Pagkabalaan ngadto sa Ginoo sa Matag Adlaw nga Kinabuhi
Ang pagkabalaan ngadto sa Ginoo makapahimo sa inadlaw nga pagpakabuhi nga sagrado. Mas makapaduol kini nato ug mas magmalipayon ngadto sa Ginoo ug sa usag usa.
Ang among bag-ong panagtigom [reunion] sa pamilya Gong naglakip sa usa ka pasundayag sa talento, giapilan sa indigay sa mga pasiaw sa papa.
Apan kini nga indigay dili kasagaran. Sa usa ka grupo mao ang Lolo (ako) ug duha ka apo, nag-edad og 12 ug 11. Sa laing grupo mao ang programa sa artificial intelligence (AI) nga gisulti sa ig-agaw nga mosugilon sa mga pasiaw sa papa sa estilo ni Gerrit W. Gong. Si Lolo Gerrit Gong batok ni AI Gerrit Gong.
Ang mga apo ug ako maoy miuna.
Unsay inyong tawag sa usa ka dinosaur nga modasmag sa iyang sakyanan? Tyrannosaurus Wrecks.
Si AI Gerrit Gong gisultihan—paghunahuna sama ni Gerrit W. Gong. Pakig-istorya sama kaniya.
AI Gerrit Gong—“Aniay pasiaw sa usa ka papa nga ingon og gisulti ni Gerrit W. Gong, mogamit sa iyang kadasig, kamahunahunaon, ug makabayaw nga estilo: Ngano nga kining mapainubsanon nga kahoy makapahimo sa mga tawo nga mopahiyom? Tungod kay kini migamot sa gugma ug miabot ngadto sa mga sanga sa pagkamabination. Sama niana nga kahoy, kita usab makakita og kalig-on sa atong mga gamot ug hingpit nga kalipay nga paghatag og kamabination ngadto sa uban.”
Nan, unsay inyong hunahuna? Mao kana nganong gitawag kini og mga pasiaw sa papa.
Sa atong tibuok palibot mao ang mga oportunidad sa pagkatawa, kahimuot, motan-aw gamit ang mapasalamaton nga mga mata. Ang atoa mao ang ebanghelyo sa hingpit nga kalipay ug pagkabalaan sa matag adlaw nga kinabuhi. Ang pakabaalaan mopahimutang sa mga butang alang sa sagrado nga kasinatian. Apan ang pagkabalaan nagdapit nato sa paggamit sa inadlaw nga pagpakabuhi kauban sa sagrado—sa pagmaya sa inadlaw nga panalangin, sama sa mana, taliwala niining mga problema ug mga hagit sa kalibotan. Sa paglakaw kauban sa Ginoo, kinahanglan kitang mahimong balaan, kay Siya balaan, ug sa pagtabang nato nga mahimong balaan, ang Ginoo nagdapit nato sa paglakaw uban Kaniya.
Matag usa kanato adunay usa ka istorya. Samtang si Sister Gong ug ako nakighimamat kaninyo—mga miyembro ug mga higala sa Simbahan sa daghang mga dapit ug mga sirkumstansiya—ang inyong mga istorya sa pagkabalaan ngadto sa Ginoo sa matag adlaw nga kinabuhi nakadasig namo. Nagpakabuhi kamo sa pito ka K: komunyon sa Dios, komunidad ug kapuangod sa usag usa, kamatinud-anon ug kasabotan uban sa Dios, pamilya, ug mga higala nga [na]—katutok kang Jesu Kristo.
Ang nagkadaghan nga ebidensya naghatag og gibug-aton niining halandomon nga kamatuoran: ang mga tumutuo sa relihiyon kasagaran mas malipayon, mas himsog, ug mas kontento kaysa niadtong walay espirituwal nga kamatinud-anon o koneksyon. Ang kalipay ug katagbawan sa kinabuhi, mental ug pisikal nga kahimsog, kahulugan ug katuyoan, kinaiya ug hiyas, suod nga sosyal nga mga relasyon, pinansyal ug materyal nga kalig-on—sa matag gihisgotan nga mga kategoriya kaganiha, ang mga nagtuman sa unsay gitudlo sa relihiyon naglambo.
Makatagamtam sila og mas maayong pisikal ug mental nga kahimsog ug mas dakong katagbawan sa kinabuhi sa tanang pangidaron ug sa demograpika nga mga grupo.
Unsay gitawag sa mga tigpanukiduki nga “konsepto sa relihiyon nga makatabang sa sosyal nga kalig-on ug kahusay” nagtanyag og katin-aw, katuyoan, ug inspirasyon taliwala sa makasurprisa ug wala damha nga mga panghitabo. Ang panimalay nga gibase sa hugot nga pagtuo ug komunidad sa mga Santos nakigbatok sa pagkalinain ug sa grupo sa mga tawo nga walay koneksyon. Ang pagkabalaan ngadto sa Ginoo nag-ingon dili pwede ang pagpasipala, dili pwede ang inabtik nga pagbiaybiay nga gibase sa pagpanaway sa uban, dili pwede ang pagpangwarta sa social media pinaagi sa pag-agni sa mga tawo sa pagklik og piho nga butang nga makapasuko ug naghatag og sayop nga impormasyon. Ang pagkabalaan ngadto sa Ginoo nag-ingon oo ngadto sa sagrado ug ngadto sa balaan nga pagtahod, oo ngadto sa atong pagkahimong labing gawasnon, labing malipayon, labing matinud-anon, labing maayo sa atong kaugalingon samtang magsunod kita Kaniya inubanan sa hugot nga pagtuo.
Nahisama sa unsa ang pagkabalaan ngadto sa Ginoo sa matag adlaw nga kinabuhi?
Ang pagkabalaan ngadto sa Ginoo sa matag adlaw nga kinabuhi nahisama sa duha ka young adult, naminyo sulod sa usa ka tuig, nakigbahin sa katinuod ug pagkabantang sa mga pakigsaad sa ebanghelyo, sakripisyo, ug pagserbisyo sa hinayhinay nga nanghitabo sa ilang kinabuhi.
Ang babaye nagsugod, “Sa high school, ako nakasinati og kasubo ug walay paglaom sa kinabuhi. Gibati nako nga ang Dios wala diha alang nako. Usa ka gabii, usa ka text gikan sa usa ka higala miingon, ‘Hoy nabasa na ba nimo ang Alma 36?’
“Samtang gisugdan nako sa pagbasa,” miingon siya gibati nako ang kalinaw ug gugma. Gibati nako nga gigakos ko og hugot. Sa dihang akong gibasa ang Alma 36:12, nasayod ko nga ang Langitnong Amahan nakakita nako ug nasayod gayod unsay akong gibati.”
Nagpadayon siya, “Sa wala pa kami maminyo, matinuoron ko sa akong pamanhonon nga ako walay dakong pagpamatuod bahin sa ikapulo. Nganong ang Dios nagkinahanglan namo nga mohatag og kwarta nga ang uban aduna may daghan kaayo nga ikahatag? Ang akong pamanhonon mitabang sa pagpasabot nga dili kini kabahin sa kwarta apan sa pagsunod sa sugo nga gisugo kanamo. Gihagit ko niya sa pagsugod sa pagbayad og ikapulo.
“Nakita gayod nako nga ang akong pagpamatuod milambo,” miingon siya. “Usahay ang kwarta lisod, apan nakakita kami og daghang panalangin ug sa ingon ang suweldo naigo ra.”
Usab, “sa akong klase sa nursing,” miingon siya “ako lang ang miyembro sa Simbahan ug mao lang ang minyo. Sa makadaghang higayon mibiya ko sa klase nga naglagot o naghilak tungod kay gibati nako nga ako ray gibantayan sa akong mga kauban sa klase ug mihimo og negatibo nga mga komentaryo bahin sa akong mga gituohan, sa akong pagsul-ob sa akong mga garment, o naminyo nga bata pa kaayo.”
Apan siya nagpadayon, “Niining miaging semester nakat-onan nako kon unsaon sa pagsulti sa akong mga gituohan ug mahimong maayong ehemplo sa ebanghelyo. Ang akong kahibalo ug pagpamatuod mitubo tungod kay gisulayan ang akong abilidad nga mobarog nga mag-inusara ug magmalig-on sa unsay akong gituohan.”
Ang batan-ong bana midugang “Sa wala pa ko magmisyon duna koy mga tanyag nga modula sa baseball sa kolehiyo. Naghimo sa malisod nga desisyon, gipadaplin nako kadto nga mga tanyag ug miserbisyo sa Ginoo. Dili nako ikabaylo kadtong duha ka tuig alang sa bisan unsa.
“Sa pagpauli,” miingon siya, “nagpaabot ko og malisod nga transisyon apan nakakaplag sa akong kaugalingon nga mas lig-on, mas paspas, ug mas himsog. Mas kusog na ko moitsa kaysa dihang mibiya ko. Mas daghan na ang nagtanyag nako kaysa dihang mibiya ko, lakip ang akong gidamgo nga eskwelahan. Ug, labing importante,” siya miingon, “mas misalig ko sa Ginoo kaysa kaniadto.”
Mitapos siya, “Isip usa ka misyonaryo gitudlo nako nga ang Langitnong Amahan misaad kanato og gahom sa atong mga pag-ampo, apan usahay nakalimot ko niana alang sa akong kaugalingon.”
Ang atong mga panalangin nga resulta sa pagpahayag og pagkabalaan ngadto sa Ginoo pinaagi sa pagserbisyo og misyon buhong ug puno. Ang mga panalapi, tayming, ug ubang sirkumstansiya sa kasagaran dili sayon. Apan kon ang mga misyonaryo bisan unsa pa ang mga pangidaron ug mga kaagi mopahinungod og pagkabalaan ngadto sa Ginoo, kini moresulta sa positibo nga butang sa panahon ug pamaagi sa Ginoo.
Karon sa pagpakigbahin og kasinatian nga nahitabo 48 ka tuig na ang nakalabay, ang usa ka senior nga misyonaryo nagpakigbahin, “Ang akong papa gusto nga ako mokuha og edukasyon sa kolehiyo, dili magmisyon. Sa wala madugay human niana, giataki siya sa kasingkasing ug namatay sa edad nga 47. Mibati ko nga sad-an. Unsaon nako nga mahibalik ang maayong relasyon nako sa akong amahan?
“Dayon,” siya mipadayon, “human ako makahukom nga moserbisyo og misyon, nakita nako ang akong amahan diha sa damgo. Malinawon ug kontento, malipayon siya nga ako moserbisyo.”
Kining senior nga misyonaryo mipadayon, “Sama sa gitudlo sa Doktrina ug mga Pakigsaad 138 nagtuo ko nga ang akong amahan mahimong moserbisyo isip usa ka misyonaryo didto sa kalibotan sa espiritu. Nakita nako ang akong amahan nga nagtabang sa among apohan sa tuhod, kinsa mibiya sa Germany sa edad nga 17 ug nawala sa pamilya, nga makaplagan pag-usab.”
Ang iyang asawa midugang, “Sa lima ka igsoong lalaki sa pamilya sa akong bana, ang upat nga nakaserbisyo og misyon mao ang adunay nag-unang degree sa kolehiyo.”
Ang pagkabalaan ngadto sa Ginoo sa matag adlaw nga kinabuhi ingon og sama sa mipauli na nga batan-ong misyonaryo kinsa nakat-on nga ipatigbabaw ang Dios labaw sa tanan sa iyang kinabuhi. Sa sayo pa, sa dihang gihangyo sa pagpanalangin og usa ka tawo nga hilabihan ka masakiton, kini nga misyonaryo miingon, “aduna koy hugot nga pagtuo; panalanginan nako siya aron mamaayo. Apan,” ang mipauli na nga misyonaryo nag-ingon, “Nakat-onan nako nianang higayona nga mag-ampo dili sa unsay akong gusto, apan alang sa unsay nahibaloan sa Ginoo nga gikinahanglan sa tawo. Gipanalanginan nako ang igsoong lalaki og kalinaw ug kahupayan. Sa wala madugay namatay siya nga malinawon.”
Ang pagkabalaan ngadto sa Ginoo sa matag adlaw nga kinabuhi ingon og sama sa usa ka gamay nga binuhatan nga miabot ngadto sa pikas tabil sa kalibotan sa mga espiritu sa pagkonektar, paghupay, pagpalig-on. Usa ka administrador sa usa ka dakong unibersidad nag-ingon nga gibati niya ang mga indibiduwal nga iyang nailhan lamang pinaagi sa unsay iyang nadunggan nga nag-ampo alang kaniya. Kadto nga mga indibiduwal mihalad sa ilang mga kinabuhi ngadto sa unibersidad ug nagpadayon sa pag-atiman sa misyon ug sa mga estudyante niini.
Usa ka igsoong babaye naghimo sa iyang labing maayo matag adlaw, human ang iyang bana dili matinud-anon ngadto kaniya ug sa mga anak. Gidayeg nako siya pag-ayo ug ang uban nga sama kaniya. Usa ka adlaw samtang namilo sa linabhan, ang iyang kamot diha sa pundok sa mga sinina, nanghupaw siya, “Unsa pa may kapuslanan?” Gibati niya ang malumo nga tingog nga mipaneguro niya, “Ang imong mga pakigsaad ania kanako.”
Sulod sa 50 ka tuig, ang laing igsoong babaye nangandoy og relasyon sa iyang amahan. “Nagtubo,” miingon siya, “anaa ang akong mga igsoong lalaki ug ang akong papa, ug dayon ako—ang bugtong anak nga babaye. Ang gusto lamang nako mao nga mahimong ‘buotan’ alang sa akong papa.
“Dayon, ang akong mama namatay! Siya lang ang tigpataliwala tali sa akong papa ug nako.
“Usa ka adlaw,” ang igsoong babaye miingon “nakadungog ko og tingog nga nag-ingon, ‘Dapita ang imong papa ug dad-a siya ngadto sa templo uban nimo.’ Kadto ang sinugdanan sa kaduha sa usa ka bulan nga pakig-date sa akong amahan ngadto sa balay sa Ginoo. Gisultihan nako ang akong papa nga gimahal nako siya. Miingon usab siya nga gimahal usab niya ako.
“Ang paggahin og panahon sa balay sa Ginoo miayo kanamo. Ang akong mama wala makatabang namo dinhi sa yuta. Kinahanglan pa nga maadto siya sa pikas nga kinabuhi aron sa pagtabang nga maayo ang unsay naguba. Ang templo mikompleto sa among panaw ngadto sa pagkahiusa isip usa ka mahangtorong pamilya.”
Ang amahan miingon, “Ang pagpahinungod sa templo usa ka dako nga espirituwal nga kasinatian alang nako ug sa akong bugtong anak nga babaye. Karon magdungan kami og tambong ug mobati nga ang among gugma nalig-on.”
Ang pagkabalaan ngadto sa Ginoo sa matag adlaw nga kinabuhi naglakip sa malumong mga higayon kon mamatay ang minahal. Sayo niining tuiga, ang akong minahal nga inahan, si Jean Gong, miadto sa sunod nga kinabuhi sa wala pa ang iyang ika-98 nga adlaw nga natawhan.
Kon pangutan-on ninyo ang akong mama, “Ganahan ka ba og rocky road, white chocolate ginger, o strawberry ice cream?” Si Mama moingon, “Oo, palihog, makatilaw ba ako sa matag usa?” Kinsa ang moingon og dili sa imong inahan, ilabi na nga ganahan siya sa tanang kasinatian sa kinabuhi?
Makausa akong gipangutana si Mama unsa nga mga desisyon ang labing nakaimpluwensya sa iyang kinabuhi.
Miingon siya, “Ang pagpabunyag nga mamiyembro sa Ang Simbahan ni Jesukristo sa mga Santos sa Ulahing mga Adlaw ug pagbalhin gikan sa Hawaii ngadto sa mainland, diin akong nahimamat ang imong amahan.”
Nabunyagan nga 15 anyos pa, ang bugtong miyembro sa iyang dako nga pamilya nga miapil sa atong Simbahan, ang akong mama adunay pakigsaad sa hugot nga pagtuo ug pagsalig sa Ginoo nga mipanalangin sa iyang kinabuhi ug sa among tanang henerasyon sa pamilya. Gimingaw ko sa akong mama, sama sa inyong kamingaw sa mga sakop sa inyong pamilya. Apan ako nasayod nga ang akong mama wala mawala. Wala lang siya dinhi karon. Gitahod nako siya ug kadtong tanan nga namatay isip maisugong mga ehemplo sa matag adlaw nga pagkabalaan ngadto sa Ginoo.
Dayag lang, ang pagkabalaan ngadto sa Ginoo sa matag adlaw nga kinabuhi naglakip sa pag-adto kanunay sa Ginoo diha sa Iyang balaan nga balay. Tinuod kini, miyembro man kita sa Simbahan o mga higala.
Tulo ka higala miadto sa open house sa Bangkok Thailand Temple.
“Kini mao ang usa ka dapit nga mamaayo gayod sa hilabihan,” miingon ang usa.
Sa bunyaganan, miingon ang lain, “Kon ako ania dinhi, gusto ko nga mahugasan nga limpyo ug dili na gayod magpakasala.”
Ang ikatulo miingon, “Mabati ba ninyo ang espirituwal nga gahom?”
Sa walo ka sagrado nga mga pulong, ang atong mga templo nagdapit ug nagpahayag:
“Pagkabalaan ngadto sa Ginoo.
Ang pagkabalaan ngadto sa Ginoo makapahimo sa inadlaw nga pagpakabuhi nga sagrado. Mas makapaduol kini ug mas malipayon ngadto sa Ginoo ug sa matag usa ug mag-andam nato sa pagpuyo uban sa Dios ang atong Amahan, ni Jesukristo, ug sa atong mga minahal.
Sama sa akong higala, tingali maghunahuna kamo kon ang inyong Langitnong Amahan nahigugma ba kaninyo. Ang tubag usa ka lanog nga oo! Mabati nato ang Iyang gugma samtang himoon nato sa atong kaugalingon ang pagkabalaan ngadto sa Ginoo matag adlaw, malipayon ug sa kahangtoran. Hinaot nga atong buhaton, ako nag-ampo pinaagi sa sagradong ngalan ni Jesukristo, amen.