Pagpangita og mga Tubag sa Espirituhanong mga Pangutana
Ang atong kinasingkasing nga mga pangutana sa ebanghelyo makahatag sa Langitnong Amahan ug ni Jesukristo og mga oportunidad sa pagtabang kanato nga molambo.
Nahibalo ko nga kini mahimong usa ka sorpresa, apan naa nako sa edad nga makahinumdom sa dihang gitudloan kami sa eskwelahan nga adunay siyam ka mga planeta sa atong solar nga sistema [solar system]. Usa niana nga mga planeta, ang Pluto, nga gihatagan og ngalan sa 11 anyos nga si Venetia Barney sa Oxford, England, human kini nadiskobrehan sa 1930. Ug hangtod sa 1992, ang Pluto gituohan nga ang labing layo nga butang sa atong solar nga sistema. Niining panahona, kasagaran adunay makita nga pangbata nga mga modelo sa mga silinganang mga planeta nga hinimo sa papier mâché diha sa mga lawak klasehanan ug mga science fair, ang matag usa naghulagway sa posisyon sa Pluto sa wala mahibaloi nga utlanan. Daghang sayentista ang nagtuo nga lapas pa sa maong ngilit, ang gawas sa solar nga sistema naglangkob sa walay sulod nga kawanangan.
Pero, usa ka dugay na nga pangutana nagpabilin sulod sa siyentipikanhong komunidad bahin sa gigikanan sa usa ka partikular nga klase sa kometa nga kanunay nga gisubay sa mga astronomo. Ug kana nga pangutana nagpadayon sulod sa mga dekada sa wala pa madiskobrehan ang laing layo nga rehiyon sa atong solar nga sistema. Uban sa limitado nga kahibalo nga ilang nabatonan, gigamit sa mga siyentista kadtong nanginlabot nga mga dekada aron makahimo og mahinungdanong mga pag-uswag sa teknolohiya nga nagtugot sa dugang nga pagtuon ug pagsuhid. Ang ilang kalamposan sa kataposan miusab sa atong planetary zone ug miresulta sa Pluto nga gipapuyo pag-usab niining bag-ong rehiyon sa kawanangan ug sa atong solar nga sistema nga gilangkoban sa walo ka mga planeta.
Usa ka nag-unang planetary scientist ug principal investigator alang sa New Horizons space mission nga gitahasan sa pagsuhid sa Pluto sa duol miingon bahin niini nga kasinatian: “Abi nato nasabtan na nato ang heyograpiya sa atong solar nga sistema. Wala kita makasabot. Abi nato nasabtan na nato ang populasyon sa mga planeta sa atong solar nga sistema. Ug nasayop kita.”
Ang nakapaikag kanako bahin niining panahona sa kasaysayan sa eksplorasyon sa kawanangan mao ang pipila ka kaparehas ug kamahinungdanong mga kalainan tali sa metapora nga pagtinguha sa pagpalapad sa siyentipikanhong kapunawpunawan ug sa panaw nga kita, isip mga anak sa Dios, naningkamot sa pagpangita og mga tubag sa atong espirituhanong mga pangutana. Sa piho, unsaon nato pagtubag ang mga limitasyon sa atong espirituhanong panabot ug pag-andam sa atong kaugalingon alang sa sunod nga yugto sa personal nga paglambo—ug asa kita makapangayo og tabang.
Lagda human sa usa ka Lagda
Ang mga pagpangutana ug pagpangita og kahulogan usa ka natural ug normal nga bahin sa atong mortal nga kasinatian. Usahay, ang dili daling pagbaton og kompletong mga tubag makadala kanato sa tumoy sa atong pagsabot, ug ang maong mga limitasyon mahimong makapahigawad o makapabug-at. Sa katalagsaon, ang plano sa Langitnong Amahan alang sa kalipay alang kanatong tanan gidesinyo sa pagtabang kanato nga mouswag bisan pa sa atong mga limitasyon ug pagtuman sa dili nato mahimo sa atong kaugalingon, bisan kon walay kompleto nga kahibalo sa tanang butang. Ang plano sa Dios maluluy-on ngadto sa mga limitasyon sa atong pagkatawhanon; naghatag kanato sa atong Manluluwas, si Jesukristo, aron mahimo natong Maayong Magbalantay; ug nagdasig kanato sa paggamit sa atong kabubut-on sa pagpili Kaniya.
Si Elder Dieter F. Uchtdorf mitudlo nga ang “pagpangutana dili timailhan sa kahuyang,” apan hinuon “kini ang mag-una sa paglambo.” Direkta nga namulong sa atong personal nga paningkamot isip mga tigpangita sa kamatuoran, ang atong propeta, si Presidente Russell M. Nelson, mitudlo nga kita kinahanglang may “tinuod nga katuyoan” ug “mangutana sa kinasingkasing [ug] sa tinuod nga katuyoan, magbaton og pagtuo kang [Jesu] Kristo.” Dugang niyang gitudlo nga ang “‘tinuod nga katuyoan’ nagpasabot nga ang usa ka tawo nagtinguha gayod sa pagsunod sa balaang direksyon nga ihatag.”
Ang atong personal nga paningkamot sa paglambo sa kaalam mahimong motultol kanato sa pagsusi sa atong mga pangutana, lisod o dili, pinaagi sa lente sa hinungdan ug epekto, pagpangita ug pag-ila sa mga sundanan ug dayon pagporma og mga asoy aron sa pagpatin-aw sa atong panabot ug pun-on ang gituohang mga kulang sa kahibalo. Kon atong ikonsiderar ang atong pagpangita og espirituhanong kahibalo, hinoon, kining mahunahunaon nga mga proseso usahay makatabang, apan sa ilang kaugalingon mahimong dili kompleto samtang kita motan-aw sa pag-ila sa mga butang kalabot sa Langitnong Amahan ug sa atong Manluluwas, si Jesukristo, Ilang ebanghelyo, Ilang Simbahan,ug Ilang plano alang kanatong tanan.
Ang paagi sa Dios nga Amahan ug sa Iyang Anak sa paghatag sa Ilang kaalam ngari kanato nag-una sa pagdapit sa gahom sa Espiritu Santo nga mahimo natong personal nga magtutudlo samtang atong isentro si Jesukristo sa atong kinabuhi ug sa atong matinud-anong pagpangita sa Ilang mga tubag ug sa Ilang kahulogan. Sila nagdapit kanato sa pagdiskobre sa kamatuoran pinaagi sa mahalaron nga panahon nga gigahin sa pagtuon sa balaang kasulatan ug sa pagpangita sa gipadayag sa ulahing mga adlaw nga kamatuoran sa atong panahon, nga gihatag sa modernong mga propeta ug apostoles. Sila nangamuyo kanato sa paggahin og regular, masimbahong panahon diha sa balay sa Ginoo ug sa pagluhod aron mag-ampo “aron makakuha og impormasyon gikan sa langit.” Ang saad ni Jesus niadtong nanambong sa pagpaminaw sa Iyang Wali sa Bukid sama ka tinuod alang kanato sa atong panahon sama sa panahon sa Iyang yutan-ong pangalagad: “Pangayo, ug kamo pagahatagan; pangita, ug kamo makakaplag; pagtoktok, ug kini pagaablihan nganha kaninyo.” Ang atong Manluluwas mipasalig nga “ang inyong Amahan nga anaa sa langit mohatag [sa] mga maayong butang ngadto kanila nga mangayo kaniya.”
Ang paagi sa pagtudlo sa Ginoo mao ang “pagtulun-an human sa usa ka pagtulun-an, lagda human sa usa ka lagda.” Mahimo kitang kinahanglan nga “maghulat sa Ginoo” diha sa kal-ang tali sa atong kasamtangang linya sa panabot ug sa sunod nga wala pa mahatag. Kining sagradong luna mahimong usa ka dapit diin mahitabo ang atong labing dako nga espirituhanong kondisyon—ang dapit diin kita “makaantos uban sa pailob” sa atong kinasingkasing nga pagpangita ug pagbag-o sa atong kusog sa pagpadayon sa pagtuman sa sagradong mga saad nga atong gihimo ngadto sa Dios pinaagi sa pakigsaad.
Ang atong relasyon sa pakigsaad uban sa Langitnong Amahan ug ni Jesukristo nagtimaan sa atong nag-una nga pagkalungsoranon sa gingharian sa Dios. Ug ang atong pagpuyo niini nagkinahanglan sa pagpahiuyon sa atong kinabuhi ngadto sa balaang mga baroganan ug pagpaningkamot nga molambo sa espirituhanon nga paagi.
Pagkamasulundon
Usa ka mahinungdanong baroganan nga gitudlo sa tibuok Basahon ni Mormon mao nga kon ang mga anak sa Dios mopili sa pagpakita sa pagkamasulundon ug pagtuman sa ilang mga pakigsaad, makadawat sila og padayon nga espirituhanong giya ug direksyon. Ang Dios nagsulti kanato nga pinaagi sa atong pagkamasulundon ug kakugi kita mahimo nga makaangkon og kahibalo ug salabotan. Ang mga balaod ug mga sugo sa Dios wala gidisenyo nga mahimong babag sa atong kinabuhi apan usa ka gamhanang ganghaan ngadto sa personal nga pagpadayag ug espirituhanong edukasyon. Si Presidente Nelson mitudlo sa mahinungdanong kamatuoran nga “ang pagpadayag gikan sa Dios kanunay nga mohaom sa Iyang mahangturon nga balaod” ug dugang pa nga “kini dili gayod mosukwahi sa Iyang doktrina.” Ang inyong kinabubut-on sa pagsunod sa mga sugo sa Dios, bisan pa sa walay kompleto nga kahibalo sa Iyang mga rason, nagbutang kaninyo uban sa Iyang mga propeta. Ang Moises 5 nagtudlo kanato mahitungod sa usa ka piho nga inter-aksyon tali ni Adan ug sa usa ka anghel sa Ginoo.
Human nga ang Ginoo mihatag ni Adan ug Eva og “mga sugo, nga sila mosimba sa Ginoo nga ilang Dios, ug kinahanglan nga mohalad sa unang mga anak sa ilang kahayopan, alang sa usa ka halad ngadto sa Ginoo,” ang mga kasulatan nagsulti nga si “Adan nagmasulundon ngadto sa mga sugo sa Ginoo.” Padayon kita sa pagbasa nga “human sa daghan nga mga adlaw usa ka anghel sa Ginoo mipakita ngadto ni Adan, nag-ingon: Ngano nga ikaw naghalad og mga sakripisyo ngadto sa Ginoo? Ug si Adan miingon ngadto kaniya: Wala ako masayod, gawas nga ang Ginoo misugo kanako.”
Ang pagkamasulundon ni Adan nag-una sa iyang pagsabot ug nag-andam kaniya sa pagdawat sa sagradong kahibalo nga siya miapil sa sagradong simbolo sa Pag-ula ni Jesukristo. Ang atong mapaubsanong pagkamasulundon, sa samang paagi, maghatag og agianan alang sa atong espirituhanong pag-ila sa mga paagi sa Dios ug sa Iyang balaang katuyoan alang sa matag usa kanato. Ang pagkab-ot nga madugangan ang atong abilidad sa pagkamasulundon makapaduol kanato sa atong Manluluwas, si Jesukristo, tungod kay ang pagkamasulundon sa Iyang mga balaod ug mga sugo motabang sa pag-establisar og koneksyon nga moduol ngadto Kaniya.
Dugang pa, ang atong pagkamaunongon sa kahibalo ug kaalam nga atong napanunod na pinaagi sa atong matinud-anong pagsunod sa mga baroganan sa ebanghelyo ug sagradong mga pakigsaad maoy mahinungdanong pagpangandam alang sa atong kaandam sa pagdawat ug mahimong mga tinugyanan sa mga komunikasyon gikan sa Balaang Espiritu.
Ang Langitnong Amahan ug si Jesukristo mao ang tinubdan sa tanang kamatuoran ug nagpakigbahin sa Ilang kaalam nga madagayaon gayod. Usab, ang pagsabot nga kita walay bisan unsa nga personal nga kahibalo nga independente sa Dios makatabang kanato nga mahibalo kon asa kita modangop ug asa ibutang ang atong nag-unang pagsalig.
Dakong Pagsalig
Ang asoy sa Daang Tugon bahin ni Naaman, ang lider sa militar nga naayo sa sanla pinaagi ni propeta Eliseo, usa ka partikular nga paborito nako. Ang istorya naghulagway kon sa unsang paagi ang lig-on nga pagtuo sa usa ka “gamay nga dalaga” miusab sa dagan sa kinabuhi sa usa ka tawo ug, alang sa tanang magtotuo, nagpadayag sa pagkab-ot sa kaluoy sa Dios niadtong nagbutang sa ilang pagsalig diha Kaniya ug sa Iyang propeta. Bisag wala mailhi, kining batan-ong babaye nakatabang usab sa pagduso sa atong pagsabot sa umaabot. Ug ang pagtuo ni Naaman sa iyang pagpamatuod nakadasig kaniya sa pagdala sa iyang hangyo alang sa kaayohan ngadto sa pinili nga sulugoon sa Dios.
Ang tubag ni Naaman sa mga instruksiyon ni propeta Eliseo nga manghugas diha sa suba sa Jordan sa sinugdanan mao ang pagduhaduha ug pagkasuko. Apan ang usa ka pagdapit alang kaniya nga magmasulundon sa tambag sa propeta naghimog paagi alang sa iyang pagkaayo ug sa iyang talagsaong pagsabot nga ang Dios tinuod.
Mahimong makaplagan nato nga ang pipila sa atong espirituhanon nga mga pangaliya adunay makataronganong masabtan nga mga tubag ug mahimong dili makamugna og dakong kahasol alang kanato. O, sama kang Naaman, tingali atong makaplagan nga ang ubang mga panginahanglan mas mahagiton ug mahimong makamugna og lisod ug komplikadong mga pagbati sulod kanato. O, susama sa paghulagway sa unang mga konklusyon sa mga astronomo mahitungod sa atong solar nga sistema, sa atong pagpangita sa espirituhanon nga kamatuoran, kita mahimong makakab-ot sa dili kaayo tukma nga mga interpretasyon kon kita mosalig lamang sa atong kaugalingong limitado nga pagsabot, usa ka masulub-on ug wala tuyoa nga sangpotanan nga mahimong modala kanato layo sa dalan sa pakigsaad. Ug dugang pa, pipila ka mga pangutana mahimong magpadayon hangtod nga ang Dios, kinsa “adunay tanang gahom” ug “tanang kaalam, ug tanang salabotan,” kinsa “natugkad niya ang tanan nga mga butang” diha sa Iyang kaluoy, mohatag og kahayag pinaagi sa atong hugot nga pagtuo sa Iyang ngalan.
Usa ka mahinungdanong pasidaan gikan sa asoy ni Naaman mao nga ang pagsukol sa pagsunod sa mga balaod ug mga sugo sa Dios mahimong magpalugway o makapalangan sa atong paglambo. Bulahan kita nga si Jesukristo maoy atong Batid nga Mananambal. Ang atong pagkamasulundon sa mga balaod ug mga sugo sa Dios makaabli sa dalan alang sa atong Manluluwas sa paghatag og panabot ug pagkaayo nga Iyang nahibaloan nga atong gikinahanglan, sumala sa Iyang gilatid nga plano sa pagtambal alang kanato.
Si Elder Richard G. Scott mitudlo nga “kini nga kinabuhi maoy usa ka kasinatian sa kusog nga pagsalig—pagsalig diha ni Jesukristo, pagsalig sa Iyang mga pagtulun-an, pagsalig sa atong kapasidad ingon nga giniyahan pinaagi sa Espiritu Santo sa pagsunod niadtong mga pagtulun-an alang sa kalipay karon ug alang sa usa ka mapuslanon, kinatas-ang kalipay sa mahangturon nga pagpuyo. Ang pagsalig nagpasabot nga andam sa pagsunod bisan wala masayod sa kataposan gikan sa sinugdanan (tan-awa sa Prob. 3:5–7). Aron makahatag og bunga, ang inyong pagsalig sa Ginoo kinahanglan gayod nga mas gamhanan ug malungtaron kaysa inyong pagsalig sa inyong kaugalingong personal nga mga pagbati ug kasinatian.”
Si Elder Scott mipadayon: “Ang paggamit sa hugot nga pagtuo mao ang pagsalig nga ang Ginoo nasayod unsa ang Iyang gihimo diha kaninyo ug nga Iyang matuman kini alang sa inyong mahangtoron nga kaayohan bisan og dili ninyo kini masabtan kon sa unsang paagi nga mahimo niya kining posible.”
Panapos nga Pagpamatuod
Minahal nga mga higala, mopamatuod ko nga ang atong kinasingkasing nga mga pangutana sa ebanghelyo makahatag sa Langitnong Amahan ug ni Jesukristo og mga oportunidad sa pagtabang kanato nga molambo. Ang akong personal nga paningkamot sa pagpangita og mga tubag gikan sa Ginoo sa akong kaugalingong espirituhanong mga pangutana—kaniadto ug karon—nakatugot kanako sa paggamit sa luna tali sa mga linya sa akong panabot ug sa Dios sa pagbansay sa pagkamasulundon ngadto Kaniya ug sa pagkamatinud-anon sa espirituhanong kahibalo nga akong naangkon karon.
Mopamatuod ko nga ang pagbutang sa inyong pagsalig diha sa Langitnong Amahan ug sa Iyang mga propeta, nga Iyang gipadala, makatabang ninyo nga motubo sa espirituhanong paagi ug modala kaninyo ngadto sa lapad nga kahibalo ug kasinatian sa Dios. Ang inyong panglantaw mausab tungod kay kamo mausab. Ang Dios nahibalo nga kon kamo anaa sa mas taas nga dapit, mas layo ang inyong makita. Ang atong Manluluwas nagdapit kaninyo sa pagbuhat nianang pag-uswag ngadto sa usa ka punto sa dugang nga kahibalo. Sa ngalan ni Jesukristo, amen.