Nā te Karaiti te huarahi i whakapuare kia ora ai tātou hei tua i ō tātou matenga.
Upoko 35
Te Oranga hei tua i te Mate
Me pēhea tātou e whakarite ai mō te oranga kei tua?
Ka Ora Ō Tātou Wairua hei tua i ō Tātou Matenga
Ko tātou ngā tamariki wairua nā tō tātou Matua i te Rangi. I a tātou e noho ana ā-wairua me Ia i te rangi kāore ō tātou tinana ōkiko. He wāhanga nō Tana mahere kia whānau mai ai tātou i tēnei ao, ā, kia whiwhi anō ō tātou wairua i ngā tinana kikōiwi. Nā ō tātou wairua te mauri o ō tātou tinana ōkiko i a tātou e noho ana i tēnei ao.
He pērā me ō tātou whānautanga mai hei wāhi nō te mahere o tō tātou Matua i te Rangi, ko te matenga tētahi anō wāhanga o Tana mahere. Ina mate tātou, ka wehe ō tātou wairua i ō tātou tinana. Ki te kore he wairua, kāore he oranga tō te tinana, ā, ka whakatakotohia ki roto i te rua kōiwi.
Engari, i te ora kē ō tātou wairua i mua i ō tātou whānautanga mai, ā, ka ora tonu ēnā hei tua atu i te matenga. Ina mate tātou, ka haere ō tātou wairua ki te ao wairua kia tāria te aranga, ka takoto tonu te tinana i te rua kōiwi.
I te ao wairua, ka rite te āhua o ō tātou wairua ki te āhua o ō tātou tinana kikōiwi i a tātou e noho ana i tēnei ao. Ka rite ō tātou āhua ki ō nāianei āhua. Ka rite ngā whakaaro me ō tātou whakapono ki ō tātou i konei. Ka tika tonu te hunga i tōtika ai i tēnei oranga. Ka haututū tonu te hunga i haututū ai. Ka rite tonu ō tātou hiahia hei tua i ō tātou matenga ki ō tātou hiahia i tēnei ao.
Hei Matapaki
-
I ahu mai ō tātou tinana wairua i hea?
-
Ka ahatia ēnā ina mate tātou?
-
He aha te āhua o ngā tinana wairua?
He Wāhi te Ao Wairua mō te Mahi, te Ako, mō te Tatari hoki
He maha ngā mea i kōrerohia mai nei ki a tātou e ngā poropiti a tō tātou Matua i te Rangi mō te ao wairua. E karangatia ana tētahi wāhi ko pararaiha. Ina mate tētahi tangata kua whakaae mai ki te rongopai, ā, kua ū ki te aruaru i a Ihu, ka haere tō tēnā tangata wairua ki pararaiha. He wāhi tēnei e harikoa ana, e mauritau ana ngā tāngata. E wātea ana rātou i konei mai i te raruraru, te pōuri me te mamae. E taea ana e rātou ngā mea whai tikanga nui te mahi pēnei i te whakaako i te rongopai ki ētahi atu, ki te ako tonu rānei i te rongopai.
Ko tērā atu wāhi ko te whakaherenga wairua. Ka toru ngā momo tāngata i reira. ko te hunga i mahi kino i tēnei oranga, ko te hunga kīhai i whakawhiwhi i te rongopai engari i tōtika ō rātou oranga, me te hunga kīhai i taea te whakarongo ki te rongopai.
Kua kī mai ngā poropiti a tō tātou Matua i te Rangi ki a tātou, nā, ka tukuna atu ngā mihingare mai i te hunga tika i te ao wairua ki te whakaako i te rongopai i ngā wairua katoa o te hunga mate. Ka tokomaha ngā mea e whakaae mai ki te rongopai, e rīpenetā mai anō hoki. Ka meatia ngā tikanga tapu e tika ana mō rātou e ngā tāngata e ora ana i roto i ngā temepara o tō tātou Matua i te Rangi. Ka meatia ēnei tikanga tapu e ō rātou whanaunga, e ētahi atu mema o te Hāhi rānei mō rātou. Kātahi ka taea e rātou te wehe atu i te whakaherenga wairua. Mā konei, ka whakapuarehia te huarahi e tō tātou Matua i te Rangi mō Āna tamariki katoa ki te whiwhi i ngā manaakitanga o te rongopai ahakoa he aha te wā i noho ai rātou i tēnei ao.
Hei tōna wā ka ara ake te hunga katoa i te ao wairua. Hei te aranga, ka whakahonoa tahitia mai anō te wairua me te tinana. Ahakoa kua pirau te tinana, ā, kua puehu haere i te rua kōiwi, ka meinga hei mea mate kore, hei tinana kohakore. E mea ana i ngā karaipiture, nā, kāore tētahi makawe e ngaro, ā, ka whakahokia ngā mea katoa ki tōna āhua tika, ki tōna hanganga kohakore.
Hei te aranga ka whakahonoa te tinana me te wairua, e kore e whakawehea atu anō. Mā Tōna aroha me Tōna whakahere whakamārie nui mō tātou, nā Ihu tēnei koha mīharo o te aranga i homai ki ngā tāngata katoa kua noho mai i tēnei ao.
Hei Matapaki
-
He aha ngā wehenga e rua i te ao wairua?
-
Ko wai ka noho i pararaiha? E aha ana ngā wairua i pararaiha?
-
Ko wai ka noho i te whakaherenga wairua? E aha ana i reira?
Ka Whakawākia Tātou Katoa hei te Whakawākanga Whakamutunga
Ka whakawākia tātou i ngā wā maha i ō tātou oranga tonutanga. I whakawākia tātou i a tātou e noho tonu ana me tō tātou Matua i te Rangi kia kite mēnā e tika ana tātou kia haere mai ai ki tēnei ao, ā, kia whiwhi tinana ai tātou. Ka whakawākia tātou i konei kia kite ai mēnā e tika ana tātou kia rumakina ai. E whakawākia ana te hunga tāne kia kite ai mēnā e tika ana rātou kia hoatu ai te tohungatanga. E whakawākia ana tātou kia kite ai mēnā e tika ana tātou kia kuhu atu ai i te temepara ki te whakawhiwhi i ngā manaakitanga. Hei tua i ō tātou matenga, ka whakawākia tātou, ā, ka hāngai ā tātou whiwhinga ki te āhuatanga o ā tātou mahi i tēnei ao.
Ina whakaarahia tātou, ka kumea tātou ki te aroaro o tō tātou Matua i te Rangi kia whakawākia ai mō te wā whakamutunga. Kua karangatia tēnei ko te Whakawākanga Whakamutunga. Mā tēnei whakawākanga whakamutunga e whakatau ki hea tātou noho ai mō āke tonu atu. Ka whakawākia tātou mō ngā mea i kōrero ai, i mahi ai, i whakaaro ai anō i tēnei oranga. Ka whakawākia tātou i tō kaha ki te whai i ngā whakaakoranga a Ihu. Ka whakawākia tātou e ngā tuhinga kua meatia nei i runga i te whenua nei me ngā mea i te rangi. Ka meinga e tō tātou Matua i te Rangi kia whakawā ai a Ihu i a tātou.
E aroha tino nui ana a Ihu ki a tātou, engari he kaiwhakawā tika Ia, ā, me whakawā i a tātou nā ngā mahi i mahia ai e tātou i ō tātou oranga. Kua whakatōpūhia ngā mea katoa i whakaarohia, i kōrerohia rānei e tātou, i roto i ō tātou hinengaro me ngā tuhinga kua meatia nei. E mōhio ana a Ihu i ā tātou mahinga katoa, ā, ina tū tātou i Tōna aroaro ka maumahara anō tātou i ērā.
Hei Matapaki
-
Whakahuahia ētahi taima i whakawākia ai tātou.
-
He aha ētahi o ngā mea e whakawākia ai tātou?
Mā ā Tātou Mahi ia Rā e Whakatau ai ka Ahatia Tātou Ina Mate Tātou
Ki te mahi pai tātou i a tātou e ora ana, ka whakarite tātou i a tātou anō kia noho tahi mō āke tonu atu me tō tātou Matua i te Rangi me ngā tāngata pai o tēnei ao. Mehemea kīhai tātou i aruaru i ngā whakahaunga a tō tātou Matua i te Rangi, ka tino pāmamae te ngākau a te wā e tū ai tātou i te aroaro o Ihu mō te whakawākanga.
Kua mea mai ngā poropiti mā ā tātou kupu, ō tātou whakaaro, me ā tātou mahi e whakahē i a tātou mehemea kua hē ēnā. Kua mea mai rātou ka tū mai te hunga kino i te aroaro o Ihu i runga i te whakamā nui me te kaniawhea kino, ā, ka hiahia ki te huna atu i Tōna aroaro.
Nā reira, mō ia tāngata kua noho i tēnei ao, ka tū te Whakawākanga Whakamutunga hei rā papai rawa, he rā pōuriuri rawa rānei. Me whakarite tātou mō tēnei rā anamata kia koa rawa taua rā mō tātou. Kei te hiahia tātou kia tū whakamā kore ai i mua i tō tātou Matua i te Rangi me te rongo atu i Tāna e kī ai kei te whakaae Ia i ā tātou i mahi ai i ō tātou oranga.
Me anga ō tātou whakaaro ki te whakawākanga whakamutunga. Me ū tō tātou whakapono ki a Ihu Karaiti me te rīpenetā i ō tātou hara tae atu ki te mutunga o ō tātou oranga kia rite ai tātou mō taua wā. Mā konā anake tātou e wātea ai i ngā hara ina tae mai taua wā. Mēnā ka whakapono tātou i a Ihu Karaiti me te rīpenetā i ō tātou hara katoa, ka murua tātou e tō tātou Matua i te Rangi mai i ō tātou hara me te āwhina i a tātou kia tino hara kore ai tātou. Mēnā e pono ana ki a Ihu Karaiti, ka pau ō tātou rā ki te mahi pai, ki te whakaaro i ngā whakaaro pai, me te kōrero i ngā kupu pai. Ka karo atu i ngā tāngata, pukapuka, me ngā wāhi e kōtiti ai i a tātou ki te whakaaro i ngā whakaaro kino, ki te mahi rānei i tētahi āhuatanga haututu.
E aroha ana tō tātou Matua i te Rangi ki a tātou katoa, ā, kei te hiahia kia tika anō tātou kia hoki atu ki Tōna aroaro. Ki te hiahia tātou ki te noho tahi me Ia me ngā tāngata pai e arohaina nei e tātou, me whakapono tātou i a Ihu Karaiti me te mahi i ngā mea e whakahaua ana tātou e Ia hei mahi. Me āwhina anō e tātou ō tātou whānau ki te mahi pai. Ka āwhina tātou e tō tātou Matua i te Rangi. Kua homai e Ia te rongopai hei whakaatu mai ki a tātou te huarahi, ā, kua kī mai e āhei ana tātou ki te inoi atu ki a Ia mō Tōna āwhina.
Hei Matapaki
-
He aha e whakahirahira ai ā tātou mahinga me ā tātou whakaaro?
-
He aha ngā mea e taea ana e koe ki te hāpai ake i ō whakaaro, ō kupu, me āu mahi?
-
He aha te take me āwhina tātou e tō tātou Matua i te Rangi kia koha kore haere ai tātou?
-
He aha te take ka whakawākia tātou mā roto anake i te whakapono i a Ihu Karaiti e tika ai tā tātou noho tahi me tō tātou Matua i te Rangi?