Ang Hingpit nga Kalipay sa Atong Katubsanan
Ang gugma ug gahom ni Jesukristo makaluwas sa matag usa kanato gikan sa atong mga sayop, mga kahuyang, ug mga sala ug makatabang nato nga mahimong mas labaw pa kon unsa kita.
Mga 10 ka tuig na ang milabay akong gibati nga magdibuho og hulagway sa Manluluwas. Bisan ako usa ka artist, kini mabati nga medyo lisod og gamay. Unsaon man nako sa pagdibuho og hulagway ni Jesukristo nga mopabati sa Iyang Espiritu? Asa man ko magsugod? Ug asa ko makakita og higayon?
Bisan pa sa akong mga pangutana, nakadesisyon ko nga magpadayon sa pagdibuho ug mosalig nga ang Ginoo motabang nako. Apan kinahanglan ko nga mopadayon ug isalig ang mga posibilidad ngadto Kaniya. Nag-ampo ko, namalandong, nagsiksik, ug nag-sketch ug napanalanginan nga makakita og tabang ug mga kapanguhaan. Ug ang kanhi puti nga canvas nagsugod nga mahimong mas nindot.
Ang proseso dili sayon. Usahay kini dili mao kon unsa ang akong gilaoman. Usahay adunay mga higayon nga nindot ang mga stroke ug mga ideya. Ug daghang higayon, nga ako kinahanglan lang nga mosulay og usab ug usab ug usab.
Sa dihang nagtuo ko nga ang oil painting sa kataposan nahuman ug uga na, nagsugod ko sa pagbutang og sihag nga varnish aron maprotektahan kini gikan sa hugaw ug abog. Samtang gibuhat nako, akong nabantayan ang buhok sa painting nga nagsugod sa pagkausab, nabuling, ug nagkatag. Naamgohan dayon nako nga sayo ra kaayo nako nabutang ang varnish, nga adunay mga bahin nga basá pa!
Akong napapas ang usa ka bahin sa akong painting gamit ang varnish. Naguol kaayo ko sa nahitabo. Gibati nako nga murag akong giguba ang unsay gitabang nako sa Dios nga mahimo. Mihilak ko ug lain gyod ang akong gibati. Sa akong kadismaya, gibuhat nako ang unsay kasagaran nga buhaton sa ingon ani nga sitwasyon: mitawag ko sa akong inahan. Siya maalamon ug kalmado nga miingon, “Dili na nimo mabakwi ang nawala na, apan buhata ang kutob sa imong mahimo sa unsay anaa nimo.”
And I Partook [Ug Ako Miambit], ni Kristin M. Yee
Mao nga nag-ampo ko ug nangamuyo alang sa tabang ug nagdibuho tibuok gabii aron ayohon ang mga butang. Ug nakahinumdom ko nga gitan-aw nako ang painting pagka buntag—mas nindot na kining tan-awon kay sa kaniadto. Nganong nahimo kanang posible? Ang akong gihunahuna nga usa ka sayop nga dili na matarong nahimong usa ka oportunidad alang sa Iyang maluluy-on nga kamot nga mapakita. Siya wala pa mahuman sa painting, ug Siya wala pa mahuman kanako. Dako nga kamaya ug kahupayan ang mipuno sa akong kasingkasing. Akong gidayeg ang Ginoo alang sa Iyang kaluoy, alang niini nga milagro nga wala lang moluwas sa painting apan nagtudlo nako og dugang mahitungod sa Iyang gugma ug gahom sa pagluwas sa matag usa kanato gikan sa atong mga sayop, mga kahuyang, ug mga sala ug sa pagtabang nato nga mahimong mas maayo pa.
Sama nga ang gilawmon sa akong pasalamat ngadto sa Manluluwas nadugangan samtang Siya maluluy-on nga mitabang nako sa pag-ayo sa “dili na maayo” nga painting, ang akong personal nga gugma ug pasalamat usab alang sa Manluluwas milambo samtang ako nakigtambayayong Kaniya sa pagwagtang sa akong mga kahuyang ug mapasaylo sa akong mga sayop. Ako mapasalamaton sa kahangtoran sa akong Manluluwas nga ako mahimong mag-usab ug mahimong malimpyohan. Anaa Kaniya ang akong kasingkasing, ug naglaom ko nga mabuhat ang unsay Iyang gustong ipabuhat kanako ug nga ako mamahimo.
Ang paghinulsol nagtugot kanato nga mobati sa gugma sa Dios ug makaila ug mahigugma Kaniya sa mga paagi nga dili gayod nato mahibaloan. Sa babaye nga midihog sa mga tiil sa Manluluwas, Siya miingon, “Ang iyang daghan nga mga sala, gipasaylo; kay dako man ang iyang paghigugma: apan siya nga gipasayloan og diyotay lamang, diyotay rag paghigugma.” Siya nahigugma og dako ni Jesus, tungod kay Siya mipasaylo kaniya og dako.
Walay lain nga ingon ana kadako nga kahupayan ug paglaom sa pagkahibalo nga kita mahimong mosulay og usab—nga, sama sa gitudlo ni Elder David A. Bednar, kita makadawat og padayong pagkalimpyo sa atong mga sala pinaagi sa makabalaan nga gahom sa Espiritu Santo samtang kita tinud-anay ug sinsero nga maghinulsol.
Ang makatubos nga gahom ni Jesukristo usa sa labing dako nga gisaad nga mga panalangin sa atong mga pakigsaad. Hinuktoki kini samtang kamo moapil sa sagrado nga mga ordinansa. Kon wala kini, kita dili makabalik sa panimalay ngadto sa presensya sa atong Amahan sa Langit ug niadtong atong gihigugma.
Ako nakahibalo nga ang atong Ginoo ug Manluluwas, si Jesukristo, gamhanan sa pagluwas. Isip ang Anak sa Dios, kinsa miula alang sa mga sala sa kalibotan ug mitugyan sa Iyang kaugalingong kinabuhi ug mibawi niini pagbalik, Siya nagkupot sa gahom sa katubsanan ug pagkabanhaw. Iyang gihimo nga posible ang imortalidad alang sa tanan ug kinabuhing walay kataposan alang niadtong mipili Kaniya. Ako nakahibalo nga pinaagi sa Iyang maulaong sakripisyo, kita makahinulsol ug tinud-anay nga malimpyohan ug matubos. Milagro kini nga Siya nahigugma kaninyo ug kanako niini nga paagi.
Nangutana ang Manluluwas, “Dili ba kamo mobalik ngari kanako, ug maghinulsol sa inyong mga sala, ug makabig, nga aron unta Ako moayo kaninyo?” Siya makaayo sa “mga dapit nga nagun-ob” sa inyong kalag—mga dapit nga nahimong uga, sapnot, ug biniyaan tungod sa sala ug kasub-anan— ug “himoon ang [imong] kamingawan nga sama sa Eden.”
Sama nga kita dili makasabot sa paghingutas ug gilawmon sa pag-antos ni Kristo sa Getsemani ug didto sa krus, kita usab “dili makasukod sa kinutoban ni matugkad ang gilawmon sa [Iyang] balaan nga pagpasaylo,” kaluoy, ug gugma.
Ikaw tingali mobati usahay nga dili posible nga matubos, nga tingali ikaw mao ang eksepsiyon sa gugma sa Dios ug sa maulaong gahom sa Manluluwas tungod sa unsay imong gipakigbisogan o tungod sa unsay imong nabuhat. Apan ako mopamatuod nga ang Manluluwas kanunay nga motabang ug mopanalangin kanimo. Ang Manluluwas “mikunsad sa tanan nga butang” ug anaa sa balaan nga posisyon sa pag-alsa kanimo ug pagkuha kanimo gikan sa labing ngitngit nga bung-aw ug modala kanimo ngadto sa “iyang katingalahan nga kahayag.” Pinaagi sa Iyang mga pag-antos, Siya nakahimo og agianan alang sa matag usa kanato nga mabuntog ang atong personal nga mga kahuyang ug mga sala. “Anaa Kaniya ang tanang gahom sa pagluwas sa matag tawo nga motuo sa iyang ngalan ug magdala og bunga nga angay sa paghinulsol.”
Sama nga nagkinahanglan og buhat ug pangamuyo alang sa tabang sa langit aron maayo ang painting, nagkinahanglan og buhat, sinseridad sa kasingkasing, ug kamapainubsanon aron makadala og “bunga nga angay sa paghinulsol.” Kini nga mga bunga naglakip sa pagpakita sa atong hugot nga pagtuo ug pagsalig ni Jesukristo ug sa Iyang maulaong sakripisyo, paghalad ngadto sa Dios og masulub-on nga kasingkasing ug mahinulsolon nga espiritu, mokompisal ug mobiya sa sala, mopahiuli nianang naguba kutob sa atong mahimo, ug maningkamot nga mopuyo nga matarong.
Aron tinud-anay nga maghinulsol ug mausab, kinahanglan kita una “makombinser sa atong mga sala.” Ang usa ka tawo dili makakita sa panginahanglan nga motumar og tambal hangtod nga sila makasabot nga sila nasakit. Tingali adunay mga higayon nga kita dili gusto nga mosusi sa atong mga hunahuna ug gibuhat ug tan-awon kon hain ang kinahanglan gayod nga ayohon.
Sa mga sinulat ni C. S. Lewis, si Aslan mihatag niini nga mga pulong ngadto sa usa ka tawo nga nalambod sa iyang kaugalingon nga mga paagi: “Ah [katawhan], maayo kaayo ninyo nga gipanalipdan ang inyong mga kaugalingon [gikan] sa mga butang nga makaayo unta kaninyo!”
Asa man kaha ka ug ako makapanalipod sa atong mga kaugalingon gikan niadtong mga butang nga tingali makaayo kanato?
Dili nato panalipdan ang atong mga kaugalingon gikan sa kaayohan nga gitinguha sa Dios nga ipanalangin kanato. Gikan sa gugma ug kaluoy nga gitinguha Niya nga atong mabati. Gikan sa kahayag ug kahibalo nga gitinguha Niya nga itanyag kanato. Gikan sa pagkaayo nga Siya nakahibalo nga kita nagkinahanglan kaayo. Gikan sa mas lawom nga relasyon sa pakigsaad nga gitinguha Niya alang sa tanan Niyang mga anak nga lalaki ug mga anak nga babaye.
Ako mag-ampo nga unta atong ipadaplin ang bisan unsang “mga hinagiban sa gubat” nga kita nakabantay o wala makabantay nga mialsa aron panalipdan ang atong mga kaugalingon gikan sa mga panalangin sa gugma sa Dios. Mga hinagiban sa garbo, pagkahakog, kahadlok, pagdumot, kahiubos, pagpasagad, dili makiangayon nga paghukom, mga pagselos—bisan unsang butang nga mopugong kanato gikan sa paghigugma sa Dios sa tibuok natong kasingkasing ug pagtuman sa tanan natong mga pakigsaad uban Kaniya.
Samtang kita mopuyo sa atong mga pakigsaad, ang Ginoo makahatag kanato sa tabang ug gahom nga atong gikinahanglan aron mailhan ug mabuntog ang atong mga kahuyang, lakip na ang espirituhanong parasito sa garbo. Ang atong propeta miingon:
“Ang paghinulsol mao ang agianan ngadto sa kaputli, ug ang kaputli magdala og gahom.”
“Ug oh, [pagkadako] sa atong panginahanglan sa Iyang gahom sa mga adlaw nga umaabot.”
Sama sa akong painting, ang Ginoo wala pa mahuman kanato kon kita makahimo og sayop, ni Siya moikyas kon kita mapandol. Ang atong panginahanglan sa pagkaayo ug tabang dili palas-anon ngadto Kaniya, apan mao gayod ang rason nga Siya mianhi. Ang Manluluwas Mismo miingon:
“Tan-awa, Ako mianhi dinhi sa kalibotan aron sa pagdala sa katubsanan ngadto sa kalibotan, aron sa pagluwas sa kalibotan gikan sa sala.”
“Ang akong bukton sa kaluoy gitunol nganha kaninyo, ug kinsa kadto nga moduol, Ako modawat kaniya; ug bulahan kadto kinsa moduol ngari kanako.”
Mao nga duol—duol kamo nga naluya, gikapoy, ug naguol, dali ug biyai ang inyong mga buluhaton ug pagkaplag og kapahulayan diha Kaniya kinsa labing nahigugma kaninyo. Pas-ana ang Iyang yugo, kay Siya malumo ug mapaubsanon sa kasingkasing.
Ang atong Langitnong Amahan ug Manluluwas nakakita kanimo. Sila nasayod sa imong kasingkasing. Sila nag-atiman sa unsay imong giatiman, lakip na kadtong imong gihigugma.
Ang Manluluwas makatubos nianang nawala, lakip na ang nabuak ug naguba nga mga relasyon. Siya mihimo og paagi alang sa tanan nga nadagma nga matubos—sa paghatag og kinabuhi niadtong mibati nga namatay ug nawad-an og paglaom.
Kon ikaw nakigbisog sa usa ka sitwasyon nga sa imong hunahuna nabuntog na unta nimo karon, ayaw paghunong. Pagmapailobon sa imong kaugalingon, tumana ang imong mga pakigsaad, paghinulsol kanunay, pangayoa ang tabang sa imong mga lider kon gikinahanglan, ug adto sa balay sa Ginoo sa kanunay kon mahimo nimo. Paminaw ug sunda ang mga pag-aghat nga Iyang ipadala kanimo. Dili Niya talikdan ang Iyang relasyon sa pakigsaad uban kanimo.
Adunay nahimong lisod ug komplikado nga mga relasyon sa akong kinabuhi nga akong gipakigbisogan ug tinud-anay nga gipaningkamotan nga momaayo. Usahay akong mabati nga mas kanunay ko nga napakyas kay sa milampos. Naghunahuna ko, “Wala ba nako masulbad ang mga butang sa miagi? Wala ba gayod nako mabuntog ang akong mga kahuyang?” Akong nakat-onan sa paglabay sa panahon nga dili gayod ako depektoso; kondili, sa kasagaran adunay dugang nga buhatonon ug dugang nga pagkaayo nga gikinahanglan.
Si Elder D. Todd Christofferson nagtudlo: “Segurado gayod nga ang Ginoo mopanalangin sa tawo nga nagtinguha nga takos nga moatubang sa hukmanan, kinsa determinadong naningkamot matag adlaw nga pulihan ang kahuyang og kalig-on. Ang tinuod nga paghinulsol, tinuod nga kausaban mahimong magkinahanglan og balik-balik nga pagsulay, apan adunay butang nga makapalunsay ug makapabalaan niana nga paningkamot. Ang balaang pagpasaylo ug pagkaayo hilom nga moabot niana nga kalag.”
Matag adlaw usa ka bag-ong adlaw nga puno sa paglaom ug mga posibilidad tungod ni Jesukristo. Matag adlaw kamo ug ako mahimong makahibalo, sama sa gipahayag ni Inahang Eva, “sa kalipay sa atong katubsanan,” sa kalipay nga mahimong tibuok, sa kalipay nga mabati ang walay kapakyasan nga gugma sa Dios alang kaninyo.
Nakahibalo ko nga ang atong Amahan sa Langit ug ang Manluluwas nahigugma kaninyo. Si Jesukristo mao ang Manluluwas ug Manunubos sa tanang katawhan. Siya buhi. Pinaagi sa Iyahang maulaong sakripisyo, ang mga higot sa sala ug kamatayon mabugto sa kahangtoran aron nga kita mahimong gawasnon sa pagpili og pagkaayo, katubsanan, ug kinabuhing walay kataposan kauban niadtong atong mga gihigugma. Ug ako mopamatuod niining mga butanga sa Iyang ngalan, ni Jesukristo, amen.