Welcome sa Simbahan sa Hingpit nga Kalipay
Tungod sa matubsanon nga kinabuhi ug misyon sa atong Manluluwas, si Jesukristo, kita makahimo—ug kinahanglan—nga mahimong labing malipayon nga mga tawo sa yuta!
Nabunyagan ako sa Ang Simbahan ni Jesukristo sa mga Santos sa Ulahing mga Adlaw sa Bisperas sa Pasko niadtong 1987, hapit 37 na ka tuig. Usa kadto ka talagsaon nga adlaw sa akong kinabuhi, ug diha sa akong mahangtorong panaw, ug ako kinasingkasing nga mapasalamaton sa mga higala kinsa miandam sa dalan ug midala kanako ngadto sa katubigan nianang bag-ong pagkatawo.
Bisan kon ang inyong bunyag kagahapon o mga tuig na ang milabay, bisan kon magkita mo sa usa ka dako nga multi-ward nga bilding sa Simbahan o ubos sa usa ka balay-balay nga kugon ang atop, bisan kon kamo modawat sa sakramento agig paghinumdom sa Manluluwas diha sa Thai o Swahili, ako moingon kaninyo, welcome sa simbahan sa hingpit nga kalipay! Welcome sa simbahan sa hingpit nga kalipay!
Ang Simbahan sa Hingpit nga Kalipay
Tungod sa mahigugmaong plano sa atong Langitnong Amahan alang sa matag usa sa Iyang mga anak, ug tungod sa matubsanon nga kinabuhi ug misyon sa atong Manluluwas, si Jesukristo, kita makahimo—ug kinahanglan—nga mahimong labing malipayon nga mga tawo sa yuta! Bisan og ang mga unos sa kinabuhi sa gubot nga kalibotan mohapak kanato, kita makaugmad og usa ka nagtubo ug nagapadayon nga pagbati sa hingpit nga kalipay ug kalinaw sa kahiladman tungod sa atong paglaom kang Kristo ug sa atong pagsabot sa atong kaugalingong dapit diha sa matahom nga plano sa kalipay.
Ang pangulong Apostol sa Ginoo, si Presidente Russell M. Nelson, namulong sa hingpit nga kalipay nga moabot gikan sa kinabuhi nga nakasentro kang Jesukristo sa halos tanang pakigpulong nga iyang gihatag sukad nahimong Presidente sa Simbahan. Iyang gisumada kini sa mubo nga paagi: “Ang kalipay nagagikan ug tungod Kaniya. … Alang sa mga Santos sa Ulahing mga Adlaw, si Jesukristo mao ang hingpit nga kalipay!”
Kita mga miyembro sa Simbahan ni Jesukristo. Kita mga miyembro sa simbahan sa hingpit nga kalipay! Ug walay bisan asa nga ang atong hingpit nga kalipay isip usa ka katawhan mas makita kon kita magpundok matag Igpapahulay diha sa atong mga panagtigom alang sa sakramento aron sa pagsimba sa tinubdan sa tanang hingpit nga kalipay! Dinhi kita nagpundok uban sa atong mga pamilya sa ward ug branch aron sa pagsaulog sa sakramento sa Panihapon sa Ginoo, sa atong kaluwasan gikan sa sala ug kamatayon, ug sa gamhanang grasya sa Manluluwas! Dinhi atong masinati ang hingpit nga kalipay, dalangpanan, kapasayloan, pagpasalamat, ug pagkasakop nga nakaplagan pinaagi ni Jesukristo!
Kining diwa sa pagmaya diha ni Kristo mao ba ang inyong nakaplagan? Mao ba kini ang inyong gidala? Tingali sa inyong hunahuna kini walay kalabotan kaninyo, o tingali naanad kamo kon giunsa ang mga butang kanunay nga nahimo. Apan kitang tanan makatampo, bisan unsa pa ang atong edad o atong calling, sa paghimo sa atong mga panagtigom alang sa sakramento nga puno sa hingpit nga kalipay, nakatutok kang Kristo, makig-abi-abi sa mangabot, malipayon ang diwa diha sa balaang pagtahod.
Hingpit nga Kalipay diha sa Balaang Pagtahod
Hingpit nga kalipay diha sa balaang pagtahod? “Tinuod ba kana?” tingali mangutana kamo. Aw, oo, tinuod na! Atong gimahal pag-ayo, gipasidunggan, ug girespeto ang atong Dios, ug ang atong balaan nga pagtahod nagagikan sa kalag nga nagmaya sa abunda nga gugma, kaluoy, ug kaluwasan ni Kristo! Kining hingpit nga kalipay diha sa balaang pagtahod ngadto sa Ginoo kinahanglang maila sa atong sagrado nga mga panagtigom alang sa sakramento.
Hinuon, alang sa kadaghanan, ang balaang pagtahod nagpasabot lamang niini: hugot nga pagkiyugpos sa atong mga bukton diha sa atong mga dughan, pagduko sa atong mga ulo, pagpiyong sa atong mga mata, ug pagpabilin nga hilom—sa taas-taas nga higayon! Mahimong makatabang kini nga paagi sa pagtudlo sa lagsik nga gagmayng mga bata, apan samtang kita motubo ug magkat-on, atong tan-awon nga ang balaang pagtahod labaw pa niini. Ingon ba niana kita kon ang Manluluwas kauban nato? Dili, tungod kay “sa [Iyang] presensya anaa ang hingpit nga kalipay”!
Hinuon, alang sa kadaghanan kanato kini nga pagbag-o diha sa atong mga tulumanon sa sakramento kinahanglan og pagbansay.
Pagtambong batok sa Pagsimba
Dili kita magpundok sa Igpapahulay aron lang makatambong sa panagtigom alang sa sakramento ug makompleto na ang buhatonon. Kita magkauban aron sa pagsimba. Adunay dakong kalainan tali sa duha. Ang pagtambong nagpasabot nga anaa dinha. Apan ang pagsimba mao ang pagtuyo og dayeg ug pagsimba sa atong Dios sa paagi nga makapabag-o kanato!
Diha sa Pulpito ug diha sa Kongregasyon
Kon kita nagpundok agig paghinumdom sa Manluluwas ug sa katubsanan nga Iyang gihimong posible, ang atong mga dagway kinahanglang magpakita sa atong hingpit nga kalipay ug pasalamat! Si Elder F. Enzio Busche kausa miasoy sa istorya sa dihang siya usa ka presidente sa branch ug usa ka batan-ong lalaki sa kongregasyon mitan-aw kaniya diha sa pulpito ug nangutana og kusog, “Unsa man ang gibuhat sa tawo diha nga adunay dili maayo nga dagway?” Kadtong naglingkod sa pulpito—mga mamumulong, mga lider, mga choir—ug kadtong nagpundok sa kongregasyon nakigsulti sa usag usa niining “welcome sa simbahan sa hingpit nga kalipay” pinaagi sa mga ekspresyon nga makita sa ilang mga nawong!
Pagpanganta og Himno
Samtang nagkanta kita, naghiusa ba kita sa pagdayeg sa atong Dios ug Hari, bisan unsa pa ang klase sa atong mga tingog, o nagyamyam lang ba kita sa mga pulong o wala gayod mokanta? Ang mga kasulatan nag-ingon nga “ang awit sa mga matarong mao ang usa ka pag-ampo ngadto sa [Dios]” diin makapahimuot sa Iyang kalag. Mao nga manganta kita! Ug modayeg Kaniya!
Mga Pagpamulong ug mga Pagpamatuod
Kinahanglan natong isentro ang atong mga pagpamulong ug mga pagpamatuod diha sa Langitnong Amahan ug ni Jesukristo ug sa mga bunga sa mapainubsanon nga pagsunod sa Ilang ebanghelyo, mga bunga nga “labing tam-is sa tanang tam-is.” Dayon kon kita tinuoray nga “mokaon …gani hangtod nga [kita] mabusog, nga [kita] dili na gutomon ni … uhawon,” ug ang atong mga palas-anon mahimong magaan, pinaagi sa hingpit nga kalipay sa Anak.
Ang Sakramento
Ang mahimayaong sentro sa atong mga serbisyo mao ang panalangin ug pagdawat sa sakramento mismo, ang pan ug ang tubig nga nagrepresentar sa maulaong gasa sa atong Ginoo ug ang tibuok katuyoan sa atong pagpundok. Kini mao ang “usa ka sagradong panahon sa espirituhanon nga pagbag-o” kon kita mosaksi pag-usab nga kita andam sa pagdala diha kanato sa ngalan ni Jesukristo ug mohimo pag-usab sa pakigsaad nga kanunay mohinumdom sa Manluluwas ug motuman sa Iyang mga sugo.
Sa pipila ka panahon sa kinabuhi, kita mahimong moduol sa sakramento nga adunay magul-anon nga mga kasingkasing ug bug-at nga mga palas-anon. Sa ubang panahon, kita gawasnon ug gikuhaan og mga palas-anon gikan sa mga kabalaka ug mga kasamok. Samtang kita maminaw pag-ayo sa panalangin sa pan ug tubig ug moambit niadtong sagradong mga timaan, kita mahimong mobati nga mamalandong sa sakripisyo sa Manluluwas, sa Iyang mga pag-antos didto sa Getsemani, sa Iyang tumang kasakit diha sa krus, ug mga kaguol ug mga kasakit nga Iyang giantos alang kanato. Mao kana ang makapahupay sa atong mga kalag, samtang atong ikonektar ang atong pag-antos ngadto sa Iyaha. Sa ubang mga higayon, mobati kita nga matingala uban sa mapasalamaton nga kahingangha sa “kanindot ug matam-is” nga hingpit nga kalipay sa unsay nahimong posible sa talagsaong gasa ni Jesus diha sa atong kinabuhi ug diha sa atong kahangtoran! Magmaya kita sa unsay umaabot—ang atong gimahal nga panagkita pag-usab sa atong minahal nga Amahan ug nabanhaw nga Manluluwas.
Mahimong nakondisyon kita nga maghunahuna nga ang katuyoan sa sakramento mao ang paglingkod sa lingkoranan nga naghunahuna lamang sa tanang kagubot nga nabuhat nato sa miaging semana. Apan buhaton nato ang butang nga sukwahi sa nahisgotan. Diha sa kahilom, atong mapamalandongan ang daghang paagi nga atong nakita ang Ginoo nga walay hunong sa paglahotay kanato uban sa Iyang talagsaong gugma nianang semanaha! Makapamalandong kita kon unsay ipasabot sa “pagkaplag sa hingpit nga kalipay sa inadlaw nga paghinulsol.” Makahatag kita og pasalamat sa mga panahon nga ang Manluluwas misulod diha sa atong mga pakigbisog ug sa atong mga kadaogan ug sa mga okasyon diin atong gibati ang Iyang grasya, kapasayloan, ug gahom nga naghatag kanato og kalig-on sa pagbuntog sa atong mga kalisdanan ug sa pagpas-an sa atong mga palas-anon uban sa pailob ug bisan sa kalipay.
Oo, namalandong kita sa mga pag-antos ug mga walay kaangayan nga gipahamtang sa atong Manunubos tungod sa atong mga sala, ug kana maoy hinungdan sa seryoso nga pagpamalandong. Apan usahay kita magpabilin didto—diha sa tanaman, diha sa krus, sulod sa lubnganan. Napakyas kita sa pagsaka ngadto sa hingpit nga kalipay sa pag-abli sa lubnganan, sa kapildihan sa kamatayon, ug sa kadaogan ni Kristo sa tanan nga makapugong kanato sa pag-angkon og kalinaw ug pagbalik sa atong langitnong panimalay. Mopaagas man kita sa mga luha sa kasubo o mga luha sa pasalamat atol sa sakramento, himoa nga kini makapahingangha sa maayong balita sa gasa sa Amahan sa Iyang Anak!
Mga Ginikanan nga adunay Gagmay nga mga Bata o Adunay Espesyal nga mga Panginahanglan
Karon, alang sa mga ginikanan sa gagmay nga mga bata o adunay espesyal nga mga panginahanglan, kasagaran walay higayon nga ingon kahilom ug hilom nga pagpamalandong atol sa sakramento. Apan diha sa gagmay nga mga gutlo sa tibuok semana, makatudlo kamo pinaagi sa ehemplo sa gugma, pasalamat, ug hingpit nga kalipay nga inyong gibati alang ug gikan sa Manluluwas samtang kanunay ninyong atimanon ang Iyang gagmay nga mga karnero. Walay pagpaningkamot niini nga buhat ang mausik. Ang Dios nahibalo kaayo kaninyo.
Mga Konseho sa Pamilya, Ward ug Branch
Sa samang paagi diha sa panimalay, kita makasugod sa pagpalambo sa atong mga paglaom ug mga pagdahom sa atong panahon sa simbahan. Diha sa mga konseho sa pamilya, mahimo natong hisgotan kon sa unsang paagi ang matag indibidwal makatampo sa makahuluganong mga paagi sa pag-abiabi sa tanan sa simbahan diha sa hingpit nga kalipay! Kita makaplano ug makapaabot nga makabaton og kasinatian sa hingpit nga kalipay sa simbahan.
Ang mga konseho sa ward ug branch makahanduraw ug makamugna og kultura sa hingpit nga kalipay diha sa balaang pagtahod alang sa oras sa atong sakramento, pag-ila sa praktikal nga mga lakang ug biswal nga mga timailhan sa pagtabang.
Hingpit nga Kalipay
Ang hingpit nga kalipay ingon og managlahi para sa lahi-lahing mga tawo. Alang sa pipila, kini mahimong madasigon nga mga pagtimbaya diha sa pultahan. Alang sa uban, kini mahimong hilom nga pagtabang sa mga tawo nga mobati nga komportable pinaagi sa pagpahiyom ug paglingkod tapad nila nga adunay mabination ug bukas nga kasingkasing. Alang niadtong mibati nga wala matagad o naa ra sa kilid, ang kanindot sa pagbati niini nga pag-abiabi mahinungdanon gayod. Sa kataposan, mahimo natong pangutan-on ang atong kaugalingon kon unsa ang gusto sa Manluluwas nga mahitabo sa atong oras sa sakramento. Sa unsang paagi gusto Niya nga ang matag usa sa Iyang mga anak abi-abihon, atimanon, amumahon, ug higugmaon? Unsa kaha ang Iyang gusto nga atong bation kon kita motambong aron mabag-o pinaagi sa paghinumdom ug sa pagsimba Kaniya?
Panapos
Sa pagsugod sa akong panaw sa hugot nga pagtuo, ang hingpit nga kalipay diha ni Jesukristo mao ang akong unang dakong nadiskobrehan, ug kini nakapausab sa akong kalibotan. Kon wala pa nimo madiskobrehan kini nga hingpit nga kalipay, sugdi na ang pagpangita niini. Kini usa ka pagdapit sa pagdawat sa gasa sa Manluluwas sa kalinaw, kahayag, ug hingpit nga kalipay—sa paghudyaka niini, sa pagkahibulong niini, ug sa pagmaya niini matag Igpapahulay.
Si Ammon diha sa Basahon ni Mormon mipahayag sa mga pagbati sa akong kasingkasing sa dihang siya miingon:
“Karon kita wala bay katarongan nga magmaya? Oo, sultihan ko kamo, wala pay [mga tawo] nga adunay dako nga rason nga magmaya sama kanato, sukad sa sinugdanan sa kalibotan; oo, ug ang akong kamaya, gani ngadto sa pagpanghambog sa akong Dios; kay anaa kaniya ang tanang gahom, tanang kaalam, ug tanang salabotan; natugkad niya ang tanan nga butang, ug siya usa ka maluluy-on nga Binuhat, gani ngadto sa kaluwasan, niadtong kinsa mohinulsol ug motuo sa iyang ngalan.
“Karon kon pagpanghambog man kini, niana nga paagi ako manghambog; kay kini mao ang akong kinabuhi ug ang akong kahayag, … akong kamaya, ug ang akong dako nga pagpasalamat.”
Welcome sa simbahan sa hingpit nga kalipay! Sa ngalan ni Jesukristo, amen.