I whakapono te tangata matapō ka whakaora te Karaiti i a ia.
Upoko 13
Te whakapono ki a Ihu Karaiti
Me pēhea tātou e whakapono ai ki a Ihu Karaiti ahakoa kāre anō kia kite i a Ia?
Ka taea e tātou te whakapono ki a Ihu me te whakawhirinaki atu ki a Ia
Ko te tikanga o te whakapono, ka whakapono tātou ki tētahi tangata, ki tētahi mea rānei tē taea te kite, ā, ka mahi tātou i tētahi mea e hāngai tonu ana ki taua mea e whakapono ana tātou. Hei tauira, ka whakapono tētahi kaipāmu, mehemea ka whakatō kākano Ia, ā, me te āta tiaki i aua kākano, ka hua mai he tipu. Nā wai rā, ka whakatō Ia i ngā kākano, ā, ka whāngaihia ki te wai, ka tiaki hoki i aua kākano. I tana mahinga i tēnei, ka tipu ngā kākano, ā, ka whai hua.
Ki te whakapono tātou ki a Ihu, ka whakapono tātou e ora ana Ia, ā, ka whakarongo tātou ki a Ia, ahakoa tē taea te kite i a Ia. Ko ēnei ētahi o ngā mea e whakapono ana tātou mō Ihu mehemea e whakapono ana tātou ki a Ia:
-
E whakapono ana mātou i kōwhiri tō tātou Matua i te Rangi i a Ihu hei āwhina i a tātou ki te whai i te mahere o tō tātou Matua i te Rangi.
-
E whakapono ana mātou ko Ihu tō tātou Kaiwhakaora.
-
E whakapono ana mātou, nā i whānau mai Ia i tēnei ao, hei Tama nā tō tātou Matua i te Rangi.
-
E whakapono ana mātou i haramai Ia ki te ao ki te whakaako i a tātou me pēhea e hoki atu ai ki tō tātou Matua i te Rangi.
-
E whakapono ana mātou e aroha ana Ia ki a tātou.
-
E whakapono ana tātou i whakamamaetia Ia mō ō tātou hara, kia taea e tātou te rīpenetā, ā, kia kore ai tātou e whakawhiua mō aua hara.
-
E whakapono ana mātou i mate Ia, ā, i whakaarahia ai.
-
E whakapono ana mātou he pono Āna whakaakoranga.
-
E whakapono ana mātou, mehemea ka whakarongo tātou ki a Ihu, ka taea e tātou te hoki atu ki tō tātou Matua i te Rangi noho ai.
He mea tino whai tikanga te whakapono ki a Ihu Karaiti, kia hoki anō tātou ki tō tātou Matua i te Rangi. Ki te whakapono tātou ki a Ia, ka whakawhirinaki tātou ki a Ia, ā, ka hiahia tātou ki te ako Mōna. Ko Ihu anake te mea e āhei ana te ārahi i a tātou ki tō tātou Matua i te Rangi. Ko rātou anake e whakapono ana ki a Ihu, ā, e whakarongo ana hoki ki a Ia, e taea ai te hoki atu ki tō tātou Matua i te Rangi noho ai.
Hei Matapaki
-
He aha te whakapono?
-
He aha te whakapono ki a Ihu?
-
He aha ētahi o ngā mea e whakapono ana tātou mō Ihu?
-
He aha te take me whakapono tātou ki a Ihu Karaiti?
I homai e Ihu tētahi huarahi kia tipu ai tō tātou whakapono ki a Ia
Kua kī mai a Ihu ki a tātou me pēhea e taea ai e tātou te ako Mōna, ā, me pēhea hoki e whakapono ki a Ia. Kua kī mai Ia ki a tātou kia pānuitia ngā karaipiture, ā, kia ako hoki i ngā mea kua tuhia ai e ngā poropiti Mōna. Kua tonoa tātou e Ia kia whakarongo ai tātou ki te poropiti e ora ana i tēnei rā. Kia mahia ai ēnei mea, ka ako tātou e pā ana ki a Ihu.
I a tātou e ako ana mō Ihu, me karakia tātou. Me inoi atu tātou ki tō tātou Matua i te Rangi, kia āwhinatia ai tātou ki te mārama ki ngā mea e pānuitia ai, ā, e rangona ai mō Ihu. Ka tono tō tātou Matua i te Rangi i te Wairua Tapu hei āwhina i a tātou kia whai māramatanga ai mō ngā mea e ako ana tātou. Ka kī mai te Wairua Tapu ki a tātou, ko Ihu te Tama a tō tātou Matua i te Rangi, ko Ia tō tātou Kaiwhakaora, ā, he pono Āna whakaakoranga.
I kī tētahi poropiti ko Arami tōna īngoa, mehemea e hiahia ana tātou te mōhio i te pono o tētahi mea, me whakamātau tātou i taua mea. I whakataurite Ia i tēnei ki te whakaono i tētahi kākano. Ki te whakaono tātou i tētahi kākano pai, ā, ka tiakina ai, ka tipu taua kākano, ā, ka mōhio tātou he kākano pai. Ki te kore taua kākano e tipu, ka mōhio tātou ehara i te kākano pai. Ki te hiahia tātou ki te mōhio i te pono o ngā whakaakoranga a Ihu, me ako tātou, ā, me whakarongo hoki tātou ki a rātou.
He nui kē atu te tikanga o te whakapono ki a Ihu, i te kī noa iho e whakapono ana tātou ki a Ia. Ko tōna tino tikanga, ka tino kaha te whakawhirinaki atu ki a Ia kia hiahia ai tātou te whakarongo ki a Ia, ahakoa ngā mea ka whakahaua tātou e Ia. Ko rātou anake e whakarongo ana ki a Ihu e tino whakapono ana ki a Ia. Kia whakarongo ai tātou ki a Ia, ka kaha ake tō tātou whakapono ki a Ia. Ka ako tātou, nō tō tātou Matua i te Rangi tonu Āna akoranga, ehara nō te tangata.
Ki te kore tātou e whakarongo ki a Ihu, ka ngoikore ake tō tātou whakapono. Ki te mahi tātou i ngā mea ka whakahaua e Ia, ka kaha ake te tipu o tō tātou whakapono. Ka kaha ake te tipu o tō tātou whakapono kia mātau pū tonu tātou kei te ora Ia, nā, pērā tonu te mātau me te mea nei kua kitea Ia e tātou.
Hei Matapaki
-
Me pēhea tātou e whakapono ai ki a Ihu mehemea kāore tātou e kite i a Ia?
-
He aha te take me whakarongo tātou ki a Ihu kia whakapono ai ki a Ia?
Ka taea e tātou te whiwhi i te mātauranga me te kaha nui ki te whakapono tātou ki a Ihu
He whakapono kaha mō Ihu, tō ngā poropiti kei roto i ngā karaipiture. Nā tēnei whakapono i whai kaha ai rātou ki te āwhina i ō rātou iwi. Nō te mea i whakapono rātou ki a Ihu, i a rātou te kaha ki te mahi i ngā mea tē taea e rātou te mahi ko rātou anake.
I mua i te whānautanga mai o Ihu ki te ao, i tohutohu tō tātou Matua i te Rangi i a Ia kia kōrero atu ki te poropiti e kīa nei ko Noa, kia hangaia ai tētahi kaipuke, nō te mea ka tono tō tātou Matua i te Rangi i tētahi waipuke nui ki te kore te hunga kino i taua wā e rīpenetā. Kāore ngā tāngata i rīpenetā. I whakapono a Noa ki a Ihu, ā, i hanga ia i te kaipuke. I te taenga mai o te waipuke, i mate katoa ngā tāngata kāore i rīpenetā; heoi i haumaru ai a Noa me tōna whānau i roto i te kaipuke, nō te mea i whakapono rātou ki a Ihu, ā, i mahi rātou i tērā i meatia e Ia.
Ko Mohi tētahi poropiti i ārahi i tōna iwi atu i te ponongatanga. I tono tō tātou Matua i te Rangi i a Ihu ki te āwhina i a Mohi nō te mea i whakapono a Mohi ki a Ihu, ā, i mahi ia i ngā mea i tohutohungia ia e Ihu.
I te oranga o Ihu i te ao, i tino whakapono tētahi wahine ki a Ia. I te māuiui te wahine nei mō tētahi wā roa, ā, i whakapono ia, mehemea ka pā noa iho ia i ngā kākahu o Ihu, ka whakaorangia ia. I te hīkoi a Ihu i tētahi mātoru tangata. I panapana ia i te mātoru tangata nei ki a Ihu, ā, i pāngia ai Ōna kākahu. I whakaorangia wawetia ia. I kōrero a Ihu ki a ia, nā tōna whakapono ia i whakaora ai.
I whakapono te poropiti a Hōhepa Mete ki a Ihu Karaiti. I pānui Ia i te Paipera, ka whakautu tō tātou Matua i te Rangi i ō tātou inoi ki te whakapono tātou ka pērā ai. I inoi a Hōhepa ki tō tātou Matua i te Rangi. I whakakitea atu tō tātou Matua i te Rangi rāua ko Ihu i a rāua anō ki a Hōhepa. I kī atu tō tātou Matua i te Rangi ki a Hōhepa kia whakarongo atu ki a Ihu me ngā mea ka tohutohungia atu ki a Ia. I whakarongo a Hōhepa ki a Ihu, nā wai rā i whiwhi Ia i Te Pukapuka a Moromona, ā, i āwhina hoki ki te whakahou anō i te Hāhi o Ihu Karaiti.
Ka āwhina hoki a Ihu i a tātou ki te whakapono tātou ki a Ia. Ka āwhina Ia i a tātou me ō tātou raruraru. Ka āwhina Ia i a tātou mehemea e iwingohe ana. Ka āwhina Ia i a tātou kia whakatikahia ō tātou hara. Mā tēnei e āhei hoki tātou ki te āwhina i ō tātou whānau me ētahi atu tāngata.
Ki te whakapono tātou ki a Ihu, ka tīmata tātou ki te whai i te mahere o tō tātou Matua i te Rangi. Ka tīmata tātou ki te whakatinana me te mahi i ngā mea e ārahina ai tātou ki tō tātou Matua i te Rangi. Ki te ū tātou, ā tōna wā, e hoki atu ai tātou ki a Ia mo āke tonu atu.
Hei Matapaki
-
He aha te momo mātauranga, te momo kaha rānei e whiwhi ai tātou ki te whakapono tātou ki a Ihu?