O Batan-on nga Bililhon
Ang Dios misalig kaninyo, ang mga anak sa pakigsaad, sa pagtabang sa Iyang buhat sa pagdala sa tanan Niyang mga anak nga luwas nga makapauli ngadto Kaniya.
Elder Stevenson, mao kini ang usa ka komperensiya nga dili gayod makalimtan.
Ang among pamilya kanunay nga nalingaw sa usa ka gamay nga basahon nga gitawag og Children’s Letters to God [Mga Sulat sa mga Bata ngadto sa Dios]. Ania ang pipila:
“Minahal nga Dios, imbes nga tugotan nga mamatay ang tawo ug maghimo og bag-o, nganong dili man lang nimo ipabilin ang anaa nimo karon?”
“Nganong ikaw adunay napulo lamang ka lagda, apan ang among eskwelahan adunay daghan kaayo?”
“Nganong gibutang man nimo ang mga tonsil kon imo lang kining kuhaon pag-usab?”
Karon walay panahon sa pagtubag sa tanan niini nga mga pangutana, apan adunay laing pangutana nga kanunay nakong madungog gikan sa mga batan-on nga gusto nakong hisgotan. Gikan sa Ulaanbaatar, Mongolia, ngadto sa Thomas, Idaho, ang pangutana pareho ra: “Ngano? Nganong ang mga Santos sa Ulahing mga Adlaw kinahanglan nga magpakabuhi nga lahi kaayo sa uban?”
Nasayod ko nga lisod nga mahimong lahi—ilabi na kon batan-on pa kamo ug gusto kaayo nga ang ubang tawo maganahan kaninyo. Ang tanan gusto nga maapil sa pundok, ug kana nga tinguha nagkadako hangtod sa gidak-on nga dili na makaayo sa karon nga digital nga kalibotan nga puno sa social media ug cyberbullying.
Busa, nianang tanang sagubangon, nganong ang mga Santos sa Ulahing mga Adlaw nagkinabuhi nga lahi kaayo? Adunay daghang maayo nga mga tubag: Tungod kay kamo espesyal nga anak sa Dios. Tungod kay kamo gitagana alang sa kataposang mga adlaw. Tungod kay kamo disipulo ni Jesukristo.
Apan kana nga mga tubag dili kanunayng makapalahi kaninyo. Ang kada usa anak sa Dios. Ang kada usa dinhi sa yuta karon gipadala dinhi sa ulahing mga adlaw. Ug bisan pa niana dili tanan nagsunod sa Pulong sa Kaalam o sa balaod sa kaputli sa paagi nga inyong gipaningkamotan. Adunay daghang maisogon nga mga disipulo ni Kristo kinsa dili mga miyembro niini nga Simbahan. Apan sila wala mag-alagad og mga misyon ug mopahigayon og mga ordinansa diha sa mga balay sa Ginoo alang sa mga katigulangan sama sa inyong gibuhat. Aduna pa gayod tingali labaw pa niini—ug aduna.
Karon gusto nakong tutokan ang dugang rason nga nahimong makahuloganon sa akong kinabuhi. Niadtong 1988, usa ka batan-ong Apostol nga ginganlan og Russell M. Nelson mihatag og pakigpulong didto sa Brigham Young University nga gitawag og “Thanks for the Covenant [Salamat sa Pakigsaad].” Niini, si Elder Nelson mipasabot nga kon kita mogamit sa atong moral nga kabubut-on sa paghimo ug pagtuman og mga pakigsaad ngadto sa Dios, kita mahimong manununod sa walay kataposan nga pakigsaad nga gihimo sa Dios uban sa atong mga katigulangan sa matag dispensasyon. Sa laing pagkasulti, kita mahimong “mga anak sa pakigsaad.” Kana ang nakapalahi kanato. Kana naghatag kanato og dalan ngadto sa samang mga panalangin nga nadawat sa atong mga katigulangang mga amahan ug mga katigulangang mga inahan, lakip sa bililhon nga katungod sa pagkatawo
Bililhon nga Katungod sa pagkatawo! Tingali nakadungog na kamo nianang pulonga. Gani atong gi-awit ang himno mahitungod niini: “Batan-on ikaw bililhon, padayon, padayon, padayon!” Kini usa ka makapaaghat nga pulong. Apan unsa man gayod ang ipasabot niini?
Sa mga panahon sa Daang Tugon kon ang usa ka amahan mamatay, ang iyang anak nga lalaki nga adunay bililhon nga katungod sa pagkatawo maoy responsable sa pag-atiman sa iyang inahan ug mga igsoong babaye. Ang iyang mga igsoong mga lalaki makadawat sa ilang kabilin ug mobiya aron manimpalad sa ilang kaugalingon, apan ang bililhon nga katungod sa pagkatawo sa anak nga lalaki dili molakaw bisan asa. Magminyo siya ug makabaton og iyang kaugalingong pamilya, apan magpabilin siya hangtod sa kataposan sa iyang mga adlaw sa pagdumala sa mga buluhaton sa kabilin sa iyang amahan. Tungod niining dugang responsibilidad, gihatagan siya og dugang nga gidak-on sa kabilin. Ang pagpangulo ug pag-atiman sa uban hilabihan ba ka dako nga hangyo? Dili kon imong hunahunaon ang dugang kabilin nga gihatag kaniya.
Karon wala kita maghisgot mahitungod sa han-ay sa inyong pagkatawo diha sa yutan-ong mga pamilya o sa mga tahas sa kinatawhan diha sa Daang Tugon. Naghisgot kita mahitungod sa kabilin nga inyong madawat isip usa ka hiniusang manununod uban ni Kristo tungod sa relasyon sa pakigsaad nga inyong gipili nga sudlan uban Kaniya ug sa inyong Amahan sa Langit. Sobra ra ba kaayo alang sa Dios nga molaom kaninyo nga magpakinabuhi nga lahi kay sa uban Niyang mga anak aron kamo mas makagiya ug makaserbisyo kanila? Dili kon ikonsiderar ninyo ang mga panalangin—temporal ug espirituhanon nga gihatag kaninyo.
Ang inyong bililhon nga katungod sa pagkatawo nagpasabot ba nga mas maayo kamo kay sa uban? Dili, apan nagpasabot kini nga kamo gilaoman sa pagtabang sa uban nga mahimong mas maayo. Ang inyong bililhon nga katungod sa pagkatawo nagpasabot ba nga gipili kamo? Oo, apan wala gipili nga magmando ibabaw sa uban; kamo gipili nga moserbisyo kanila. Ang inyong bililhon nga katungod sa pagkatawo ebidensiya ba sa gugma sa Dios? Oo, apan ang mas importante, kini mao ang ebidensiya sa Iyang pagsalig.
Usa ka butang ang higugmaon ug laing butang ang hingpit nga kasaligan. Diha sa Alang sa Kalig-on sa mga Kabatan-onan nga giya, atong mabasa: “Ang inyong Amahan sa Langit misalig kaninyo. Siya mihatag kaninyo og talagsaong mga panalangin, lakip ang kahingpitan sa ebanghelyo ug ang sagradong mga ordinansa ug pakigsaad nga nagbugkos kaninyo ngadto Kaniya ug nagdala sa Iyang gahom ngadto sa inyong kinabuhi. Uban niadtong mga panalangin anaay gidugang nga responsibilidad. Siya nasayod nga kamo makahimo og kalainan sa kalibotan, ug kana nagkinahanglan, sa daghang kahimtang, nga molahi gikan sa kalibotan.”
Ang atong mortal nga kasinatian mahimong ikatandi sa usa ka cruise ship diin ang Dios mipadala sa tanan Niyang mga anak samtang sila mipanaw gikan sa usa ka baybayon ngadto sa lain. Ang panaw puno sa mga oportunidad sa pagkat-on, pagtubo, pagmalipayon, ug pag-uswag, apan kini usab puno sa mga kakuyaw. Ang Dios nahigugma sa tanan Niyang mga anak ug nagpakabana sa ilang kaayohan. Dili Siya gusto nga mawala ang bisan kinsa kanila, busa gidapit Niya kadtong andam nga mahimong mga sakop sa Iyang mga tripulante—kana mao kamo. Tungod sa inyong pagpili sa paghimo ug pagtuman sa mga pakigsaad, Siya nagtanyag kaninyo sa Iyang pagsalig. Siya misalig kaninyo nga mahimong lahi, talagsaon, ug gigahin tungod sa importante nga buhat nga Iyang gisaligan nga inyong buhaton.
Hunahunaa kini! Ang Dios mosalig kaninyo—Sa tanang katawhan sa yuta, ang Dios misalig kaninyo, ang mga anak sa pakigsaad—ang Iyang mga sakop nga tripulante—sa pagtabang sa Iyang buhat sa pagdala sa tanan Niyang mga anak nga luwas nga makapauli ngadto Kaniya. Dili ikatingala nga si Presidente Brigham Young sa makausa miingon, “Ang tanang mga anghel sa langit nagtan-aw niining pipila ka mga katawhan.”
Kon kamo motan-aw sa palibot niini nga cruise ship nga gitawag og yuta, kamo mahimo nga makakita sa ubang mga tawo nga naglingkod sa haruhayng lingkoranan nga nag-inom, nagsugal sa mga casino, nagsul-ob og sinina nga labihan ka dayag, walay kataposang pag-scroll sa cell phone, ug pag-usik-usik sa dako kaayong panahon sa pagdula og mga elektronik nga mga dula. Apan imbes maghunahuna, “Nganong dili man ako makabuhat niana?,” mahinumdoman ninyo nga kamo dili usa ka ordinaryo nga pasahero. Kamo sakop sa tripulante. Kamo adunay responsibilidad nga wala sa mga pasahero. Sama sa gisulti ni Sister Ardeth G. Kapp kaniadto, “Dili ka mahimong tigluwas sa kinabuhi [life guard] kon ikaw sama ra sa uban nga mga lumalangoy diha sa dagat.”
Ug sa dili pa kamo mawad-an sa kadasig tungod sa tanang dugang nga mga obligasyon, palihog hinumdomi nga ang mga sakop nga tripulante makadawat og butang nga dili madawat sa ubang mga pasahero: bayad. Si Elder Neil L. Andersen nag-ingon, “Adunay [kompensasyon] nga espirituhanong gahom alang sa mga matarong,” lakip ang “mas dakong kasiguroan, mas dakong kumpirmasyon, ug mas dakong pagsalig.” Sama ni Abraham, ikaw makadawat og mas dako nga kalipay ug kalinaw, mas dako nga pagkamatarong, ug mas dako nga kahibalo. Ang inyong suhol dili lamang usa ka mansiyon sa langit ug mga kadalanan nga gimasahan ug bulawan. Sayon ra alang sa Langitnong Amahan nga ihatag lang kaninyo ang tanan nga anaa Kaniya. Ang Iyang tinguha mao ang pagtabang kaninyo nga mamahimong sama Kaniya. Busa, ang inyong mga pasalig nagkinahanglan og labaw pa gikan kaninyo tungod kay mao kana ang paagi nga ang Dios mohimo og labaw pa gikan kaninyo.
Kini “sobra ra nga pangayoon gikan ni bisan kinsa, apan kamo dili si bisan kinsa lang”! Kamo ang kabatan-onan nga may bililhon nga katungod sa pagkatawo. Ang inyong relasyon sa pakigsaad ngadto sa Dios ug ni Jesukristo usa ka relasyon sa pagsalig diin kamo adunay mas dakong dalan ngadto sa Ilang mas dakong grasya—sa ilang balaanong tabang, pagtuga sa kalig-on, ug sa makapalihok nga gahom. Kana nga gahom dili lang pangandoy sa hunahuna, usa ka pangpaswerte, o katumanan sa kaugalingon nga panagna. Kini Tinuod.
Kon inyong tumanon ang inyong mga responsabilidad sa bililhon nga katungod sa pagkatawo, dili gayod kamo mag-inusara. Ang Ginoo sa ubasan maghago uban kaninyo. Kamo makigtambayayong uban ni Jesukristo. Sa matag bag-ong pakigsaad—ug samtang ang inyong relasyon Kaniya magkalawom—ang inyong paggunitay magkahugot ug magkahugot hangtod kamo lig-on nga mahugpong sa usag usa. Diha nianang sagrado nga simbolo sa Iyang grasya, inyong makaplagan ang tinguha ug kalig-on sa pagpuyo gayod kon sa unsang paagi ang Manluluwas nagpuyo nga lahi gikan sa kalibotan. Makahimo kamo niini tungod kay si Jesukristo nagpaluyo kaninyo!
Sa 2 Nephi 2:6 atong mabasa, “Mao nga, ang katubsanan mahitabo pinaagi sa Balaan nga Mesiyas; kay siya puno sa grasya ug kamatuoran.” Tungod kay Siya puno sa kamatuoran, Iyang nakita kon si kinsa gayod kamo—ang inyong mga sayop, mga kahuyang, mga pagmahay, ug ang tanan. Tungod kay Siya puno sa grasya, Siya nagtan-aw kaninyo kon unsa gayod kamo mamahimo. Siya motagbo kaninyo kon asa kamo ug motabang kaninyo sa paghinulsol ug paglambo, pagbuntog ug pagkahimo.
“Batan-on ikaw bililhon, padayon, padayon, padayon!” Ako mopamatuod nga kamo gihigugma—ug kamo gisaligan—karon, sa 20 ka tuig, ug hangtod sa kahangtoran. Ayaw ibaligya ang inyong bililhon nga katungod sa pagkatawo alang sa usa ka panaksan nga sinabaw. Ayaw ibaylo ang tanang butang sa walay kapuslanan. Ayaw tugoti ang kalibotan nga mousab kaninyo kon kamo natawo aron sa pag-usab sa kalibotan. Sa ngalan ni Jesukristo, amen.