Tutokan si Jesukristo ug ang Iyang Ebanghelyo
Kon atong ibaliwala ang mga makabalda sa kalibotan ug tutokan si Jesukristo ug ang Iyang ebanghelyo, hatagan kita og kasegurohan nga molampos.
Niadtong 1996, ang football team sa kalalakin-an sa Nigeria nakadaog og bulawan sa Olympic games nga gipahigayon sa Atlanta, sa Estados Unidos. Sa dihang natapos na ang kataposang dula, midugok ang masadyaon nga mga panon sa katawhan ngadto sa kadalanan sa matag siyudad ug lungsod sa Nigeria; kini nga nasod nga adunay kapin sa 200 ka milyon ka tawo kalit nga nahimong usa ka dakong selebrasyon sa alas dos sa kaadlawon! Adunay makatakod nga kamaya, kalipay, ug kahinam samtang ang mga tawo nangaon, nanganta, ug nagsayaw. Nianang higayona, ang Nigeria nahiusa ug ang matag Nigerian nakuntento sa pagka Nigerian.
Sa wala pa ang sangka, kini nga team nag-atubang og daghang mga hagit. Samtang nagsugod ang sangka, gihunong ang ilang pinansyal nga suporta. Ang team nakigbangga nga walay saktong mga gamit, dapit alang sa pagbansay, pagkaon, ug mga serbisyo sa paglaba.
Jerome Prevost/Getty Images
Sa usa ka punto, pipila na lamang ka minuto nga matagak na sila sa kompetisyon, apan ang team sa Nigeria nagmadaogon batok sa tanang kalisod. Kining labing mahinungdanon nga panahon nakapausab sa ilang pagtan-aw sa ilang kaugalingon. Inubanan sa bag-ong nakaplagan nga pagsalig, ug pinaagi sa indibidwal ug team nga kakugi sa trabaho ug determinasyon, gibaliwala nila ang daghang mga makabalda ug mitutok sa pagdaog. Kini nga pagtutok nakapadaog nila sa bulawan nga mga medalya, ug ang mga Taga-Nigeria mihingalan nila og ang “Dream Team.” Ang Dream Team sa 1996 nga Olympics padayon nga gipasidunggan sa mga sports sa Nigeria.
David Cannon/Allsport/Getty Images
Sa dihang ang Taga-Nigeria nga football team sa kalalakin-an nakakat-on sa pagbaliwala sa daghang mga makabalda nga ilang giatubang ug mitutok sa ilang tumong, milampos sila labaw pa sa ilang gihunahuna nga posible ug nakasinati og dakong kalipay. (Ingon man usab kaming tanan sa Nigeria!)
Sa samang paagi, kon atong ibaliwala ang mga makabalda sa kalibotan ug tutokan si Jesukristo ug ang Iyang ebanghelyo, hatagan kita og kasegurohan nga molampos labaw pa sa atong hingpit nga mahanduraw—ug mobati og dakong kamaya. Si Presidente Russell M. Nelson nagtudlo: “Kon ang sentro sa atong kinabuhi anaa … ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”
Nag-ampo ko nga ang Espiritu Santo motabang sa matag usa kanato sa pagpatalinghog sa pagdapit ni Presidente Nelson nga itutok ang atong kinabuhi ngadto ni “Jesukristo ug sa Iyang ebanghelyo” aron makasinati kita og kalipay diha ni Kristo ”bisan unsa pa ang nahitabo o wala mahitabo karon sa atong kinabuhi.”
Pipila ka asoy sa Basahon ni Mormon naghulagway niadtong hingpit nga miusab sa ilang kinabuhi pinaagi sa pagtutok ni Jesukristo ug sa Iyang ebanghelyo.
Ikonsiderar si Alma nga Batan-on. Misukol ug nakigbatok siya sa Simbahan. Ang iyang amahan nag-ampo ug nagpuasa. Usa ka anghel nagpakita ug mitawag kang Alma nga Batan-on sa paghinulsol. Niadtong higayona, si Alma nagsugod sa pag-antos sa “kasakit sa usa ka gipanghimaraot nga kalag.” Sa iyang mangitngit nga mga takna, siya nahinumdom sa iyang amahan nga nagtudlo nga si Kristo moabot aron sa pag-ula sa mga sala sa kalibotan. Samtang ang iyang pangisip napunting niini nga hunahuna, nangamuyo siya sa Dios alang sa kaluoy. Ang kamaya mao ang resulta, ang kamaya nga iyang gihulagway nga labaw ka talagsaon! Ang kaluoy ug kamaya miabot kang Alma tungod kay siya ug ang iyang amahan nakatutok usab sa Manluluwas.
Alang sa mga ginikanan nga adunay mga anak nga nahisalaag, pagmalig-on! Imbis nga maghunahuna nganong walay moanhi nga anghel aron sa pagtabang sa imong anak nga maghinulsol, hibaloi nga ang Ginoo nagbutang og mortal nga anghel sa iyang dalan: ang bishop o ubang mga lider sa Simbahan o tigpangalagad sa brother o sister. Kon magpadayon ka sa pagpuasa ug pag-ampo, kon dili nimo pagbut-an kon kanus-a mahitabo o tagalan ang Dios, ug kon mosalig ka nga ang Ginoo nagtunol ang Iyang kamot aron sa pagtabang, nan—sa madugay o sa madali—makaplagan nimo ang impluwensiya sa Dios nga motandog sa kasingkasing sa imong anak kon pilion sa imong anak nga maminaw. Tungod kini kay si Kristo mao man ang kalipay—paglaom si Kristo; Siya ang saad sa “maayong mga butang nga moabot.” Busa isalig ni Jesukristo ang imong anak, kay Siya ang kusog sa matag ginikanan, ug sa matag bata.
Sa dihang nakasinati na siya og kalipay diha ni Kristo, si Alma nga Batan-on nagkinabuhi pinaagi niana nga kalipay. Apan sa unsang paagi nga iyang napatunhay ang maong kalipay bisan sa kalisdanan ug pagsulay? Miingon siya:
“Oo, ug sukad nianang panahona hangtod karon, naghago ako sa walay paghunong, aron makadala ako og mga kalag ngadto sa paghinulsol; aron madala nako sila sa pagtilaw sa hilabihan nga kamaya nga akong natilawan. …
“… Ug … ang Ginoo mihatag kanako og hilabihan nga kamaya sa bunga sa akong mga kahago. …
“Ug gibuligan ako samtang anaa ubos sa mga pagsulay ug mga kasamok sa matag matang.”
Ang kamaya pinaagi ni Kristo nagsugod alang kang Alma sa dihang mipakita siya og pagtuo Kaniya ug nangayo og kaluoy. Dayon si Alma nagpakita sa iyang pagtuo kang Kristo pinaagi sa paghago sa pagtabang sa uban aron makatilaw sa samang kamaya. Kining padayon nga paghago sa pagdala sa uban ngadto ni Kristo nakahatag og dakong kalipay ni Alma bisan sa pagsulay ug mga kasamok sa matag matang. Nahibalo mo, “ang Ginoo ganahan og paningkamot,” ug ang paningkamot nga nakatutok Kaniya magdala og mga panalangin. Bisan ang grabe nga mga pagsulay mahimong “buntogon pinaagi sa kamaya kang Kristo.”
Laing grupo sa mga tawo diha sa Basahon ni Mormon nga gihimong sentro si Jesukristo ug ang Iyang ebanghelyo sa ilang kinabuhi ug nakakaplag og kalipay mao kadtong mitukod sa siyudad sa Helam—usa ka dapit diin ilang mapadako ang ilang mga anak ug makatagamtam sa gawasnong pagtuman sa ilang relihiyon. Kining matarong nga mga tawo nga nagkinabuhi og maayong mga kinabuhi naulipon sa usa ka grupo sa mga tulisan ug gikuhaan sa sukaranang tawhanong katungod sa pagtuman sa relihiyon. Usahay ang dili maayong mga butang mahitabo sa maayong mga tawo:
“Nakita sa Ginoo nga angayang pantonon ang iyang katawhan; oo, gisulayan niya ang ilang pailob ug ang ilang pagtuo.
“Bisan pa niana—kinsa kadto nga mobutang sa iyang pagsalig diha kaniya ang mao nga tawo pagabayawon sa kataposan nga adlaw. Oo, ug busa mao kadto ang nahitabo niini nga katawhan.”
Sa unsang paagi kini nga katawhan nakalahutay sa ilang mga pagsulay ug pag-antos? Pinaagi sa pagtutok ni Jesukristo ug sa Iyang Ebanghelyo. Ang ilang mga kasamok wala magpasabot nga ingon sila niana; hinuon, ang matag usa kanila midangop sa Dios tungod kay ilang gitan-aw ang ilang mga kaugalingon isip anak sa Dios, anak sa pakigsaad, ug disipulo ni Jesukristo. Samtang nahinumdom sila kon kinsa sila ug mitawag sa Dios, nakadawat sila og kalinaw, kalig-on, ug sa kataposan, kalipay diha ni Kristo:
“Ug si Alma ug ang iyang katawhan … ilang gipadayag ang ilang mga kasingkasing ngadto kaniya; ug siya nasayod sa mga pagbati sa ilang mga kasingkasing.
“Ug nahitabo nga ang tingog sa Ginoo miabot ngadto kanila diha sa ilang mga kasakit, nga nag-ingon: Ihangad ang inyong mga ulo ug pagmalaomon, kay ako nasayod sa pakigsaad nga inyong gihimo ngari kanako; ug ako makigsaad sa akong katawhan ug moluwas kanila gikan sa pagkaulipon.”
Agig tubag, ang Ginoo “mipagaan sa mga alantoson … nga gipatong sa [ilang] mga abaga. … Oo, ang Ginoo mipalig-on kanila aron ilang madaog ang ilang mga palas-anon sa kasayon, ug misunod sila nga malipayon ug mapailobon sa tanan nga kabubut-on sa Ginoo.” Timan-i nga kini nga mga Santos mitugot sa ilang mga kasamok, pag-antos, ug mga pagsulay nga mabuntog pinaagi sa kamaya ni Kristo! Dayon sa tukmang panahon, Iyang gipakita ni Alma ang dalan alang sa ilang pag-ikyas, ug si Alma—usa ka propeta sa Dios—migiya kanila ngadto sa kahilwasan.
Samtang motutok kita kang Kristo ug mosunod sa Iyang propeta, kita usab magiyahan ngadto kang Kristo ug sa kalipay sa Iyang ebanghelyo. Si Presidente Nelson nagtudlo: “Ang kalipay gamhanan, ug ang pagtutok sa kalipay modala sa gahom sa Dios diha sa atong kinabuhi. Sama sa tanang butang, si Jesukristo mao ang atong labing halangdon nga ehemplo, ‘tungod sa kalipay nga gibutang sa iyang atubangan, giantos niya ang krus’ [Mga Hebreo 12:2].”
Ang akong inahan bag-o lang namatay; nakalitan ko. Gihigugma nako ang akong inahan ug wala magdahom nga mawala siya nga bata pa kaayo. Apan pinaagi sa iyang kamatayon, ang akong pamilya ug ako nakasinati og kaguol ug kamaya. Nasayod ko nga tungod Kaniya, wala siya mamatay—buhi siya! Ug nasayod ko nga tungod ni Kristo ug sa mga yawe sa pagkapari nga gipahiuli pinaagi ni Propeta Joseph Smith, makauban nako siya pag-usab. Ang kasubo sa pagkawala sa akong mama gibuntog pinaagi sa kalipay ni Kristo! Nagkat-on ko nga ang “paghunahuna og celestial” ug ang “ipatigbabaw ang Dios labaw sa tanan” naglakip sa pagtutok sa kalipay nga anaa ni Kristo.
Si Jesus mahigugmaon midapit, “Duol kamo kanako, kamong tanan nga gikapoyan ug gibug-atan sa inyong gipas-an ug papahulayon ko kamo.” Sa ngalan ni Jesukristo, amen.