua atu, ina ua talosagaina e faamanuia se tasi sa ma’i tigaina, sa fai mai le faifeautalai lenei, “E i ai lo’u faatuatua; o le a ou faamanuia ia te ia ia toe malosi. Ae,” fai mai le faifeautalai ua mae’a mai, “Sa ou aoaoina i lena taimi e tatalo e le gata mo le mea sa ou manao ai, ae mo le mea sa silafia e le Alii e moomia e le tagata. Sa ou faamanuiaina le uso ia maua le filemu ma le mafanafana. Sa maliu filemu o ia mulimuli ane.”

O le paia i le Alii i le olaga i aso faisoo, e pei o se emo faaofuofu i luga ae o le veli e fesootai ai, faamafanafana, ma faamalosia ai. Fai mai se taitai i se iunivesite iloga, na te lagonaina o tagata na te silafia mai na o mea e faalogo ai, o tatalo mo ia. O na tagata ua tuuto atu o latou ola i le iunivesite, ma o loo faaauau pea ona amanaia lana misiona ma tamaiti aoga.

E faia e se tamaitai le mea sili i aso taitasi, ina ua lē faamaoni lana tane ia te ia ma le fanau. Ou te matuai faamemelo ia te ia, ma isi e faapei o ia I se tasi aso a o gaugau le tagamea, sa tuu lona lima i luga o le faaputuga o ofusa, ma mapuea ifo ia te ia lava, “O le a ea le aoga?” Sa ia lagonaina se leo mālū o faamautinoa atu ia te ia, “O au feagaiga o ia te a’u ia.”

Mo le 50 tausaga, sa momoo ai se isi tuafafine mo se sootaga ma lona tamā. “A o ou tuputupu a’e,” o lana tala lea, “sa i ai o’u tuagane ma lo’u tamā, ona i ai lea o a’u—le afafine e toatasi. Na pau lava le mea sa ou manao ai ia ‘lava o lo’u lelei’ e fiafia mai ai lo’u tamā ia te au.

“Ona, maliu lea o lo’u tina! Sa na o ia le sooupu i lo ma va ma lo’u tamā.

Fai mai le tuafafine, “I se tasi aso sa ou faalogo ai i se leo o fai mai, ‘Valaaulia lou tamā ma ave lua te o i le malumalu.’ O le amataga lena o se ma aso na o i ma’ua ai, e ta’ilua i le masina, ma lo’u tamā i le maota o le Alii. Sa ou fai i lo’u tamā ou te alofa ia te ia. Sa ia fai mai foi e alofa o ia ia te au.

“O le faaalu o le taimi i le maota o le Alii na faamaloloina ai i ma’ua. Sa le mafai e lo’u tina ona fesoasoani ia i ma’ua i le olaga nei. Na manaomia ona i ai o ia i le isi itu o le veli e fesoasoani ai e fonofono mea sa gauī. Sa faamae’aina e le malumalu la matou malaga ina ia atoatoa o se aiga e faavavau.

Fai mai le tamā, “O le faapaiaga o le malumalu sa o se aafiaga sili faaleagaga lea mo au, ma si o’u afafine e toatasi. O lea la ua ma o faatasi ma lagona le faamalosia o lo ma alolofa.

O le paia i le Alii i le olaga i aso faisoo e aofia ai taimi mu’amu’a pe a maliu se e pele. I le amataga o lenei tausaga, sa see atu ai si o’u tina pele, o Jean Gong, i le isi olaga i le toe o ni nai aso ona aulia lea o lona aso fanau lona 98.

Afai e te fesili i lo’u tina, “E te manao i le aisakulimi o le auala patupatu, [rocky road], sukalati paepae ma le fiu, [white chocolate ginger], po o le strawberry?” E fai mai tina, “I, faamolemole, e mafai ona ou tofo i ituaiga taitasi?” O ai se o le a fai mai leai i lou tina, aemaise ai pe a fiafia o ia i aafiaga uma o le olaga?

Sa ou fesili i se tasi aso i lo’u Tina pe o a faaiuga na sili ona faatulaga ai lona olaga.

Fai mai o ia, “O le papatisoina e avea ma tagata o Le Ekalesia a Iesu Keriso o le Au Paia o Aso e Gata Ai ma le masii mai Hawaii i le Iunaite Setete, lea na ou feiloai ai i lou tamā.”

Na papatiso i le 15 o ona tausaga, ma sa na o ia le tagata o lona aiga toatele na auai i le tatou Ekalesia, ae na i ai le faatuatua i feagaiga ma le faalagolago o lo’u tina i le Alii, lea na faamanuiaina ai lona olaga ma tupulaga uma a lo matou aiga. Ou te misia lava lo’u tina, pei foi ona outou misia tagata o o outou aiga. Ae ou te iloa e le o aluese atu lava lo’u tina. Ua na ona le o i ai nei o ia iinei. Ou te faamamaluina o ia ma i latou uma ua mavae atu, o ni faataitaiga totoa o le paia i le Alii i aso faisoo.

Ioe, o le paia i le Alii i le olaga i aso faisoo e aofia ai le o mai soo i le Alii i Lona maota paia. E moni lenei mea, pe o tatou o ni tagata o le Ekalesia po o ni uo.

E toatolu ni uo na o mai i le fale tatala o le Malumalu o Bangkok Thailand.

“O se nofoaga lenei o le faamalologa maoae,” o le tala lea a se tasi.

I le potu mo papatisoga, sa fai mai ai le isi, “Pe a ou i ai ii, ou te manao ia fufulu mama ma ia aua lava nei toe agasala.”

Na fai mai le lona tolu, “O mafai ona e lagonaina le mana faaleagaga?”

I upu paia e sefulu ma le tasi, o loo valaaulia ai ma folafola atu e o tatou malumalu:

“E Paia i le Alii.

“O Le Maota o le Alii.”

O le paia i le Alii e faapaia ai le ola i aso taitasi. Tatou te latalata atu ai ma fiafia atili i le Alii ma i le tasi ma le isi, ma saunia ai i tatou e mafuta ma le Atua lo tatou Tama, Iesu Keriso, ma e pele ia i tatou.

E faapei o la’u uo, atonu e te taumafaufau pe alofa lou Tama Faalelagi ia te oe. O le tali o se ioe leotele ma mautinoa! E mafai ona tatou lagona Lona alofa a o tatou faapaia i le Alii i tatou lava i aso taitasi, fiafia ma faavavau. Talosia ia tatou faia faapea, ou te tatalo atu ai i le suafa paia o Iesu Keriso, amene.

Faamatalaga

1. Mai taimi o le Feagaiga Tuai, na aoaoina i tatou, “Ia faapaiaina outou e outou ma ia paia outou, aua e paia lava A’u” (Levitiko 11:44). E ao ina tatou savavali i le paia i luma o le Alii (tagai Mataupu Faavae ma Feagaiga 20:69), tutu i nofoaga paia (tagai Mataupu Faavae ma Feagaiga 45:32), ia faapaiaina le aso Sapati (tagai Esoto 20:8), ia fai ofusa (tagai Esoto 29:29), faaaoga le suauu paia o faauuga (tagai Esoto 30:25), ia faamanuiaina e perofeta paia (tagai Mataupu Faavae ma Feagaiga 10:46), ma faalagolago i tusitusiga paia (tagai Mataupu Faavae ma Feagaiga 20:11), tulafono paia (tagai Mataupu Faavae ma Feagaiga 20:20), ma agelu paia (tagai Mataupu Faavae ma Feagaiga 20:6). O le e paia i le Alii ua faamoemoe ia manuia ai itu uma o o tatou olaga i aso faisoo.

2. Tagai i le Mose 6:34.

3. Tagai i le “Religion and Spirituality: Tools for Better Wellbeing?,” Gallup Blog, Oct. 10, 2023, news.gallup.com. “I le lalolagi atoa, o tagata e i ai se tautinoga sili atu i le faaleagaga po o le tapuaiga, e sili atu le soifua manuia i le tele o itu—e aofia ai lagona lelei, lagona o se faamoemoega, gauai i le nuu, ma sootaga faaleagafesootai” (Faith and Wellness: The Worldwide Connection between Spirituality and Wellbeing [2023], 4, faithandmedia.com/research/gallup).

4. O aafiaga taitasi na ta’ua, na faasoa atu—ma lo’u faamemelo ma le agaga talisapaia—i upu a tagata taitoatasi na aafia ai ma e ala i la latou faatagaga.

5. I aso nei i le Ekalesia, o talavou matutua e 18-35 tausaga (e aofia uma ai talavou nofofua ma talavou matutua ua faaipoipo) ma tagata matutua nofofua (36-45 tausaga) e aofia ai le tasi vaetolu (32.5 pasene) o le aofai o tagata o le Ekalesia. Mai na 5.623 miliona o tagata o le Ekalesia, o talavou matutua e 18-35 tausaga e 3.625 miliona le aofai (lea e 694,000 ua faaipoipo), o tagata matutua nofofua e 36-45 tausaga e 1.998 miliona le aofai. O a tatou talavou matutua ma tagata matutua nofofua e maoae; e taua i latou taitasi. E tofu i latou ma se tala o le faatuatua, sailiga, aumalolosi, ma le agaalofa. O le faataitaiga na faasoa atu ii, o se sui o le mau tala matagofie ma aafiaga na faasoa mai e talavou ma talavou nofofua, a o matou feiloai i le tele o nofoaga ma tulaga i le salafa o le Ekalesia.

6. I le taimi nei, o se mea o le 77,500 faifeautalai o loo auauna atu i misiona e 450 i le lalolagi atoa. E aofia ai faifeautalai talavou e aoao atu, o faifeautalai talavou o auaunaga, ma ulugalii matutua, ae le o faitaulia ai le 27,800 faifeautalai matutua mo auaunaga ma volenitia mo taimi uumi. O tala a faifeautalai taitasi, mai le tapenaga e oo atu i le galuega ma toe foi mai, e patino ma e tumu i le paia i le Alii i aafiaga faaletagata lava ia.

   E tele aafiaga faafaifeautalai e atagia ai se mamanu faaleagaga. E aofai ai molimau taitoatasi o le valaaulia ma le le manatu faapito ma le fesoasoani i isi e o mai ia Iesu Keriso, ma le faifeautalai i le avea ai ma soo o Iesu Keriso ma le faifeautalai o le Tala’i La’u Talalelei. O faifeautalai o le Tala’i La’u Talalelei ua sui, ua liua, e ala i aafiaga o a latou molimau. Ua latou aoao e alolofa i tagata, nofoaga, gagana, ma aganuu. Ua latou faataunuu le valoaga e ala i le aumaia o tala fiafia o le atoaga o le talalelei toefuataiina a Iesu Keriso i malo, ituaiga, ma tagata. Latou te iloa mea lelei i le aoaoina ma le ola ai faatasi ma soa taitasi. Latou te galulue ma tagata o le au paia, taitai, ma uo i le tele o tulaga ma talaaga, ma le anoanoai o isi mea.

   O faifeautalai o leTala’i La’u Talalelei e faafaileleina le faatuatua ma le mautinoa. Latou te atinae ni soa faapaiaina. Ua latou iloa o le usiusitai e aumaia ai faamanuiaga ma vavega. I le anoanoai o isi ala patino, latou te avea moni ma iloa e ala i feagaiga: “O au o se soo o Iesu Keriso, le Alo o le Atua” (3 Nifae 5:13).

7. O nisi o o tatou tagata o le Ekalesia e sili ona faamaoni ma lotototoa, tuafafine ma uso, latou te feagai ma tulaga latou te lei mafaufauina ma semanu foi latou te le filifilia lava. O nei Au Paia faamaoni e galulue pea lava pea, i lea aso ma lea aso, ae tele ina faatalitali i le Alii. E silafia e le Alii i latou taitoatasi, ma e pei ona faasoa mai i lenei faataitaiga, e finagalo e faamalosiau ma faamalolosia i tatou taitoatasi i Lona taimi ma Lana ala.

8. E tele naua le moomoo mo sootaga ma matua ma fanau. Ou te matuai faafetai mai le ta’ele o le loto mo tulaga taitasi, e oo foi i le mavae ai o le tele o tausaga, e fatuina ai pe toefuatai le toefaaleleiga, faamagaloga, ma le avea ai ma ni ō le feagaiga. O lenei tuafafine lelei, e le manao i se tasi e mafaufau leaga i lona tamā. Fai mai a ia, “E lelei o ia ma o se taitai faamaoni ma o se tamā lelei.

9. O se talatia’i ae mulimuli ane talia o le tulaga faamātua e faapea, e matuai aafia loloto lava tamaiti i le ala e faafailele ai, ae e masani ona latou manatua nai mea iti o uluai tausaga pe a tausia faatina e o latou tina ma le le faalogologo tiga, e aunoa ma le manatu faapito. E le lava upu e faamatala ai le moni e faapea, o lo’u malamalama, alofa ma le talisapaia o lo’u tamā ma lo’u tina, ua matuai faalauteleina ma faalolotoina ina ua avea au o se tane, matua, ma se matua o matua. I le tomanatu ai i le natura faaletupulaga o le fuafuaga o le fiafia, e mafai, i faata o le faavavau i le malumalu, ona tatou vaai ia i tatou lava o se tina, tinamatua, tina o le tina matua i se tasi itu, ma o se afafine, afafine o le atalii, afafine o se tasi o fanau a fanau i le isi itu.

10. O le taimi nei, pe tusa o le 60 pasene o tagata o le Ekalesia i le lalolagi atoa ua nonofo i totonu o le 50 maila (80 km) pe tusa foi o se afa itula le taimi e malaga ai i le tele o nofoaga) i se maota o le Alii. I tausaga a sau, a o mae’a malumalu na faasilasila mai, pe tusa o le tolu vaefa o tagata o le Ekalesia o le a nonofo i mea na o se itula e malaga ai i le maota o le Alii. E faalagolago lava i tulaga, ae faamoemoe e lava lona latalata e o mai soo ai i le Alii i Lona maota paia, ia faamanuiaina ai tupulaga o tagata pele o aiga ma i tatou lava ma a tatou fanau.

11. I luga o o tatou malumalu, o le faaupuga vane laugatasia o le “E Paia i le Alii, o le Maota o le Alii.” E i ai ni nai malumalu ua tuu i ai nisi upu nai lo le faaupuga vane, e pei o le faaopoopo i ai o le igoa o le Ekalesia. E i ai ni nai malumalu ua fesuiai le faaupuga o vane i luma: “O le Maota o le Alii, e Paia i le Alii” (i Atelana, Los Angeles ma San Diego). O le faaupuga vane i luga o le malumalu o Logan e na ona faaupu lava faapea, “E Paia i le Alii.”