Pagsunod kang Kristo
Isip mga sumusunod ni Kristo, motudlo ug mopamatuod kita ni Jesukristo, ang atong Hingpit nga Panig-ingnan. Mao nga sundon nato Siya pinaagi sa pagwagtang sa panagbingkil.
Niining tuiga minilyon ang nadasig pinaagi sa plano sa pagtuon sa ebanghelyo nga nailhan pinaagi sa pagdapit sa Manluluwas “Dali, sunod kanako.” Ang pagsunod kang Kristo dili usa ka kaswal o panalagsa nga bulohaton. Usa kini ka padayon nga pasalig ug pagkinabuhi nga kinahanglang mogiya kanato sa tanang higayon ug sa tanang lugar. Ang Iyang mga pagtulun-an ug ang Iyang ehemplo nagtino sa dalan alang sa matag disipulo ni Jesukristo. Ug ang tanan gidapit niini nga dalan, kay Iyang gidapit ang tanan sa pagduol Kaniya “itom ug puti, ulipon ug gawasnon, lalaki ug babaye; … ug ang tanan managsama ngadto sa Dios.”
I.
Ang unang lakang sa pagsunod ni Kristo mao ang pagsunod unsa ang Iyang gipasabot nga “ang labing dakong sugo sa balaod”:
“Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.
“Kini ang labing dako ug labing importanteng sugo.
“Ang ikaduha nga labing importanting sugo sama sa una: Higugmaa ang imong isigkatawo sama sa imong kaugalingon.
“Nagsukad niining duha ka sugo ang [tibuok nga balaod] ug [mga propeta].”
Ang mga sugo sa Dios nagsangkap sa giya ug makanunayong tabang sa atong mga kinabuhi. Ang atong mga kasinatian sa mortalidad sama sa gamayng bata ug sa iyang amahan nga nagpalupad og tabanog sa mahangin nga adlaw. Samtang nagkataas ang tabanog, ang hangin mao ang nagbira sa tugot nga konektado ngadto sa kamot sa gamayng bata. Walay alamag uban sa pwersa sa nagbalibali nga hangin, mihangyo siya nga ipaputol ang tugot aron ang tabanog mopataas pa. Ang iyang maalamon nga amahan mitambag nga dili, nagpasabot nga ang tugot mao ang naghigot sa tabanog sa saktong pagkabutang batok sa nagbalibali nga hangin. Kon atoang mabuhian ang tugot, ang tabanog dili mopataas. Kini ipadpad sa hangin ug malagmit mahagsa sa yuta.
Kanang importanteng tugot nagrepresentar sa mga pakigsaad nga nagkonektar kanato sa Dios, ang atong Langitnong Amahan, ug sa Iyang Anak, si Jesukristo. Samtang atong gitahod kadtong mga pakigsaad pinaagi sa paghupot sa Ilang mga sugo ug pagsunod sa Ilang plano sa katubsanan, ang Ilang saad nga mga panalangin nagtugot kanato sa pagbayaw sa kahitas-an sa celestial.
Ang Basahon ni Mormon kanunayng namahayag nga si Kristo mao ang “kahayag sa kalibotan.” Atol sa Iyang pagpakita ngadto sa mga Nephita, ang nabanhaw nga Ginoo mipasabot niana nga pagtulun-an pinaagi sa pagsulti kanila, “nagpakita ako og panig-ingnan alang kaninyo.” “Ako ang kahayag nga inyong ipakita—kana nga inyong nakita nga akong gibuhat.” Siya ang atong panig-ingnan. Atong nakat-onan unsa ang Iyang gisulti ug gibuhat pinaagi sa pagtuon sa mga kasulatan ug pagsunod sa propetikanhong mga pagtulun-an sama sa giawhag ni Presidente Russell M. Nelson kanato nga buhaton. Sa ordinansa sa sakramento, kita nakigsaad matag adlawng Igpapahulay nga kita “kanunay mohinumdom kaniya ug maghupot sa iyang mga sugo.”
II.
Sa Basahon ni Mormon, ang Ginoo naghatag kanato sa mga sukaranan sa unsay Iyang gitawag nga “ang doktrina ni Kristo.” Mao kini ang hugot nga pagtuo ni Ginoong Jesukristo, paghinulsol, bunyag, pagdawat sa gasa sa Espiritu Santo, paglahutay sa kataposan, ug pagkahimong sama sa usa ka gamayng bata, nagpasabot nga mosalig sa Ginoo ug mobuhat sa tanang Iyang gikinahanglan kanato.
Adunay duha ka matang sa mga sugo sa Ginoo: permanente, sama sa doktrina ni Kristo, ug temporaryo. Ang temporaryong mga sugo mao kadtong gikinahanglan sa panginahanglan sa Simbahan sa Ginoo o sa matinud-anon sa temporaryong mga sirkumstansiya, apan dili na gamiton kon dili kinahanglanon. Ang ehemplo sa temporaryo nga mga sugo mao ang mga paggiya sa Ginoo ngadto sa kanhi nangulo sa Simbahan sa pagbalhin sa mga Santos gikan sa New York ngadto sa Ohio, ngadto sa Missouri, ug ngadto sa Illinois ug sa kataposan sa pagpangulo sa pioneer ngadto sa Intermountain West. Bisan tuod og temporaryo lang, kon gikinahanglan kini nga mga sugo gihatag aron pagasundon.
Ang pipila sa permanenting mga sugo gihatagan og igong panahon aron sundon sa kadaghanan. Pananglitan, ang sikat nga wali ni Presidente Lorenzo Snow bahin sa balaod sa ikapulo naghatag og gibug-aton sa sugo nga gihatag na apan wala pa gisunod sa tanang miyembro sa Simbahan. Nagkinahanglan kini nga hatagan og gibug-aton pag-usab sa mga sirkumstansiya nga nasinati kaniadto sa Simbahan ug sa mga miyembro. Bag-o nga mga ehemplo bahin sa paghatag og gibug-aton pag-usab nga gikinahanglan tungod sa kasamtangang sirkumstansiya nga gisinati sa mga Santos sa Ulahing mga Adlaw o sa Simbahan. Kini naglakip sa pamahayag sa pamilya nga gipagawas ni Presidente Gordon B. Hinckley usa ka henerasyon na ang milabay, ug ang bag-ong panawagan ni Presidente Russell M. Nelson nga mailhan ang Simbahan pinaagi sa gipadayag nga ngalan, Ang Simbahan ni Jesukristo sa mga Santos sa Ulahing mga Adlaw.
III.
Ang laing mga pagtulun-an sa atong Manluluwas daw nagkinahanglang hatagan og gibug-aton pag-usab sa mga sirkumstansiya sa atong panahon karon.
Mao kini ang panahon sa daghang mapintas ug sakit nga mga pulong sa atong mga komunikasyon sa publiko ug usahay bisan sa atong mga pamilya. Ang pagsulti sa mga panaglahi sa mga isyu sa palisiya sa publiko sagad moresulta sa mga buhat sa panagbingkil—gani pagdumot—sa publiko ug personal nga mga relasyon. Kining kinaiya sa pagdinumtanay usahay makapalisod sa mga magbabalaod sa paghimog importante nga mga desisyon sa politika bisan og ang tanang tawo uyon nga kini nga desisyon kinahanglang himoon.
Unsay kinahanglang itudlo ug buhaton sa sumusunod ni Kristo niining makadaot nga mga komunikasyon? Unsa ang Iyang mga pagtulun-an ug mga ehemplo?
Mahinungdanon nga usa sa unang mga baroganan nga gitudlo ni Jesus dihang nagpakita Siya sa mga Nephita mao ang paglikay sa panagbingkil. Samtang Iyang gitudlo kini sa konteksto sa panaglalis tali sa relihiyosong doktrina, ang mga rason nga Iyang gihatag klaro nga magamit sa mga komunikasyon ug mga relasyon sa mga politika, palisiya sa publiko, ug mga relasyon sa pamilya. Si Jesus mitudlo:
“Siya nga may espiritu sa panagbingkil dili gikan kanako, apan gikan sa yawa, kinsa mao ang amahan sa panagbingkil, ug siya nag-aghat sa mga kasingkasing sa mga tawo sa panagbangi uban ang kasuko, sa usag usa.
“Tan-awa, kini dili mao ang akong doktrina, ang hulhogan ang mga kasingkasing sa mga tawo sa kasuko, usa batok sa usa; apan mao kini ang akong doktrina, nga ang ingon niana nga mga butang pagahunongon.”
Sa Iyang nahibiling pagpangalagad diha sa mga Nephita si Jesus mitudlo sa ubang mga sugo nga may kalabotan sa paghunong sa panagbingkil. Kita nasayod gikan sa Biblia nga Siya kanhi mitudlo sa matag usa niini diha sa Iyang dakong Wali sa Bukid, kasagaran tukma sa samang pinulongan nga Iyang gigamit diha sa mga Nephita. Akong kutloon ang pamilyar nga pinulongan sa Biblia:
“Higugmaa ang inyong mga kaaway, pagpanalangin kanila nga nagtunglo kaninyo, pagbuhat og maayo ngadto kanila nga nagdumot kaninyo, ug pag-ampo alang kanila kinsa nag-amung-among kaninyo, ug nagalutos kaninyo.”
Mao kini ang usa sa labing nailhan nga mga sugo ni Kristo—labing ilado ug labing lisod sundon. Apan kini ang labing sukaranang bahin sa Iyang pagdapit sa tanan nga mosunod Kaniya. Sama sa gitudlo ni Presidente David O. McKay, “Walay laing maayong paagi sa pagpakita og gugma alang sa Dios kay sa pagpakita og dili hinakog nga gugma alang sa isig ka tawo.”
Aniay laing sukaranang pagtulun-an pinaagi Kaniya kinsa atong panig-ingnan: “Bulahan ang magbubuhat ug kadaitan, kay sila pagatawgon nga mga anak sa Dios.”
Tigpasiugda og Kalinaw! Makapausab gayod sa personal nga mga relasyon kon wagtangon sa mga sumusunod ni Kristo ang mapintas ug sakit nga mga pulong sa tanan nilang mga komunikasyon.
Sa kinatibuk-ang komperensiya sa miaging tuig, si Presidente Russell M. Nelson mihatag kanato niini nga mga hagit:
“Usa sa labing sayon nga paagi sa pag-ila sa usa ka tinuod nga sumusunod ni Jesukristo mao ang maluluy-on nga pagtagad niana nga tawo ngadto sa ubang tawo. …
“… Ang tinuod nga mga disipulo ni Jesukristo mga tigpasiugda og kalinaw.
“… Usa sa labing maayong mga paagi nga kita makatahod sa Manluluwas mao ang pagkahimong tigpasiugda og kalinaw.”
Gitapos ang iyang mga pagtulun-an: Ang panagbingkil usa ka pagpili. Ang pagpasiugda og kalinaw usa ka pagpili. Kamo adunay inyong kabubut-on sa pagpili og panagbingkil o panag-uli. Ako moawhag ninyo sa pagpili nga mahimong tigpasiugda og kalinaw, karon ug sa kanunay.”
Ang potensiyal nga mga kaaway kinahanglan nga mosugod pinaagi sa pag-ila sa komon nga mithi diin ang tanan uyon.
Aron sundon ang atong Hingpit nga Panig-ingnan ug ang Iyang propeta, kinahanglan natong buhaton unsay mas nailhan nga Bulawanong Lagda: “Buhata ngadto sa uban ang buot ninyo nga ilang buhaton nganha kaninyo: kini ang kahulogan sa [balaod] ug [mga propeta].” Kinahanglan kitang mohigugma ug mobuhat og maayo sa tanan. Kinahanglan natong likayan ang panagbingkil ug mopasiugda og kalinaw sa tanan natong komunikasyon. Wala kini magpasabot nga ibaliwala ang atoang mga baroganan ug mga prayoridad apan sa paghunong sa mapintas nga pag-atake ngadto sa uban sa ilahang mga baroganan. Kana mao ang gibuhat sa atong Hingpit nga Panig-ingnan sa Iyang pagpangalagad. Mao kana ang ehemplo nga Iyang gitakda kanato samtang gidapit kita Niya sa pagsunod Kaniya.
Niini nga komperensiya upat ka tuig ang nakalabay, si Presidente Nelson mihatag kanato og propetikanhong hagit sa atong panahon karon:
“Andam ba kamo nga ipatigbabaw ang Dios labaw sa tanan diha sa inyong kinabuhi? Andam ba kamo nga tugotan ang Dios nga maoy mahimong labing importante nga impluwensiya sa inyong kinabuhi? Tugutan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensiya sa inyong buhaton matag adlaw? Tugotan ba ninyo ang Iyang tingog nga maoy prayoridad kay sa bisan unsa pang uban?”
Isip mga sumusunod ni Kristo, motudlo ug mopamatuod kita ni Jesukristo, ang atong Hingpit nga Panig-ingnan. Mao nga sundon nato Siya pinaagi sa pagwagtang sa panagbingkil. Samtang nagpasiugda kita sa mga politikanhong mga programa nga atong gitinguha, kinahanglang sarang kita sa Iyang mga panalangin pinaagi sa paggamit sa pinulongan ug mga pamaagi sa pagpasiugda og kalinaw. Sa atong mga pamilya ug ubang personal nga mga relasyon, likayan nato ang unsay mapintas ug madumtanon. Atong tinguhaon nga mabalaan, sama sa atong Manluluwas, kansang balaang ngalan ako mopamatuod ug magtinguha sa Iyang panalangin nga motabang kanato nga Masantos. Sa ngalan ni Jesukristo, amen.