Ang Hangin Wala Gayod Mohunong sa Paghuyop
Makatabang kita sa uban nga mouswag sa ilang panaw aron makadawat sa mga panalangin sa Dios.
Niadtong 2015, sa estado sa Pernambuco, Brazil, 62 ka miyembro sa J. Reuben Clark Law Society nakigtambayayong sa Buhatan sa Piskaliya sa estado sa pag-imbestiga sa legal nga mga hagit sa mga residente sa upat ka lainlaing mga nursing home. Sulod sa lima ka oras sa usa ka Sabado, kini nga mga abogado miinterbiyo tagsa-tagsa, sa kapin sa 200 ka residente, ang matag usa nahikalimtan ug gibaliwala sa katilingban.
Atol sa ilang mga interbiyo, ilang nadiskobrehan ang daghang krimen nga gihimo batok sa mga tigulang nga residente sama sa pag-abandona, dili maayong pagtratar, ug sayop nga paggamit sa pundo. Usa ka mahinungdanon nga bahin niini nga kapunongan sa balaod mao ang pag-atiman alang sa mga kabos ug sa nanginahanglan. Duha ka bulan lang ang milabay, malamposon nga gisang-at sa piskal ang mga sumbong batok sa mga partido nga responsable.
Ang ilang pag-abag usa ka hingpit nga ehemplo sa pagtulun-an ni Hari Benjamin “nga kon kamo anaa sa pag-alagad sa inyong isig ka tawo kamo anaa lamang sa pag-alagad sa inyong Dios.”
Usa ka residente nga personal nakong giinterbiyo atol sa kaayohan sa publiko [pro bono] nga proyekto mao ang usa ka malumo og kasingkasing nga 93 anyos nga babaye nga ginganlan og Lúcia. Mapasalamaton sa among serbisyo, siya nangomedya nga mituaw, “Minyoi ko!”
Nasorpresa, mitubag ko: “Tan-awa kanang matahom nga batan-ong babaye didto! Siya ang akong asawa ug ang piskal sa estado.”
Dali siyang mitubag: “Ngano man diay? Siya batan-on, maanyag, ug dali rang maminyo pag-usab. Ang importante para nako ikaw!”
Wala masulbad ang tanang problema sa talagsaong mga residente nianang adlawa. Walay duhaduha nga nagpadayon sila sa pagsinati og kalisod matag karon ug unya sama sa mga Jaredita diha sa ilang mga barko sa mahagiton nga panaw paingon sa gisaad nga yuta, “nalubong sila sa mga kinahiladman sa dagat, tungod sa sama ka dako sa bukid nga mga balod nga mihasmag kanila.”
Apan niana nga Sabado, ang mga residente sa nursing home nahibalo nga dili igsapayan sa ilang pagkahimong kinalimtan sa katilingban, personal silang nailhan sa usa ka mahigugmaon nga Langitnong Amahan, sa Usa kinsa motubag bisan sa labing yano nga mga pag-ampo.
Ang Agalon sa mga agalon mipahinabo sa usa ka “kusog nga hangin” sa paghuyop sa mga Jaredita ngadto sa gisaad nga mga panalangin. Sa samang paagi, mahimo kitang mopili nga moalagad isip usa ka mapainubsanong huyohoy sa hangin sa mga kamot sa Ginoo. Sama nga “ang hangin wala gayod mohunong sa paghuyop” sa mga Jaredita padulong sa gisaad nga yuta, kita makatabang sa uban sa pag-uswag sa ilang panaw sa pagdawat sa mga panalangin sa Dios.
Pipila ka tuig ang milabay, sa dihang si Chris, ang akong minahal nga asawa, ug ako giinterbiyo alang sa akong tawag isip bishop, ang among presidente sa stake mihangyo kanako nga mainampoong maghunahuna og mga ngalan nga irekomendar isip mga magtatambag. Human makadungog sa mga ngalan nga akong girekomendar, siya miingon nga kinahanglan kong mahibalo og pipila ka butang mahitungod sa usa sa mga kaigsoonan.
Una, kini nga brother dili makabasa. Ikaduha, siya walay sakyanan nga iyang magamit sa pagbisita sa mga miyembro. Ikatulo, siya kanunay—kanunay—nga mag-antepara [sunglass] diha sa simbahan. Bisan pa sa tinuoray nga mga kabalaka sa presidente, kusog nakong gibati nga kinahanglan gihapon nako siyang irekomendar isip akong magtatambag, ug ang presidente sa stake misuporta kanako.
Pagka-Dominggo nga ang akong mga magtatambag ug ako gipaluyohan atol sa panagtigom alang sa sakramento, ang katingala sa mga nawong sa mga miyembro maklaro. Kining minahal nga brother hinay-hinay nga milakaw paingon ngadto sa pulpito, diin ang mga suga sa ibabaw hayag nga mianinag sa iyang sunglass.
Samtang milingkod siya sa akong kilid, gipangutana nako siya, “Brother, ikaw ba adunay mga problema sa imong panan-aw?”
“Wala,” miingon siya.
“Nan nganong magsul-ob man ka og sunglass sa simbahan?” Nangutana ko. “Migo, ang mga miyembro kinahanglan nga makakita sa imong mga mata, ug ikaw kinahanglan usab nga makakita og tarong kanila.”
Nianang higayona, gitangtang niya ang iyang sunglass ug wala na gayod kini gamita pag-usab sa simbahan.
Kining minahal nga brother miserbisyo sa akong kiliran hangtod sa akong pagka-release isip bishop. Karon, nagpadayon siya sa matinud-anong pagserbisyo sa Simbahan ug usa ka ehemplo sa dedikasyon ug pasalig ngadto ni Ginoong Jesukristo. Ug gani, sa mga katuigang milabay, usa lamang siya ka tawo nga tigsul-ob og sunglass nga wala mailhi nga naglingkod nga nakalimtan lang diha sa mga lingkoran sa chapel. Kanunay kong naghunahuna, “Pila ka matinud-anon nga mga brother ug mga sister ang wala mailhi nga naglingkod lang taliwala kanato karon?”
Dili igsapayan kon kita ilado o nakalimtan, ang mga pagsulay dili kalikayan nga moabot sa matag usa kanato. Samtang modangop kita sa Manluluwas, Siya mahimong “mopahinungod sa [atong] mga kasakit alang sa [atong] kaayohan” ug motabang kanato sa pagtubag sa atong mga pagsulay sa paagi nga makapadali sa atong espirituhanong pag-uswag. Kon alang man sa mga residente sa nursing home, usa ka miyembro sa Simbahan nga sayop nga nahukman, o ni bisan kinsa pa, kita mamahimong “ang hangin [nga] wala gayod mohunong sa paghuyop,” nga nagdala og paglaom ug naggiya sa uban ngadto sa dalan sa pakigsaad.
Ang atong minahal nga propeta, si Presidente Russell M. Nelson, mihimo og makapahinam ug makadasig nga imbitasyon ngadto sa kabatan-onan: “Ako kusganong mopanghimatuod og balik nga ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo og misyon. Alang sa batan-ong kalalakin-an nga mga Santos sa Ulahing mga Adlaw, ang misyonaryo nga pagserbisyo usa ka responsibilidad sa pagkapari. … Alang kaninyong batan-on ug makahimo nga mga sister, ang usa ka misyon gamhanan usab, apan opsiyonal, nga oportunidad.”
Kada adlaw, liboan ka batan-ong lalaki ug babaye motubag sa propetikanhong tawag sa Ginoo pinaagi sa pagserbisyo isip mga misyonaryo. Maayo kaayo kamo, ug sama sa gisulti ni Presidente Nelson, kamo mahimong “adunay mas dakong epekto sa kalibotan kay sa nangaging henerasyon!” Siyempre, wala kana magpasabot nga kamo mamahimo nga labing maayo nga bersiyon sa inyong kaugalingon sa higayon nga kamo mosulod sa sentro sa pagbansay sa misyonaryo.
Hinuon, mahimong mobati kamo sama ni Nephi, “gigiyahan … sa Espiritu, kay wala … masayod sa mga butang nga angay [ninyong] buhaton. Bisan pa niana mipadayon [kamo].”
Tingali mibati kamo nga dili segurado sama sa gibati ni Jeremias ug gusto nga mosulti, “Dili ako mahibalong mosulti, kay usa lamang ako ka batan-on.”
Gani tingali makita ninyo ang inyong personal nga mga kakulangan ug gustong motuaw sama sa gibuhat ni Moises: “O akong Ginoo, dili ako maayong manulti … : kay ako hinay nga mosulti ug yungit ug dila.”
Kon adunay bisan kinsa kaninyo nga hinigugma ug gamhanan nga batan-ong mga lalaki ug mga babaye nga adunay hunahuna sama niini karon, hinumdomi nga ang Ginoo mitubag, “Ayaw pag-ingon, Ako usa lamang ka batan-on: kay ngadto sa tanan nga akong paadtoan kanimo moadto ikaw.” Ug Siya nagsaad, “Busa lakaw, kay ako mag-uban sa imong baba ug magtudlo kanimo kon unsa ang imong isulti.”
Ang inyong kausaban gikan sa inyong kinaiyanhon ngadto sa espirituhanong kaugalingon mahitabo “pagtulun-an human sa usa ka pagtulun-an, sugo human sa usa ka sugo” samtang kamo kinasingkasing nga maningkamot sa pagserbisyo ni Jesukristo diha sa natad sa misyon pinaagi sa inadlaw nga paghinulsol, hugot nga pagtuo, tukma nga pagkamasulundon, ug kakugi sa “pagpangita kanunay, pagtudlo sa paghinulsol, ug pagbunyag sa mga kinabig.”
Bisan kon nagsul-ob kamo og usa ka name tag, usahay mobati kamo nga wala mailhi o nakalimtan. Apan, kinahanglan mahibaloan ninyo nga kamo adunay usa ka hingpit nga Langitnong Amahan, kinsa personal nga nakaila kaninyo, ug usa ka Manluluwas, nga nahigugma kaninyo. Kamo adunay mga lider sa misyon kinsa, bisan pa sa ilang mga pagkadili hingpit, moalagad kaninyo isip “ang hangin [nga] wala gayod mohunong sa paghuyop” sa paggiya kaninyo sa inyong panaw sa personal nga pagkakabig.
Sa “yuta diin nag-agas ang gatas ug dugos” kamo moserbisyo sa inyong misyon, kamo matawo pag-usab sa espirituhanong paagi ug mahimong tibuok kinabuhi nga disipulo ni Jesukristo samtang kamo magpaduol ngadto Kaniya. Mahimo kamong masayod nga kamo wala gayod hikalimti.
Bisan og ang uban tingali maghulat og “dugay na kaayo” alang sa kahupayan, kay sila “walay tawo” nga makatabang pa, si Ginoong Jesukristo mitudlo kanato nga walay usa sukad nga Iyang nakalimtan. Sa sukwahi, Siya usa ka hingpit nga ehemplo sa pagpangita sa usa sa matag gutlo sa Iyang mortal nga pangalagad.
Matag usa kanato—ug niadtong naglibot kanato—nag-atubang sa atong kaugalingong mga bagyo sa oposisyon ug mga balod sa mga pagsulay nga molunod kanato kada adlaw. Apan “ang hangin [dili] gayod mohunong sa paghuyop paingon sa gisaad nga yuta … ; ug sa ingon niana [kita mapadpad] pinaagi sa kusog nga hangin.”
Ang matag usa kanato mamahimong kabahin niini nga hangin—ang sama nga hangin nga mipanalangin sa mga Jaredita sa ilang panaw ug sa sama nga hangin nga, uban sa atong tabang, mopanalangin sa wala mailhi ug nakalimtan nga makaabot sa ilang kaugalingong gisaad nga mga yuta.
Ako mopamatuod nga si Jesukristo mao ang atong Manlalaban ngadto sa Amahan. Siya usa ka buhi nga Dios ug naglihok isip usa ka kusog nga hangin nga kanunay mogiya kanato subay sa dalan sa pakigsaad. Sa ngalan ni Jesukristo, amen.