Ang Tawo Nga Nakigsulti ni Jehova
Si Joseph Smith “[napanalanginan] nga miabli niini nga [kataposang] dispensasyon,” ug kita napanalanginan sa iyang gibuhat.
Ang akong katuyoan niining adlawa ug sa kanunay mao ang pagpamatuod kang Jesukristo, nga Siya mao ang Anak sa Dios, ang Tiglalang ug ang Manluluwas sa kalibotan, atong Tigluwas ug Manunubos. Tungod kay “ang sukaranan nga mga baroganan sa atong relihiyon mao ang pagpamatuod sa apostoles ug sa mga propeta, mahitungod ni Jesukristo,” karon ako mopakigbahin kaninyo sa akong kahibalo ug pagpamatuod sa Manluluwas nga sa kanunay nalig-on ug napalawman pinaagi sa kinabuhi ug mga pagtulun-an sa mahinungdanong apostol ug propeta.
Ang Sinugdanan sa Kaalam
Sa buntag sa matahom hayag nga adlaw sa sayo nianang tingpamulak sa 1820, ang 14 anyos nga si Joseph Smith misulod sa kakahoyan duol sa balay sa iyang pamilya aron mag-ampo mahitungod sa iyang mga sala ug mangutana asa nga simbahan mopasakop. Ang iyang sinserong pag-ampo, gihalad nga adunay dili matarog nga hugot nga pagtuo, nakadani sa pagtagad sa labing gamhanang mga pwersa sa uniberso, lakip ang Amahan ug ang Anak. Ug ang yawa. Ang matag usa niini adunay dakong interes nianang pag-ampo ug nianang batang lalaki.
Ang unsay gitawag nato karon nga ang Unang Panan-awon nagtimaan sa sinugdanan sa Pagpahiuli sa tanang butang niining kataposang dispensasyon. Apan alang ni Joseph, ang kasinatian usa usab ka personal ug pagpangandam. Ang gusto lamang niya mao ang kapasayloan ug direksiyon. Ang Ginoo mihatag kaniya nianang duha. Ang instruksiyon nga “dili gayod mopasakop sa bisan hain sa [mga Simbahan]” usa ka mando. Ang mga pulong nga “Gipasaylo na ang imong mga sala” usa ka matubsanon.
Sa tanang matahom nga mga kamatuoran nga tingali atong makat-onan gikan nianang Unang Panan-awon, tingali simple lang ang nakat-onan ni Joseph Smith, “Ako nakakaplag nga ang pagpamatuod ni Santiago tinuod—nga ang tawo kinsa kulang sa kaalam mahimo nga mangayo sa Dios, ug makaangkon.”
Sama sa gisulti sa usa ka iskolar: “Ang labing importanting mensahe sa Unang Panan-awon karon mao ang pagkasayod nga ang kinaiyahan sa Dios mao ang paghatag niadtong kulang sa kaalam. … Ang Dios nga nagpadayag sa Iyang kaugalingon ngadto ni Joseph Smith sa sagradong kakahoyan mao ang Dios kinsa nagtubag sa mga tin-edyer pahanon sa kasamok.”
Ang kasinatian ni Joseph sa kakahoyan naghatag niya og kaisog sa pagpangayo og kapasayloan ug direksiyon alang sa iyang tibuok kinabuhi. Ang iyang kasinatian naghatag usab nako og kaisog aron mangayo og kapasayloan ug direksiyon alang sa akong tibuok kinabuhi.
Kanunay nga Paghinulsol
Niadtong Septiyembre 21, 1823, kinasingkasing nga nag-ampo si Joseph alang sa kapasayloan, masaligon nga tungod sa iyang kasinatian sa kakahoyan tulo ka tuig ang nakalabay, ang Langit motubag pag-usab. Ug kini nahitabo. Ang Ginoo mipadala og anghel, si Moroni, aron motudlo ni Joseph ug mopahibalo niya sa usa ka karaan nga rekord nga sa kaulahian iyang hubaron pinaagi sa gasa ug gahom sa Dios—ang Basahon ni Mormon.
Hapit 13 ka tuig human niana, si Joseph ug si Oliver Cowdery miluhod sa usa ka ligdong, hilom nga pag-ampo sa bag-ong napahinungod nga Kirtland Temple. Wala kita masayod unsay ilang giampo, apan ang ilang mga pag-ampo malagmit naglakip sa pagpangayo og kapasayloan, tungod kay, sa dihang sila mitindog, ang Manluluwas mipakita ug namahayag “Tan-awa ang inyong sala gipasaylo diha kaninyo, kamo malimpyo sa akong atubangan.”
Sa mga bulan ug mga tuig human niini nga kasinatian, si Joseph ug Oliver makasala gihapon pag-usab. Ug pag-usab. Apan niana nga panahon, alang niana nga panahon, agi og tubag sa ilang pangamuyo ug sa pagpangandam alang sa mahimayaong pagpahiuli sa mga yawe sa pagkapari nga mahitabo, si Jesus mihimo kanila nga walay sala.
Ang kinabuhi ni Joseph sa makanunayon nga paghinulsol naghatag kanako og kaisog aron sa “[pagduol] sa trono sa grasya, aron makadawat [akog] kaluoy.” Akong nakat-onan nga si Jesukristo tinuod gayod nga “mapasayloon.” Dili Iyang misyon ni Iyang kinaiya ang pagkondenar. Siya mianhi aron moluwas.
Nagpakisayod sa Ginoo
Isip kabahin sa saad nga “pagpahiuli sa tanan nga mga butang,” ang Ginoo, pinaagi ni Joseph Smith, mipahinabo sa Basahon ni Mormon ug sa laing mga pagpadayag nga naglangkob sa kahingpitan sa Iyang ebanghelyo. Importanteng mga kamatuoran gihatagan og katin-awan ug kakompleto samtang si Joseph balik-balik nga nagpakisayod sa Ginoo alang sa dugang direksiyon. Hunahunaa ang mosunod:
-
Ang Amahan ug ang Anak adunay lawas “nga mahikap sama sa tawo.”
-
Gipas-an ni Jesus sa Iyang Kaugalingon dili lang ang atong mga sala apan usab ang atong mga sakit, mga kasakit, ug mga kahuyang.
-
Ang Iyang Pag-ula sobra kasakit nga naghimo Kaniya nga miagas ang dugo sa matag lungag sa panit.
-
Kita maluwas pinaagi sa Iyang grasya “human sa tanan nga [atong] mabuhat.”
-
Samtang kita moduol ni Kristo, dili lang Siya mopasaylo sa atong mga sala, apan Siya mousab sa atong kinaiyahan, “nga [kita] wala nay tinguha sa pagbuhat og daotan.”
-
Si Kristo kanunay mimando sa iyang katawhan sa pagtukod og mga templo, diin Siya mopakita sa Iyang Kaugalingon ngadto kanila ug motuga kanila og gahom gikan sa kahitas-an.
Ako mopamatuod nga ang tanan niini nga mga butang tinuod ug gikinahanglan. Kini nagpakita lamang sa gamay nga bahin sa kahingpitan nga gipahiuli ni Jesukristo pinaagi ni Joseph Smith agi og tubag sa balikbalik nga hangyo ni Joseph alang sa direksiyon.
Pag-uswag Niini nga Gingharian
Niadtong 1842, si Joseph misulat og maanindot nga mga butang nga moabot sa kataposang dispensasyon. Siya mipahayag nga atol sa atong adlaw, “ang langitnon nga [Pagkapari] makighiusa uban sa kalibotanon nga [Pagkapari], sa pagpahinabo niadtong mga dagko nga mga katuyoan; ug samtang kita magkahiusa sa usa ka sama nga katuyoan, sa pagpalambo sa gingharian sa Dios, ang langitnon nga [Pagkapari] dili lamang maghinan-aw.”
Ngadto sa iyang higala nga si Benjamin Johnson, si Joseph miingon, “Benjamin, [kon ako mamatay] ako dili halayo kanimo, ug kon anaa na sa pikas tabil, makigtambayayong [gihapon] ako kanimo, ug uban sa dakong dugang gahom, sa pag-uswag niini nga gingharian.”
Niadtong Hunyo 27, 1844, si Joseph Smith ug ang iyang igsoon si Hyrum gipatay. Ang lawas ni Joseph gilubong, apan ang iyang pagpamatuod mopadayon nga molanog sa tibuok kalibotan ug sa akong kalag:
“Ako nakakita og usa ka panan-awon; ako nasayod niini, ug ako nasayod nga ang Dios nasayod niini, ug ako dili makalimod niini.”
“Wala gayud ako moingon kaninyo nga perpekto ako; apan walay sayop sa mga padayag nga akong gipanudlo.”
“Ang sukaranan nga mga baruganan sa atong relihiyon mao ang pagpamatuod sa mga Apostoles ug mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabutan sa atong relihiyon sumpay lamang niini.”
Unsa ang gisulti ni Juan Bautista tingali mao usab ang gisulti ni Joseph Smith: “Dihay usa ka tawo nga gipadala gikan sa Dios nga ginganlan og [Joseph]. … Kini siya dili mao ang Kahayag, hinunoa siya mianhi, aron sa pagpanghimatuod mahitungod sa kahayag,” “aron ang tanan motuo pinaagi kaniya.”
Nagtuo ako. Ako nagtuo ug ako segurado nga si Jesus mao ang Kristo ang Anak sa buhi nga Dios. Ako mopamatuod nga ang buhi nga Dios mao ang atong mahigugmaong Amahan. Ako nasayod niini tungod kay ang tingog sa Ginoo misulti kanako, ug mao usab ang tingog sa Iyang mga sulugoon, ang mga apostol ug mga propeta, lakip ug sugod ni Joseph Smith.
Ako mopamatuod nga si Joseph Smith sa kaniadto ug sa karon usa ka propeta sa Dios, usa ka saksi ug sulugoon ni Ginoong Jesukristo. Siya “[napanalanginan] nga miabli niini nga [kataposang] dispensasyon,” ug kita napanalanginan sa iyang gibuhat.
Ang Ginoo misugo ni Oliver Cowdery ug kanatong tanan nga, “[Mo]barog uban sa akong sulogoon nga si Joseph, nga matinud-anon.” Ako mopamatuod nga ang Ginoo mibarog uban sa Iyang sulogoon nga si Joseph ug ang Pagpahiuli nga nahitabo pinaagi kaniya.
Si Joseph Smith karon kabahin na nianang langitnong pagkapari nga iyang gipamulong. Sama sa gisaad niya sa iyang higala, dili siya layo kanato, ug sa pikas tabil, siya makigtambayayong kanato, ug uban sa dakong dugang nga gahom, aron sa pagpauswag niini nga gingharian. Uban sa hingpit nga kalipay ug pasalamat, akong ipalanog ang akong tingog sa “pagdayeg sa tawo nga nakigsulti ni Jehova.” Ug labaw sa tanan, pagdayeg ngadto ni Jehova, kinsa nakigsulti niana nga tawo! Sa ngalan ni Jesukristo, amen.