Sulod Lamang sa Dili Daghan nga Katuigan
Kon kita dili magmatinud-anon ug magmasulundon, kita makausab sa hinatag sa Dios nga panalangin sa kauswagan ngadto sa mapagarbohon nga tunglo nga mopatipas ug mobalda nato.
Akong minahal nga kaigsoonan, naglingkod sa atubangan karon, nagtan-aw ko niining Conference Center nga napuno og ka tulo pil-on, sulod sa unang higayon sukad sa COVID. Mapahinungoron kamo nga mga disipulo ni Jesukristo kinsa matinguhaon nga makat-on. Gidayeg ko kamo sa inyong pagkamatinud-anon. Ug gihigugma ko kamo.
Si Ezra Taft Benson miserbisyo isip Presidente sa Ang Simbahan ni Jesukristo sa mga Santos sa Ulahing mga Adlaw gikan niadtong Nobiyembre 1985 hangtod Mayo 1994. Ako 33 anyos sa dihang si Presidente Benson nahimong Presidente sa Simbahan ug 42 anyos sa dihang namatay siya. Ug ang iyang mga pagtulun-an ug pagpamatuod nakaimpluwensya nako sa tulukibon ug sa gamhanang mga paagi.
Usa sa mga talagsaong bahin sa pangalagad ni Presidente Benson mao ang iyang pagtutok sa katuyoan ug kaimportante sa Basahon ni Mormon. Balikbalik niyang gihatagan og gibug-aton nga “ang Basahon ni Mormon mao ang sukaranang bato sa atong tinuohan—ang sukaranang bato sa atong pagpamatuod, ang sukaranang bato sa atong doktrina, ug ang sukaranang bato sa pagpamatuod sa atong Ginoo ug Manluluwas.” Kanunay usab niyang gihatagan og gibug-aton ang mga pagtulun-an ug mga pasidaan mahitungod sa sala sa garbo nga makita niining ulahing mga adlaw nga tugon ni Jesukristo.
Ang usa ka partikular nga pagtulun-an ni Presidente Benson dako kaayo og epekto nako ug nagpadayon sa pag-impluwensya sa akong pagtuon sa Basahon ni Mormon. Miingon siya:
“Ang Basahon ni Mormon … gisulat alang sa atong panahon. Ang mga Nephita wala gayod niini nga basahon; ni ang mga Lamanita sa karaang mga panahon. Kini gitagana alang kanato. Si Mormon misulat sa hapit na sa pagtapos sa sibilisasyon sa Nephita. Ubos sa inspirasyon sa Dios, kinsa nakakita sa tanang butang gikan sa sinugdanan, gipamubo [ni Mormon] ang mga rekord sa daghang mga siglo, nagpili sa mga istorya, mga pagpamulong, ug mga panghitabo nga makatabang kaayo kanato.”
Si Presidente Benson mipadayon: “Ang matag mahinungdanong mga tigsulat sa Basahon ni Mormon nagpamatuod nga siya misulat alang sa umaabot nga mga henerasyon. … Kon ilang nakita ang atong panahon, ug mipili niadtong mga butang nga labing bililhon kaayo alang kanato, dili ba ingon niana kon unsaon nato ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, ‘Ngano man nga ang Ginoo nagdasig ni Mormon … sa paglakip [niini nga asoy] sa iyang rekord? Unsa nga leksiyon ang akong makat-onan gikan [niini nga pag-awhag] nga makatabang kanako sa pagpakabuhi niining panahona?’”
Ang mga pamahayag ni Presidente Benson makatabang nato nga masabtan nga ang Basahon ni Mormon dili lamang usa ka makasaysayanon nga rekord nga mahinungdanon sa nangagi. Hinuon, kini nga libro sa kasulatan mahinungdanon sa umaabot ug naglangkob sa importante nga mga baroganan, mga pasidaan, ug mga leksiyon nga gituyo alang sa mga kahimtang ug mga hagit sa atong panahon karon. Busa, ang Basahon ni Mormon mao ang usa ka basahon mahitungod sa atong umaabot ug sa mga panahon nga kita nagpakabuhi karon ug sa pagpakabuhi sa umaabot.
Nag-ampo ko alang sa tabang sa Espiritu Santo samtang maghunahuna kita karon sa mahinungdanong mga leksiyon alang nato karon gikan sa basahon ni Helaman sa Basahon ni Mormon.
Ang mga Nephita ug mga Lamanita
Ang rekord ni Helaman ug sa iyang mga anak nga lalaki naghulagway og usa ka katawhan nga nagpaabot sa pagkatawo ni Jesukristo. Ang tunga sa siglo nga giasoy sa rekord sa kasulatan naghatag og gibug-aton sa pagkakabig ug pagkamatarong sa mga Lamanita ug sa pagkadaotan, apostasiya, ug pagkasalawayon sa mga Nephita.
Usa ka sunod-sunod nga pagkomparar ug pagtandi tali sa mga Nephita ug sa mga Lamanita gikan niining karaan nga rekord mao ang labing makahatag og pagtulun-an alang nato karon.
“Ang mga Lamanita, ang mas daghang bahin kanila, nahimo nga matarong nga katawhan, nga niana ang ilang pagkamatarong milabaw pa sa mga Nephita, tungod sa kalig-on ug kahugot sa ilang pagtuo.
“[Ug] dihay daghan nga Nephita ang nahimong gahi ug dili mahinulsolon ug hilabihan ang pagkadaotan, nga ilang gisalikway ang pulong sa Dios ug tanan nga pagsangyaw ug pagpanagna nga miabot taliwala kanila.”
“Ug sa ingon niana atong makita nga ang mga Nephita misugod sa pagkunhod ngadto sa pagkawalay pagtuo, ug misamot sa pagkadaotan ug pagkasalawayon, samtang ang mga Lamanita misugod sa hilabihan nga pagtubo sa kahibalo sa ilang Dios; oo, sila misugod sa pagsunod sa iyang mga balaod ug mga sugo, ug naglakaw subay sa kamatuoran ug pagkamatarong sa iyang atubangan.
“Ug sa ingon niana atong makita nga ang Espiritu sa Ginoo misugod sa pagbiya gikan sa mga Nephita, tungod sa kadaotan ug katig-a sa ilang mga kasingkasing.
“Ug sa ingon niana atong makita nga ang Ginoo misugod pagbu-bo sa iyang Espiritu diha sa mga Lamanita, tungod sa ilang kadali ug kaandam nga motuo sa iyang mga pulong.”
Tingali ang labing makapahingangha ug makapahinuklog nga aspeto niini nga pagkunhod ngadto sa apostasiya sa mga Nephita mao ang kamatuoran nga “kining tanan nga kadaotan midangat kanila sulod lamang sa dili daghan nga katuigan.”
Ang mga Nephita Mipalayo sa Dios
Sa unsang paagi nga ang kanhi matarong nga katawhan nahimong tig-a ug daotan sulod lamang sa ingon ka mubo nga panahon? Sa unsang paagi nga ang katawhan paspas kaayo nga nakalimot sa Dios nga mipanalangin kanila sa hilabihan ka abunda?
Sa gamhanan ug tulukibon nga paagi, ang negatibong ehemplo sa mga Nephita makahatag og pagtulun-an alang nato karon.
Ang “garbo … misugod sa pagsulod … sa mga kasingkasing sa katawhan kinsa nangangkon nga mga sakop sa simbahan sa Dios … tungod kini sa ilang hilabihan gayod nga kaadunahan ug sa ilang kauswagan sa yuta.”
“Gipahimutang [nila] ang [ilang] mga kasingkasing diha sa mga katigayonan ug sa walay kapuslanang mga butang dinhi sa kalibotan” “tungod nianang garbo nga gitugotan [nila] nga makasulod sa [ilang] mga kasingkasing, nga … nagbayaw [kanila] nga molabaw nianang unsay maayo tungod sa [ilang] hilabihan ka daghan nga katigayonan!”
Ang kaaran nga mga tingog gikan sa abog nangamuyo nato karon nga makat-on niining mahangtorong leksiyon: kauswagan, mga katigayonan, ug kaharuhay naglangkob og usa ka gamhanang pagkasagol nga moresulta nga bisan ang mga matarong moinom sa espirituhanong hilo nga mao ang garbo.
Ang pagtugot sa garbo nga mosulod sa atong mga kasingkasing mao ang hinungdan nga kita mobiaybiay niana nga sagrado; dili na motuo sa espiritu sa panagna ug sa pagpadayag; moyatak-yatak sa mga sugo sa Dios; molimod sa pulong sa Dios; mosalikway, mobiaybiay, ug [mopasipala] batok sa mga propeta; ug mahikalimot sa Ginoo nga atong Dios ug “wala magtinguha nga ang Ginoo nga [atong] Dios, kinsa milalang [kanato], kinahanglan nga momando ug mohari ibabaw [kanato].”
Busa, kon kita dili magmatinud-anon ug magmasulundon, kita makausab sa hinatag sa Dios nga panalangin sa kauswagan ngadto sa mapagarbohon nga tunglo nga mopatipas ug mobalda nato gikan sa mahangtorong mga kamatuoran ug mahinungdanong espirituhanong mga prayoridad. Kinahanglang magbantay kita kanunay batok sa makamugna og garbo ug nasobrahan nga pagbati og kaimportante sa kaugalingon, usa ka sayop nga ebalwasyon sa atong kaugalingong kaharuhay, ug kaugalingon ra ang gihunahuna imbes moserbisyo sa uban.
Kon mapagarbohon kita nga nagtutok sa atong mga kaugalingon, natakboyan usab kita og espirituhanong pagkabuta ug daghan ang mataligam-an, kasagaran, o tingali ang tanan nga nahitabo sa sulod ug sa palibot nato. Dili kita makatan-aw ug makatutok kang Jesukristo isip mao ang “tumong” kon nagtan-aw lamang kita sa atong kaugalingon.
Ang ingon nga espirituhanong pagkabuta mahimo usab nga hinungdan nga kita mopalayo sa dalan sa pagkamatarong, mahulog ngadto sa gidili nga mga dalan, ug mahisalaag. Kon buta kita nga “[mo]padayon sa [atong] kaugalingong mga paagi” ug mosunod sa makaguba nga mga pagtipas, kita lagmit nga magsalig sa atong kaugalingong panabot, manghambog sa atong kaugalingong kusog, ug magsalig sa atong kaugalingong kaalam.
Si Samuel ang Lamanita sa minubo nga paagi misaysay sa pagpahilayo sa mga Nephita gikan sa Dios: “Nagtinguha kamo sa tanang adlaw sa inyong kinabuhi nianang dili ninyo maangkon; ug kamo nangita sa kalipay pinaagi sa pagbuhat og kadaotan, mga butang nga sukwahi sa kinaiya niana nga pagkamatarong nga anaa sa atong halangdon ug Walay Kataposang Pangulo.”
Si propeta Mormon miobserbar, “Ang mas daghan nga bahin sa katawhan nagpabilin sa ilang garbo ug kadaotan, ug ang mas gamay nga bahin naglakaw nga mas mabinantayon sa atubangan sa Dios.”
Ang mga Lamanita Midangop ngadto sa Dios
Diha sa Basahon ni Helaman, ang naglambo nga pagkamatarong sa mga Lamanita naghatag og dakong kalainan ngadto sa paspas nga espirituhanong pagkunhod sa mga Nephita.
Ang mga Lamanita midangop ngadto sa Dios ug nadala ngadto sa kasayoran sa kamatuoran pinaagi sa pagtuo sa mga pagtulun-an nga anaa sa balaang mga kasulatan ug sa mga propeta, nagpakita og hugot nga pagtuo ni Ginoong Jesukristo, ug naghinulsol sa ilang mga sala, ug nakasinati og dakong kausaban sa kasingkasing.
“Busa, kutob sa mihangop niini, kamo nasayod sa inyong mga kaugalingon nahimo nga lig-on ug makanunayon sa pagtuo, ug sa butang diin sila nahimo nga gawasnon.”
“Kamo motan-aw nga ang mas daghan nga bahin sa [mga Lamanita] anaa sa dalan sa ilang katungdanan, ug sila naglakaw nga nagmatngon sa atubangan sa Dios, ug sila naninguha sa pagsunod sa iyang mga sugo ug sa iyang mga balaod ug sa iyang mga paghukom. …
“… Sila naningkamot uban sa walay kaluya nga kakugi nga ilang madala ang nahibilin sa ilang kaigsoonan ngadto sa kasayoran sa kamatuoran.”
Isip resulta, ang “pagkamatarong [sa mga Lamanita] milabaw pa sa mga Nephita, tungod sa kalig-on ug kahugot sa ilang pagtuo.”
Usa ka Pasidaan ug usa ka Saad
Si Moroni namahayag: “Tan-awa, ang Ginoo mipakita ngari kanako niining mahinungdanon ug kahibulongan nga mga butang mahitungod nianang moabot sa dili madugay, ug nianang adlawa nga kining mga butanga moabot kaninyo.
“Tan-awa, sultihan ko kamo sama nga kamo ania, apan kamo wala. Apan tan-awa, si Jesukristo mipakita kaninyo ngari kanako, ug nasayod ako sa inyong binuhatan.”
Palihog hinumdomi nga ang Basahon ni Mormon mahinungdanon sa umaabot ug naglangkob sa importante nga mga baroganan, mga pasidaan, ug mga leksiyon nga gituyo alang sa mga kahimtang ug mga hagit sa atong panahon karon.
Ang apostasiya mahimong mahitabo sa duha ka nag-unang mga lebel—institusyonal ug indibiduwal. Sa institusyonal nga lebel, Ang Simbahan ni Jesukristo sa mga Santos sa Ulahing mga Adlaw dili mawala pinaagi sa apostasiya o kuhaon gikan sa yuta.
Si Propeta Joseph Smith namahayag: “Ang Sumbanan sa Kamatuoran natukod; walay dili balaan nga kamot ang makapugong sa buhat sa paglambo; … ang kamatuoran sa Dios magpadayon nga maisugon, halangdon, ug gawasnon, hangtod nga kini makasulod sa matag yuta, makabisita sa matag dapit, molukop sa matag nasod, ug makasulti sa matag dunggan, hangtod ang mga katuyoan sa Dios matuman, ug ang Halangdong Jehova moingon nga ang buhat nahuman na.”
Sa indibiduwal nga lebel, matag usa nato kinahanglang “[mo]likay sa garbo, tingali [kita] mahisama sa mga Nephita sa karaan.”
Mosugyot ko nga kon kamo o ako nagtuo nga igo na ang atong kalig-on ug kaisog aron makalikay sa kaarogante sa garbo, nan tingali nagsagubang na kita niining makamatay nga espirituhanong sakit. Sa yanong pagkasulti, nga kon kamo o ako wala magtuo nga dili matakboyan uban ug pinaagi sa garbo, nan talandogon kita ug anaa sa espirituhanong kakuyaw. Sulod lamang sa dili daghan nga mga adlaw, mga semana, mga bulan, o katuigan, tingali atong gisalikway ang atong espirituhanong katungod sa pagkamagulang alang sa menos ra kaayo nga linat-ang nga mga liso.
Pero, kon ako ug kamo nagtuo nga kita mahimong matakboyan uban ug pinaagi sa garbo, nan magmakanunayon kita nga mohimo sa ginagmay ug yano nga mga butang nga manalipod ug motabang nato nga mahimong “sama sa usa ka bata, manunoton, maaghop, mapainubsanon, mapailobon, puno sa gugma, mauyonon sa pagtugyan sa tanan nga butang diin ang Ginoo makakita nga angay ipahamtang [ngari kanato].” “Bulahan sila kinsa magpaubos sa ilang mga kaugalingon nga wala pugsa sa pagpaubos.”
Kon atong sundon ang tambag ni Presidente Benson ug mangutana sa atong kaugalingon kon nganong gidasig sa Ginoo si Mormon nga ilakip sa iyang pagminubo sa basahon ni Helaman ang mga asoy, mga pag-awhag, ug mga pasidaan nga iyang gihimo, ako mosaad nga atong masabtan kon unsaon paggamit niini nga mga pagtulun-an ngadto sa piho nga mga sitwasyon sa atong indibiduwal nga mga kinabuhi ug mga pamilya karon. Kon kita magtuon ug mamalandong niining dinasig nga rekord, kita mapanalanginan og mga mata nga makakita, mga dunggan nga makadungog, mga hunahuna ug mga kasingkasing nga makasabot sa mga leksiyon nga kinahanglan natong makat-onan sa “pagbantay sa garbo, tingali unya og [kita] masulod ngadto sa pagtental.”
Ako malipayong mosaksi nga ang Dios ang Amahan sa Kahangtoran mao ang atong Amahan. Si Jesukristo mao ang Iyang Bugtong ug Pinalangga nga Anak. Siya ang atong Manluluwas. Ug ako mopamatuod nga samtang kita maglakaw diha sa kaaghop sa Espiritu sa Ginoo, atong malikayan ug mabuntog ang garbo ug makabaton og kalinaw diha Kaniya. Niini ako mosaksi pinaagi sa sagradong ngalan ni Ginoong Jesukristo, amen.