Upoko 24
Te Rā Koropiko
Kua tohutohu mai tō tātou Matua i te Rangi kia waiho e tātou tētahi rā hei ia wiki hei koropiko atu ki a Ia. Ka whiwhi tātou i ngā manaakitanga maha ina whakatapu tātou i taua rā hei rā tapu.
I Homai e Tō Tātou Matua i te Rangi Tētahi Rā Koropiko Ki a Tātou Hei Āwhina i a Tātou
E mōhio ana tō tātou Matua i te Rangi he maha ā tātou raruraru. He maha ngā mea me mahi tātou ia rā. Me mahi tātou kia whiwhi kai, ā, kia hoko kākahu hoki. Me whakarite kai tātou, ā, me ētahi atu mahi o ia rā.
Nā ēnei mahi katoa, e ngāwari noa ana te wareware ki tō tātou Matua i te Rangi. He ngāwari hoki te wareware ki ngā mea e hiahiatia ana e tō tātou Matua i te Rangi hei mahi mā tātou. He nui ake tā tātou aro atu ki ngā mahi o te ia rā i tā tātou aro atu ki tō tātou Matua i te Rangi.
E mōhio ana tō tātou Matua i te Rangi me whai wā tātou ki te whakaaro Mōna. Me whai wā tātou ki te ako i Tana e hiahia nei mō tātou. Nā tēnei, kua tohutohu mai Ia ki a tātou kia whakangā ai tātou kotahi te rā ia wiki, ā, kia ako Mōna.
Nā tō tātou Matua i te Rangi te ao i hanga mā roto i a Ihu Karaiti i ngā wāhanga taima e ono. I huaina ēnei wāhanga taima he rā. I te rā tuawhitu, i whakatā Ia i Tāna mahi waihanga ao. Kua mea mai Ia ki a tātou me whakatā tātou i ā tātou mahi i te rā kotahi ia wiki.
Kua Tohua mai e Tō Tātou Matua i te Rangi Tēhea Rangi hei Rā Koropiko
I tohua e tō tātou Matua i te Rangi ngā tāngata i ngā wā onamata kia meatia te rā tuawhitu o te wiki hei rā koropiko. He mea āwhina tēnei rangi i ngā tāngata ki te maumahara atu nō muri iho i Tana waihanga i te ao ka whakatā Ia i te rangi tuawhitu.
I muri iho i te matenga o Ihu, i whakaarahia Ia i te rā tuatahi o te wiki. I meatia e ngā kaiaru o Ihu i te rā tuatahi o te wiki hei rā koropiko, hei āwhina i a rātou ki te maumahara, ā, ki te whakahonore i te rā aranga o Ihu. Ka karangatia e tātou tēnei rā ko Te Rā o Te Ariki. (I ētahi wā ka karangahia a Ihu ko Te Ariki.) Ka karangahia hoki e tātou tēnei rā ko te Rā Hāpati.* Ahakoa he rā kē atu i tērā i meatia ai i ngā wā onamata hei rā koropiko, he rā kotahi tonu i ngā rā e whitu. Ka mahi tonu tātou i ā tātou mahi o te ia rā i ngā rā e ono o te wiki. Kātahi ka koropiko tātou ki tō tātou Matua i te Rangi hei te rā tuawhitu.
I ō tātou rā o nāianei, meatia ai e te nuinga o ngā tāngata te rā tuatahi, arā, te Rātapu, hei rā koropiko. He torutoru anō hoki ngā wā kua kī atu tō tātou Matua i te Rangi ki Tana poropiti, e āhei ana Āna iwi i ētahi atu whenua kia meatia tētahi atu rā hei rā koropiko.
He rā koropiko te Rātapu.
Ka Taea e Tātou Te Pūmau ki Tō Te Ariki Rā Tapu
He maha ngā mea me mahi tātou i te rā o te Ariki. Ko te mea matua ka taea e tātou te mahi, he whakaaro mō tō tātou Matua i te Rangi rāua ko Ihu mō te roanga atu o te rā. Me whakaaro tātou ki ngā mea e hiahiatia ana e Rāua kia mōhio ai, ā, kia mahi ai hoki tātou. Ānei ētahi o ngā mea ka taea e tātou te mahi i te rā koropiko hei āwhina i a tātou ki te maumahara, ā, ki te ako mō tō tātou Matua i te Rangi:
-
Tirohia ngā karaipiture e whakaako ana mō tō tātou Matua i te Rangi rāua ko Ihu.
-
Āwhinatia ētahi atu ki te ako mō te Hāhi.
-
Whakaakongia ō tātou whānau mō tō tātou Matua i te Rangi rāua ko Ihu me ngā mea e hiahiatia ana e Rāua hei mahi mā tātou.
-
Haere ki ngā hui me ngā akoranga o te Hāhi e ako tahi ai tātou e pā ana ki te rongopai. Ka taea e tātou te ako i ngā pūrākau e pā ana ki a Ihu me ētahi atu akoranga o te rongopai, ā, ka taea hoki e tātou te kōrero tahi i ngā mea kua mahia e tō tātou Matua i te Rangi rāua ko Ihu mō tātou.
-
Whakatā i ngā mahi e mahia ana e tātou i ērā atu rā o te wiki.
-
Inoi.
-
Toro atu ki te hunga māuiui, ā, āwhinatia rātou kia piki ai te ora.
-
Tuhia iho ētahi o ngā mea e pā ana ki ō tātou whānau kia taea e tātou te maumahara ki ērā a muri ake nei.
Me kai ngā mema o te Hāhi o Ihu Karaiti i te hakarameta i te rā koropiko. Ka taea e rātou te whakarite i a rātou anō ki te kai i te hakarameta mā te aro atu i ngā whakaaro ki a Ihu me ngā mea kua mahia e Ia mō tātou. Me tono rātou ki tō tātou Matua i te Rangi kia āwhinatia ai rātou ki te maumahara ki a Ihu. I a rātou e kai ana i te hakarameta, me maumahara rātou ki ngā taurangi tapu kua meatia e rātou. Me aro ō rātou whakaaro ki ngā mea kua whakaaria nei e tō tātou Matua i te Rangi ki a rātou mehemea ka whakarongo rātou ki a Ihu.
He maha ngā mea me kaua tātou e mahi i te rā koropiko. Me kaua tātou e mahi. Me kaua e whakamahi ō tātou whānau, ā tātou pononga, ā tātou kararehe rānei. Me kaua tātou e pānui, e mātaki i ngā hōtaka i runga pouaka whakaata, e whakarongo rānei ki ngā waiata e aukati ai i ō tātou whakaaro ki tō tātou Matua i te Rangi rāua ko Ihu. Me kaua tātou e haere ki ngā kaupapa hākinakina. Me kaua tātou e hoko, e hoko atu rānei i ētahi mea. Tērā pea e whai tikanga ana ēnei mea, engari kāore ēnei mea e āwhina i a tātou kia whai whakaaro ai ki tō tātou Matua i te Rangi rāua ko Ihu i tēnei rangi tapu.
He wā ōna pea me mahi e tātou i runga i te rā koropiko, engari me ngana e tātou kia kaua e pēnā. I ngā wā e tino tika ana ki te mahi, me ngana tātou ki te aro pūmau ō tātou whakaaro ki tō tātou Matua i te Rangi rāua ko Ihu i a tātou e mahi ana.
Hei Matapaki
-
Me aha tātou i te rā o te Ariki?
-
He aha ngā mea me kaua tātou e mahi i te rā koropiko?
Ka Manaakitia Tātou e Tō Tātou Matua i te Rangi Mō Te Pūmau ki Tō Te Ariki Rā Tapu
Kotahi tonu te take o te rā koropiko i ngā wā katoa. He rangi hei whakatā i ngā mahi e mahi nei tātou ia rā, ia rā. He rā hei ako i ngā mea e pā ana ki tō tātou Matua i te Rangi me te whakarite mō te oranga i Tōna taha. He rā hei hāpai ake i te āhua o ō tātou oranga mā te ako tonu he aha ngā mea e hiahia ana tō tātou Matua i te Rangi hei mahi mā tātou.
He rangi pai tēnei mō tātou. Mā konei e āwhina i a tātou kia maumahara ai ki tō tātou Matua i te Rangi me te pūtake he aha tātou i konei i tēnei ao. Ina mahi tātou i ngā mea e hiahiatia ana e tō tātou Matua i te Rangi hei mahi i runga i te rā o te Ariki, ka whiwhi manaakitanga tātou. Ka harikoa ake ō tātou whānau. Ka whakahauorahia ō tātou tinana. Ka whakatata atu tātou ki tō tātou Matua i te Rangi me Āna akoranga. Ka kaha ake tō tātou rongo i te whakaawenga o te Wairua Tapu i te roanga katoa o te wiki. Nā tā tātou ngohengohe ka āwhina tō tātou Matua i te Rangi i a tātou ki te hopu kai, kākahu, me ēra atu mea e tika ana mō tātou. Ka āwhina Ia i a tātou ki te ako Mōna, ā, kia harikoa ai hoki.
Hei Matapaki
-
He aha ētahi take me pūmau tātou ki te rā koropiko hei rangi tapu?