I whakahaua e Ihu Āna Āpotoro ki te whakaako i te rongopai ki te ao.
Upoko 31
Ko Tō Tātou Haepapa ki te Kauhau i te Rongopai
Me pēhea tātou e āwhina i ngā tamariki a tō tātou Matua i te Rangi ki te whakarongo ki te rongopai?
E Hiahia ana Tō Tātou Matua i te Rangi kia Mōhio Āna Tamariki Katoa ki te Rongopai
E aroha ana tō tātou Matua i te Rangi i Āna tamariki katoa. He whakahirahira tātou katoa ki a Ia, e taea ana e tātou katoa te tupu kia rite ki a Ia. Kei te hiahia Ia kia hoki atu tātou ki te noho tahi me Ia me te whiwhi i taua harikoa anō, i taua korōria anō kei a Ia.
He mahere tā tō tātou Matua i te Rangi hei āwhina i a tātou katoa ki te hoki atu me te noho tahi me Ia. Ko te ingoa o te mahere ko te rongopai a Ihu Karaiti. Ina ako tātou i te rongopai, ka ako tātou i tō tātou hiranga. Ka ako tātou he aha tātou i tau ai ki runga i tēnei whenua. Ka ako anō tātou ko hea haere ai a te wā e mate ai tātou. Ka ako tātou me aha kia hoki atu ai ki tō tātou Matua i te Rangi.
Ko Ihu Karaiti tō tātou tuakana/tungāne ā-wairua. Ko Ia te tama mātāmua ā-wairua a tō tātou Matua i te Rangi. I haere mai Ia ki tēnei ao koia te Tama Kotahi Anake a tō tātou Matua i te Rangi i roto i te kikokiko. Nā te nui o tana aroha ki a tātou i whakamamaetia ai, i mate ai Ia mō tātou. Nāna i whakaako he aha tā tō tātou Matua i te Rangi hiahia kia mōhio ai, kia mahi ai tātou. Nāna Tana Hāhi i whakarite hei āwhina i a tātou. Nāna Tana tohungatanga i homai ki te tangata i runga i te whenua kia mahi ai rātou i Tana mahi.
Ko te Hāhi o Ihu Karaiti o te Hunga Tapu o ngā Rā o Muri Nei te hāhi anake e pupuri ana i te tohungatanga me te mahere o tō tātou Matua i te Rangi. E hiahia ana tō tātou Matua i te Rangi kia akoako ai ngā tāngata katoa i Tana mahere me te whakaae ki taua mahere. E tino whai tikanga ana ngā tikanga tapu o te Hāhi pono kia hoki atu ai tātou ki te noho tahi me tō tātou Matua i te Rangi.
Kua kīa e tō tātou Matua i te Rangi ngā mema katoa o Tana Hāhi kia whākina atu te rongopai ki ngā tāngata katoa. Kua whakapaua e ngā poropiti katoa ō rātou taima ki te whakaako i ētahi atu i te rongopai mai i te wā i a Ārama. Kua kīa mai tātou e rātou me tū katoa ia mema o te Hāhi hei mihingare. Koinei tētahi wāhanga o te oati i oati ai tātou i te wā i rumakina ai tātou. I oati tātou ki te kōrero atu ki ētahi atu mō Ihu i ngā wā katoa e taea ana.
Hei Matapaki
-
Me aha ngā tāngata e rongo ai i te rongopai?
-
Nō wai te haepapa ki te whakaako i te rongopai ki ngā tāngata katoa?
Me mārama ngā whānau katoa i te Hāhi te hiranga nui ki te whakaako i te rongopai. E mōhio ana tātou e pēhea nei te whakahirahira o te mahere o te rongopai. Me rahi tā tātou whakaaro ki ngā tāngata katoa ki te whakapau kaha kia mahia tā tātou e taea ai ki te whakamāramahia rātou mō te mahere a tō tātou Matua i te Rangi.
He maha ngā mea e taea ana e ngā mema whānau ki te āwhina i ētahi atu ki te ako i te rongopai. Ānei ētahi o aua mea:
-
Mahia ngā mea pai mō ētahi atu.
-
Kōrerohia atu kei te harikoa koe nā tō whakarongo ki ngā akoranga o te rongopai.
-
Whakamāramahia atu te rongopai ki ngā hoa me ngā hoa noho tata. Tonoa rātou kia haere tahi atu ki ngā huinga hāhi.
-
Tonoa ngā tāngata kia haere mai ki tō kāinga mō te pō kāinga, hei āhea rānei e taea ai e ngā mihingare ki te whakaako i a rātou.
-
Tukuna atu ki ngā mihingare ngā ingoa me ngā wāhi noho o ō hoa me ō whanaunga e hiahia ana pea ki te ako i te rongopai.
-
Whakaakona ngā tamariki te hiranga nui ki te mahi hei mihingare. Āwhinatia rātou ki te penapena pūtea kia haere ki te mīhana.
-
Tukuna atu tō whakatekau.
-
Takohangia he pūtea ki te tahua mihingare.
Hei Matapaki
-
Whakaarohia me pēhea e whakamōhio atu ai ki tētahi ehara i te Hāhi mō te rongopai.
-
He aha tā tō whānau ki te āwhina i ētahi atu tāngata ki te ako i te rongopai?
Ka Whai Wāhi atu tō Whānau i roto i ngā Mahi Mihingare Whakahirahira o te Hāhi
Kua tukuna atu e tō tātou Hāhi ngā mihingare manomano ki te whakaako i te rongopai i ngā whenua maha. Ko te nuinga o rātou kei waenga i te 18 me te 25 tau te pakeke. Ka haere anō hoki te hunga kaumātua hei mihingare. He mema ū, he mema ngohengohe rātou nō te Hāhi e hiahia ana ki te mahi aroha mō tō tātou Matua i te Rangi.
Me nui ake ngā mihingare. Ka whai wāhi atu tō whānau i roto i tēnei mahi whakahirahira mā te whakariterite i ngā mema o te whānau ki te haere i runga i tētahi mīhana. E taea ana e ngā mātua te āwhina i ā rāua tamariki ki te hopu i tētahi mōhiotanga mō te rongopai me te ako me pēhea e whakamārama atu ai i te rongopai ki ētahi atu. Ka taea e rāua te whakaako i ā rāua tamariki ki te aroha atu i iwi kē nō ngā ahurea katoa. Me whakarite anō ngā mātua i a rāua anō ki te haere i runga i tētahi mīhana ina pakekehia ake ngā tamariki.
He tokomaha ngā tāngata kāore anō kia rongo i te rongopai. E noho ana ētahi i roto i ngā whenua kāore i taea e ngā mihingare ki te haere ki reira. Me whai wā ēnei tāngata ki te rongo, ki te whakawhiwhi i te rongopai. Mā tō tātou Matua i te Rangi tētahi huarahi e whakapuare kia pēnei ai. Me inoi tātou ki a Ia kia tukuna ai e ngā rangatira o ēnei whenua kia kuhu atu ai ngā mihingare ki te whakaako i ō rātou iwi.
Hei Matapaki
-
E pēhea ana ngā whānau o te Hāhi e tutuki ana i ō rātou haepapa ki te whakaako i te rongopai ki ngā tāngata katoa?
-
He aha e nui ake ai ngā mihingare i ēnei rā?
Ka Nui ngā Manaakitanga e Tau ai ki te Hunga e Whāki atu i te Rongopai ki Ētahi atu
Ka manaakitia tātou e tō tātou Matua i te Rangi mēnā ka whai whakaaro atu tātou ki ētahi atu me te whakamōhio atu i te rongopai ki a rātou. Māna tātou e manaaki nā tā tātou whakarongo atu ki Tana whakahaunga, ā, mō te harikoa e kawea mai nei e tātou ki te hunga e whakaae mai ki te rongopai. Kua kī mai Ia ki a tātou ka hari tātou mēnā ka āwhina i te mea kotahi o Āna tamariki ki te ako i te rongopai me te hoki atu ki a Ia. Ka nui noa atu tō tātou hari mēnā rānei ka tokomaha Āna tamariki e āwhinatia ai e tātou ki te hoki atu ki a Ia.
Hei Matapaki
-
He aha ngā manaakitanga e puta ai i te kawenga atu i te rongopai ki ētahi atu?
-
Kua kitea e koe ētahi o ēnei manaakitanga?