Ko ngā Tikanga Whakapono

I te koanga o 1842, i tukuna atu e te Poropiti Hōhepa Mete tētahi reta ki a John Wentworth, koia te ētita o tētahi niupepa e kīa nei ko te Chicago Democrat. Kei roto i tēnei reta tētahi kōrero mō ngā āhuatanga maha i te hītori tōmua o te Hāhi. Kei roto anō hoki i te tuhinga ngā kīanga 13 e whakamāramahia ana ngā whakapono o te Hunga Tapu o ngā Rā o Muri Nei. Kua mōhio haeretia ēnei ko ngā Tikanga Whakapono, kua tukuna i raro iho nei.

He whakaakoranga tūturu ngā Tikanga Whakapono nō te Hāhi, ā, kua whakatūturuhia hei wāhi nō ngā karaipiture i ngā rā o muri nei. He whakatauākī whakapono motuhake e āwhina ana i ngā mema kia mārama i ngā whakapono o te Hāhi me te whakamārama atu i ēnei whakapono ki ētahi atu. Heoi, ehara ēnei i te whakarāpopototanga whānui i ngā whakaakoranga Hāhi. Mā roto i ngā poropiti e ora ana, e ārahina tonutia ana te Hāhi e te whakakitenga me te ranga wairua.

1. E whakapono ana mātou i te Atua, i te Matua Ora Tonu, i Tāna Tama, a Ihu Karaiti, i te Wairua Tapu anō hoki.

2. E whakapono ana mātou ka whiua ngā tāngata mō ō rātou ake hara, ā, kāore mō te hē o Ārama.

3. E whakapono ana mātou mā te whakamārietanga a te Karaiti, ka taea te whakaora i ngā tāngata katoa mā te ngohengohe ki ngā ture me ngā tikanga tapu o te Rongopai.

4. E whakapono ana mātou, nā, ko ngā mātāpono me ngā tikanga tapu tōmua o te Rongopai, ko te: tuatahi, ko te Whakapono ki te Ariki ki a Ihu Karaiti; tuarua, ko te Rīpenetātanga: tuatoru, ko te Iriiringa rumaki hei murunga hara; tuawhā, ko te Whakapākanga i ngā ringaringa mō te takohatanga o te Wairua Tapu.

5. E whakapono ana mātou me karanga te tangata e te Atua, mā te poropititanga, me te whakapākanga i ngā ringaringa e te hunga kua whakamanahia, ki te kauhau i te Rongopai me te whakahaere i ōna tikanga tapu.

6. E whakapono ana mātou i taua whakaritenga pū anō i whakaritea ai i roto i te Hahi onamata, arā, ko ngā āpotoro, ko ngā poropiti, ko ngā hēpara, ko ngā kaiako, ko ngā kaikauhau i te rongopai, me ērā atu anō hoki.

7. E whakapono ana mātou i te takohatanga i ngā reo, te poropititanga, te whakakitenga, te kitenga, te mana whakaora, te whakamāoritanga i ngā reo, me ērā atu anō hoki.

8. E whakapono ana mātou ko te Paipera te kupu a te Atua; arā, ko te wāhi i tika te whakamāoritanga; e whakapono ana anō hoki mātou ko te Pukapuka a Moromona te kupu a te Atua.

9. E whakapono ana mātou i nga mea katoa i whakakitea mai nei e te Atua, i ngā mea katoa e whakakitea mai ana e Ia ināianei; ā, e whakapono ana mātou Māna anō e whakakite mai ngā mea tino tikanga utu nui maha e pā ana ki te Kīngitanga o te Atua.

10. E whakapono ana mātou i te huihuinga tūturu o Iharaira, ā, i te whakahokinga mai anō i ngā Iwi Kotahi Tekau; nā, ka hangaia a Hīona (te Hiruharama Hou) i runga i te whenua o Amerika; Mā te Karaiti pū anō te ao e whakahaere; ā, ka whakahoungia te ao, ā, ka whiwhi i tōna korōria pararaiha.

11. E kerēme ana mātou i te tikanga ki te koropiko ki te Atua Kaha Rawa e ai ki ngā ākinga o ō mātou ake whakaaro, me te tuku i ngā tāngata katoa taua tikanga anō, tukuna rātou kia koropiko pēhea, i hea, i te aha rānei e ai ki tā rātou e hiahia ai.

12. E whakapono ana mātou ki te tikanga o te noho i raro i te mana o ngā kīngi, o ngā tumuaki, o ngā rangatira, me ngā kaiwhakahaere ture, mā roto i te ngohengohe, te whakahōnore me te tautoko i te ture.

13. Ā, e whakapono ana matou i te mahi tika, pono, hē kore, atawhai, me te ū ki te pai, i te mahi pai anō hoki ki ngā tāngata katoa; arā, e whai ana mātou i tā Pāora koheteranga—E whakapono ana mātou i ngā mea katoa, e tūmanako atu ana mātou ki ngā mea katoa, kua manawanui mātou i ngā mea maha, ā, e manako ana mātou kia manawanui ai ki ngā mea katoa. Mehemea he mea pai, he mea ātaahua rānei, he mea kōrerotia paitia rānei, he mea whakamoemititia rānei, e whai ana mātou i ēnei mea.