Mga Adlaw nga Dili Gayod Angay nga Makalimtan
Ang mosunod nga mga panahon mohatag sa mga miyembro sa Simbahan bisan asa og dugang nga mga oportunidad sa pagpakigbahin sa maayong balita sa ebanghelyo ni Jesukristo.
Pasiuna
Minahal kong kaigsoonan, ang kasaysayan sa Simbahan ni Jesukristo niini nga dispensasyon napuno sa balaanong mga kasinatian nga nagpakita kon sa unsang paagi gigiyahan sa Ginoo ang Iyang Simbahan. Adunay usa ka dekada sa atong kasaysayan, hinuon, nga seguradong klaro nga labing talagsaon kay sa uban—ang dekada gikan sa 1820 hangtod 1830. Nagsugod sa kasinatian ni Propeta Joseph Smith sa Sagradong Kakahoyan niadtong tingpamulak sa 1820, dihang iyang nakita ang Dios nga Amahan ug ang Iyang Anak, si Jesukristo, ug nagpadayon hangtod sa Abril 6, 1830, kanang dekada nga lahi kay sa uban.
Ikonsiderar kining talagsaong mga panghitabo! Ang batan-ong propeta nakigsulti ni anghel Moroni, mihubad sa bulawan nga mga palid, ug mimantala sa Basahon ni Mormon! Siya ang instrumento diin ang Aaronic ug Melchizedek nga Pagkapari gipahiuli, ug dayon iyang giorganisar ang Simbahan! Si Oliver Cowdery maayo nga mihulagway niana nga panahon: “Kini ang mga adlaw nga dili gayod angay makalimtan.” Mga milagrosong panghitabo nagpadayon hangtod karon.
Mahimo bang maisogon kong mosugyot nga karong tuiga gisugdan nato ang usa ka dekada nga mahimong mapamatud-an nga mahinungdanon sama sa bisan unsa nga misunod niadtong dili hitupngan nga pagtukod sa Simbahan nga dekada dul-an sa duha ka siglo nga milabay.
Atong Dekada
Tugoti ko nga mopasabot. Tali sa 2024, ug 2034, makasinati kita og nag-anak-anak nga mga panghitabo nga moresulta sa dili hitupngang mga oportunidad sa pagserbisyo, sa paghiusa sa mga miyembro ug mga higala, ug sa pagpaila sa Ang Simbahan ni Jesukristo sa mga Santos sa Ulahing mga Adlaw ngadto sa mas daghang tawo kaysa kaniadto.
Atong nasaksihan ang gahom sa usa ka tinuod nga makasaysayanong higayon samtang nagsaulog kita uban sa minilyon nga katawhan sa ika-100 nga adlawng natawhan ni Presidente Russell M. Nelson.
Nagreport kabahin sa adlawng natawhan ni Presidente Nelson ang, Newsweek misulat og headline nga mabasa, “Ang Pinakatigulang nga Relihiyosong Lider sa Kalibotan Nag-edad na og 100.” Dayon ilang gilista ang 10 ka labing karaan nga mga lider sa mga tinuohan sa kalibotan—si Presidente Nelson ang nag-una sa listahan nga naglakip ni Pope Francis ug sa Dalai Lama.
Kining pamahayag gikan sa usa ka artikulo sa New York Times nagrepresentar sa diwa sa kadaghanan sa internasyonal nga pagmantala: “Sa panahon sa eleksiyon sa presidente sa [Estados Unidos] nga nagdasig og pagpamalandong sa kalag bahin sa pagkatigulang ug pagpangulo, ang kang Mr. Nelson nga pag-abot sa talagsaong edad nagpasabot nga, maayo na lang sa iyang simbahan, ang tulo ka numero nga adlawng natawhan dili makapabalaka. Nagpabilin siyang popular nga tawo sa mga miyembro sa simbahan, kinsa nagtan-aw sa ilang presidente dili lamang isip usa ka pangulo apan isip usa ka ‘propeta, manalagna, ug tigpadayag.’”
Mapasalamaton kaayo kita nga ang talagsaong adlaw nga natawhan ni Presidente Nelson naghatag kanato og oportunidad sa pagpaila sa tibuok kalibotan nga manan-away [audience] ngadto sa usa ka propeta sa Dios, usa ka selebrasyon nga dili gayod angay nga makalimtan.
Sa sayo niini nga tingpamulak, gibuksan alang sa publiko ang gibag-o nga plaza sa Temple Square—nagpakita sa mga internasyonal nga bandila nga nagrepresentar sa mga nasod diin ang Simbahan giila. Ang entrada sa plaza gimarkahan sa usa ka monumento nga granito diin gisulat kining matagnaong mga pulong: “Sa umaabot nga mga adlaw, ang bukid diin nahimutang ang Templo mahimong labing habog sa tanan; molabaw kini sa kabungtoran. Daghang kanasoran ang mag-ambahan sa pag-adto didto.”
Sa tinuod, ang dagkong mga panghitabo nga mahitabo sa sunod nga 10 ka tuig maglangkob sa usa ka pagpakita nga kini nga panagna ni Isaias natuman.
Ikonsiderar ang dili hitupngan nga gidaghanon sa mga open house ug mga pagpahinungod sa templo nga giplanong mahitabo sa sunod nga dekada, gani ang posibleng 164 ka templo ug daghan pa. Hunahunaa ang minilyon nga gidaghanon ninyo ug inyong mga higala nga maglakaw latas sa balay sa Ginoo. Ang simbolikanhon nga sentro niini nga mga panghitabo mao ang pagtukod og usab sa Templo sa Salt Lake ug sa mga kalihokan nga may kalabotan niini. Sa pagkatinuod mga adlaw kini nga dili gayod angay makalimtan.
Ang tuig 2030 magdala og mga oportunidad sa tibuok kalibotan sa paghandom sa ikaduhang siglo sa pag-organisar sa Simbahan. Bisan og sayo pa kaayo nga isulti kon sa unsang paagi ang Simbahan mopasidungog niining mahinungdanong hitabo, seguradong motugot kini kanato sa pagdapit sa pamilya, mga higala, mga kauban, ug inila nga mga bisita nga mag-ingon nga “dali ug tan-awa” ug aron mas masabtan ang gamhanang epekto niini sa kinabuhi sa mga miyembro sa Simbahan.
Inig ka 2034, liboan ka mga dignitaryo, mga bisita, ug mga atleta gikan sa tibuok kalibotan mopuno sa kadalanan sa Siyudad sa Salt Lake, ang entablado alang sa Winter Olympic Games. Tingali wala nay mas labaw pa ka dakong pagpakita og tibuok kalibotan nga panaghiusa kay sa pagahimoon sa Olympic Games. Ang mga mata sa kalibotan ipunting sa Simbahan ug sa mga miyembro niini, maghatag og daghang mga oportunidad sa pagboluntaryo, pagserbisyo, ug pagpakigbahin sa malipayong balita pinaagi sa maayong mga buhat—usa ka panghitabo nga dili gayod angay nga makalimtan.
Kining umaabot nga mga higayon makahatag sa mga miyembro sa Simbahan bisan asa og dugang nga mga oportunidad sa pagpakigbahin sa maayong balita sa ebanghelyo ni Jesukristo pinaagi sa pulong ug sa buhat, usa ka dekada nga dili gayod angay nga makalimtan.
Malipayong mga Balita
Sa usa ka miting pipila lang ka semana sa wala pa ang iyang adlawng natawhan, si Presidente Nelson mipakigbahin sa rason nga iyang gimahal ang mga pulong nga “malipayong balita.” Sa tataw, miingon siya, ang panultihon nagdala og kamaya ug kalipay. Apan ang “malipayong mga balita” nagpahayag ug labaw pa niana. Mipasabot siya nga kini nga panultihon naggikan sa orihinal nga Griyego nga pulong nga euangelion, nga sa literal nagpasabot nga “maayong balita” o ang “ebanghelyo.” Ang kalipay ug kamaya niini nga kinabuhi ug sa sunod kanunay nga nalambigit sa ebanghelyo ni Jesukristo. Mao nga ang panultihon nga “malipayong balita” naglangkob niining dobleng kahulogan sa talagsaong paagi.
“Ang mga tawo anaa, aron sila makabaton og kamaya.” Ang Langitnong Amahan naghatag na sa plano sa kalipay nga makahatag og katakos sa pagmaya pinaagi sa Iyang mga panalangin. Naglakip kini sa pagpuyo sa Iyang presensya sa kahangtoran isip mga pamilya. Ang Pag-ula ni Jesukristo mao ang labing mahinungdanon nga bahin sa plano sa Dios alang sa kaluwasan. Aron makadawat og kinabuhing dayon, kinahanglan nga moduol kita ni Kristo. Samtang ato kining buhaton “ug motabang sa uban sa pagbuhat sa ingon, kita miapil sa buhat sa Dios sa kaluwasan ug kahimayaan.”
Kini nga mensahe sa maayong balita sa ebanghelyo ni Jesukristo mao ang labing mahinungdanong mensahe sa yuta. Ug diha niini anaa ang mahinungdanong papel sa mga kabatan-onan ug mga young adult sa Simbahan.
Alang sa Kalig-on sa Kabatan-onan
Karon, samtang kining umaabot nga dekada mahimong mapuno sa mga adlaw nga dili gayod angay nga makalimtan sa matag miyembro sa Simbahan, kini ilabi nang tinuod alang kaninyo sa nagtubo nga henerasyon. Ania kamo karon sa yuta tungod kay gipili kamo nga moanhi karon. Nagtuo ko nga kamo adunay kalig-on ug kapasidad nga mahimong mga disipulo ni Kristo sa dili malabwan nga paagi.
Si Presidente George Q. Cannon nagtudlo, “Ang Dios nagreserba og mga espiritu alang niining dispensasyon kinsa adunay kaisog ug determinasyon sa pag-atubang sa kalibotan, ug sa tanang gahom sa yawa, [ug sa] pagtukod sa Zion sa atong Dios nga dili mahadlok sa tanang mga sangpotanan.”
Alang niana nga katuyoan, gusto kong mamulong kaninyo nga sakop sa nagtubo nga henerasyon, sa pagdapit kaninyo sa paghanduraw kon unsa ka kulbahinam ang sunod nga dekada, usa nga dili gayod angay nga makalimtan, alang kaninyo. Motanyag usab ako og pipila ka yano nga mga pulong sa tambag ug pagdasig nga mahimong makahatag og gahom kaninyo niining umaabot nga dekada.
Sama sa kadaghanan kaninyo, duna koy smartphone nga, usahay ug walay pag-aghat, momugna og reel sa mga litrato nga nagpakita sa akong gibuhat sa usa ka adlaw. Kanunay nga makapakurat nga makita kon unsa ka daghang mga butang ang nausab nako ug sa akong pamilya sa pipila lang ka tuig.
Hunahunaa ang mga litrato nga mapakita sa imong phone 10 ka tuig gikan karon! Mahimo nimong makita ang imong kaugalingon nga migraduwar sa high school o kolehiyo, nakadawat sa imong pagtuga, nagmisyon, nagminyo, ug nakabaton sa imong unang anak. Alang kanimo sa personal, kini mahimong usa ka dekada nga dili gayod angay nga makalimtan. Apan mahimo kining doble kon kamo aktibong maningkamot nga mahimong kahayag sa kalibotan kon sa unsang paagi ang malipayong balita sa ebanghelyo ni Jesukristo makapalambo ug makapauswag dili lamang sa inyong mga kinabuhi apan sa inyong pamilya, mga higala, ug sa mga follower sa social media.
Tingali naghunahuna mo kon unsaon pagbuhat niini.
Ang mga propeta sa Dios nagtudlo kanato nga kini mahimo pinaagi sa upat ka yano nga mga kalihokan, nga gitawag og balaanong gitudlo nga mga responsibilidad: una, ang pagsunod sa ebanghelyo ni Jesukristo; ikaduha, pag-atiman niadtong nanginahanglan; ikatulo, pagdapit sa tanan sa pagdawat sa ebanghelyo; ug ikaupat, paghiusa sa mga pamilya alang sa kahangtoran. Sa talagsaong paagi, ang matag usa mahimong buhaton sa labing normal ug natural nga mga paagi.
Balaanong Gisangon nga mga Responsibilidad
Ako mosaad kaninyo nga kini usa ka dekada nga dili gayod angay nga makalimtan alang kaninyo kon inyong dawaton kining upat ka balaanong gisangon nga mga responsibilidad. Ikonsiderar nato kon unsa kaha ang buot ipasabot niini.
Una, sundon ang ebanghelyo ni Jesukristo. Tun-an ang mga pulong sa mga propeta ug magkat-on sa paghigugma sa inyong Amahan sa Langit. Ikabig ang inyong mga kasingkasing ngadto Kaniya, ug paningkamot sa paglakaw sa Iyang dalan. Mabayaw “pagsalig sa pakigsaad nga gihulagway ni Elder Ulisses Soares. Kini nga pagsalig nagagikan sa paghimo og mga pakigsaad sa pagsunod ni Jesukristo, kay nahibalo nga ang Manluluwas agig tubag molig-on ug mosuporta kaninyo.
Pakitaa ang inyong mga higala sa kalipay nga inyong gibati sa pagsunod sa ebanghelyo, ug kamo ang mahimong labing maayong mensahe sa ebanghelyo nga ilang madawat sukad.
Ikaduha, maluluy-ong motabang sa pag-atiman niadtong nanginahanglan. Ang inyong henerasyon adunay talagsaong pagkamanggihunahunaon sa mga kabos. Sa matag higayon nga mahitabo ang katalagman ug ang mga miyembro sa Simbahan magdali sa pagtabang sa paghawan sa mga natumpag ug paghupay sa mga nag-antos, morag ang kadaghanan nga nagsul-ob og “Helping Hands” nga T-shirt mga ten-edyer ug mga baynte anyos. Naa sa inyong kinaiya nga “mopas-an sa mga alantoson sa usag usa” ug “paghupay niadtong nanginahanglan og kahupayan.” Sa pagbuhat niini atong “gituman ang balaod ni Kristo.”
Si Evan, usa ka batang lalaki nga anaa sa pangedaron nga Primary, nakahukom sa paggahin sa iyang bakasyon sa ting-init gikan sa eskwelahan sa pagtigom og mga suplay alang sa peanut butter ug jelly sandwich aron idonar sa iyang lokal nga food bank. Iyang nakaplagan ang proyekto diha sa JustServe nga website. Ang batan-ong Evan mipaapil sa iyang tibuok klase sa eskwelahan aron motabang sa pagkolekta ug kapin sa 700 ka garapon nga jelly! Pahibaloa ang mga tawo nga imong gialagaran nga ang imong pagpakabana alang kanila nakagamot sa imong gugma sa Dios ug sa imong tinguha sa pagtagad sa imong silingan sama sa imong kaugalingon.
Ikatulo, dapita ang tanan sa pagdawat sa ebanghelyo. Karong tuiga nag-abli kita og 36 ka bag-ong mga misyon sa tibuok kalibotan aron mahatagan og kahigayonan ang tanang gustong moserbisyo og full-time nga mga misyon. Sa usa ka panahon diin daghang mga kabatan-onan ang hingpit nga mopili sa pormal nga relihiyoso nga kalihokan, talagsaon kini ug nagpakita sa talagsaong kinaiyahan sa inyong mga pagpamatuod. Nagserbisyo man og full-time o wala, palihog hibaloi ang imong dakong kapasidad sa pag-impluwensya sa imong mga kaedad samtang ikaw mohigugma, mopakigbahin, ug modapit kanila sa pagsuhid sa ebanghelyo ni Jesukristo.
Ikaupat, paghiusa sa mga pamilya alang sa kahangtoran. Samtang nagbisita ko sa mga templo sa tibuok kalibotan, nahingangha ko sa puno kaayo nga lawak nga nagbarog na lamang ang mga batan-on nga naghulat sa bunyaganan ug sa nagkadaghang mga young adult nga nagserbisyo isip mga ordinance worker. Bag-ohay lang usa ka grupo sa kabatan-onan nga sobra sa 600 ka mga kabatan-onan gikan sa Scotland ug Ireland mibiyahe ngadto sa Preston England Temple, nagpahigayon og sobra sa 4,000 ka mga ordinansa, kadaghanan niini mao ang ilang personal nga namatay nga mga katigulangan! Awhagon ko kamo sa pag-apil sa family history, paggahin og panahon sa templo, ug pag-andam og maayo sa inyong kaugalingon nga mahimong matang sa lalaki o babaye nga andam nga magminyo og parehas nga takos nga kauban sa templo. Pagmugna og usa ka sumbanan sa inyong kinabuhi karon sa paghimo sa templo nga usa ka regular nga bahin sa inyong kinabuhi.
Panapos
Minahal kong mga kaigsoonan, akong minahal nga batan-ong mga higala, lagmit adunay mga kalisdanan alang sa matag usa kanato sa umaabot nga mga adlaw. Hinoon, sa atong pagsulod niining umaabot nga dekada sa wala pa malabwi nga mga panahon, hinaot nga atong ipakigbahin ang malipayong balita pinaagi sa yanong mga kalihokan sa pagpuyo, pag-amuma, pagdapit, ug paghiusa. Kon buhaton nato kini, ang Ginoo mopanalangin kanato og mga kasinatian nga dili angay nga makalimtan.
Ako mopamatuod nga kadtong moduol sa Ginoo uban sa sinsero nga kasingkasing ug tinuod nga katuyoan, kadtong adunay ngalan sa Manluluwas diha sa ilang mga ngabil ug Balaang Espiritu sa ilang mga kalag, kadtong misugod niining dako ug mahimayaong pagpanaw, ako magbilin kaninyo og usa ka panalangin nga inyong madiskobrehan ug masinati ang buhong nga celestial nga mga panalangin ug makadawat og saksi nga ang Dios naminaw kaninyo, nakaila kaninyo, ug nahigugma kaninyo. Makasinati kamo og mga adlaw nga dili gayod angay nga makalimtan. Sa ngalan ni Jesukristo, amen.