Ang Ginoong Jesukristo Moanhi Pag-usab
Karon ang panahon alang kaninyo ug kanako sa pag-andam alang sa Ikaduhang Pag-anhi sa atong Ginoo ug Manluluwas, si Jesukristo.
Minahal kong kaigsoonan, mapasalamaton ako nga ang Ginoo mipanalangin kanako nga mamulong kaninyo.
Niini nga komperensiya, ang Ginoo namulong ngari kanato pinaagi sa Iyang mga sulugoon. Ako moawhag kaninyo sa pagtuon sa ilang mga mensahe. Gamita kini ingon nga usa ka pag-ila kon unsay tinuod ug kon unsay dili atol sa mosunod nga unom ka bulan.
Ang pagpreserbar ug pagbag-o sa Templo sa Salt Lake ug uban pang mga lugar sa Temple Square nagpadayon dul-an na sa lima ka tuig. Ang kasamtangan nga mga pagbanabana nagpakita nga kini nga trabaho makompleto sa kataposan sa 2026. Mapasalamaton kami alang sa tanan nga nagtrabaho niining dako kaayo nga proyekto.
Atol sa milabay nga unom ka bulan, among gipahinungod o gipahinungod og usab ang siyam ka templo sa lima ka nasod. Tali karon ug sa kataposan sa tuig, kami mopahinungod og lima pa.
Karon ikalipay namong ipahibalo ang mga plano sa pagtukod og dugang 17 ka mga templo. Palihog paminaw sa matinahorong paagi samtang akong ipahibalo ang mga lokasyon.
-
Juchitán de Zaragoza, Mexico
-
Santa Ana, El Salvador
-
Medellín, Colombia
-
Santiago, Dominican Republic
-
Puerto Montt, Chile
-
Dublin, Ireland
-
Milan, Italy
-
Abuja, Nigeria
-
Kampala, Uganda
-
Maputo, Mozambique
-
Coeur d’Alene, Idaho
-
Queen Creek, Arizona
-
El Paso, Texas
-
Huntsville, Alabama
-
Milwaukee, Wisconsin
-
Summit, New Jersey
-
Price, Utah
Akong minahal nga kaigsoonan, nakita ba ninyo ang nanghitabo sa atubangan gayod sa atong mga mata? Ako nag-ampo nga dili nato mataligam-an ang kahalangdon niini nga higayon! Ang Ginoo nagpadali gayod sa Iyang buhat.
Nganong nagtukod kita og mga templo sa ingon nga gipaspason nga wala pa sukad mahitabo? Ngano? Tungod ang Ginoo nagsugo kanato sa pagbuhat sa ingon. Ang mga panalangin sa templo nagtabang sa pagpundok sa Israel sa duha ka habig sa tabil. Kini nga mga panalangin nagtabang usab sa pag-andam og usa ka katawhan nga motabang sa pag-andam sa kalibotan alang sa Ikaduhang Pag-anhi sa Ginoo!
Sama sa gitagna ni propeta Isaias, ug ingon nga nahinumdoman diha sa Messiah ni Handel, kon si Jesukristo mobalik, “ipadayag ang himaya sa Ginoo ug makakita niini ang tanang tawo.”
Nianang adlawa “ang kagamhanan igatungtong sa iyang abaga: ug ang iyang ngalan pagatawgon [og] Kahibulongan, Magtatambag, Dios nga Makagagahom, Amahan nga Walay Kataposan, Prinsipe sa Pakigdait.”
Si Jesukristo modumala gikan sa karaang Jerusalem ug sa Bag-ong Jerusalem nga “pagatukoron diha sa kayutaan sa Amerika.” Gikan niining duha ka sentro, Siya modumala sa mga kahimoan sa Iyang Simbahan.
Nianang adlawa ang Ginoo mailhan isip ang “Hari sa mga Hari, ug Ginoo sa mga Ginoo.” Kadtong kinsa nga anaa uban Kaniya mahimong mga “tinawag, ug mga pinili, ug mga kasaligan.”
Mga kaigsoonan, karon ang panahon alang kaninyo ug kanako sa pag-andam alang sa Ikaduhang Pag-anhi sa atong Ginoo ug Manluluwas, si Jesukristo. Karon mao ang panahon nga atong himoon ang atong pagkadisipulo nga atong kinatas-an nga prayoridad. Sa usa ka kalibotan nga napuno gayod sa daghang butang nga makabalda kanato gikan sa ebanghelyo, sa unsang paagi nato kini mahimo?
Ang makanunayon nga pagsimba sa templo makatabang kanato. Diha sa balay sa Ginoo, kita motutok ngadto ni Jesukristo. Kita magkat-on Kaniya. Kita mohimo og mga pakigsaad aron mosunod Kaniya. Kita mahimong makaila Kaniya. Kon kita motuman sa atong mga pakigsaad sa templo, kita makabaton og mas dakong akses ngadto sa makapalig-on nga gahom sa Ginoo. Diha sa templo, kita makadawat og panalipod gikan sa mga paghampak sa kalibotan. Kita makasinati sa tiunay nga gugma ni Jesukristo ug sa atong Langitnong Amahan sa dakong kaabunda! Kita mobati og kalinaw ug espirituhanong kasegurohan, nga sukwahi sa kagubot sa kalibotan.
Ania ang akong saad nganha kaninyo: Ang matag sinsero nga tigpangita ni Jesukristo makakaplag Kaniya diha sa templo. Mabati ninyo ang Iyang kaluoy. Makakaplag kamo og mga tubag sa inyong labing makabalaka nga mga pangutana. Mas masabtan ninyo ang hingpit nga kalipay sa Iyang ebanghelyo.
Akong nakat-onan nga ang labing importante nga pangutana nga kinahanglang tubagon sa matag usa kanato mao kini: Kang kinsa o ngadto sa unsa akong ihatag ang akong kinabuhi?
Ang akong desisyon sa pagsunod ni Jesukristo mao ang labing importante nga desisyon nga akong nahimo. Atol sa medikal nga pag-eskwela, ako nakaangkon og pagpamatuod sa kabalaan sa Dios nga Amahan ug sa Iyang Anak, si Jesukristo. Sukad niadto ang atong Manluluwas mao ang bato diin ako nagtukod sa akong kinabuhi. Kana nga pagpili mao ang nakahimo sa tanang kalainan! Kana nga desisyon mihimo sa daghang uban pang mga desisyon nga mas sayon. Kana nga desisyon naghatag kanako og katuyoan ug direksiyon. Nakatabang usab kini kanako nga makalahutay sa mga unos sa kinabuhi. Tugoti ko nga mopakigbahin og duha ka ehemplo:
Una, sa dihang ang akong asawa nga si Dantzel wala damha nga namatay, dili nako makontak ang bisan kinsa sa among mga anak. Didto ako, nag-inusara, nahugno, ug naghilak nga nangayo og tabang. Maayo gani, pinaagi sa Iyang Espiritu, ang Ginoo mitudlo kanako ngano nga ang akong minahal nga si Dantzel gidala og balik ngadto sa panimalay. Uban niana nga pagsabot, nahupay ako. Sa paglabay sa panahon, mas maayo nakong nasagubang ang akong kaguol. Sa wala madugay, giminyoan nako ang akong minahal nga asawa nga si Wendy. Siya usa ka importante nga bahin sa akong ikaduhang ehemplo.
Sa dihang si Wendy ug ako adunay usa ka bulahaton didto sa halayong yuta, ang armadong mga tulisan mition og pusil sa akong ulo ug gikablit kini. Apan ang pusil wala mobuto. Sa tibook niana nga kasinatian, nameligro ang among duha ka kinabuhi. Apan si Wendy ug ako mibati ug dili malalis nga kalinaw. Kadto mao ang kalinaw “nga dili matugkad sa tawo.”
Mga kaigsoonan, ang Ginoo mohupay usab kaninyo! Siya molig-on kaninyo. Siya mopanalangin kaninyo og kalinaw, bisan taliwala sa kagubot.
Palihog paminaw niini nga saad ni Jesukristo nganha kaninyo: “Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libot kaninyo, aron sa pagtabang kaninyo.”
Walay kinutoban sa kapasidad sa Manluluwas sa pagtabang kaninyo. Ang Iyang dili matugkad nga pag-antos sa Getsemani ug sa Kalbaryo para kaninyo! Ang Iyang walay kinutoban nga Pag-ula para kaninyo!
Ako moawhag kaninyo sa paggahin og panahon matag semana—alang sa tibuok ninyong kinabuhi—sa pagdugang sa inyong pagsabot sa Pag-ula ni Jesukristo. Ang akong kasingkasing mibati og dakong kaluoy alang niadtong nabitik sa kasal-anan ug wala makahibalo kon unsaon nga makalingkawas. Ako naghilak alang niadtong kinsa espirituhanon nga nakigbisog o kinsa nag-inusara nga nagpas-an og bug-at nga mga palas-anon tungod kay sila wala makasabot sa unsay gibuhat ni Jesukristo alang kanila.
Gidala ni Jesukristo diha sa Iyang Kaugalingon ang inyong mga sala, inyong mga kasakit, inyong mga kaguol, ug inyong mga kahuyang. Dili kinahanglan nga kamo mag-inusara sa pagpas-an niini! Siya mopasaylo kaninyo kon kamo maghinulsol. Siya mopanalangin kaninyo sa unsay inyong gikinahanglan. Siya moayo sa inyong nasamdan nga kalag. Samtang isangon ninyo ang inyong kaugalingon ngadto Kaniya, ang inyong mga palas-anon mobati nga mas mogaan. Kon kamo mohimo ug motuman sa mga pakigsaad sa pagsunod ni Jesukristo, inyong makita nga ang masakit nga mga gutlo sa inyong kinabuhi temporaryo lang. Ang inyong mga kasakit “buntogon pinaagi sa kamaya kang Kristo.”
Dili pa sayo kaayo o ulahi na kaayo nga kamo mahimong usa ka matinguhaon nga disipulo ni Jesukristo. Dayon kamo makasinati sa hingpit nga mga panalangin sa Iyang Pag-ula. Kamo usab mahimong mas epektibo sa pagtabang sa pagpundok sa Israel.
Akong minahal nga kaigsoonan, sa umaabot nga adlaw, si Jesukristo mobalik sa yuta isip ang Mesiyas sa milenyum. Busa karon ako manawagan kaninyo nga ipahinungod pag-usab ang inyong mga kinabuhi ngadto ni Jesukristo. Ako manawagan kaninyo sa pagtabang sa pagpundok sa nagkatibulaag nga Israel ug sa pag-andam sa kalibotan alang sa Ikaduhang Pag-anhi sa Ginoo. Ako manawagan kaninyo sa paghisgot mahitungod kang Kristo, pagpamatuod mahitungod kang Kristo, pagbaton og hugot nga pagtuo kang Kristo, ug paglipay diha kang Kristo!
Duol ngadto kang Kristo ug “itanyag ang inyong tibuok nga mga kalag” ngadto Kaniya. Kini mao ang sekreto sa usa ka kinabuhi sa hingpit nga kalipay!
Ang labing maayo moabot pa, akong minahal nga kaigsoonan, tungod kay ang Manluluwas moanhi pag-usab! Ang labing maayo moabot pa tungod kay ang Ginoo nagpadali sa Iyang buhat. Ang labing maayo moabot pa samtang kita hingpit nga motugyan sa atong mga kasingkasing ug sa atong mga kinabuhi ngadto ni Jesukristo.
Ako mohatag sa akong ligdong nga pagsaksi nga si Jesukristo mao ang Anak sa Dios. Ako Iyang disipulo. Akong dungog nga mahimong Iyang sulugoon. Sa Iyang Ikaduhang Pag-anhi, “ipadayag ang himaya sa Ginoo ug makakita niini ang tanang tawo.” Kana nga adlaw mapuno sa hingpit nga kalipay alang sa mga matarong!
Pinaagi sa gahom sa sagradong mga yawe sa pagkapari nga akong gihuptan, ako mopahayag niini nga kamatuoran nganha kaninyo ug sa tibuok kalibotan! Sa ngalan ni Jesukristo, amen.