Ngā Rauemi
Upoko 12: Te Whakamārietanga o Ihu Karaiti

Upoko 12

Te Whakamārietanga o Ihu Karaiti

I tino whakamamaetia Ia i ō tātou hara. He aha i kōwhiri ai e Ia kia mate ai mō tātou?

I tono tō tātou Matua i te Rangi i a Ihu Karaiti ki te ao hei Kaiwhakaora mō tātou

Me whai tinana kikōiwi tātou kia meinga tonu pērā ki tō tātou Matua i te Rangi. Heoi, i mōhio tō tātou Matua i te Rangi ka mate tātou, ā, ka ngaro i ō tātou tinana, nā te mea kāore a Ārama rāua ko Iwi i whakarongo ki tō tātou Matua i te Rangi. Nā te kai i te hua i tohutohungia e tō tātou Matua i te Rangi kia kaua e kai, ā tōna wā e mate ai rāua, ā, me ngā tāngata katoa hoki e ora ai whai muri i a rāua. Waihoki, i mōhio tō tātou Matua i te Rangi ka hara tātou katoa i a tātou i te ao, nā runga anō i ō tātou hara, tē taea e tātou te hoki atu ki a Ia noho ai. He mea whai tikanga kia āwhinatia ai tātou hei utu i te whiu o ō tātou hara, ā, kia ngohengohe ai, mā reira e hoki atu ai ki tō tātou Matua i te Rangi. He mea whai tikanga anō kia āwhinatia tātou ki te whiwhi anō i ō tātou tinana kikōiwi i muri i te matenga. I mea a Ihu ka āwhina Ia i a tātou. Ka meinga Ia hei Kaiwhakaora mō tātou.

He mea whai tikanga, kia utua ai ō tātou hara e tētahi tangata harakore. Ko Ihu anake te Mea e taea ai tēnei. Kāore Ia i hara. I a Ia te kaha i runga i te mate, nō reira ka taea e Ia te āwhina i a tātou kia whiwhi anō i ō tātou tinana i muri i te matenga. I tino aroha Ia ki a tātou. I ngākaunui Ia kia whakamamaetia ai mō ō tātou hara, kia mā ai tātou. I ngākaunui hoki Ia ki te mate mō tātou, kia ora ai anō tātou i muri i te mate. Ko te whakahere o Ihu mō tātou, e kīa nei ko Te Whakamārietanga.

Hei Matapaki

  • He aha i whai tikanga ai, kia tono tō tātou Matua i te Rangi i a Ihu ki te ao?

Ka whakaatu te whakamamaetanga o Ihu i Tōna aroha, me te aroha ō tō tātou Matua i te Rangi mō tātou

E tino aroha ana tō tātou Matua i te Rangi i a tātou, nā wai rā i tono Ia i Tana Tama a Ihu ki te ao, ā, i whakaae Ia kia whakamamaetia, kia mate ai hoki Ia mō tātou. Nā te tino nui o tō Ihu aroha mō tātou i whakamamaehia nuitia Ia, ā, i mate Ia mō tātou. I mōhio a Ihu, ka tino nui te whakamamaetanga. I tata nui ake i tērā ka taea e Ia te kawe. Heoi i hiahia Ia kia meinga tonu tātou, pērā tonu ki tō tātou Matua i te Rangi.

I haere a Ihu ki tētahi wāhi e kīa nei ko te Kāri o Kehemane. I reira, i tūturi Ia, ā, i inoi ki tō tātou Matua i te Rangi mō te āwhina. I pātai Ia ki tō tātou Matua i te Rangi, mehemea e āhei ana, kia kaua Ia e whakamamaetia ai. Heoi, i kī Ia, ka mahi Ia i te mea i hiahiatia e tō tātou Matua i te Rangi. Kāore a Ihu i meinga ai kia whakamamaetia. I kōwhiri Ia kia whakamamaetia, nō te mea, he wāhanga tonu tērā o te mahere o tō tātou Matua i te Rangi, kia horoia ai tātou i ō tātou hara.

I roto o Kehemane, i whakamamaetia a Ihu mō ngā hara katoa o te ira tangata, me te mea nei Nōna anō aua hara. He nui kē atu Ōna whakamamaetanga mō ngā hara nei, i te māramatanga e mārama ai e tētahi o tātou. Nā te kaha o te mamae i hūngoingoi ai Ia. I heke te toto i ia putaputa kiri o Tōna tinana.

A muri ake, i haramai ngā tāngata kino, ā, i kawe atu i a Ia ki ngā rangatira o Hiruharama. I reira, i tuha rātou ki runga i a Ia, ā, i patu i a Ia. I hanga rātou i tētahi karauna tātarāmoa, ā, i pōtaea ki Tōna māhunga. I kata rātou ki a Ia, ā, i tāwai hoki i a Ia.

I tohutohu ngā rangatira i ngā hōia, kia rīpekatia a Ihu. I meinga Ia e rātou, kia kawea e Ia tētahi rīpeka kua hangaia e te rākau taumaha ki te wāhi e mate ai Ia. I whakairi rātou i a Ia ki te rīpeka mā te pao i ngā nēra ki roto i ōna ringaringa me ōna waewae. I runga i te rīpeka, i mutu i a Ia te whakamamaetanga mō te whiu o te kore whakarongo a Ārama, ā, mō ō tātou ake hara hoki.

I waihotia Ia ki reira e iri ana mō ngā hāora maha. Ahakoa ōna whakamamaetanga, ā, ahakoa i tāwaitia Ia, i wahangū, ā, i manawanui tonu Ia. Kātahi rā, i kōrero Ia ki tō tātou Matua i te Rangi, ka tukua e Ia Tōna wairua ki a Ia, ā, i mate Ia.

I a Ihu te kaha ki te whakaora anō i a Ia i te mate. I āhei tonu Ia ki te ora, heoi i kōwhiri Ia kia mate ai, kia taea e tātou te ora anō me tō tātou Matua i te Rangi.

I te matenga o Ihu, i wehe atu Tōna wairua i Tōna tinana. E toru ngā rā whai muri ake i Tōna matenga, i hoki anō Tōna wairua ki Tōna tinana, ā, i ora anō Ia. Ko te hokinga anō o te wairua ki te tinana, e kīa nei ko te aranga.

I whakakitea ai a Ihu i a Ia anō ki Ōna āpotoro me ētahi atu tāngata i muri i Tōna whakaarahanga. I whakaatu Ia ki Ōna āpotoro i ngā matohu i mahue ake i ngā nēra i Ōna ringaringa me Ōna waewae. I whakapā atu rātou i ngā matohu, ā, i mōhio ai rātou ko tō rātou kaiārahi tēnei, a Ihu, i whakaora anōtia. I kōrero tahi Ia ki a rātou, ā, i kaitahi hoki.

Hei Matapaki

  • I whakaatu pēhea tō tātou Matua i te Rangi i Tōna aroha mō tātou?

  • I whakaatu pēhea a Ihu i Tōna aroha mō tātou?

Christ in Gethsemane [Te Karaiti i Kehemane], nā Harry Anderson

I te Kāri o Kehemane, ā, a muri ake, i runga i te rīpeka, i utaina a Ihu ki runga i a Ia anō ngā hara o ngā tāngata katoa.

Nā Ihu i Mea Kia taea ai ō Tātou Hara te Horoi

Ko Ihu anake e taea ai te utu mō ō tātou hara. Ka whiwhi tātou i ngā painga katoa o Tōna whakahere, mā te whakapono e ora ana Ia, ā, mā te mau hoki ki Āna whakahaunga. Me pōuri tātou i ō tātou hara. Kia kaua tātou e hara anō. Me whai tātou i ngā whakaakoranga a Ihu Karaiti. Kātahi, ka murua o tātou hara e tō tātou Matua i te Rangi.

Hei Matapaki

  • He aha e whai tikanga ai a Ihu ki a koe, kia whakatikahia ō hara?

  • Me aha koe, kia utua ai o hara e Te Whakamārietanga o Ihu?

Christ on the Cross [Te Karaiti i runga i te Rīpeka], nā Carl Heinrich Bloch

I mate a Ihu i runga i te rīpeka mō ngā hara o ngā tāngata katoa.

Nā Ihu, ka whiwhi anō tātou katoa i ō tātou tinana

I ngākaunui a Ihu kia mate ai, ā, ko Ia te tangata tuatahi ki te whakaara ake. Ko Ia anake te tangata i whai kaha ai ki te whakaara i a Ia anō. Nāna anō tātou e āhei ai ki te whakaara.

Ahakoa ka mate tātou, ka ora anō tātou. Kia mate ai tātou, ka wehe atu ō tātou wairua i ō tātou tinana. Heoi, nā te mea i wikitōria a Ihu i te mate, ka hono anō ō tātou wairua me ō tātou tinana mō āke tonu atu. E kore tātou e mate anō. He taonga tēnei kua tukuna mai e Ihu ki ngā tāngata katoa ka whānau mai ki te ao.

Hei Matapaki

  • I pēhea i whakaāhei ai e Ihu, kia whiwhi anō tātou i ō tātou tinana?

  • Ko wai ka whakaarahia?