Ang Dios Nahigugma sa Tanan Niyang mga Anak
Si Jesukristo kanunayng nagtawag kanato, ug Siya naggamit kanato, Iyang ordinaryo nga mga sulugoon, sa pagtabang pagdala sa Iyang mga anak ngadto Kaniya.
Unsa ang gitinguha sa atong Langitnong Amahan gikan kanimo? Nakahibalo ka ba nga sa dihang didto pa ikaw sa imong kinabuhi sa wala pa dinhi sa yuta, ang Langitnong Amahan nag-andam kanimo alang sa imong kinabuhi dinhi sa yuta? Nakigsulti ngadto sa kabatan-onan, si Presidente Russell M. Nelson mitudlo, “Gireserba sa atong Langitnong Amahan ang daghan sa Iyang labing halangdong mga espiritu—tingali … labing nindot Niya nga team—alang niining kataposang hugna.” Tungod kay nareserba naman kita alang niining kataposang mga adlaw, importante alang kanato ang pagkat-on nga mamahimong mga disipulo ni Jesukristo.
Ang Ginoong Jesukristo mao ang Maayong Magbalantay, ug Siya nakaila sa Iyang panon, ug ang panon nakaila sa ilang Magbalantay tungod kay “tawgon niya ang iyang mga karnero sa ilang mga ngalan.” Kanunay Siyang nagtawag kanato, ug Siya naggamit kanato, Iyang ordinaryo nga mga sulugoon, sa pagtabang pagdala sa Iyang mga anak ngadto Kaniya.
Dili pa lang dugay, usa ka presidente sa stake ug ako mibisita sa mga miyembro sa Simbahan sa usa ka lokal nga kasilinganan. Human kami nahuman sa among naeskedyul nga mga pagbisita, mihangyo kanako ang presidente sa stake kon makaadto pa kami sa pakigkita og usa pa ka pamilya. Mibati siya og kaaghat nga kinahanglan makig-istorya kami kanila.
Nanuktok kami sa pultahan, ug usa ka sister ang miabli niini. Mitan-aw siya nako, apan wala siya kaila kinsa ako, mao nga wala kaayo siya masorpresa. Akong gitudlo ang presidente sa stake, kinsa nangumusta kaniya ug misulti sa iyang ngalan. Pagkadungog dayon niya ug nakakita kaniya, nalipay kaayo siya. Nagbarog sa may pultahan, nagginaksanay sila ug naghinilakay. Kini nga pagbati mipadayon sa tibuok namong pagbisita. Wala kami nasayod nga ang sister nag-chemotherapy sa miaging adlaw. Luya pa kaayo siya aron moatiman sa iyang hamtong nga anak nga lalaki. Mao nga akong gitabangan ang presidente sa stake sa pag-ilis sa iyang anak nga lalaki, ug amo siyang gibutang sa iyang wheelchair. Amo siyang gipakaon sa pagkaon nga bag-o lang gidala sa laing buotan nga sister gikan sa ward, ug mitabang kami sa ubang buluhaton. Sa wala pa kami mobiya sa ilang panimalay, nakapanalangin kami kanila.
Kadtong tanan dinha sa akong hunahuna atol niini nga pagbisita usa ka kompirmasyon nga si Jesukristo nahigugma sa hilabihan kanila. Siya nakasabot kanila ug personal nga nahibalo sa kasakit sa ilang talagsaong sitwasyon. Hapit ang entiro nga pagbisita nahitabo sa kahilom. Niini nga okasyon wala kami mohatag og dakong sermon o mopakigbahin sa among paborito nga kasulatan, apan ang Ginoo mipanalangin kanamo uban sa kabuhong sa Iyang Espiritu.
Usa sa labing mahinungdanon nga mga rason nga gipadala kamo sa inyong Langitnong Amahan dinhi niini nga panahon mao aron kamo makagamit sa inyong hingpit nga potensyal. Ang Isangyaw ang Akong Ebanghelyo nagtudlo kanato nga isip mga disipulo ni Kristo, likayan nato ang pagtandi sa atong mga kaugalingon sa usag usa. Ang inyong espirituhanong mga abilidad talagsaon, personal, ug tiunay, ug ang inyong Langitnong Amahan gusto nga motabang kaninyo sa pagpalambo niini. Kanunay nga adunay usa ka tawo nga inyong matabangan nga mobati sa gugma sa inyong Langitnong Amahan. Ang inyong potensiyal balaanon. Samtang mahinungdanon gayod ang pagpangandam sa inyong kaugalingon aron molampos niining nag-indigay kaayo nga kalibotan, usa sa inyong mahinungdanon nga misyon sa inyong tibuok kinabuhi mao ang pagkahimong disipulo ni Jesukristo ug pagsunod sa mga impresyon sa Espiritu. Samtang inyo kining buhaton, ang Dios mopanalangin sa inyong kinabuhi; Siya mopanalangin sa inyong kasamtangan o umaabot nga pamilya; ug Siya mopanalangin sa mga kinabuhi sa Iyang mga anak nga inyong masugatan.
Nagpuyo kita sa panahon sa talagsaon nga oportunidad. Bisan og nagsagubang kita og daghang mga kalisod, ako nasayod nga anaa kana isip kabahin sa pagtugot kanato aron makatabang sa uban nga mobati sa gugma sa atong Langitnong Amahan. Si Presidente Nelson mitudlo, “Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala pa makita sa kalibotan.” Kita adunay kahigayonan sa pagbantay sa mga tawo kinsa nagkinahanglan og tabang, paggakos, pagbati nga giamuma, o alang kanato sa yano makig-uban kanila sa hilom. Kon makatabang kita sa pagpagaan sa ilang mga alantuson, bisan kon sa makadiyot lamang, nan makakita kita sa labing dako nga mga pagpakita sa gahom sa Manluluwas sa ilang kinabuhi.
Isip mga disipulo ni Jesukristo, ang mga Santos sa Ulahing mga Adlaw makahimo og positibo nga kalainan sa kalibotan. Makahatag kita og hingpit nga kalipay nga makita sa atong panagway—hingpit nga kalipay nga atong ipakigbahin uban sa mga pulong sa gugma ug mga buhat sa kamabination. Magpakamaayo kita nga mga silingan, maayo nga mga agalon, maayo nga mga trabahante. Maningkamot kita nga mahimong maayo nga mga Kristiyano sa tanang panahon.
Ang Ginoo mipahiuli sa Iyang ebanghelyo uban sa mahinungdanong mga ordinansa aron ang mga anak sa Langitnong Amahan makaangkon sa tanang mga saad nga nagbugkos kanato ngadto Kaniya. Pinaagi sa pagtabang sa atong kaigsoonan sa ilang inadlaw nga mga hagit, hinumdoman usab nato ang pagtabang kanila sa paghimo ug paghupot niini nga sagrado nga mga saad uban sa ilang Langitnong Amahan aron Siya usab makasaad ngadto kanila sa labing buhong nga mga panalangin alang niini nga kinabuhi ug alang sa kahangtoran. Kini nga mga saad gihimo lamang nga posible pinaagi sa Pagpahiuli sa ebanghelyo ni Jesukristo ug sa Iyang mga yawe sa pagkapari.
Sa laing pagkasulti, makatabang kita sa uban nga magpabilin diha sa dalan sa pakigsaad. Ang pipila kanato motipas gikan sa dalan matag karon ug unya, ug mao nga kinahanglan kitang mohinumdom nga alang sa atong Langitnong Amahan kanunay kitang adunay posibilidad sa pagbalik. Bisan kon ang atong giagian dili ang labing hingpit, ang Manluluwas kanunay nga nagpahinumdom kanato nga, “Kon kanunay [kita nga maghinulsol] ug [mangita] og kapasayloan, uban sa tinuod nga katuyoan, [kita] pasayloon.”
Usa sa mga kahanas sa kaaway karon mao ang pagpahunahuna ug pagpatuo kanato nga wala nay paagi nga kita mausab o nga wala na kitay paglaom. Kining makadaot nga hunahuna makapahimo sa kadaghanan kanato nga mohunong sa pagpaningkamot. Ug niining higayona nga ang atong gugma, atong mga pulong sa pag-awhag ug suporta, atong panahon, ug atong tabang makahatag sa laing tawo og paglaom igo nga mosulay og makausa pa.
Tingali naghunahuna ka, “OK, apan kinsay mangalagad kanako?” Pinaagi sa pag-adto ug pagpanalangin sa mga kinabuhi sa atong kaigsoonan, makakuha kita og mga pagpamatuod nga mopuno sa atong mga kinabuhi og hugot nga pagtuo diha ni Ginoong Jesukristo. Kini nga mga pagpamatuod mohatag kanato og kusog sa pagsulay sa makausa pa sa atong kaugalingon. Ang Espiritu Santo mobuhi kanato ug motabang kanato pinaagi sa nabag-o nga mga pagpamatuod sa pagpadayon sa atong kaugalingong mga kalisdanan ug personal nga mga pagsulay. Sa higayon nga magtinguha kita sa pagpanalangin sa kinabuhi sa uban, ang Ginoo mas malooy kanato; Siya naglig-on kanato ug nagtabang kanato sa atong mga kinabuhi.
Palihog hinumdomi nga si Ginoong Jesukristo mao ang inyong Manluluwas ug nakasabot kaninyo sa personal. Siya nasayod unsa ang pagtuman og calling ug mobiya sa mga butang aron sa pagtabang sa mga anak sa Dios. Siya adunay gahom sa pagpanalangin kaninyo sa tanan kon kamo motuo Kaniya ug dili magduhaduha.
Minahal kong kaigsoonan, nianang adlawa nga ang usa ka lider sa pagkapari mibati og kadasig nga bisitahan namo ang usa ka inahan ug anak nga lalaki nga wala sa among tulumanon, ako mopahayag nga nasayod ang Dios nga gikinahanglan nila kami. Ug sa kataposan, ako mao ang usa nga napangalagaran. Nianang adlawa, nakadawat ako og mahinungdanon nga mga leksiyon sa gugma sa Manluluwas alang kanato.
Ako mopamatuod nga si Jesukristo mao ang Manluluwas sa kalibotan, nga Siya buhi, nga Siya nagpakatawo ug namatay alang kanimo ug kanako, ug nga Siya nabanhaw alang kanimo ug kanako aron kita makapaninguha nga magkahiusa sa celestial nga puno sa hingpit nga kalipay uban niadtong mipanaw na. Nakahibalo ako nga Siya hingpit nga nakasabot kanimo ug kanako. Nakasabot Siya sa matag malisod nato nga mga panahon, ug Siya adunay gahom sa pagtabang kanato niadto nga mga panahon nga mobati kita nga mas huyang. Nasayod ako nga ang Ginoong Jesukristo ug ang atong Langitnong Amahan mipakita ngadto ni Joseph Smith sa pagpahiuli sa ebanghelyo niini nga mga panahon. Nasayod ako nga ang atong minahal nga propeta, si Presidente Russell M. Nelson, usa ka propeta sa Ginoo, ug ako mopamatuod niini nga mga butang sa ngalan ni Jesukristo, amen.