Pagpahiuyon sa Atong Kabubut-on ngadto sa Iyang Kabubut-on
Ang pagsunod sa kabubut-on sa Ginoo dinhi sa atong kinabuhi maghimo nga makaplagan nato ang perlas nga labing bililhon sa kalibotan—sa gingharian sa langit.
Sa usa ka piho nga okasyon, ang Manluluwas namulong mahitungod sa tawong magpapatigayon nga nagpangita og “mga maayong perlas.” Atol sa pagsiksik sa maong magpapatigayon, nakakita siya og usa “nga labing bililhon.” Hinoon, aron maangkon ang labihan kaanindot nga perlas, kinahanglang ibaligya niining tawhana ang iyang tanan nga kabtangan, diin diha dayon iyang gibuhat ug mihimo niini sa malipayong paagi.
Pinaagi niining mubo ug makapahunahuna nga sambingay, ang Manluluwas sa matahom nga paagi mitudlo nga ang gingharian sa langit ikapahisama sa dili mapalit nga perlas nga tinuod nga labing bililhon nga bahandi nga angayang tinguhaon labaw sa tanan. Ang katinuod nga diha dayon gibaligya sa maong magpapatigayon ang tanan niyang kabtangan aron maangkon kana nga bililhong perlas klarong nagpasabot nga kinahanglang ipahiuyon nato ang atong hunahuna ug mga tinguha ngadto sa kabubut-on sa Ginoo ug kaandam nga mohimo sa tanan nga atong mahimo sa panahon sa atong mortal nga panaw aron makab-ot ang mahangtorong mga panalangin sa gingharian sa Dios.
Aron mahimong takos niining talagsaong ganti, kita piho nga nagkinahanglan, tali sa ubang mga butang, nga ihatag ang labing maayo natong paningkamot nga ihikling ang tanang nakasentro sa kaugalingon nga mga tinguha ug talikdan ang bisan unsang mga kalibog nga magpugong kanato gikan sa hingpit nga pasalig ngadto sa Ginoo ug sa Iyang mas taas ug mas balaang mga paagi. Gipasabot ni Apostol Pablo kini nga makabalaang mga tinguha ang “nakasabot sa hunahuna ni Kristo.” Sigon sa gipakitang ehemplo ni Jesukristo, nagpasabot kini sa “kanunay nga [pagbuhat] sa makapahimuot [sa Ginoo]” sa atong kinabuhi, o sama sa giingon sa mga tawo karon, “pagbuhat kini sa unsay ikahimuot alang sa Ginoo.”
Sa pagsabot niini pinaagi sa ebanghelyo, ang “[pagbuhat] kanunay sa mga butang nga makapahimuot [sa Ginoo]” may kalabotan sa pagtugyan sa atong kabubut-on ngadto sa Iyang kabubut-on. Ang Manluluwas sa mahunahunaong paagi mitudlo sa kaimportante niini nga baroganan samtang nagtudlo sa iyang mga disipulo:
“Kay nanaog ako gikan sa langit dili aron pagbuhat sa akong kaugalingong kabubut-on, kondili sa kabubut-on sa nagpadala kanako.
“Kini mao ang kabubut-on sa nagpadala kanako, nga dili ako kawad-an bisag usa sa tanan nga iyang gihatag kanako, hinuon banhawon ko silang tanan sa kataposang adlaw.
“Kay [iyang kabubut-on sa nagpadala kanako], nga ang tanan nga makakita sa Anak ug motuo kaniya, makabaton sa kinabuhing walay kataposan: ug banhawon ko sila sa kataposang adlaw.”
Ang Manluluwas nakalampos og usa ka hingpit ug balaanong lebel sa pagkamatinugyanon ngadto sa Amahan pinaagi sa pagtugot nga mahiuyon ang Iyang kabubut-on ngadto sa kabubut-on sa Amahan. Sa makausa miingon Siya, “Ug siya nga nagpadala kanako nag-uban kanako. Wala ako niya pasagdi nga mag-inusara kay nagbuhat man ako kanunay sa makapahimuot kaniya.” Sa pagtudlo sa Propeta nga si Joseph Smith mahitungod sa kahapdos ug sa mga kasakit sa Pag-ula, ang Manluluwas miingon:
“Kay tan-awa, Ako, ang Dios, nag-antos niini nga mga butang alang sa tanan, nga sila unta dili mag-antos kon sila maghinulsol; …
“Kansang pag-antos nakapahimo sa akong kaugalingon, gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antos sa lawas ug sa espiritu—ug buot nga Ako unta dili moinom sa mapait nga kopa, ug mobiya—
“Bisan pa niana, himaya ngadto sa Amahan, ug Ako nakaambit ug nakahuman sa akong mga pagpangandam alang sa mga katawhan.”
Sa panahon sa atong panaw sa mortalidad, kasagaran makigbisog kita sa unsay atong nahibaloan, sa unsay gihunahuna nato nga labing maayo, ug sa unsay atong gituohan nga makaayo kanato, nga sukwahi sa unsay nahibaloan gayod sa Langitnong Amahan, sa unsay labing maayo sa kahangtoran, ug unsay klarong makatabang sa Iyang mga anak sumala sa Iyang plano. Kining labihan nga pakigbisog posibling makomplikado kaayo, ilabi na sa pagkonsiderar sa mga panagna nga anaa sa mga kasulatan sa atong panahon: “Timan-i [usab] kini, [nga] sa kataposang mga adlaw … ang mga tawo maghunahuna lamang sa ilang kaugalingon, … palabihon nila ang kahilayan kay sa Dios.”
Usa ka timailhan nga nagpasabot sa katumanan niini nga panagna mao ang naglambo nga mga butang karon sa kalibotan, nga gisagop sa kadaghanan, sa mga tawo nga nakatutok lang sa ilang kaugalingon ug padayong magaingon, “Magkinaunsa man, ako ray magbuot unsa may akong tuohan o buhaton nga makaayo kanako.” Sigon sa giingon ni Apostol Pablo, sila “naghunahuna lamang sa ilang kaugalingong kaayohan, dili sa mga katuyoan ni Jesukristo.” Kini nga matang sa paghunahuna kasagaran suportahan sa pag-ingon nga kini “tinuod” niadtong nagpatuyang niining makaugalingon nga mga tinguha, personal nga mga pagpili, o kagustohan nga ipangatarongan ang pihong mga matang sa kinaiya nga kasagarang dili mohaom sa plano sa mahigugmaong Dios ug sa Iyang kabubut-on alang kanila. Kon tugotan nato nga hangpon sa atong kasingkasing ug hunahuna kini nga paagi sa panghunahuna, makamugna kita og dagkong mga babag sa atong kaugalingon sa pag-angkon sa labing bililhong perlas nga mahigugmaong giandam sa Dios alang sa Iyang mga anak—ang kinabuhing dayon.
Samtang tinuod nga matag usa kanato nagtinagsa sa biyahe sa pagkadisipulo subay sa dalan sa pakigsaad, naningkamot nga padayong isentro ang atong mga kasingkasing ug mga hunahuna ngadto kang Kristo Jesus, kinahanglan kitang magmainampingon ug mabinantayon nga dili matental sa pagsagop niining matang sa kalibotanong pilosopiya sa atong kinabuhi. Si Elder Quentin L. Cook miingon nga ang “tinud-anay nga pagkasama kang Kristo mas importante pa nga tumong kay sa pagpakatinuod.”
Minahal kong mga higala, kon kita mopili nga tugotan ang Dios nga mahimong labing importante nga impluwensiya sa atong kinabuhi kay sa magtinguha lang para sa atong kaugalingon, molambo kita sa atong pagkadisipulo ug modugang ang atong kapasidad nga mahiusa ang atong hunahuna ug kasingkasing ngadto sa Manluluwas. Sa laing bahin, kon dili nato tugotan ang pamaagi sa Dios nga mopatigbabaw sa atong kinabuhi, mapasagdan kitang mag-inusara, ug sa walay dinasig nga giya sa Ginoo, makapangatarongan kita sa hapit bisan unsay atong gibuhat o wala buhata. Makapangatarongan usab kita sa atong kaugalingon sa paghimo sa mga butang sa kaugalingon natong paagi, sa pag-ingon nga, “gibuhat lang nako sa kaugalingon nakong paagi.”
Sa usa ka okasyon, samtang ang Manluluwas namahayag sa Iyang doktrina, pipila ka tawo, labi na ang mga Pariseo nga nagtuong mas tarong sila kay sa uban, misalikway sa Iyang mensahe ug walay pagpanukong miingon nga mga anak sila ni Abraham, nagpasabot nga ang ilang kaliwatan maghatag kanila og mga espesyal nga mga katungod sa panan-aw sa Dios. Kana nga mentalidad misangpot kanila sa pagsalig sa kaugalingon nilang panabot ug sa dili pagtuo sa unsay gitudlo sa Manluluwas. Ang reaksyon sa mga Pariseo kang Jesus klaro nga ebidensya nga ang ilang mapangahason nga kinaiya wala magbilin og luna sa ilang kasingkasing alang sa mga pulong sa Manluluwas ug sa paagi sa Dios. Agig tubag, si Jesus sa maalamon ug maisogong paagi namahayag nga kon sila mga matinuorong mga anak sa pakigsaad ni Abraham, buhaton nila ang mga buhat ni Abraham, ilabi na sa pagkonsidera nga ang “Dios ni Abraham” nagbarog atubangan kanila ug nagtudlo kanila sa kamatuoran niana gayod nga gutlo.
Mga kaigsoonan, sigon sa inyong makita, ang paglihok sa pangatarongan nga “haom kini kanako” kay sa paglihok “kanunay sa unsay makapahimuot sa Ginoo” dili bag-ong uso nga lahi sa atong panahon. Karaan na kaayo kini ug sa kasagaran mobuta sa mga tawo kinsa nagtuo nga sila maalamon ug molibog ug moluya sa daghang mga anak sa Dios. Kini nga mentalidad, sa tinuod, kinaraang taktika sa kaaway; makailad kini nga paagi nga anam-anam nga mobira sa mga anak sa Dios tipas sa tinuod ug matinud-anong dalan sa pakigsaad. Samtang ang mga personal nga kahimtang sama sa henetika, hiyograpiya, ug mga pisikal ug mental nga hagit moimpluwensiya sa atong panaw, sa mga butang nga importante gayod, dunay luna diin kita gawasnong makapili kon mosunod man kita o dili sa sundanan nga giandam sa Ginoo sa atong kinabuhi. Sa tinuod, ang “Dalan Niya may timaan, [ug] gipasabot ang tanan.”
Isip mga disipulo ni Kristo, tinguhaon nato ang pagsubay sa dalan nga Iyang gimarkahan alang kanato atol sa Iyang mortal nga pangalagad. Dili lamang kita magtinguha sa pagbuhat sa Iyang kabubut-on ug sa tanan nga makapahimuot Kaniya apan magtinguha sa pagsunod Kaniya. Kon maningkamot kitang magmatinuoron sa matag pakigsaad nga atong gibuhat ug gisunod “pinaagi sa matag pulong nga mogula sa baba sa Dios,” maprotektahan kita batok sa pagkahimong biktima sa mga sala ug mga sayop sa kalibotan—mga sayop sa pilosopiya ug doktrina nga modala kanato palayo gikan sa niadtong labing bililhong mga perlas.
Sa personal nadasig ako kon sa unsang paagi ang espiritwal nga kamatugyanon ngadto sa Dios nakaapekto sa kinabuhi sa matinud-anong mga disipulo ni Kristo samtang gipili nila ang paghimo niadtong mga butang nga makatabang ug makapahimuot sa panan-aw sa Ginoo. May nailhan ako nga batan-ong lalaki nga wala pa makadesisyon nga magmisyon nga nadasig sa pag-adto ug moserbisyo sa Ginoo dihang gipaminaw niya ang senior nga lider sa Simbahan nga nagpakigbahin sa kaugalingon niyang pagpamatuod ug sagradong kasinatian sa pagserbisyo isip misyonaryo.
Sa kaugalingon niyang mga pulong, kini nga batan-on, karon nauli na nga misyonaryo, miingon: “Dihang naminaw ko sa pagpamatuod sa usa ka Apostol sa Manluluwas nga si Jesukristo, mibati ko sa gugma sa Dios kanako, ug nagtinguha kong mopakigbahin niana nga gugma ngadto sa uban. Nianang gutloa nasayod kong kinahanglan kong magmisyon bisan sa akong mga kahadlok, mga pagduhaduha, ug mga kabalaka. Masaligon kaayo ko sa mga panalangin ug mga saad sa Dios alang sa Iyang mga anak. Karon, bag-o na ko nga tawo; duna akoy pagpamatuod nga kining ebanghelyo tinuod ug nga ang Simbahan ni Jesukristo napahiuli dinhi sa yuta.” Kining batan-ong lalaki mipili sa dalan sa Ginoo ug nahimong ehemplo sa usa ka tinuod nga disipulo sa matag aspeto.
Usa ka matinud-anong batan-on nga babaye mihukom nga dili ikompromiso ang iyang mga sumbanan dihang pasul-obon siya og dili tarong aron mohaom sa negosyo nga fashion company nga iyang gitrabahoan. Sa pagsabot nga ang iyang lawas sagrado nga gasa gikan sa atong Langitnong Amahan ug dapit diin ang Espiritu makapuyo, nadasig siya nga magpakabuhi sa sumbanan nga mas taas kay sa kalibotan. Dili lang kay naangkon niya ang pagsalig niadtong nakakita kaniya nga nagsunod sa katinuod sa ebanghelyo ni Jesukristo, apan wala usab siya matangtang sa iyang trabaho, nga sa usa ka higayon nameligro. Ang iyang kaandam sa paghimo sa unsay makahimuot sa panan-aw sa Ginoo, kay sa unsay gidawat sa kalibotan, naghatag kaniya og pagsalig sa pakigsaad taliwala sa lisod nga mga pagpili.
Mga kaigsoonan, padayon kitang nag-atubang og susamang mga pagdesisyon sa atong inadlaw nga panaw. Nagkinahanglan og isog ug andam nga kasingkasing ang paghunong ug pagtinguha og matinuoron ug maaghop nga pagpamalandong aron maila ang anaang mga kahuyang sa unod sa atong kinabuhi nga mahimong mobabag sa atong katakos sa pagtugyan sa atong kaugalingon ngadto sa Dios, ug dayon sa kataposan mohukom sa pagsagop sa Iyang paagi kay sa atong kaugalingon. Ang kinalisdang pagsulay sa atong pagkadisipulo makita sa atong kaandam nga itugyan ug wagtangon ang karaan natong kaugalingon ug motugyan sa atong kasingkasing ug atong tibuok kalag ngadto sa Dios aron maatoa ang Iyang kabubut-on.
Usa sa labing mahimayaong mga gutlo sa mortalidad mahitabo kon makadiskobre kita sa kalipay nga moabot sa kanunayng pagbuhat sa mga butang nga “makaayo ug makapahimuot sa Ginoo” ug “unsay haom kanato” nga magkahiusa ug magkapareha! Aron mahimo sa walay pagpanuko ug pagduhaduha nga maatoa ang kabubut-on sa Ginoo nagkinahanglan og kaisog ug bayanihong pagkadisipulo! Nianang makadasig nga gutlo, mahimo kitang mapahinungoron ngadto sa Ginoo, ug hingpit natong matugyan ang atong mga kabubut-on ngadto Kaniya. Ang ingon niana nga espirituhanong pagtugyan, giingon nga, matahom, puno sa gahom, ug makapabag-o.
Mopamatuod ko nga ang pagsunod sa kabubut-on sa Ginoo sa atong kinabuhi maoy maghimo nga makaplagan nato ang perlas nga labing bililhon sa kalibotan—sa gingharian sa langit. Manghinaot ko nga ang matag usa kanato, sa atong panahon ug atong higayon, makapamahayag, uban sa kamasaligon sa pakigsaad, ngadto sa atong Langitnong Amahan ug Manlulwas nga si Jesukristo nga “kon unsay maayo Kanimo, maayo kanako.” Gipamulong ko kining mga butanga sa sagrado nga pangalan sa Manluluwas nga si Jesukristo, amen.