Ang Iyang Kamot Andam nga Motabang Kanato

Ni Elder Juan Pablo Villar

Sa Seventy

Kon moduol kita kang Jesukristo uban sa hugot nga pagtuo, Siya makaayo kanako sa espirituhanong paagi.

Sa bata pa ko, uban sa tibuok pamilya nagbakasyon kami sa baybay duol sa usa ka baybayon sa akong lumad nga nasod, sa Chile. Mahinamon ko nga makagahin og pipila ka adlaw nga maglingaw sa ting-init kauban sa akong pamilya. Nalipay usab kaayo ko kay nagtuo ko nga sa kataposan makaapil na ko ug mobuhat sa unsay kasagaran gibuhat sa duha nako ka magulang nga mga lalaki sa paglingaw-lingaw ngadto sa tubig.

Usa ka adlaw, ang akong mga igsoong lalaki nangadto sa pagdula kon asa mabungkag ang mga balod, ug mibati ko nga dako na ko ug igo na ang kahingkod nga mosunod nila. Samtang nagpadulong ko sa maong dapit, akong nabantayan nga ang mga balod mas dagko kay sa unsay makita gikan sa baybay. Sa kalit, usa ka balod ang paspas kaayong naduol kanako, nga nakuratan ko. Akong gibati nga sama og ang gahom sa kinaiyahan midat-og kanako, ug naguroy ko ngadto sa kahiladman sa dagat. Dili na nako makita o mabati ang timailhan asa ang daplin kay gikusokuso ko og maayo. Sa dihang nagtuo ko nga ang akong panimpalad dinhi sa yuta ingon og matapos na, mibati ko nga dunay kamot nga mibira nako padulong sa ibabaw. Sa kataposan, makita na nako ang adlaw ug nakaginhawa.

Ang igsoon nakong si Claudio nakakita sa akong mga pagsulay nga molihok isip dako na nga tawo ug miadto sa pagluwas kanako. Dili ako layo sa baybayon. Bisan pa og mabaw ra ang tubig, wala ko masayod unsay buhaton ug wala makabantay nga kaya ra diay nakong tabangan ang akong kaugalingon. Giingnan ko ni Claudio nga kinahanglan kong mag-amping ug kon gusto ko, pwede ko niyang tudloan. Bisan sa ginalon nga tubig nga akong naimom, ang akong garbo ug tinguha nga mahimong dako na mas milabaw, ug miingon ko, “Oo sige.”

Giingnan ko ni Pablo nga kinahanglan sugaton nako ang mga balod. Miingon ko sa akong kaugalingon nga seguradong mapildi ko sa pagkigbatok sa ingon ka dagkong balod.

Dihang nagpadulong ang bag-ong dakong balod, miingon dayon si Claudio: “Tan-awa ko, ingon ani ang imong buhaton.” Midagan si Claudio paingon sa nagpadulong nga balod ug misalom sa ilawom niini sa wala pa kini mabungkag. Nakadayeg kaayo ko sa iyang pagsalom nga wala nako makita ang sunod nga nagpadulong nga balod. Usab, nadala na pod ko sa kahiladman sa dagat ug gikusokuso sa mga pwersa sa kinaiyahan. Pipila ka segundos ang milabay, may mihakop sa akong kamot, ug mibira na usab kanako sa ibabaw ug mihanggab sa hangin. Ang kalayo sa akong garbo nagkahanaw.

Niini nga higayon, gidapit ako sa akong igsoon nga mosalom dungan niya. Sa iyang pagdapit, gisunod nako siya, ug nagdungan kami sa pagsalom. Mibati ko nga ingon og nagbuntog ko og sa labihan ka komplikadong hagit. Tinuod, dili gayod sayon, apan akong nahimo, salamat sa tabang ug ehemplo nga gipakita sa akong igsoon. Kaduha ang iyang kamot miluwas kanako, ang iyang ehemplo nagpakita unsaon nako pag-atubang ang akong hagit ug magmadaogon nianang adlawa.

Si Presidente Russell M. Nelson midapit kanato sa paghunahuna og celestial, ug gusto nakong sundon ang iyang tambag ug gamiton kini sa akong sugilanon sa ting-init.

Ang Gahom sa Manluluwas batok sa Kaaway

Kon maghunahuna kita og celestial, atong masabtan nga sa atong kinabuhi mag-atubang kita og mga hagit nga daw mas dagko kaysa atong kapasidad sa pagbuntog niini. Atol sa atong pagkamortal, ubos kita sa mga pag-atake sa kaaway. Sama sa mga balod nga may gahom sa paglumos kanako niana nga ting-init, mobati kitang walay gahom ug monunot na lang sa dili maayong kapalaran. Kadtong “isog kaayong mga balod” mokusokuso kanato pagmaayo. Apan ayaw kalimti kon si kinsa ang dunay gahom batok nianang mga balod, ug gani, sa tanan nga butang. Kana mao ang atong Manluluwas, si Jesukristo. Siya adunay gahom sa pagtabang kanato nga makalingkawas sa matag miserabling kondisyon o makadaot nga sitwasyon. Bisan og mobati man kita nga duol o layo Kaniya, Siya sa gihapon motabang kanato bisan unsa o asa man kita.

Kon moduol kita Kaniya pinaagi sa hugot nga pagtuo, kanunay Siya nga anaa, ug sa Iyang panahon, andam Siya ug matinguhaong mohakop sa atong mga kamot ug mobira kanato paingon sa luwas nga dapit.

Ang Manluluwas ug ang Iyang Ehemplo sa Pagpangalagad

Kon maghunahuna kita og celestial, atong maila si Jesukristo isip hingpit nga ehemplo sa pagpangalagad. Adunay sundanan alang nato diha sa mga kasulatan dihang Siya o ang Iyang mga disipulo mitabang og tawo nga nanginahanglan og tabang, pagluwas, pagpanalangin samtang mitunol sila sa ilang mga kamot. Sa akong giistorya, nasayod kong anaa ang akong igsoon, apan ang iyang pagkaanaa didto alang kanako dili pa igo. Nasayod si Claudio nga nagkalisod ko, ug miadto siya aron motabang sa pagkawas kanako gikan sa tubig.

Usahay, maghunahuna kita nga kinahanglan lang nga naa ta didto alang sa uban nga nagkinahanglan, ug sa daghang higayon duna kitay mas daghan pa nga mahimo. Ang pagkaadunay mahangtoron nga panglantaw makatabang sa atong pagdawat og pagpadayag sa pagtanyag og tukma sa panahon nga tabang sa uban nga nanginahanglan. Makasalig kita sa giya ug inspirasyon sa Espiritu Santo sa pag-ila unsa nga matang sa tabang ang gikinahanglan, matemporal man kini nga suporta sama sa kahupayan sa emosyon, pagkaon, tabang sa inadlawng buluhaton, o espirituhanong giya sa pagtabang sa uban sa ilang panaw aron maandam, sa paghimo, ug pagtahod sa sagradong mga pakigsaad.

Ang Manluluwas Andam nga Moluwas Kanato

Dihang si Pedro, ang pangulong Apostol, “milakaw ibabaw sa tubig sa pag-adto kang Jesus … nahadlok siya; ug nag-anam sa pagtidlom”; dayon “misinggit siya, nga nag-ingon, Ginoo, luwasa ako.” Nasayod si Jesus sa hugot nga pagtuo nga gigamit ni Pedro sa pagduol ngadto Kaniya didto sa tubig. Nasayod usab siya sa kahadlok ni Pedro. Sigon sa asoy, “dihadiha gituy-od ni Jesus … ang iyang kamot ug iyang gikuptan siya,” nag-ingon sa mosunod nga mga pulong: O tawong gamay og pagtuo, nganong nagduhaduha man ikaw?” Ang iyang mga pulong dili sa pagpangasaba kang Pedro apan sa pagpahinumdom kaniya nga Siya, ang Mesiyas, anaa uban kaniya ug sa mga disipulo.

Kon maghunahuna kita og celestial, madawat nato ang kumpirmasyon sulod sa atong kasingkasing nga si Jesukristo sa tinuod atong Tigluwas, atong Manlalaban ngadto sa Amahan, ug atong Manunubos. Kon ang atong pagtuo Kaniya atong gamiton, Siya moluwas kanato gikan sa atong napukan nga kahimtang, lapas sa atong mga hagit, mga kahuyang, ug mga panginahanglan niining temporal nga kinabuhi, ug hatagan kita sa gasa nga labaw sa tanan nga gasa, nga mao ang kinabuhing dayon.

Ang Manluluwas Dili Mohunong sa Pagtabang Kanato

Ang akong igsoon wala mohunong sa pagtabang kanako niana nga adlaw apan nagpadayon aron makakat-on ko unsaon sa paghimo niini nga ako ra. Nagpadayon siya, bisan og nagkinahanglan kini nga luwason ako sa duha ka higayon. Nagpadayon siya, bisan wala nako kini makuha sa pagsugod. Nagpadayon siya aron akong mabuntog ang hagit ug molampos. Kon maghunahuna kita og celestial, makaamgo kita nga ang Manluluwas anaa sa daghang higayon kon gikinahanglan aron mahatag ang tabang kon gusto kitang makakat-on, mag-usab, makabuntog, makasugakod, o molampos sa bisan unsa nga magdala og tinuod ug walay kataposang kalipay sa atong kinabuhi.

Ang mga Kamot sa Manluluwas

Ang mga kasulatan mipreserbar sa simbolo ug kahulogan sa mga kamot sa Manluluwas. Sa Iyang maulaon nga sakripisyo, gitusok ang Iyang mga kamot sa mga lansang aron mabutang Siya sa krus. Human sa Iyang Pagkabanhaw, mipakita Siya sa Iyang mga disipulo sa usa ka hingpit nga lawas, apan ang mga uwat sa Iyang mga kamot nagpabiling pahinumdom sa Iyang walay kinutobang sakripisyo. Ang iyang mga kamot kanunayng maanaa alang kanato, bisan og dili nato kini makita sa sinugdanan, kay Siya gipili sa atong Langitnong Amahan nga mahimo natong Manluluwas, ang Manunubos sa tanang tawhanong binuhat.

Kon maghunahuna ko og celestial, nasayod kong dili kita mapasagdan nga mag-inusara niining kinabuhia. Samtang kinahanglan kitang mag-atubang og mga hagit ug mga pagsulay, ang atong Langitnong Amahan nasayod sa atong mga kapabilidad ug nasayod nga atong mapas-an o mabuntog ang atong mga kalisdanan. Kinahanglan nga buhaton nato ang atong bahin sa pagduol ngadto Kaniya pinaagi sa pagtuo. Ang Hinigugma Niya nga anak, si Jesukristo, maoy atong tigluwas ug kanunay nga maanaa. Sa Iyang pangalan, sa sagrado nga ngalan ni Jesukristo, amen.