Magpuyo sumala sa Inyong mga Pribilihiyo
Pagkat-on kon sa unsang paagi nga ang mga ordinansa sa pagkapari ug mga saad diha sa pakigsaad motugot sa gahom sa Dios nga modagayday diha sa inyong kinabuhi.
Bag-ohay lang ang akong bana, si Greg, nakadawat og dayagnosis nga magkinahanglan og makuti nga operasyon ug pipila ka bulan nga chemotherapy. Sama sa uban kaninyo nga nakasinati og parehas nga sitwasyon, kami nagsugod dayon og pag-ampo alang sa tabang sa langit ug sa gahom sa Dios. Sa Dominggo pagkahuman sa operasyon ni Greg, ang sakramento gidala sa among lawak sa ospital.
Niini nga okasyon, ako lang ang miambit sa sakramento. Usa ka piraso sa pan. Usa ka gamayng tasa sa tubig. Sa simbahan, ang akong hunahuna kasagaran motutok sa paagi sa pagpahigayon sa sakramento—sa pag-andam, sa pagpanalangin, ug sa pagpasa. Apan nianang hapona, akong gihinuktokan ang gasa sa gahom sa Dios nga anaa alang nako pinaagi sa sagradong ordinansa mismo ug ang saad diha sa pakigsaad nga akong gihimo samtang ako miambit nianang gamayng piraso sa pan ug nianang gamayng tasa sa tubig. Kini mao ang higayon nga ako nagkinahanglan sa gahom gikan sa langit. Taliwala sa grabe nga kaguol, kakapoy, ug kawalay kaseguroan, ako naghunahuna mahitungod niining gasa nga makaabli sa gahom gikan Kaniya nga gikinahanglan kaayo nako. Ang pag-ambit sa sakramento mopadugang sa akong pagpakig-uban sa Espiritu sa Ginoo, naghatag kanako og dugang nga kahigayonan sa gasa sa gahom sa Dios, lakip na ang pagpangalagad sa mga anghel ug ang makaabag nga kalig-on sa Manluluwas nga makabuntog niini nga pagsulay.
Wala ko kahibalo kon ako na ba kaha nga naamgohan nga ingon ani kaklaro kaniadto nga dili lamang kon kinsa ang nagpahigayon sa ordinansa ang mahinungdanon—unsa ang giablihan sa ordinansa ug sa atong pakigsaad angay usab nga hatagan sa atong atensiyon. Ang mga ordinansa sa pagkapari ug mga saad diha sa pakigsaad mitugot sa Dios sa pagbalaan kanato ug dayon maghimo og mga katingalahan sa atong kinabuhi. Apan giunsa niini pagkahitabo?
Una, aron ang usa ka ordinansa makapakita sa gahom sa Dios sa atong kinabuhi, kinahanglan kining buhaton nga adunay awtoridad gikan sa Anak sa Dios. Ang paagi sa pagpahigayon importante. Ang Amahan mitugyan ni Jesukristo sa mga yawe ug awtoridad sa pag-atiman sa pagpahigayon sa Iyang mga ordinansa sa pagkapari. Ubos sa Iyang paggiya, sulod sa han-ay sa Iyang pagkapari, ang mga anak nga lalaki sa Dios giordinahan aron mobarog isip puli sa Anak sa Dios.
Ikaduha, wala lamang kita mohimo og mga saad diha sa pakigsaad—kinahanglan kitang motuman niini. Sa daghang ordinansa sa ebanghelyo, kita maghimo og sagrado nga mga pakigsaad uban sa Dios; Siya misaad sa pagpanalangin kanato samtang kita motuman niadto nga mga pakigsaad. Ato ba nga naamgohan nga ang kombinasyon sa mga ordinansa sa pagkapari uban sa pagtuman sa mga saad diha sa pakigsaad ang mitugot kanato sa pagpahimulos sa gahom sa Dios?
Niana nga hapon naghunahuna ko kon ako, usa ka anak nga babaye sa pakigsaad sa Dios, tinud-anay ba nga nakasabot kon unsaon sa pag-akses sa gasa sa gahom sa Dios pinaagi sa mga ordinansa sa pagkapari ug unsaon sa pag-ila sa gahom sa Dios nga milihok sulod kanako.
Niadtong 2019 usa ka propetikanhong pagdapit ang gihatag ngadto sa kababayen-an sa Simbahan, nagtudlo kanato kon unsaon sa pagdawat sa gahom sa Manluluwas ngadto sa atong kinabuhi. Si Presidente Russell M. Nelson nagdapit kanato sa pagtuon sa Doktrina ug mga Pakigsaad 25, usa ka pagpadayag nga gihatag ngadto ni Emma Smith sa Harmony, Pennsylvania. Ang pagdawat niana nga pagdapit nakausab sa akong kinabuhi.
Sa miaging bulan ako adunay wala damha nga oportunidad sa pagbisita sa Harmony. Didto, ubos sa mga kahoy nga maple, ang pagkapari gipahiuli ngadto ni Joseph Smith ug Oliver Cowdery. Duol niadto nga mga kahoy mao ang atubangan nga pultahan sa panimalay ni Joseph ug Emma. Atbang sa abohan niana nga panimalay adunay bintana. Nagbarog ko niana nga bintana ug namalandong kon unsa kaha ang gihunahuna ni Emma samtang naglantaw sa gawas latas sa mga kahoy.
Niadtong Hulyo sa 1830, si Emma 26 anyos; batan-on pa kaayo siya. Siya tulo ka tuig ug tunga diha sa iyang kaminyoon. Namatyan siya og masuso nga anak nga lalaki—ang iyang una nga anak. Ang iyang lubnganan anaa sa duol lang sa iyang panimalay subay sa gamay nga kalsada. Samtang ako nagbarog niana nga bintana, dili lisod alang nako ang paghanduraw kon unsa kaha ang anaa sa sulod sa iyang hunahuna. Seguradong nabalaka siya mahitungod sa ilang panalapi, mahitungod sa nagkadaghan nga pagpanglutos nga mihulga sa ilang kahilwasan, mahitungod sa ilang kaugmaon. Apan ang buluhaton sa Dios naglambo palibot kaniya. Naghunahuna ba kaha usab siya sa iyang dapit diha sa plano, sa iyang katuyoan sa Iyang gingharian, ug sa iyang potensyal diha sa mga mata sa Dios?
Seguro nabalaka siya niini.
Diha lang gyod sa atbang sa agianan duol sa ilang panimalay, ang gasa sa awtoridad sa pagkapari sa Dios ug mga yawe gipahiuli sa kalibotan. Kini mao ang higayon nga si Emma sa tinud-anay nagkinahanglan sa gahom gikan sa langit. Taliwala sa grabe nga kaguol, kakapoy, ug kawalay kaseguroan, akong gihanduraw si Emma nga naghunahuna mahitungod niining gasa sa pagkapari sa Dios nga makaabli sa gahom gikan Kaniya nga gikinahanglan kaayo niya.
Apan si Emma wala lang nagbarog niana nga bintana ug naghunahuna.
Samtang ang Propeta Joseph gitudloan kabahin sa mga yawe, mga buhatan, mga ordinansa, ug unsaon sa pag-abag diha sa serbisyo sa pagkapari, ang Ginoo Mismo, pinaagi sa Iyang propeta, mihatag og pagpadayag ngadto ni Emma. Dili ang presidente-sa Relief-Society sa Nauvoo nga si Emma—kini nga pagpadayag gihatag ngadto sa 26-anyos nga si Emma sa Harmony. Pinaagi sa pagpadayag, si Emma makat-on mahitungod sa pailalom nga pagbalaan ug koneksiyon sa pakigsaad nga mopadugang sa abilidad niadtong mga ordinansa sa pagkapari aron molihok sa iyang kinabuhi.
Una, ang Ginoo mipahinumdom ni Emma sa iyang dapit diha sa Iyang plano, lakip na kon si kinsa siya ug kang kinsa siya—usa ka anak nga babaye sa Iyang gingharian. Siya gidapit nga “maglakaw sa mga agianan nga maligdong,” usa ka agianan nga naglakip sa mga ordinansa nga moabli sa gahom sa Dios kon si Emma magpabiling matinud-anon sa iyang mga pakigsaad.
Ikaduha, sa iyang panahon sa grabe nga pagbangotan, ang Ginoo mihatag kaniya og katuyoan. Si Emma dili lamang usa ka tigpaniid sa mga kalihokan sa Pagpahiuli; siya usa ka mahinungdanon nga partisipante sa buhat nga nahitabo. Siya i-set apart “sa pagpatin-aw sa mga kasulatan, ug pag-awhag sa simbahan.” Ang iyang panahon “ihatag ngadto sa pagsulat, ug sa daghan nga pagtuon.” Si Emma gihatagan og sagrado nga tahas sa pagtabang nga maandam ang mga Santos sa pagsimba; ang ilang mga awit ngadto sa Ginoo dawaton isip mga pag-ampo ug “pagatubagon uban sa usa ka panalangin diha sa ilang mga ulo.”
Kataposan, ang Ginoo naglatid og proseso sa pailalom nga pagbalaan nga moandam ni Emma alang sa kahimayaan. “Gawas kon ikaw mobuhat niini,” ang Ginoo mipasabot kaniya, “kon hain ako ikaw dili makaadto.”
Kon kita mainampingong mobasa sa seksiyon 25, atong madiskobrehan ang usa ka importanteng pag-uswag nga nahitabo. Si Emma mabalhin gikan sa pagkahimong anak nga babaye sa gingharian ngadto sa “babaye nga pinili” ngadto sa pagka rayna. Ang mga ordinansa sa Aaronic ug Melchizedek nga Pagkapari, nga gihugpong kauban sa pagtuman sa iyang mga saad diha sa pakigsaad makapadugang sa iyang pagpakig-uban sa Espiritu ug mga anghel, naghatag kaniya og gahom sa pagpakabuhi nga adunay balaan nga giya. Pinaagi sa Iyang balaan nga gahom, ang Dios moayo sa iyang kasingkasing, mopadako sa iyang kapasidad, ug makausab niya ngadto sa bersyon sa iyang kaugalingon nga Iyang nahibaloan nga siya mamahimo. Ug pinaagi sa mga ordinansa sa Melchizedek nga Pagkapari, “ang gahom sa pagka-diosnon [mahimong] makita” sa iyang kinabuhi, ug ang Ginoo moabli sa tabil aron siya makadawat og panabot gikan Niya. Kini nga ehemplo nagpakita kon unsay ipasabot nga ang gahom sa Dios naglihok diha kanato.
Si Presidente Russell M. Nelson mitudlo:
“Ang tanan nga nahitabo [sa Harmony] adunay dakong implikasyon sa inyong kinabuhi. Ang pagpahiuli sa pagkapari, uban sa tambag sa Ginoo ngadto ni Emma, makagiya ug makapanalangin sa matag usa ninyo. …
“… Ang paggamit sa gahom sa Dios sa inyong kinabuhi nagkinahanglan sa samang butang nga gisugo sa Ginoo ni Emma ug sa usag usa [kanato] nga buhaton.”
Adunay importanteng mga butang nga nahitabo sa matag pikas nga bahin sa mga bintana sa Harmony, lakip na ang pagpadayag nga gihatag ngadto sa babaye nga pinili nga gitawag sa Ginoo—usa ka pagpadayag nga molig-on, modasig, ug motudlo ni Emma Smith, ang anak nga babaye sa Dios.
Sa dihang ang among apo nga babaye nga si Isabelle gihatagan og ngalan ug panalangin, ang iyang amahan mipanalangin niya og panabot sa pagkapari; nga siya magpadayon sa pagtubo ug pagkat-on mahitungod sa mga panalangin nga ihatag niini sa iyang kinabuhi, ug nga ang iyang hugot nga pagtuo sa pagkapari molambo samtang siya nagpadayon sa paglambo sa panabot.
Dili kasagaran nga ang usa ka batang babaye panalanginan nga makasabot sa pagkapari ug makat-on kon unsaon nga ang may kalabotan nga mga ordinansa ug mga saad diha sa pakigsaad makatabang niya nga makagamit sa gahom sa Dios. Apan akong nahinumdoman si Emma ug naghunahuna sa akong kaugalingon, Nganong dili man? Kining gamay nga anak nga babaye adunay potensyal nga mahimong pinili nga babaye sa Iyang gingharian ug sa kataposan mahimong rayna. Pinaagi sa Iyang mga ordinansa sa pagkapari ug sa pagtuman sa iyang mga saad diha sa pakigsaad, siya makagamit sa gahom sa Dios aron matabangan siya nga mabuntog ang bisan unsa nga ihatag sa kinabuhi ug mamahimong ang babaye nga nahibaloan sa Dios nga siya mamahimo. Kini usa ka butang nga gusto nakong masabtan sa matag batang babaye sa gingharian.
“Magpakabuhi subay sa inyong mga pribilihiyo,”
Kat-oni kon sa unsang paagi nga ang mga ordinansa sa pagkapari ug ang mga saad diha sa pakigsaad motugot sa gahom sa Dios nga modagayday diha sa inyong kinabuhi nga adunay dugang nga kaepektibo, maglihok diha ug pinaagi nimo, ug maghatag og gahom ug mosangkap nimo aron makab-ot ang imong hingpit nga katuyoan ug potensyal.
Pagtuon sa mainampingong paagi ug pamalandongi ang mga ordinansa sa Aaronic ug Melchizedek nga Pagkapari, ang kaubang mga saad diha sa pakigsaad nga atong gihimo sa matag usa, ug ang gahom sa Dios nga atong magamit pinaagi niadto nga mga ordinansa.
Hinumdomi, dili lamang kon kinsa ang nagpahigayon sa ordinansa ang mahinungdanon; unsa ang giablihan sa ordinansa ug sa kauban nga saad diha sa pakigsaad angay usab nga hatagan sa inyong atensiyon.
Ang pag-ambit sa pan ug tubig usa ka sinemana nga pahinumdom sa Iyang gahom nga naglihok diha ninyo aron motabang nga kamo makabuntog. Ang pagsul-ob sa garment sa balaan nga pagkapari usa ka inadlaw-adlaw nga pahinumdom sa gasa sa Iyang gahom nga naglihok diha kaninyo aron makatabang kaninyo nga mamahimo.
Kitang tanan makagamit sa gasa sa gahom sa Dios.
Matag higayon nga kita moambit sa sakramento.
Matag higayon nga kita motabok sa tumbanan sa templo.
Kini ang labing importanteng bahin sa akong Igpapahulay. Kini ang rason nganong akong giampingan ang akong rekomend sa templo.
“Diha sa mga ordinansa niana, ang gahom sa pagka-diosnon gipakita.”
Niini nga gasa ako mopamatuod sa ngalan ni Jesukristo, amen.