“Tan-awa Ako ang Kahayag Nga Inyong Ipakita”
Atong ipakita ang kahayag sa Ginoo kon kita maghupot og hugot sa atong mga pakigsaad ug kon kita mosuporta sa atong buhi nga propeta.
Ngadto sa daghang pagpamatuod dinhi niini nga komperensiya, ako modugang sa akong apostolikanhong pagsaksi nga si Jesukristo mao ang Anak sa Dios, atong Ginoo ug Manluluwas, ang Manunubos sa tanang anak sa atong Amahan. Pinaagi sa Iyang Pag-ula, si Jesukristo mihimo niining posible alang kanato, kon kita takos, nga makabalik ngadto sa presensiya sa atong Amahan sa Langit ug makauban sa atong mga pamilya sa kahangtoran.
Ang Manluluwas wala mawala sa atong mortal nga mga panaw. Sa miaging duha ka adlaw nadungog nato Siya nga namulong pinaagi sa Iyang pinili nga mga lider aron kita mas mapaduol ngadto Kaniya. Balik-balik, uban sa Iyang putli nga gugma ug kaluoy, Siya mosuporta kanato samtang kita mag-atubang sa mga hagit sa kinabuhi. Si Nephi mihulagway: “Ang akong Dios mao ang akong kaabag; siya miagak kanako sa akong mga kasakit. … Gipuno niya ako sa iyang gugma.”
Kana nga gugma dayag kon kita mopaluyo sa usag usa sa Iyang buhat.
Kita mopaluyo sa atong buhi nga propeta sa kinatibuk-ang komperensiya, ug sa Unang Kapangulohan, sa Korum sa Napulog Duha ka Apostoles, sa mga General Authority, ug mga Opisyal sa Simbahan. Ang pagpaluyo nagpasabot sa pagpakita og suporta sa laing tawo, sa paghatag kanila sa atong pagtagad, sa pagkamatinud-anon sa ilang pagsalig, sa paglihok sa ilang mga pulong. Sila namulong pinaagi sa inspirasyon sa Ginoo; sila nakasabot sa kasamtangan nga mga isyu, sa moral nga pagkunhod sa katilingban, ug sa nagkadaghang paningkamot sa kaaway sa pagpugong sa plano sa Amahan. Sa pagpataas sa atong mga kamot, kita mopasalig sa atong suporta, dili lamang alang niana nga higayon apan sa atong inadlaw-adlaw nga mga kinabuhi.
Ang pagpaluyo naglakip sa pagsuporta sa atong mga presidente sa stake ug mga bishop, mga lider sa korum ug organisasyon, mga magtutudlo, ug bisan sa mga direktor sa kampo sa atong mga ward ug mga stake. Sa mas personal nga paagi, kita magpakita og suporta sa atong mga asawa ug mga bana, mga anak, mga ginikanan, kaparyentehan, ug mga silingan. Kon kita magpakita og suporta sa usag usa kita moingon, “Ako ania dinhi alang kanimo, dili lang sa pagsuporta sa imong mga bukton ug mga kamot kon sila ‘nawad-an og paglaom’ apan aron mahimong usa ka kahupayan ug kalig-on sa imong kiliran.”
Ang konsepto sa pagpakita og suporta nakabase sa kasulatan. Didto sa Katubigan sa Mormon, ang bag-ong nabunyagan nga mga miyembro sa Simbahan mipasalig “nga mopas-an sa mga alantoson sa usag usa, nga kini mogaan; … sa paghupay niadtong nanginahanglan og kahupayan, ug mobarog isip mga saksi sa Dios sa tanang panahon ug sa tanang butang, ug sa tanang dapit.”
Ngadto sa mga Nephita, si Jesus miingon: “Ipakita ninyo ang inyong kahayag aron modan-ag kini sa kalibotan. Tan-awa ako ang kahayag nga inyong ipakita.” Atong ipakita ang kahayag sa Ginoo kon kita maghupot og hugot sa atong mga pakigsaad ug kon kita mosuporta sa atong buhi nga propeta samtang siya mamulong sa mga pulong sa Dios.
Si Presidente Russell M. Nelson miingon, sa dihang nagserbisyo sa Korum sa Napulog Duha ka Apostoles, “Ang atong pagpaluyo sa mga propeta usa ka personal nga pasalig nga atong himoon ang labing maayo sa pagsuporta sa ilang propetikanhong [mga] prayoridad.”
Ang pagpakita og suporta sa propeta usa ka sagrado nga buhat. Dili kita hilom nga maglingkod apan aktibo nga manalipod kaniya, mosunod sa iyang tambag, motudlo sa iyang mga pulong, ug mag-ampo alang kaniya.
Si Hari Benjamin, sa Basahon ni Mormon, miingon ngadto sa katawhan, “Sama ako sa inyong mga kaugalingon, ubos sa tanang matang sa mga kahuyang sa lawas ug hunahuna; apan ako gipili … ug gitugotan sa kamot sa Ginoo … ug gipanalipdan ug gipatunhay sa iyang dili hitupngan nga gahom, nga makaalagad kaninyo uban sa tanang gahom, hunahuna ug kusog nga gihatag sa Ginoo ngari kanako.”
Sa samang paagi, sa edad nga 100, si Presidente Nelson gipanalipdan ug gipatunhay sa Ginoo. Si Presidente Harold B. Lee, niadtong panahona usa ka sakop sa Unang Kapangulohan, mikutlo sa ehemplo ni Moises nga nagbarog sa ibabaw sa bungtod sa Rephidim. “Ang mga kamot sa [Presidente sa Simbahan] mahimong maluya,” miingon siya. “May kalagmitan kining mopaubos sa kilid tungod sa bug-at niyang mga responsibilidad; apan kon atong suportahan ang iyang mga kamot, ug mangulo kita ubos sa iyang direksiyon, diha sa iyang kiliran, ang mga ganghaan sa impyerno dili makabuntog kaninyo ug batok sa Israel. Ang inyong kahilwasan [safety] ug ang amoa nagdepende kon kita mosunod ba o dili sa tawo nga gibutang sa Ginoo aron mangulo sa iyang simbahan. Nasayod Siya kon kinsa ang gusto niya nga mangulo sa Iyang Simbahan ug Siya dili gayod masayop.”
Si Presidente Nelson misalig sa katuigan niya nga panerbisyo sa Ginoo. Ang iyang kahingkod, daghang kasinatian, kaalam, ug makanunayon nga pagdawat og pagpadayag piho nga angay alang sa atong panahon. Miingon siya: “Ang Simbahan ni Jesukristo sa mga Santos sa Ulahing mga Adlaw nag-andam sa kalibotan alang sa adlaw nga ‘ang yuta mapuno sa kahibalo sa Ginoo’ (Isaias 11:9). … Kini nga buhat gitugotan pinaagi sa balaang pahibalo 200 ka tuig na ang milabay. Naglangkob lamang kini sa pito ka pulong: ‘Kini ang Akong Hinigugmang Anak. Paminaw Kaniya!’ (tan-awa sa Joseph Smith—Kasaysayan 1:17).”
Si Presidente Nelson miingon usab: “Wala pa gayoy panahon sa kasaysayan sa kalibotan nga ang kaalam bahin sa atong Manluluwas adunay mas personal nga kaimportante ug may kalabotan ngadto sa matag kalag sa tawo. Hunahunaa kon unsa kadali nga ang makapahugno nga mga kaguliyang sa tibuok kalibotan—ug niadtong anaa sa atong kaugalingon nga mga kinabuhi—masulbad kon kitang tanan mopili sa pagsunod ni Jesukristo ug magtuman sa Iyang mga panudlo.”
Mga kaigsoonan, kinahanglan kitang mohimo og dugang nga pagsuporta ug menos nga pagbagulbol, mas mosuporta sa pulong sa Ginoo, sa Iyang mga paagi, ug sa Iyang propeta, kinsa miingon: “Usa sa labing dagko nga hagit karon mao ang pag-ila tali sa mga kamatuoran sa Dios ug sa mga panglingla ni Satanas. Mao nga ang Ginoo mipahimangno kanato sa ‘pag-ampo kanunay, … aron [kita] makabuntog ni Satanas, ug … makalingkawas sa mga kamot sa mga sulugoon ni Satanas nga nagpatunhay sa … buhat [sa kaaway]’ [Doktrina ug mga Pakigsaad 10:5].”
Niadtong Abril, si Sister Rasband ug ako adunay dungog nga gikauban ang atong minahal nga propeta ug si Sister Nelson alang sa pagpahinungod pag-usab sa Manti Utah Temple.
Si Presidente Nelson misorpresa sa tanan sa dihang misulod siya sa lawak. Gamay ra kaayo kanamo ang nasayod nga siya moabot. Sa iyang presensya, dihadiha dayon akong nabati ang kahayag ug propetikanhon nga kupo nga iyang gidala. Ang panagway sa hingpit nga kalipay diha sa mga nawong sa katawhan nga personal nga nakakita sa propeta magpabilin kanako sa kahangtoran.
Sa pag-ampo sa pagpahinungod pag-usab, si Presidente Nelson mihangyo sa Ginoo nga ang Iyang balaan nga balay gayod mopakita og suporta sa tanan kinsa mosulod sa templo, “nga sila makadawat og sagrado nga mga panalangin ug magpabiling takos ug matinud-anon sa ilang mga pakigsaad … nga kini mahimong usa ka balay sa kalinaw, usa ka balay sa kahupayan, ug usa ka balay sa personal nga pagpadayag alang sa tanan kinsa takos nga mosulod niini nga mga pultahan.”
Kitang tanan kinahanglang mabayaw sa Ginoo uban ang kalinaw, uban ang kahupayan, ug labaw sa tanan uban ang personal nga pagpadayag sa pagbatok sa kahadlok, kangitngit, ug panagbingkil nga nagpalibot sa kalibotan.
Sa wala pa ang tulumanon, mibarog kami sa gawas diha sa kahayag sa adlaw uban nila ni Presidente ug Sister Nelson aron tan-awon ang matahom nga palibot. Daghang katigulangan ni Presidente Nelson naggikan niini nga dapit. Ang iyang walo ka apohan sa tuhod mipuyo sa mga walog nga naglibot sa templo, sama sa pipila sa akong mga katigulangan. Ang akong lolo sa tuhod nga si Andrew Anderson miserbisyo diha sa mga tripulante sa konstruksiyon sa unang mga pioneer kinsa naghago og 11 ka tuig aron makompleto ang Templo sa Manti, ang ikatulo diha sa Rocky Mountains.
Samtang nagbarog kami uban ni Presidente Nelson, kami adunay oportunidad sa pagpakita og suporta sa propeta sa Dios sa pagsaulog sa pagpahinungod pag-usab sa balaang balay sa Ginoo. Adlaw kadto nga dili gayod nako makalimtan.
“Nagtukod kita og mga templo aron sa pagpasidungog sa Ginoo,” miingon si Presidente Nelson nianang sagrado nga adlaw. “Gitukod kini alang sa pagsimba ug dili lang aron adunay ikapakita. Kita mohimo og sagrado nga mga pakigsaad nga adunay mahangtoron kaayo nga bili sulod niining sagrado nga mga bungbong.” Kita ang nagpundok sa Israel.
Si Presidente Nelson ug ang mga propeta nga nag-una kaniya nagpakabana gayod og maayo sa balaan nga mga templo. Karon, sa tibuok kalibotan, kita adunay 350 ka sagrado nga mga balay sa Ginoo nga gigamit, gipahiblo, o gitukod. Isip propeta, sukad 2018, si Presidente Nelson mipahibalo og 168 ka templo.
“Sa atong panahon,” miingon siya, “usa ka tibuok, kompleto, ug hingpit nga panaghiusa sa tanang dispensasyon, mga yawe, ug mga gahom kinahanglang lig-ong ikonektar (tan-awa sa Doktrina ug mga Pakigsaad 128:18). Alang niining sagrado nga mga katuyoan, ang balaang mga templo karon anaa sa tibuok kalibotan. Akong panghimug-atan pag-usab nga ang pagtukod niini nga mga templo tingali dili makausab sa inyong kinabuhi, apan ang inyong pagserbisyo sulod sa templo seguradong makausab.”
“Ang Manluluwas ug ang Iyang doktrina mao ang sentro nga bahin sa templo,” miingon ang Presidente. “Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom.”
Ang “tanan nga mosimba sa templo,” si Presidente Nelson miingon, “makabaton sa gahom sa Dios ug mga anghel ang ‘mobantay kanila’ [Doktrina ug mga Pakigsaad 109:22]. Unsa ka dako ang nadugang niini sa inyong pagsalig nga mahibalo niana, isip usa ka natugahan nga babaye o lalaki [o batan-on nga nagtambong sa templo] nga napanalanginan sa gahom sa Dios, nga dili kamo kinahanglan nga moatubang sa kinabuhi nga mag-inusara? Unsa nga kaisog ang nahatag niini kaninyo nga makahibalo nga ang mga anghel motabang gayod kaninyo?”
Ang mga anghel nga nagkab-ot aron sa pagpakita og suporta gihulagway diha sa mga kasulatan sa dihang si Jesukristo mapainubsanon nga miluhod diha sa Tanaman sa Getsemani. Pinaagi sa Iyang pag-antos gihatag Niya ang walay kataposan nga Pag-ula. “Didto,” si Presidente Nelson namahayag, “nahitabo ang labing dako nga nag-inusarang buhat sa gugma nga narekord sa tibuok kasaysayan. … Didto sa Getsemani, ang Ginoo ‘nag-antos sa mga kasakit sa tanan nga mga tawo, nga unta ang tanan … maghinulsol ug moduol ngadto kaniya’ [Doktrina ug mga Pakigsaad 18:11].”
“Kuhaa kining kupa gikan kanako,” si Jesukristo mihangyo, “apan dili ang akong pagbuot kondili ang imo maoy matuman.
“[Ug] may anghel nga mitungha gikan sa langit nga milig-on kaniya.”
Kita adunay mga anghel nga nagpalibot kanato karon. Si Presidente Nelson miingon, “[Sa templo,] kamo makat-on unsaon sa pag-abli sa tabil tali sa langit ug yuta, unsaon sa paghangyo nga ang mga anghel sa Dios motabang kaninyo.”
Ang mga anghel nagdala og kahayag. Ang kahayag sa Dios. Ngadto sa Iyang Nephita nga Apostoles, si Jesus miingon, “Tan-awa ako ang kahayag nga inyong ipakita.” Samtang atong paluyohan ang atong propeta, kita mopamatuod nga siya gitawag sa atong Manluluwas, kinsa mao “ang kahayag … sa kalibotan.”
Minahal nga Presidente Nelson, alang sa mga miyembro ug mga higala sa Simbahan sa Ginoo sa tibuok kalibotan, mibati kami nga bulahan nga magpakita og suporta sa imong mga pagtulun-an, magpakita og suporta sa imong ehemplo sa Kristohanon nga pagpakabuhi, ug magpakita og suporta sa imong mainitong pagpamatuod sa atong Ginoo ug Manluluwas, ang Manunubos kanatong tanan.
Ako mohatag sa akong apostolikanhon nga saksi nga si Jesukristo mao “ang kahayag … sa kalibotan.” Hinaot nga kitang tanan, isip Iyang mga disipulo, “magpakita og suporta” sa Iyang kahayag. Sa ngalan ni Jesukristo, amen.