Ang mga Pulong ni Kristo ug ang Espiritu Santo Mogiya Kanato ngadto sa Kamatuoran
Ang pagkasayod niining talagsaong plano makatabang nato nga mahibalo nga kita mga anak sa Dios ug kita mahisama Kaniya.
Ang Dios mao ang atong Amahan sa Langit. Kita mao ang Iyang espiritu nga mga anak, ug kita gibuhat sama sa iyang panagway. Busa, matag usa nato, isip anak sa Dios, adunay balaanong potensiyal nga mahisama Kaniya.
Nagpuyo kita uban Kaniya isip mga espiritu sa wala pa kita moanhi dinhi sa yuta. Ang Langitnong Amahan, isip ginikanan sa atong espiritu, nahigugma nato, nagtinguha sa labing maayo alang nato, ug nag-andam og plano aron atong madawat ang Iyang labing mahinungdanong mga panalangin, nga mao ang pagka-imortal ug kinabuhing dayon. Sumala sa plano, kita, isip espiritu nga mga anak, pagahatagan og kabubut-on sa pagpili sa Iyang plano. Pinaagi sa pag-anhi sa yuta, kita mobiya sa presensya sa Dios, malimot sa atong kinabuhi sa wala pa dinhi sa yuta, makadawat og lawas sa unod ug mga bukog, makabaton og atong kaugalingong kasinatian, ug mopalambo og hugot nga pagtuo. Uban sa atong mga lawas sa unod ug mga bukog, isip kinaiyanhon nga mga tawo, kita monunot sa tentasyon, mahimong hugaw ug mahilayo sa Dios, ug dili na makabalik sa Iyang balaang presensya. Tungod sa walay kinutoban nga gugma sa Langitnong Amahan alang nato, Iyang gipadala ang Iyang Kinamagulangan nga Anak, si Jesukristo, aron mahimo natong Manluluwas. Pinaagi sa Iyang sakripisyo, ang Pag-ula, si Jesukristo mihimo niining posible nga kita matubos gikan sa atong mga sala ug mabanhaw ug makadawat og kinabuhing dayon.
Mapasalamaton kaayo ko niining mahimayaong mga kamatuoran—nga atong gitawag og ang plano sa atong Amahan alang sa kaluwasan, Iyang plano sa kaluoy, o Iyang mahinungdanong plano sa kalipay. Ang pagkat-on niining importante nga mga kamatuoran nakatabang nako nga mahibalo sa akong tinuod nga pagkatawo ug sa mahinungdanong mga panalangin sa kahimayaan ug kinabuhing dayon nga giandam sa Dios alang nato. Si propeta Nephi mitudlo nato sa paagi: “Mao nga, … pagbusog sa mga pulong ni Kristo; kay tan-awa, ang mga pulong ni Kristo motug-an kaninyo sa tanang butang unsay inyong angay nga buhaton.” Siya midugang, “Kon mosulod kamo agi sa agianan, ug makadawat sa Espiritu Santo, kini mopakita diha kaninyo sa tanang butang nga kinahanglan ninyong buhaton.” Karon gusto ko nga mopakigbahin kon sa unsang paagi nga ang mga pulong ni Kristo ug ang Espiritu Santo mitabang nako sa pagpangita niining importante nga makahatag og kalinaw nga mga kamatuoran sa katuigan sa akong pagkabatan-on.
Ang mga Pulong ni Kristo Motug-an Kaninyo sa Tanang Butang Unsay Inyong Angay nga Buhaton
Sama sa gisulti ni Nephi sa pangbukas nga bersikulo sa basahon sa 1 Nephi, ako usab “natawo sa matarong nga mga ginikanan.” Nagdako ko sa Nagano, Japan, sa usa ka panimalay diin ang kamatinuoron, kaligdong, ug kamapainubsanon hugtanong giawhag ug ang pagtuman sa karaang mga kustombre higpit nga gisunod. Ang akong amahan usa ka relihiyoso nga tawo. Nagtan-aw ko niya nga nag-ampo sa atubangan sa mga altar sa Shinto ug sa Buddhist matag buntag ug matag gabii. Bisan kon ako walay ideya kon kinsa ang iyang giampoan ug unsay iyang giampo, mituo ko nga adunay ingon og dili makita nga gahom o Dios nga “gamhanan sa pagluwas” o sa pagtabang nato kon kita sinsero nga mag-ampo.
Sama sa ubang mga batan-on, nakasinati ko og daghang kalisdanan. Nanglimbasog ko, naghunahuna nga ang kinabuhi dili patas ug daghan kaayo og maayo ug dili maayo nga mga kasinatian. Mibati ko nga nahisalaag, nga walay direksiyon ang akong kinabuhi. Ang kinabuhi daw mubo ra gyod kaayo tungod kay matapos ra kini kon namatay na ko. Ang kinabuhi nga wala pa makahibalo sa plano sa kaluwasan makalibog.
Wala madugay human sa akong pagsugod sa akong pagkat-on og Iningles sa junior high school, ang tanang estudyante sa among eskwelahan nakadawat og kopya sa Bag-ong Tugon. Bisan og bag-ohay lang kaming nagsugod sa among pagtuon og Iningles, ang among magtutudlo misulti namo nga kinahanglang magtuon kami og Iningles pinaagi sa pagbasa niini. Giablihan nako kini ug girebyo ang mga sulod niini. Ang mga pulong sa Bag-ong Tugon hilabihan ka lisod alang nako. Ang mga pulong sa Hinapon sama ra ka lisod. Hinuon, nakatutok ko ngadto sa lista sa mga pamahayag ug mga pangutana sa kalag nga gilakip nga nag-una sa biblikanhon nga teksto niining Gideon Bible—mga pangutana mahitungod sa pagbati nga nag-inusara, kakulang sa pagsalig, naglibog, nag-atubang sa mga pagsulay sa kinabuhi, ug uban pa. Matag aytem sa lista gisundan og usa ka pakisayran ngadto sa mga bersikulo ug mga pahina sa Bag-ong Tugon. Nakatutok ko ilabi na ngadto sa pamahayag “Kon ikaw gikapoy.” Ang pakisayran midala nako sa pag-abli sa Mateo 11:28–30, diin si Jesus miingon ngadto sa Iyang mga disipulo:
“Duol kamo kanako, kamong tanan nga gikapoyan ug gibug-atan ug papahulayon ko kamo.
“Isangon ang akong yugo ug sunda ninyo ako kay malumo ako ug mapaubsanon sa espiritu ug makapahulay kamo.
“Sayon ang yugo nga akong isangon kaninyo ug gaan ang ipapas-an ko kaninyo.”
Mao kadto ang unang higayon nga akong nahinumdoman nga nagbasa sa mga pulong ni Jesukristo. Bisan og wala ko makasabot sa tanang pulong nga Iyang gisulti, ang Iyang mga pulong nakahupay nako, nakabayaw sa akong kalag, ug nakahatag nako og paglaom. Kon mas kanunay ko nga mobasa, mas kanunay nakong bation nga kinahanglan nakong sulayan ang hiyas sa Iyang mga pulong. Wala gayod ako mobati sukad og sama sa akong gibati nianang adlawa. Gibati nako nga ako gihigugma. Gibati nako nga si Jesukristo usa ka tawo nga akong nailhan.
Samtang nagpadayon ko sa pagtuon, gibati nako nga murag direkta Siya nga nakigsulti nako sa dihang Siya miingon, “Bulahan ang mga gigutom ug giuhaw sa pagkamatarong: kay sila pagabusgon.”
Ang Iyang mga pulong mipuno sa akong kasingkasing, bisan kon dili ko makahulagway og maayo sa akong mga pagbati nianang higayona. Bisan og si Jesukristo nabuhi daghang mga siglo na ang milabay didto sa usa ka lugar nga dili nako pamilyar, naghunahuna ko nga makasalig ko sa Iyang mga pulong sa tibuok nakong kasingkasing. Nanghinaot ko nga puhon sa umaabot makahibalo unta ko og dugang pa mahitungod ni Jesukristo.
Ang Espiritu Santo Mopakita diha Kaninyo sa Tanang Butang nga Kinahanglan Ninyong Buhaton
Kana nga puhon miabot paglabay sa pipila ka tuig. Nahimamat nako ang usa ka mapahinungoron kaayo, batan-on, nga full-time nga mga misyonaryo sa Ang Simbahan ni Jesukristo sa mga Santos sa Ulahing mga Adlaw. Ug sa wala madugay nahimamat nako ang usa ka gamayng grupo sa mabination ug malipayon nga mga Santos sa Ulahing mga Adlaw nga naningkamot sa pagsunod ni Jesukristo. Bisan kon midangat pa kini og taudtaod aron hingpit nga mosalig kanila, akong nakita ang gipahiuli nga ebanghelyo sa unsay akong gipangandoy sa dihang nagtuon ko sa Bag-ong Tugon—ang mga pulong ni Jesukristo ug ang paglaom ug kalinaw nga nagagikan niini.
Usa ka partikular nga sagradong kasinatian nahitabo sa dihang ang mga misyonaryo mitudlo nako sa pag-ampo. Akong nakat-onan nga kinahanglan kita nga motawag sa ngalan sa Dios. Kon kita mag-ampo, kinahanglan kita nga mosulti gikan sa atong mga kasingkasing, mopahayag sa atong pasalamat, ug mopakigbahin sa atong mga pangandoy ug mga tinguha. Sa higayon nga masulti na nato ang tanang gusto natong isulti , atong taposon ang atong pag-ampo pinaagi sa pag-ingon, “Sa ngalan ni Jesukristo, amen.” Kita mohimo niini tungod kay si Jesus misugo nato sa pag-ampo pinaagi sa Iyang ngalan. Ang pag-ampo ngadto sa Langitnong Amahan nakatabang nako nga makaila kon kinsa Siya ug sa akong relasyon ngadto Kaniya—nga ako Iyang pinanggang espiritu nga anak. Akong nakat-onan nga tungod kay ang Langitnong Amahan nakaila ug nahigugma nako, Siya makigsulti nako sa personal, talagsaon nga paagi, ug sa mga paagi nga akong masabtan pinaagi sa Espiritu Santo.
Adunay panahon nga wala gyod ko makaila sa Espiritu Santo. Sayop ang akong pagsabot, naghunahuna nga ang buhaton lamang nako mao ang pagsunod sa mga lakang sa pag-ampo ug adunay talagsaong butang nga mahitabo. Usa ka adlaw, atol sa leksiyon kauban sa mga misyonaryo, migawas ko gikan sa leksiyon aron mopahulay. Naglibog gihapon ko kon unsay kinahanglan nakong buhaton sa akong kinabuhi kon ang gipahiuling ebanghelyo ni Jesukristo tinuod gayod.
Sa dihang padulong na ko nga mobalik sa lawak diin ang mga misyonaryo naghulat, nadungog nako ang tingog sa usa ka misyonaryo. Nadungog nako ang akong ngalan. Imbes nga moabli sa pultahan, naminaw ko sa tingog sa pikas habig sa pultahan. Nakuratan ko. Nag-ampo sila ngadto sa Langitnong Amahan. Ang usa nga maoy nag-ampo nangamuyo sa Dios nga Iyang dunggon ang akong pag-ampo. Bisan og ang iyang Hinapon dili hanas, ang pagpaminaw sa iyang sinsero nga pag-ampo nakapahumok sa akong kasingkasing. Natingala ko kon nganong hilabihan ang ilang pagpakabana nako. Dayon akong naamgohan nga ang ilang pag-ampo alang nako usa ka pagpakita sa gugma sa Langitnong Amahan ug sa Manluluwas alang nako. Kana nga gugma nakahatag nako og paglaom, ug human niana nangutana ko sa Dios inubanan sa hugot nga pagtuo ug tinuod nga katuyoan. Sa dihang gihimo nako kini, gibati nako ang kalipay ug kalinaw nga ako sa pagkatinuod anak sa Dios ug nga ako adunay balaanong potensiyal ug padulngan. Ang plano sa kaluwasan mituhop pag-ayo sa akong kasingkasing.
Si Presidente Russell M. Nelson nag-ingon, “Ang paagi nga kamo maghunahuna mahitungod kon kinsa … kamo makaapekto sa … matag desisyon nga inyong himoon.” Tinuod kini alang nako. Ang desisyon sa pagsunod sa Manluluwas nga si Jesukristo pinaagi sa pagpabunyag ug sa pagdawat sa gasa sa Espiritu Santo nakapanalangin sa akong kinabuhi labaw pa sa akong gihunahuna. Sa dihang misulod kita sa pakigsaad sa bunyag ngadto sa Dios, kita misaad nga kita andam nga modala diha sa atong mga kaugalingon sa ngalan ni Jesukristo, mosunod sa mga sugo sa Dios, ug moserbisyo Kaniya sa nahibilin sa atong mga kinabuhi. Ang atong Langitnong Amahan, agi og bugti, misaad nato nga kita sa kanunay makabaton sa Iyang Espiritu uban kanato—ang nagpadayon nga giya gikan sa Espiritu Santo.
Ako modapit ninyo sa pagbaton og hugot nga pagtuo sa mensahe nga gitudlo ni Nephi kanato—nga ang mga pulong ni Kristo ug ang Espiritu Santo mogiya kaninyo sa “tanang butang nga kinahanglan [ninyo nga] buhaton.” Tanan! Usa kini ka talagsaong gasa gikan sa Dios.
Mga kaigsoonan, mapasalamaton ko sa plano sa atong Langitnong Amahan alang sa kaluwasan. Tungod kay Siya nahigugma nato, Siya miandam og paagi aron makabalik ngadto sa Iyang presensya pinaagi sa Iyang Bugtong Anak, si Jesukristo. Ang pagkasayod niining talagsaong plano makatabang nato nga mahibalo nga kita mga anak sa Dios ug kita mahisama Kaniya. Mapasalamaton ko niining importante nga kamatuoran. Mohatag ko kaninyo sa akong pagsaksi nga ang mga pulong ni Jesukristo ug ang Espiritu Santo mogiya kanato aron makadawat og kinabuhing dayon. Nasayod ko nga kini nga mga butang tinuod. Sa sagradong ngalan ni Jesukristo, amen.