Mga Kalihokan sa Kinatibuk-ang Komperensiya nga Dili Makita sa Publiko: Pamaagi sa Conference Center

Kon kita maghunahuna sa kinatibuk-ang komperensiya, tingali maghunahuna kita sa pulpito ug sa mga lider sa Simbahan nga naglingkod sa atubangan sa mga tubo sa organ. Apan ang entablado sa Conference Center dili maoy makita sa tibuok tuig.

Ang Conference Center naghimo og daghang mga kalihokan nga nagkinahanglan og pagpahimutang ug molungtad kini og daghang oras sa pag-andam sa entablado (opisyal nga gitawag nga “rostrum”) alang sa kinatibuk-ang komperensiya. Usa ka grupo sa 10 ka tawo mogahin og mga tulo ka semana sa pag-andam sa entablado, mga hawanan, ug ubang mga pasilidad sa Conference Center alang sa mga bisita nga makatagamtam sa kinatibuk-ang komperensiya.

Ania ang pipila ka makapaikag nga mga kamatuoran:

• 18 ka dagko nga modyul maoy nahimong mga salog sa entablado, nga ang matag usa adunay gibug-aton nga 1.5–4 ka tonelada.

• Kadtong bug-at nga mga estraktura balhinon pinaagi sa gipahanginan nga mga unlan nga maoy mahimong hanig sa yuta, aron makaphimo sa mga estraktura nga sayon nga balhinon.

• Mga 500 ka gagmay nga mga piraso, sama sa riles ug mga panel, ang gidugang usab.

• Ang 80-ka pye ang gitas-on (24 m) nga pultahan ablihan aron mapahimutang sa lugar ang labing dagko nga mga estraktura.

• Ang grupo nga gisangonan sa pag-andam sa entablado moandam usab sa mga pasilidad alang sa seguridad, mga misyonaryo, ug sa pagdumala—nga mosumada og sobra sa 600 ka buluhaton.

Si Joel Wright, ang supervisor sa grupo nga gisangonan sa pag-andam sa entablado, nakatabang na og 50 ka kinatibuk-ang komperensiya. Gitawag niya ang iyang grupo nga “wala mailhi nga mga bayani” kinsa maoy naningkamot pag-ayo. Miingon siya, “Dili kaayo dako og dungog ang pagpahimutang og lingkoranan o lamesa o pagpahimutang sa pasilidad.” Apan kon wala sila, miingon siya, ang komperensiya dili matigayon.

Ang lider sa grupo nga gisangonan sa pag-andam sa entablado nga si Brandon Urry miingon nga magkinahanglan kini og “daghan nga lain-laing tawo gikan sa lain-laing mga matang sa kahanas ug lain-laing mga gigikanan” sa paghimo sa ilang trabaho—“sa pagsibya sa gugma sa Ginoo ug sa mga pulong nga gusto Niya nga ipakigbahin ngadto sa tanan.”

Si Brandon miingon nga gikinahanglan nila ang tanan nga aduna niadtong lain-laing mga kahanas sa “paghiusa alang sa usa ka kawsa.” Tungod kay kana nga kawsa nakasentro ni Jesukristo, kining grupo nga gisangonan sa pag-andam sa entablado mibati sa Iyang presensya ug nakakita sa Iyang mga milagro.

Si Robert Simpson, usa usab ka lider sa grupo nga gisangonan sa pag-andam sa entablado, miingon: “Ako … mibati nga ang Espiritu sa Ginoo misulod sa among mga miting ug anaa diha aron sa pagtabang namo … nga makomplleto [ang trabaho]. … Usahay maghunahuna kami unsaon namo nga mahuman kining tanan. Apan nag-ampo kami ug nangayo sa panabang sa Langitnong Amahan.”

Ug sa gidugang ni Joel: “Pinaagi sa paglahutay, pinaagi sa pagpatunhay, pinaagi sa pagpadayon sa pagpaningkamot, [sa pag-andam sa entablado] nga mapahimutang ang tanan, andam na sa buntag sa kinatibuk-ang komperensiya.”