Ang Doktrina ni Jesukristo Yano
Ako mosaksi sa sagrado nga buhat sa pagtudlo sa mga anak sa Langitnong Amahan sa yano nga doktrina ni Jesukristo.
Kitang tanan adunay mga sakop sa pamilya nga atong gihigugma kinsa gitental ug gisulayan sa daw kanunay nga mga pwersa ni Satanas, ang tiglaglag, kinsa buot nga mamiserable ang tanang mga anak sa Dios. Alang sa kadaghanan kanato, may mga gabii nga dili makatulog. Kita misulay nga palibotan ang mga tawo nga nameligro sa matag pwersa alang sa kaayohan. Kita nangamuyo diha sa pag-ampo ngadto kanila. Kita nahigugma kanila. Kita nagpakita sa labing maayo nga ehemplo nga atong mahimo.
Si Alma, usa ka maalamon nga propeta gikan sa karaang mga panahon, miatubang sa susama nga mga pagsulay. Ang mga tawo nga iyang gipangulohan ug gihigugma kanunay nga giatake sa usa ka mabangis nga kaaway, apan sila naningkamot gihapon sa pagpadako og matarong nga mga anak sa usa ka kalibotan sa pagkadaotan. Gibati ni Alma nga ang iyang bugtong nga paglaom sa kadaogan mao ang usa ka pwersa nga kita usahay mopakaubos ug kasagaran dili kaayo gamiton. Nangamuyo siya alang sa tabang sa Dios.
Si Alma nasayod nga aron ang Dios motabang, ang paghinulsol gikinahanglan niadtong iyang gipangulohan, ingon man sa iyang mga kaaway. Sa ingon, mipili siya og lahi nga pamaagi kaysa pagpakiggubat.
Ang Basahon ni Mormon mihulagway niana niini nga paagi: “Ug karon, kay ang pagsangyaw sa pulong adunay dakong kalagmitan nga modala sa katawhan sa pagbuhat niana nga makiangayon—oo, kini adunay mas dako nga epekto diha sa mga hunahuna sa katawhan kay sa espada, o sa bisan unsa pa, nga nahitabo kanila—busa si Alma naghunahuna nga maayong sulayan nila ang gahom sa pulong sa Dios.”
Ang pulong sa Dios mao ang doktrina nga gitudlo ni Jesukristo ug sa Iyang mga propeta. Si Alma nasayod nga ang mga pulong sa doktrina may dakong gahom.
Sa ika-18 nga seksiyon sa Doktrina ug mga Pakigsaad, ang Ginoo mipadayag sa pundasyon sa Iyang doktrina:
“Kay, tan-awa, Ako nagsugo sa tanan nga mga tawo sa tanan nga dapit sa paghinulsol. …
“Kay, tan-awa, ang Ginoo nga imong Manunubos nag-antos sa kamatayon diha sa unod; busa siya nag-antos sa kasakit sa tanan nga mga tawo, nga unta ang tanan nga mga tawo maghinulsol ug moduol ngadto kaniya.
“Ug siya nabanhaw pag-usab gikan sa patay, nga siya unta modala sa tanan nga mga tawo ngadto kaniya, sa mga kondisyon sa paghinulsol.”
“Ug kamo moluhod ug mosimba sa Amahan pinaagi sa akong ngalan.
“… Kamo kinahanglan gayod maghinulsol ug magpabunyag, diha sa ngalan ni Jesukristo.”
“Pangayo sa Amahan pinaagi sa akong ngalan, sa hugot nga pagtuo nga ikaw makadawat, ug ikaw makabaton sa Espiritu Santo.”
“Ug karon, human kamo makadawat niini, kamo kinahanglan gayod maghupot sa akong mga sugo diha sa tanan nga mga butang.”
“Dad-a diha kanimo ang ngalan ni Kristo, ug pamulong sa kamatuoran diha sa pagkamaligdong.
“Ug kutob sa naghinulsol ug nabunyagan diha sa akong ngalan, nga si Jesukristo, ug molahutay ngadto sa kataposan, ang mao maluwas.”
Niadto nga pipila ka tudling, ang Manluluwas naghatag kanato sa hingpit nga ehemplo kon kinahanglan unsaon nato pagtudlo ang Iyang doktrina. Kini nga doktrina mao nga ang hugot nga pagtuo diha ni Ginoong Jesukristo, paghinulsol, bunyag, pagdawat sa gasa sa Espiritu Santo, ug paglahutay hangtod sa kataposan mopanalangin sa tanang anak sa Dios.
Samtang itudlo nato kini nga mga baroganan ngadto niadtong atong gihigugma, ang Espiritu Santo motabang kanato nga masayod sa kamatuoran. Tungod kay kita nagkinahanglan sa mga pag-aghat sa Espiritu Santo, kita kinahanglang molikay sa pagpangagpas o personal nga interpretasyon nga molapas sa pagtudlo sa tinuod nga doktrina.
Kana mahimong lisod buhaton kon gihigugma ninyo ang tawo nga inyong gipaningkamotan nga maimpluwensiya. Siya mahimong mibaliwala sa doktrina nga gitudlo. Kini makapatental sa pagsulay og bag-ong butang o makapahinam. Apan ang Espiritu Santo mopadayag lamang sa espiritu sa kamatuoran kon kita magmatngon ug magmabinantayon nga dili molapas sa pagtudlo sa tinuod nga doktrina. Usa sa labing segurado nga mga pamaagi sa paglikay nga maduol sa sayop nga doktrina mao ang pagpili nga mahimong yano sa atong pagtudlo. Ang kahilwasan maangkon pinaagi niana nga pagkayano, ug gamay ang mawala.
Ang yano nga pagtudlo magtugot kanato sa pagpakigbahin sa makaluwas nga doktrina sa sayo pa, samtang ang mga bata nagpabilin nga wala matandog sa mga tentasyon sa tiglimbong nga moatubang kanila sa kaulahian, samtang ang mga kamatuoran nga kinahanglan nilang makat-onan layo pa sa pagkalumos sa kasaba sa social media, mga kaedad, ug sa ilang kaugalingong personal nga mga pakigbisog. Kinahanglang pahimuslan nato ang matag kahigayonan sa pagpakigbahin sa mga pagtulun-an ni Jesukristo ngadto sa mga bata. Kini nga mga gutlo sa pagtudlo bililhon ug mas gamay kon itandi sa walay hunong nga mga paningkamot sa kaatbang nga mga pwersa. Alang sa matag oras nga gigahin sa pagsilsil og doktrina ngadto sa kinabuhi sa usa ka bata, adunay dili maihap nga mga oras sa oposisyon nga napuno sa mga mensahe ug mga imahe nga naghagit o nagbaliwala niadtong makaluwas nga mga kamatuoran.
Mahimong maghunahuna ang pipila kaninyo kon mas maayo ba nga mas mapaduol ang inyong mga anak kaninyo pinaagi sa paglingaw-lingaw, o tingali mangutana kamo kon ang bata magsugod sa pagbati nga nabug-atan sa inyong mga pagtulun-an. Hinuon, kinahanglang hunahunaon nato, “Uban sa gamay kaayo nga panahon ug diyutay kaayo nga mga kahigayonan, unsa man nga mga pulong sa doktrina ang akong mapakigbahin nga makapalig-on kanila batok sa dili malikayan nga mga pag-ataki sa ilang hugot nga pagtuo?” Ang mga pulong nga inyong ipakigbahin karon mahimong mao ang mga pulong nga ilang mahinumdoman, ug ang karon molabay sa dili madugay.
Kanunay nakong gidayeg ang debosyon sa akong lola sa tuhod nga si Mary Bommeli sa pagpakigbahin sa doktrina ni Jesukristo. Ang iyang pamilya gitudloan sa mga misyonaryo didto sa Switzerland sa dihang siya 24 anyos.
Human mabunyagan, si Mary nagtinguha sa pag-apil sa mga Santos sa Amerika, busa siya mibiyahe gikan sa Switzerland paingon sa Berlin ug nakakaplag og trabaho sa usa ka babaye kinsa miempleyo kaniya sa paghablon og panapton alang sa sinina sa pamilya. Si Mary nagpuyo sa lawak alang sa sulugoon ug mipahimutang sa iyang hablonan sa sala sa balay.
Niadtong panahona, supak sa balaod ang pagtudlo sa doktrina sa Ang Simbahan ni Jesukristo sa mga Santos sa Ulahing mga Adlaw didto sa Berlin. Apan nakaplagan ni Mary nga dili siya makapugong sa pagpakigbahin sa mga butang nga iyang nakat-onan. Ang babaye nga miempleyo kaniya ug ang iyang mga higala magpundok libot sa hablonan aron maminaw ni Mary nga magtudlo. Siya namulong kabahin sa pagpakita sa Langitnong Amahan ug ni Jesukristo ngadto ni Joseph Smith, sa pagbisita sa mga anghel, ug sa Basahon ni Mormon. Nahinumdom sa mga asoy ni Alma, mitudlo siya mahitungod sa doktrina sa Pagkabanhaw. Siya mipamatuod nga ang mga pamilya mahimong mahiusa pag-usab sa celestial nga gingharian.
Ang kadasig ni Mary sa pagpakigbahin sa doktrina sa gipahiuli nga ebanghelyo sa wala madugay nakahimo og kagubot. Wala madugay nga gikuha si Mary sa pulis aron ibilanggo. Padulong didto, nangutana siya sa pulis sa ngalan sa huwes nga iyang atubangon pagkasunod buntag. Nangutana usab siya bahin sa iyang pamilya ug kon siya usa ba ka maayong amahan ug bana. Ang pulis mihulagway sa huwes isip usa ka makasasala nga tawo.
Sa bilanggoan, si Mary nangayo og lapis ug pipila ka papel. Siya migahin sa gabii sa pagsulat og usa ka sulat ngadto sa huwes, nagsaksi sa Pagkabanhaw ni Jesukristo sama sa gihulagway diha sa Basahon ni Mormon, naghisgot sa kalibotan sa espiritu, ug nagpasabot sa paghinulsol. Gisugyot niya nga ang huwes magkinahanglan og panahon sa pagpamalandong sa iyang kinabuhi sa dili pa moatubang sa kataposang paghukom. Siya misulat nga siya nakahibalo nga siya adunay daghang angayan nga hinulsolan, daghan nga makapaguol gayod sa iyang pamilya ug makahatag kaniya og hilabihan nga kasubo. Pagkabuntag, sa dihang nahuman na niya ang iyang sulat, gihatag niya kini ngadto sa pulis ug gihangyo siya nga ihatod kini ngadto sa huwes, ug miuyon siya sa pagbuhat niini.
Pagkataudtaod, ang pulis gipatawag sa huwes ngadto sa iyang buhatan. Ang sulat nga gihimo ni Mary dili malalis nga ebidensya nga siya nagtudlo sa doktrina sa gipahiuli nga ebanghelyo ug, sa pagbuhat niana, nagsupak sa balaod. Apan, wala madugay ang pulis mibalik sa selda ni Mary. Siya miingon kaniya nga ang tanan nga demanda gihunong ug nga siya gawasnon nang makalakaw. Ang iyang pagtudlo sa doktrina sa gipahiuli nga ebanghelyo ni Jesukristo nakahimo kaniya nga mabalhog sa bilanggoan. Ug ang iyang pagpahayag sa doktrina sa paghinulsol ngadto sa huwes mao ang nakapagawas kaniya sa bilanggoan.
Ang pagtudlo ni Mary Bommeli wala matapos human nga siya nakagawas. Ang rekord sa iyang mga pulong mipreserbar sa tinuod nga doktrina ngadto sa mga henerasyon nga wala pa matawo. Ang iyang pagtuo nga bisan ang bag-ong kinabig makatudlo sa doktrina ni Jesukristo nagsiguro nga ang iyang mga kaliwat mapalig-on sa ilang kaugalingong mga gubat sa pagbuntog sa tentasyon.
Samtang buhaton nato ang atong labing maayo sa pagtudlo niadtong atong gihigugma mahitungod sa doktrina ni Jesukristo, pipila gihapon ang dili mosanong. Ang mga pagduda mahimong mosulod sa inyong hunahuna. Kamo tingali mokwestiyon kon kamo nakahibalo ba pag-ayo sa doktrina sa Manluluwas aron sa pagtudlo niini sa epektibong paagi. Ug kon kamo mihimo na og mga pagsulay sa pagtudlo niini, mahimong maghunahuna kamo kon ngano nga dili kaayo makita ang positibong mga epekto. Ayaw padala niadto nga mga pagduhaduha. Dangop ngadto sa Dios alang sa tabang.
“Oo, ug pangamuyo ngadto sa Dios alang sa tanan nimong kabuhian; … himoa nga ang tanang pagbati sa imong kasingkasing maiya sa Ginoo sa kahangtoran.”
“Ug karon manghinaot ko nga magmapainubsanon kamo, ug magmasinugtanon ug magmalumo; sayon nga hangyoon; puno sa pailob ug mainantoson; mapugnganon sa tanang butang; makugihon nga motuman sa mga sugo sa Dios sa tanang panahon; mangayo sa bisan unsang mga butang nga inyong gikinahanglan, sa espirituwal ug sa temporal; magpasalamat kanunay sa Dios alang sa bisan unsang mga butang nga madawat ninyo.”
Kon kamo mag-ampo, kon kamo makig-istorya sa Dios, ug kon kamo mangamuyo sa Iyang tabang alang sa inyong hinigugma, ug kon kamo mopasalamat Kaniya dili lang sa tabang apan sa pailob ug kaaghop gumikan kay wala madawat ang tanan ninyong gitinguha dihadiha dayon o tingali dili gayod madawat, ako mosaad kaninyo nga kamo mas maduol ngadto Kaniya. Kamo mahimong makugihon ug mainantoson. Ug dayon kamo masayod nga inyong gibuhat ang tanan nga inyong mahimo sa pagtabang niadtong inyong gihigugma ug niadtong inyong giampo sa pagsagubang latas sa pagsulay ni Satanas sa pagpugong sa ilang pag-uswag.
“Apan kadtong nagahulat sa Ginoo magabag-o sa ilang kusog; sila manlupad pinaagi sa mga pako ingon sa mga agila; sila manalagan, ug dili makapuyan: sila manlakaw, ug dili mangaluya.”
Makakaplag kamo og paglaom diha sa talaan sa kasulatan sa mga pamilya. Atong mabasa bahin niadtong kinsa mitalikod gikan sa unsay gitudlo kanila o kinsa nakigbisog sa Dios alang sa kapasayloan, sama ni Alma nga Batan-on, sa anak nga mga lalaki ni Mosiah, ug ni Enos. Sa ilang mga panahon sa kalisod, sila nahinumdom sa mga pulong sa ilang mga ginikanan, mga pulong sa doktrina ni Jesukristo. Ang paghinumdom miluwas kanila. Ang inyong pagtudlo nianang sagrado nga doktrina mahinumdoman.
Mosaksi ko sa sagradong buhat sa pagtudlo sa mga anak sa Langitnong Amahan sa yano nga doktrina ni Jesukristo, nga nagtugot kanato nga malimpyohan sa espirituhanong paagi ug sa kataposan maabiabi ngadto sa presensiya sa Dios, sa pagpuyo uban Kaniya ug sa Iyang Anak diha sa himaya hangtod sa kahangtoran uban sa atong mga pamilya. Sa ngalan ni Jesukristo, amen.