Mga Anak nga Lalaki ug Mga Anak nga Babaye sa Dios
Nagtuo gayod kita nga kitang tanan literal nga mga anak sa Dios, tungod niana, kita adunay potensyal nga mahimong sama Kaniya.
Karon gusto ko nga mamulong sa usa sa labing mahimayaon, malipayon, ug gamhanan nga mga kamatuoran sa ebanghelyo nga gipadayag sa Dios. Sa samang higayon, usa kini diin kita sa kasagaran gisaway. Usa ka kasinatian pipila ka tuig na ang milabay mipalawom pag-ayo sa akong pasalamat alang niining kamatuoran sa ebanghelyo.
Isip usa ka representante sa Simbahan, gidapit ko makausa sa usa ka komperensiya sa relihiyon diin gipahibalo nga gikan nianang higayona ilang ilhon isip balido ang tanang bunyag nga gipahigayon sa hapit tanang ubang Kristiyano nga mga simbahan, basta ang ordinansa gihimo pinaagi sa tubig ug sa ngalan sa Amahan ug sa Anak ug sa Espiritu Santo. Dayon, gipasabot nga kini nga palisiya dili magamit sa mga bunyag nga gipahigayon sa Ang Simbahan ni Jesukristo sa mga Santos sa Ulahing mga Adlaw.
Human sa komperensiya naningkamot ko nga masabtan ang mga rason alang niana nga eksepsiyon gikan sa lider nga nagdumala sa pahibalo. Kami adunay talagsaon ug puno sa pagsabot nga panagsultihanay.
Sa laktod, mipasabot siya nako nga ang eksepsiyon adunay kalabotan sa atong piho nga mga pagtuo bahin sa Dios nga Kapangulohan, nga sa kasagaran gipasabot sa ubang Kristiyano nga mga denominasyon nga mao ang Trinidad. Mihatag ko og pasalamat kaniya sa paggahin og panahon sa pagpasabot nako sa iyang mga gituohan ug sa palisiya sa iyang simbahan. Sa pagtapos sa among panagsultihanay, naggakos mi ug dayon nanamilit.
Unya samtang namalandong ko sa among panag-istorya, unsa ang gisulti niini nga higala bahin sa mga Santos sa Ulahing mga Adlaw nga wala makasabot sa unsay iyang gitawag nga “misteryo sa Trinidad” nakapabalaka nako. Unsay iyang buot ipasabot? Ah, bahin kini sa atong pagsabot sa kinaiyahan sa Dios. Nagtuo kita nga ang Dios nga Amahan “usa ka nahimaya nga tawo” adunay nahimaya nga “lawas nga unod ug mga bukog nga mahikap ingon sa tawo; [ug] ang Anak usab.” Matag higayon nga kita maghisgot bahin sa kinaiyahan sa Dios, sa pipila ka paagi naghisgot usab sa atong kaugalingong kinaiyahan.
Ug kini tinuod dili lamang tungod kay kitang tanan gihimo “sama sa [Iyang] dagway, sunod sa [Iyang] hitsura,” apan usab, sama sa girekord sa Salmista, tungod kay miingon ang Dios, “Mga dios kamo; nga kamong tanan mga anak sa Labing Halangdon.” Alang kanato usa kini ka bililhon nga doktrina nga nahibalik pag-abot sa Pagpahiuli. Sa katingbanan walay lain kondili unsay gitudlo sa atong mga misyonaryo isip ang unang leksiyon, unang parapo, unang linya: “Ang Dios mao ang atong Langitnong Amahan, kita Iyang mga anak.”
Karon, tingali moingon mo, “Apan daghang tawo nagtuo nga kita mga anak sa Dios.” Oo, tinuod kana, apan ang ilang pagsabot tingali lahi og gamay gikan sa implikasyon sa mas lawom nga kahulogan niini nga atong gipamatud-an. Alang sa mga Santos sa Ulahing mga Adlaw, kini nga pagtulun-an dili sambingay. Hinuon, nagtuo gayod kita nga ang tanang tawo tinuod nga mga anak sa Dios. Siya mao “ang Amahan sa [atong] mga espiritu,” ug tungod niana, kita adunay potensyal nga mahimong sama Kaniya, nga ingon og dili masabtan sa uban.
Sobra na karon sa 200 ka tuig sukad nga ang Unang Panan-awon mibukas sa mga pultahan sa Pagpahiuli. Nianang higayona, ang batan-ong si Joseph Smith nangayo og giya gikan sa langit aron makahibalo unsa nga simbahan ang apilan. Pinaagi sa pagpadayag nga nadawat niya niana nga adlaw, ug sa ulahing mga pagpadayag nga gihatag ngadto kaniya, si Propeta Joseph nakaangkon og kahibalo bahin sa kinaiyahan sa Dios ug sa atong relasyon ngadto Kaniya isip Iyang mga anak.
Tungod niana, mas klaro natong nakat-onan nga ang atong Langitnong Amahan mitudlo niining bililhong doktrina gikan gayod sa sinugdanan. Tugoti ko nga mohisgot og dili mominos duha ka kasinatian gikan sa mga kasulatan sa paghulagway niini.
Tingali nahinumdom mo sa mga instruksiyon sa Dios ngadto ni Moises nga narekord sa Perlas nga Labing Bililhon.
Mabasa nato nga ang “Dios namulong ngadto kang Moises, nga nag-ingon: Tan-awa, Ako mao ang Ginoong Dios nga Makagagahom, ug Walay Kataposan mao ang akong ngalan.” Sa laing pagkasulti nag-ingon, Moises, gusto ko nga makahibalo ka kinsa ko. Dayon Siya midugang, “Ug, tan-awa, ikaw akong anak Unya miingon siya, “Ug ako adunay usa ka buhat alang kanimo, Moises, akong anak; ug ikaw mao ang may pagkasama sa akong Bugtong Anak.” Ug sa kataposan, gitapos Niya sa pag-ingon, “Ug karon, tan-awa, kining usa ka butang Ako mopakita nganha kanimo, Moises, akong anak.”
Makita nga ang Dios determinado sa pagtudlo ni Moises og usa ka leksiyon: “Ikaw akong anak,” nga Iyang gibalikbalik dili mominos tulo ka higayon. Dili gani Niya isulti ang ngalan ni Moises nga dili dugangan dayon nga siya Iyang anak.
Pero, human nga si Moises nag-inusara na lang, gibati niya ang kahuyang tungod kay wala na siya sa presensya sa Dios. Mao kanang higayona nga si Satanas miabot aron sa pagtental kaniya. Makita ba ninyo ang sundanan? Ang unang butang nga iyang gisulti, “Moises, anak sa tawo, simba kanako.”
Niini nga konteksto, ang hangyo ni Satanas sa pagsimba kaniya tingali usa lang ka pagbalda. Ang usa ka importante nga tentasyon alang ni Moises nianang higayona sa kahuyang mao nga maglibog ug motuo nga siya usa lamang ka “anak sa tawo,” kaysa usa ka anak sa Dios.
“Ug nahinabo nga si Moises mitan-aw diha kang Satanas ug miingon: Kinsa ikaw? Kay tan-awa, ako mao ang usa ka anak sa Dios, nga may pagkasama sa iyang Bugtong Anak.” Maayo gani, si Moises wala maglibog ug wala motugot sa iyang kaugalingon nga mabalda. Nakat-on siya sa leksiyon kon kinsa gayod siya.
Ang sunod nga asoy makita sa Mateo 4. Ang mga eskolar mihatag og ulohan niini “ang tulo ka tentasyon ni Jesus” ingon og ang Ginoo gitental lang og tulo ka higayon, nga sa tinuod dili mao.
Gatosan ka galon sa tinta ang gigamit sa pagpasabot sa kahulogan ug sa sulod niini nga mga tentasyon. Sa atong nahibaloan, ang kapitulo nagsugod pinaagi sa pagpasabot nga si Jesus miadto sa disyerto, “ug didto nagpuasa si Jesus sulod sa kap-atan ka adlaw ug kap-atan ka gabii ug unya gigutom siya.”
Ang unang tentasyon ni Satanas may kalabotan sa pagtagbaw sa pisikal nga mga panginahanglan sa Ginoo. “Himoang pan kining mga bato,” iyang gihagit ang Manluluwas.
Ang ikaduha nga pagpanghaylo may kalabotan sa pagtental sa Dios: “Ambak ngadto sa ubos kay nag-ingon man ang kasulatan, ang Dios magsugo sa iyang mga anghel pagbantay kanimo.”
Sa kataposan, ang ikatulong tentasyon ni Satanas may kalabotan sa mga pangandoy ug himaya sa kalibotan. Human gipakita ngadto ni Jesus ang “tanang gingharian sa kalibotan, … si [Satanas] miingon ngadto kaniya, Ihatag ko kanimo kining tanan kon moluhod ka ug mosimba kanako.”
Sa tinuod, ang labing mahagitong tentasyon ni Satanas tingali wala kaayoy kalabotan sa tulo ka piho nga mga panghaylo ug mas may kalabotan sa pagtental ni Jesukristo sa pagkwestyon sa Iyang balaan nga kinaiyahan. Dili mominos kaduha, ang pagpanghaylo giunhan pinaagi sa mahagitong akusasyon gikan ni Satanas “Anak ka man kaha sa Dios”—kon ikaw nagtuo gayod niini, nan buhata kini o kana.
Palihog hibaloi unsa ang nahitabo dayon sa wala pa si Jesus miadto sa disyerto aron magpuasa ug mag-ampo: makita nato ang asoy sa bunyag ni Kristo. Ug sa dihang mikawas Siya sa tubig unya may “tingog gikan sa langit nag-ingon, Kini mao ang pinangga kong Anak, nga nakalipay kanako pag-ayo.”
Makita ba nato ang koneksyon? Makaila ba kita sa usa ka sundanan dinhi?
Dili ikatingala nga sa matag higayon nga gitudloan kita bahin sa atong balaan nga kinaiyahan ug kapalaran, ang kaaway sa tanang pagkamatarong motental nato sa pagduhaduha unsay gitudlo nato.
Pagkalahi gayod tingali sa atong mga desisyon kon kita nakahibalo pa kinsa gayod kita.
Nagpuyo kita sa mahagiton nga kalibotan, usa ka kalibotan nga nagkagrabe ang pagkaguliyang, diin ang madungganon nga mga tawo naningkamot sa pagpasabot sa kaligdong sa atong pagkatawo, samtang kita sakop sa usa ka simbahan ug nagdawat sa ebaghelyo nga mobayaw sa atong panan-awon ug modapit nato ngadto sa balaan.
Ang sugo ni Jesus nga “magmahingpit kamo ingon nga hingpit ang [atong] Amahan nga atua sa langit” usa ka klaro nga timailhan sa Iyang taas nga mga ekspektasyon ug sa atong mahangtorong mga posibilidad. Karon, walay usa niini nga mahitabo dihadiha dayon. Sa mga pulong ni Presidente Jeffrey R. Holland, mahitabo kini sa “kataposan.” Apan ang saad mao nga kon kita “moduol ngadto ni Kristo” kita “mahingpit diha kaniya.” Nagkinahang kana og daghang buhat—dili lang bisan unsa nga buhat, apan balaanon nga buhat. Iyang buhat!
Karon, ang maayong mga balita mao nga ang atong Amahan sa Langit mismo kinsa mipahayag, “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.”
Ang imbitasyon ni Presidente Russell M. Nelson sa “paghunahuna og celestial” nagsugyot og talagsaong pahinumdom sa atong balaan nga kinaiyahan, gigikanan, ug potensyal nga destinasyon. Makaangkon lamang kita sa celestial pinaagi sa maulaong sakripisyo ni Jesukristo.
Tingali mao kana ang hinungdan kon ngano nga si Satanas mihaylo ni Jesus sa samang tentasyon gikan sa sinugdanan hangtod gayod sa kataposan sa Iyang yutan-ong pangalagad. Si Mateo mirekord nga samtang si Jesus nagbitay sa krus, kadtong “nanglabay gibiaybiay siya, … nag-ingon, … Kon ikaw ang Anak sa Dios, kanaog sa krus.” Himaya ngadto sa Dios nga wala Siya maminaw apan hinuon mihatag og paagi alang nato nga modawat sa tanang panalangin sa celestial.
Hinumdoman nato kanunay, nga adunay dakong bugti nga gibayad alang sa atong kalipay.
Ako mopamatuod sama ni Apostol Pablo nga “makighiusa ang maong Espiritu sa atong espiritu aron pagmatuod nga kita mga anak sa Dios: ug kay mga anak man kita niya, madawat nato ang mga panalangin nga gitagana sa Dios ug madawat nato kini uban kang Kristo, kay kon makig-ambit kita sa iyang mga pag-antos, makaambit usab kita sa iyang himaya.” Sa ngalan ni Jesukristo, amen.