Pagsalig sa Atong Amahan
Ang Dios nagsalig kanato sa paghimo og daghang importante nga mga desisyon, ug sa tanan nga mga butang Siya mihangyo kanato sa pagsalig Kaniya.
Niadtong Hunyo 1, 1843, si Addison Pratt mibiya sa Nauvoo, Illinois, aron sa pagsangyaw sa ebangehlyo didto sa mga Isla sa Hawaii, gibiyaan ang iyang asawa, si Louisa Barnes Pratt, aron sa pag-atiman sa ilang batan-ong pamilya.
Didto sa Nauvoo, Samtang nagkakusog ang mga pagpangdaogdaog, nga nagpugos sa mga Santos sa pagbiya, ug sa kadugayan didto sa Winter Quarters samtang nangandam sila sa paglalin ngadto sa Walog sa Salt Lake, si Louisa miatubang sa desisyon kon buhaton ba ang panaw. Mas sayon pa unta nga magpabilin ug maghulat nga mobalik si Addison kay sa mobiyahe nga mag-inusara.
Sa duha ka okasyon, nangayo siya og giya gikan sa propeta, si Brigham Young, kinsa midasig kaniya sa pag-adto. Bisan pa sa dako nga kalisod ug sa iyang personal nga pagdumili, malamposon niyang gihimo ang panaw sa matag higayon.
Sa sinugdanan, gamay ra nga kalipay ang nakaplagan ni Louisa sa pagbiyahe. Apan, sa wala madugay nalipay siya sa pagtan-aw sa berde nga lapad nga kasagbotan, mabulokon nga ihalas nga mga bulak, ug sa mga dapit sa yuta subay sa daplin sa suba. “Ang kaguol sa akong hunahuna hinay-hinay nga nahanaw,” siya misulat, “ug wala nay laing mas malipayong babaye sa tibuok pundok.”
Ang sugilanon ni Louisa nakadasig kaayo kanako. Nakadayeg ko sa iyang kaandam sa pagsalikway sa iyang personal nga mga gusto, sa iyang abilidad sa pagsalig sa Dios, ug sa unsang paagi ang paggamit sa iyang hugot nga pagtuo nakatabang kaniya nga makita ang sitwasyon sa lahi nga paagi.
Gipahinumdoman ko niya nga kita adunay mahigugmaong Amahan sa Langit, nga nag-atiman kanato bisan asa kita, ug nga kita mas makasalig Kaniya kay ni bisan kinsa o sa bisan unsa nga butang.
Ang Tinubdan sa Kamatuoran
Ang Dios nagsalig kanato sa paghimo og daghang importante nga mga desisyon, ug sa tanan nga mga butang Siya mihangyo kanato sa pagsalig Kaniya. Lisod kaayo kini kon ang atong paghukom o opinyon sa publiko lahi sa Iyang kabubut-on alang sa Iyang mga anak.
Ang uban nagsugyot nga kinahanglan natong usbon ang mga kahulogan sa unsay husto ug unsa ang sayop tungod kay sila nag-ingon nga ang kamatuoran nagdepende, ang matag tawo motino sa ilang kaugalingong reyalidad, o ang Dios manggihatagon kaayo nga Siya wala gayod magpakabana sa unsay atong buhaton.
Samtang magtinguha kita sa pagsabot ug pagdawat sa kabubut-on sa Dios, makatabang ang paghinumdom nga dili kita ang mohatag og kahulogan sa mga utlanan tali sa husto ug sayop. Giestablisar sa Dios Mismo kini nga mga utlanan, base sa mahangtoron nga mga kamatuoran alang sa atong kaayohan ug kabulahan.
Ang tinguha sa pag-usab sa mahangtoron nga kamatuoran sa Dios adunay taas nga kasaysayan. Nagsugod kini sa wala pa magsugod ang kalibotan, sa dihang si Satanas mirebelde batok sa plano sa Dios, hinakog nga nagtinguha sa paglaglag sa tawhanong kabubut-on. Nagsunod niini nga sundanan, ang mga tawo sama ni Sherem, Nehor, ug Korihor nangatarongan nga ang hugot nga pagtuo binuang, ang pagpadayag dili mahinungdanon, ug husto ang bisan unsa nga gusto natong buhaton. Ikasubo, sa kasagaran gayod kini nga mga pagtipas gikan sa kamatuoran sa Dios miresulta sa dakong kasubo.
Samtang ang uban nga mga butang mahimong magdepende sa konteksto, dili tanang butang nagdepende niana. Si Presidente Russell M. Nelson makanunayon nga mitudlo nga ang makaluwas nga mga kamatuoran sa Dios hingpit, gawasnon, ug gitino sa Dios Mismo.
Ang Atong Pagpili
Kinsa ang atong pilion nga saligan mao ang usa sa importante nga mga desisyon sa kinabuhi. Si Hari Benjamin mitudlo sa iyang katawhan, “Tuohi ang Dios; tuohi nga siya mao gayod … ; tuohi nga anaa kaniya ang tanang kaalam … ; tuohi nga dili masabtan sa tawo ang tanang butang nga masabtan sa Ginoo.”
Maayo gani, kita adunay mga kasulatan ug giya gikan sa buhi nga mga propeta aron sa pagtabang kanato nga makasabot sa kamatuoran sa Dios. Kon gikinahanglan ang katin-awan lapas sa unsay anaa kanato, ang Dios naghatag niini pinaagi sa Iyang mga propeta. Ug Siya motubag sa atong sinsero nga mga pag-ampo pinaagi sa Espiritu Santo samtang kita magtinguha nga makasabot sa mga kamatuoran nga wala pa nato hingpit nga masabti.
Si Elder Neil L. Andersen kausa mitudlo nga kinahanglang dili kita matingala “kon usahay ang [atong] personal nga mga panglantaw dili kanunay nga mahiangay sa mga pagtulun-an sa propeta sa Ginoo. Mga gutlo kini sa pagkat-on,” miingon siya, “sa pagpaubos, kon moluhod kita aron mag-ampo. Matinud-anon kitang magpadayon, nga mosalig sa Dios, nga nasayod nga moabot ang panahon nga makadawat kita og dugang nga espirituwal nga katin-awan gikan sa atong Langitnong Amahan.”
Sa tanang panahon, makatabang ang paghinumdom sa pagtulun-an ni Alma nga ang Dios naghatag sa Iyang pulong sumala sa pagtagad ug paningkamot nga atong gigahin niini. Kon kita mopatalinghog sa pulong sa Dios, makadawat kita og dugang; kon ibaliwala nato ang Iyang tambag, makadawat kita og menos ug mas menos hangtod nga kita wala nay pulong sa Dios. Kini nga pagkawala sa kahibalo wala magpasabot nga sayop ang kamatuoran; hinuon, kini nagpakita nga kita nawad-an sa kapasidad sa pagsabot niini.
Dangop sa Manluluwas
Sa Capernaum, ang Manluluwas mitudlo mahitungod sa Iyang pagkatawo ug misyon. Daghan ang wala mouyon sa Iyang mga pulong, nga misangpot kanila sa pagsalikway ug “wala na gayod mokuyog kaniya.”
Nganong mibiya man sila?
Tungod kay wala sila ganahi sa unsay Iyang gisulti. Mao nga, nagsalig sa ilang kaugalingong paghukom, mibiya sila, naglimod sa ilang mga kaugalingon sa mga panalangin nga moabot unta kon sila nagpabilin.
Sayon ra sa atong garbo nga mopugong kanato sa pagdawat sa mahangtoron nga kamatuoran. Kon wala kita makasabot, mahimo kitang mohunong, pakalmahon usa ang atong mga pagbati, ug dayon mopili kon unsaon pagresponde. Ang Manluluwas nag-awhag kanato sa “[pagtan-aw ngadto Kaniya] sa matag hunahuna; ayaw pagduhaduha, ayaw kahadlok.” Kon motutok kita sa Manluluwas, ang atong hugot nga pagtuo magsugod sa pagbuntog sa atong mga kabalaka.
Sama sa giawhag ni Elder Dieter F. Uchtdorf nga atong buhaton: “Palihog, duhaduhai una ang inyong pagduhaduha sa dili pa mo magduhaduha sa inyong pagtuo. Dili gayod nato tugotan nga himoon kitang binilanggo sa atong pagduhaduha ug ilayo kita sa diosnong gugma, kalinaw, ug gasa nga moabot pinaagi sa hugot nga pagtuo kang Ginoong Jesukristo.”
Moabot ang mga Panalangin ngadto Niadtong Kinsa Magpabilin
Samtang ang mga disipulo mibiya sa Manluluwas nianang adlawa, Siya dayon nangutana sa Napulog Duha, “Mobiya ba usab kamo kanako?”
Si Pedro mitubag:
“Ginoo, kinsa may among kapaingnan? Anaa kanimo ang mga pulong nga naghatag ug kinabuhing walay kataposan.
“Nagtuo kami ug nasayod nga ikaw mao ang Balaan nga mianhi gikan sa Dios.”
Karon, ang Apostoles nagpuyo sa samang kalibotan, ug nag-atubang sila sa samang mga pagpamugos sa katilingban sama sa mga disipulo nga mibiya. Apan, niining higayona, sila mipili sa ilang hugot nga pagtuo ug misalig sa Dios, sa ingon nagpreserbar sa mga panalangin nga ihatag sa Dios ngadto niadtong magpabilin.
Tingali kamo, sama kanako, usahay makakaplag sa inyong kaugalingon sa duha ka habig niini nga desisyon. Kon kita maglisod sa pagsabot o pagdawat sa kabubut-on sa Dios, makapahupay ang paghinumdom nga Siya nahigugma kanato kon unsa kita, bisan asa man kita. Ug Siya adunay butang nga mas maayo alang kanato. Kon kita modangop ngadto Kaniya, Siya moabag kanato.
Samtang ang pagdangop ngadto Kaniya mahimong lisod, sama sa amahan nga nagtinguha nga mamaayo ang iyang anak nga lalaki nga gisultihan sa Manluluwas, “Ang tanan mahimo sa tawo nga may pagtuo.” Sa atong mga higayon sa pakigbisog, kita usab makasinggit, “Tabangi kami [sa among] kawalay pagtuo.”
Pagtugyan sa Atong Kabubut-on ngadto sa Iyaha
Si Elder Neal A. Maxwell kausa mitudlo nga, “ang pag-uyon sa kabubut-on sa usa ka tawo sa tinuoray mao lamang ang talagsaong personal nga butang nga atong mahatag isip sakripisyo ngadto sa Dios.” Dili ikatingala nga si Hari Benjamin mahinamon kaayo nga ang iyang katawhan mahimong “sama sa usa ka bata, manunoton, maaghop, mapainubsanon, mapailobon, puno sa gugma, mauyonon sa pagtugyan sa tanan nga butang diin ang Ginoo makakita nga angay ipahamtang nganha kaniya, sa samang paagi nga ang usa ka bata motugyan sa iyang kaugalingon ngadto sa iyang amahan.”
Sa kanunay, ang Manluluwas mipakita sa hingpit nga ehemplo alang kanato. Uban sa grabe nga kaguol, ug nasayod sa masakit nga buhat nga Iyang kinahanglang buhaton, Siya mitugyan ngadto sa kabubut-on sa Iyang Amahan, nagtuman sa Iyang misyon isip ang mesiyas ug miabli sa saad sa kahangtoran nganha kaninyo ug kanako.
Ang pagpili sa pagtugyan sa atong kabubut-on ngadto sa Dios usa ka buhat sa hugot nga pagtuo nga mao ang labing importante sa atong pagkadisipulo. Sa paghimo niana nga pagpili, atong madiskobrehan nga ang atong kabubut-on wala mamenosan; hinuon, kini gipadako ug gigantihan sa presensiya sa Espiritu Santo, kinsa nagdala og katuyoan, kalipay, kalinaw, ug paglaom nga dili nato makaplagan bisan asa.
Pipila ka bulan ang milabay, usa ka presidente sa stake ug ako mibisita sa usa ka sister didto sa iyang stake ug sa iyang young adult nga anak nga lalaki. Human sa mga katuigan nga nalayo sa Simbahan, wala magsunod og kinabuhi sa pagkadisipulo nga misangpot sa mga kalisod, siya mibalik. Atol sa among pagbisita, nangutana kami kaniya kon nganong mibalik siya.
“Nagubot nako ang akong kinabuhi,” miingon siya, “ug nasayod ako kon asa ko kinahanglan nga maanaa.”
Gipangutana dayon nako siya kon unsa ang iyang nakat-onan sa iyang panaw.
Uban sa gamayng emosyon, mipakigbahin siya nga iyang nakat-onan nga kinahanglan siyang motambong og igong panahon sa simbahan aron mahunong ang naandan nga dili pagsimba ug nga kinahanglan siyang magpabilin hangtod nga kini mao ang dapit nga gusto siya nga maanaa. Dili sayon ang iyang pagbalik, apan samtang nagpakita siya og hugot nga pagtuo sa plano sa Amahan, gibati niya nga ang Espiritu mibalik.
Ug dayon midugang siya, “Nakat-onan nako sa akong kaugalingon nga ang Dios maayo ug nga ang Iyang mga paagi mas maayo kay sa akong mga paagi.”
Mosaksi ko sa Dios, ang atong Mahangtorong Amahan, kinsa nahigugma kanato; sa Iyang Anak, si Jesukristo, kinsa miluwas kanato. Nasayod Sila sa atong mga kasakit ug mga hagit. Sila dili gayod mobiya kanato ug hingpit nga nasayod unsaon sa pagtabang kanato. Kita mahimong magmalipayon samtang kita mas mosalig Kanila kay sa ni bisan kinsa o sa bisan unsang butang. Sa sagradong ngalan ni Jesukristo, amen.