Kupu Whakataki

Ka āwhina tēnei pukapuka i a koe ki te ako me te whakaako i ngā mātāpono tūāpapa o te rongopai o Ihu Karaiti. Mā te mōhio ki ēnei mātāpono, e mārama ai koe ki te tino tikanga o te oranga, me pēhea hoki e harikoa tūturu ai. He pono ngā mātāpono kua whakamāramatia i te pukapuka nei. I a koe e ako ana i ēnei mātāpono, e whakaaroarotia ana, e inoi hoki ana mō ēnei mātāpono, ka mōhio koe mōu ake, ā, ka whakaatu hoki te Wairua Tapu ki a koe, he pono.

E āhei ana koe te whakamahi i tēnei pukapuka mō ngā kaupapa rerekē maha. Ka taea te whakamahi hei akoranga māu anō. Ka taea rānei te whakamahi ki te whakarite kōrero, kia whakamārama rānei i te rongopai ki ētahi atu.

E āhei ana te whakamahi i tēnei pukapuka mō ngā akoranga whānau, mō ngā pō whānau hoki. He pātai kei ia kaupapa ako, kia kite ngā mātua me ngā kaiako i te māramatanga o ngā tamariki, o te hunga ako rānei.

Ina whakaako koe i ngā akoranga mai i tēnei pukapuka, ka neke ake pea tāu whakaako i te upoko kotahi i roto i tētahi akomanga, ka nui ake rānei i te akomanga kotahi e tirohia ana tētahi upoko. Me mātua mārama ngā tauira i tētahi mātāpono i mua i te kāneke whakamua ki kaupapa kē. Mehemea kei a koe ngā whakamāoritanga o ngā karaipiture, tirohia ake ngā tohutoro karaipiture kātahi ka kōrerohia tahitia.

Mehemea he kaiako koe, me mahara e 21 ki te 25 anake pea ngā wāhanga ako i te tau kotahi. Nā wai rā, me whakatōpū pea koe i ngā kaupapa ako 10 ki te akoranga kotahi. Whakaarohia ngā hiahia o āu tauira, ā, kōwhiria ngā kaupapa ako ka whakatōpūhia, ko ēhea hoki ngā kaupapa ka roa ake tana tirotiro.

Ka hiahia pea koe ina tata atu ki te mutunga o te tau kia noho mō te akoranga kotahi e rua rānei ngā akoranga e whakawhitwhiti kōrero ana mō ngā Tikanga Whakapono, kei roto hoki i tēnei pukapuka. Māu anō ngā Tikanga Whakapono hei āta tiro whakamuri ki ngā akoranga kua mahi kē.

E ngā mātua me ngā kaiako, me inoi koutou mō te ārahitanga i a koutou e whakarite ana ki te whakaako i ēnei akoranga. Tukuna mā te Wairua Tapu koutou e ārahi i roto i ō māramatanga, i roto hoki i ō whakaakoranga. Me pānui ngā mema katoa e taea ana i ngā upoko me te haere rite mai ki te tohatoha ki ērā atu mema i ngā whakawhitinga kōrero o te akomanga.

Ina kite koe i tētahi kupu kua tohungia ki te *, ka kite koe i tōna whakamāramatanga ki te wāhanga Ngā kupu me mōhio ki te mutunga o tēnei pukapuka. He nui anō ngā kupu i reira, kia mārama ai koe ki te tikanga o ēnā kupu.

Mā te Atua koe e manaaki i a koe e ako ana, e inoi ana i ngā mea pono i tēnei pukapuka.