Nadugtong ngadto ni Jesukristo: Mamahimong Asin sa Katawhan

Ni Elder José A. Teixeira

Sa Kapangulohan sa Seventy

Samtang kita magpabilin nga nadugtong ngadto sa Ginoo, ang atong mga kinabuhi natural nga mosanag sa Iyang kahayag, ug kita mamahimong ang “asin sa katawhan.

Ang Manluluwas nagtudlo nga kon kita “gitawag ngadto sa [Iyang] walay kataposan nga ebanghelyo, ug pakigsaad uban sa walay kataposan nga pakigsaad, [kita] pagaisipon nga asin sa katawhan.” Ang asin hinimo sa duha ka nadugtong nga elemento. Dili kita mahimong asin sa atong kaugalingon; kon kita gusto nga mahimong asin sa katawhan, kinahanglan gayod kita nga madugtong ngadto sa Ginoo, ug akoa kanang nakita samtang ako nakig-uban sa mga miyembro sa Simbahan sa tibuok kalibotan—akong nakita ang matinud-anong mga miyembro sa Simbahan nga nadugtong ngadto sa Ginoo, mipasalig sa ilang mga paningkamot sa pagserbisyo sa uban ug mahimong asin sa yuta.

Ang inyong dili matarog nga pagpahinungod usa ka sanag nga ehemplo. Ang inyong serbisyo gipasalamatan ug gimahal.

Ang atong kabatan-onan nagpakita og talagsaong kaisog ug debosyon. Sila madasigong mihangop sa buhat sa family history, ug ang ilang kanunay nga pagbisita ngadto sa balay sa Ginoo mao ang testamento sa ilang dedikasyon. Ang ilang kaandam sa pagpahinungod og panahon ug kusog sa pagserbisyo og mga misyon sa tibuok kalibotan nagpakita og lawom ug makanunayong hugot nga pagtuo. Sila dili lang basta nangapil apan nangulo sa dalan diha sa pagkahimong mga disipulo nga nadugtong ngadto ni Jesukristo. Ang ilang serbisyo nagpagawas og kahayag ug paglaom, nagtandog sa dili maihap nga mga kinabuhi. Kaninyo, mga kabatan-onan sa Simbahan, among gipahayag ang among kinasingkasing nga pasalamat sa inyong makapadasig nga pagserbisyo. Kamo dili lamang ang kaugmaon sa Simbahan apan ang inyong epekto karon sa Simbahan. Ug kamo gayod ang asin sa katawhan!

Gihigugma nako ang Ginoong Jesukristo ug gibati nako nga nabulahan tungod sa oportunidad sa pagserbisyo uban kaninyo diha sa Simbahan sa Ginoo. Ang atong panaghiusa ug kalig-on, nanukad sa atong giambitan nga pagtuo, nagpasalig kanato nga wala gayod kita mag-inusara niini nga panaw. Sa atong panag-uban, makapadayon kita sa pagtukod sa gingharian sa Dios, nga nakagamot sa pagserbisyo, gugma, ug dili matarog nga hugot nga pagtuo.

Sa dihang si Jesukristo nagtudlo sa daplin sa Dagat sa Galilea, kanunay Niyang gigamit ang inadlaw adlaw nga mga elemento nga pamilyar sa Iyang tigpaminaw aron mapahayag ang lawom nga espirituhanong mga kamatuoran. Usa sa maong elemento mao ang asin. Si Jesus namahayag, “[Kamo] ang asin sa katawhan,”usa ka pamahayag nga buhong sa kahulogan ug kamahinungdanon, ilabi na alang sa mga katawhan sa Iyang panahon, kinsa nakasabot sa nagkadaiyang bili sa asin.

Ang karaang pamaagi sa pag-ani sa asin didto sa Algarve, ang habagatang rehiyon sa akong yutang natawhan sa Portugal, nagsugod balik sa liboan ka mga tuig sa panahon sa Imperyo sa Roma. Talagsaon kaayo, ang mga pamaagi nga gigamit sa mga trabahante sa asin, nga nailhan nga marnotos, nausab og gamay sukad kaniadto. Kini nga mga mapahinungoron nga mga artesano naggamit sa tradisyonal nga mga pamaagi, naghimo sa ilang trabaho nga hingpit nga gimano-mano gayod, nga nagpadayon sa usa ka kabilin nga milahutay sa mga siglo.

Kining karaang pamaagi sa pag-ani sa gitawag og “bulak sa asin.” Aron hingpit nga makadayeg sa makuti nga proseso sa pag-ani sa bulak sa asin, importante nga masabtan ang palibot diin kini gihimo. Ang mga asinan diha sa mga lim-aw daplin sa kabaybayon sa Algarve nagsangkap og saktong mga kondisyon alang sa pagpamuhat og asin. Ang tubig sa dagat gipaagos ngadto sa mabaw nga mga lim-aw, nga gitawag isip mga saloran sa asin, diin kini gipasagdan nga moalisngaw ubos sa grabing kainit sa adlaw. Samtang mag-alisngaw ang tubig, ang bulak sa asin maporma sa mga lunsay nga kristal sa ibabaw sa mga saluran sa asin. Kini nga mga kristal dili katuohan nga putli ug adunay usa ka talagsaon, kagumkom nga tekstura. Ang mga marnotos maampingong mokalis sa mga kristal gikan sa ibabaw sa tubig gamit ang mga espesyal nga himan, usa ka proseso nga nanginahanglan og dakong kahanas ug katukma. Sa Portugal, kini nga maayong kalidad sa asin gitawag nga “krema sa asin [salt cream]” tungod kay mahimo kining kalison og hinayhinay sama sa krema nga mopaibabaw sa gatas. Kining bantayanan nga asin giampingan alang sa kaputli niini ug talagsaon nga lami, nga nakapahimo niining usa ka bililhon nga sangkap sa culinary arts.

Sama sa mga marnotos nga naggahin og dakong paningkamot sa pagseguro nga ilang maani ang kinatas-an nga kalidad sa asin, busa ingon usab kita, isip katawhan sa pakigsaad sa Ginoo, kanunayng mobuhat sa atong pinakamaayo aron ang atong gugma ug ehemplo, kutob sa mahimo, usa ka putli nga pagnig-ingnan sa atong Manluluwas, si Jesukristo.

Sa karaang kalibotan, ang asin labaw pa sa usa ka panimpla—kini usa ka importante nga preserbatibo ug simbolo sa kaputli ug pakigsaad. Nasayod ang mga tawo nga ang asin mahinungdanon alang sa pagpreserbar sa pagkaon ug pagpalambo sa lami. Nasabtan usab nila ang makaguol nga implikasyon sa pagkawala sa kaparat sa asin o sa lami tungod sa pagtapot sa hugaw o pagkatunaw.

Sama nga ang asin mahimong mawad-an sa kamahinungdanon niini, kita mahimo usab nga mawad-an sa atong espirituhanong kusog kon ang atong hugot nga pagtuo kang Jesukristo mahimo lang yano. Mahimong sama ra kitang tan-awon sa gawas, apan walay lig-on nga pagtuo sa kahiladman, mawad-an kita sa atong abilidad sa paghimo og kalainan diha sa kalibotan ug makapagawas sa labing maayo niadtong naglibot kanato.

Mao nga unsaon nato sa pagamit ang atong mga kusog ug mga paningkamot aron makahimo og kalainan ug mahimong ang kausaban nga gikinahanglan sa kalibotan karon? Sa unsang paagi nga atong mapreserbar ang pagkadisipulo ug magpadayon nga mahimong usa ka positibong impluwensiya?

Ang mga pulong sa atong minahal nga propeta milanog gihapon sa akong hunahuna: “Ang Dios gusto nga kita magtambayayong ug motabang sa usag usa. Mao kana ang hinungdan nga Siya mipadala kanato sa yuta pinaagi sa mga pamilya ug miorganisar kanato diha sa mga ward ug mga stake. Mao kana ang hinungdan nga Siya mihangyo kanato sa pagserbisyo ug pagpangalagad sa usag usa. Mao kana ang hinungdan nga Siya mihangyo kanato nga magpuyo dinhi sa kalibotan apan dili iya sa kalibotan.”

Kon ang atong kinabuhi puno sa katuyoan ug pagserbisyo, atong malikayan ang espirituhanong kawalay-pagtagad; sa laing bahin, kon ang atong kinabuhi gihikawan sa balaanong katuyoan, makahuloganong pagserbisyo ngadto sa uban, ug sagradong mga oportunidad sa pagpamalandong, kita sa hinay-hinay malumos sa atong kaugalingong binuhatan ug sa kaugalingon nga hilig, mameligro sa pagkawala sa atong lami. Ang panguntra niini mao ang pagpadayon nga pag-apil sa pagserbisyo—matinguhaon nga moapil sa maayong mga buhat ug ang pagpalambo sa atong kaugalingon ug sa katilingban nga atong gipuy-an.

Minahal kong mga kaigsoonan, pagkadako sa panalangin nga anaa kanatong tanan karon nga nahisakop sa Simbahan ni Jesukristo ug nakabaton sa oportunidad sa pagserbisyo sa Iyang Simbahan. Ang atong mga sirkumstansiya mahimong magkalain-lain, apan kitang tanan makahimo og kalainan.

Hinumdomi ang mga marnotos, ang mga trabahante sa asin; sila naggamit og yano nga mga himan sa pag-ani sa labing maayo nga mga kristal, ang labing maayo nga asin! Kita usab makahimo og yano nga mga butang nga, uban sa makanunayong mga paningkamot sa gagmay ug makahuloganong mga buhat, makapalawom sa atong pagkadisipulo ug pasalig ngadto ni Jesukristo. Ania ang upat ka yano apan lawom nga mga paagi nga kita makapaningkamot nga mahimong asin sa katawhan:

Ipabilin ang balay sa Ginoo nga nakasentro sa atong debosyon. Karon nga ang mga templo mas duol na kay sa kaniadto, ang pag-una sa makanunayong pagsimba diha sa balay sa Ginoo makatabang kanato nga matutokan ang unsay labing importante ug ipabilin ang atong kinabuhi nga nakasentro diha ni Kristo. Diha sa templo, atong makaplagan ang labing importanteng bahin sa atong hugot nga pagtuo ni Jesukristo ug ang tinuod nga katuyoan sa atong debosyon ngadto Kaniya.
Magmainampingon sa atong mga paningkamot sa paglig-on sa uban pinaagi sa pagpuyo sa ebanghelyo nga magkauban. Kita makapalig-on sa atong mga pamilya pinaagi sa makanunayon ug tinuyo nga mga paningkamot sa pagdala sa mga baroganan sa ebanghelyo ngadto sa atong mga kinabuhi ug sa atong mga panimalay.
Ang kaandam sa pagdawat og calling ug moserbisyo diha sa Simbahan. Ang pagserbisyo sa atong lokal nga mga kongregasyon motugot kanato sa pagsuporta sa usag usa ug magdungan sa paglambo. Samtang ang pagserbisyo dili kanunayng sayon, kini sa kanunay magantihon.
Ug sa kataposan, gamiton ang digital nga mga himan sa komunikasyon nga may katuyoan. Karon, ang digital nga mga himan sa komunikasyon motugot kanato sa pagkonektar nga wala pa kaniadto. Sama sa kadaghanan kaninyo, ako naggamit niining mga himan aron makonektar sa mga kaigsoonan sa Simbahan ug sa akong pamilya ug mga higala. Samtang mokonektar ko nila, ako mobti nga mas suod ngadto kanila; kita makapangalagad sa usag-usa sa mga panahon sa panginahanglan nga kita dili na kinahanglang anaa sa personal. Kining mga himan walay duha-duha nga usa ka panalangin, apan kining maong mga himan makapahilayo kanato sa makahuluganong mga inter-aksiyon ug sa kataposan maoy hinungdan nga kita mabira ngadto sa mga batasan nga mag-usik sa atong panahon diha sa mga kalihokan nga dili kaayo mapuslanon. Ang pagpaningkamot nga mahimong asin sa katawhan naglakip sa labaw pa kay sa walay kataposang pag-scroll sa reels diha sa sayes pulgadas nga screen.

Kon atong ipabilin ang balay sa Ginoo nga sentro sa atong mga kinabuhi, sa tinuyo nga paagi sa paglig-on sa uban pinaagi sa pagsunod sa ebanghelyo, pagdawat og mga calling sa pagserbisyo, ug paggamit sa digital nga mga himan nga may katuyoan, kita makapreserbar sa atong espirituhanong kalagsik. Sama sa asin diha sa labing putli nga porma adunay gahom sa pagpalambo ug pagpreserbar, busa ingon usab ang atong hugot nga pagtuo ni Jesukristo kon kini giamuma ug gipanalipdan pinaagi sa atong didekasyon ngadto sa Kristohanong serbisyo ug gugma.

Samtang kita magpabilin nga nadugtong ngadto sa Ginoo, ang atong mga kinabuhi natural nga mosanag sa Iyang kahayag, ug kita mamahimong ang “asin sa katawhan. Niini nga paningkamot, kita dili lamang nagpalambo sa atong kaugalingong mga kinabuhi apan mapalig-on usab ang atong mga pamilya ug ang atong mga komunidad. Hinaot nga kita maningkamot sa pagpabilin niining dugtong diha sa Ginoo, dili gayod wagtangon ang atong lami, ug mahimong gamay, diyutay nga kristal sa asin nga gusto sa Ginoo nga kita mamahimo. Sa ngalan ni Jesukristo, amen.