Nā tā Ihu rumaki i whakatauirahia ai te ngohengohenga ki Tōna Matua.
Upoko 22
Ngohengohenga
Kua kōrero mai tō tātou Matua i te Rangi i ngā mea me mahi e tātou kia harikoa ai tātou, ā, kia hoki atu ai tātou ki te noho tahi me Ia. Me pēhea tātou e ako ai ki te mahi i ēnei mea?
Ka Homai Tō Tātou Matua i te Rangi i ngā Ture ki a Tātou Nō Te Mea e Aroha ana Ia ki a Tātou
E hiahia ana tō tātou Matua i te Rangi kia harikoa ai tātou i te ao nei nō te mea e aroha ana Ia ki a tātou. E hiahia ana anō Ia kia hoki atu tātou ki a Ia kia whiwhi ai tātou i Tōna hari. Ka taea anake e tātou te pērā mehemea ka whakamahi tātou i te āheinga kua homai e Ia ki a tātou kia meinga ai tātou kia rite ki a Ia.
E mōhio ana tō tātou Matua i te Rangi me aha tātou kia meinga pērā ki a Ia. Kua homai e Ia he whakahaunga e tohutohu mai ana i ngā mea pai kia mahia ai e tātou. E kōrero mai ana anō hoki Ia ki a tātou he aha ngā mea kāore i te pai hei mahinga mā tātou.
Ko ngā whakahaunga katoa i homai nei e tō tātou Matua i te Rangi he mea homai ki a tātou hei painga, ā, hei āwhinatanga mō tātou. He mea arataki ēnei whakahaunga i a tātou i ō tātou oranga, ā, ki te aruaru tātou i ēnei mea ka harikoa tātou.
Kua whati tātou katoa i ngā whakahaunga a tō tātou Matua i te Rangi i tētahi wā. Nā te mea kua whati tātou i ngā whakahaunga a tō tātou Matua i te Rangi, kua hara tātou. Nō te mea kua hara tātou, e noho wehe ana tātou i te aroaro o tō tātou Matua i te Rangi. Ko te whiu tika mō ō tātou hara, ko te noho wehe i te aroaro o tō tātou Matua i te Rangi mō āke tonu atu.
Engari, e aroha ana tō tātou Matua i te Rangi ki a tātou. Kua whakarite Ia i tētahi huarahi kia utua ai te whiu mō ō tātou hara. I tono Ia i Tana Tama, a Ihu, kia utua ai te whiu mō ō tātou hara. Kua utua e Ihu te whiu, ā, ka taea e tātou te hoki atu ki tō tātou Matua i te Rangi mā te whakapono i a Ihu. Ko te tikanga o te whakapono i a Ihu, ko te whakawhirinaki ki a Ia, ā, ka meinga hei kaiaru ngākau ngohengohe Āna. Ka ū te hunga whakapono ki a Ihu ki Āna whakahaunga. Ko te arapiki tuatahi kia whakatata atu ki tō tātou Matua i te Rangi, ko te whakapono ki a Ihu, ā, e ngana pono ana ki te whakarongo ki a Ia. Kātahi, ki te ū tonu tātou ki te whakapono ki a Ihu, ka āwhina Ia i a tātou kia ngohengohe ai ki ngā whakahaunga katoa a tō tātou Matua i te Rangi, ā, ka whakamuru tō tātou Matua i te Rangi i ō tātou hara.
E whai pānga ana ētahi o ngā whakahaunga a Ihu ki ngā mema katoa o te Hāhi. Ka hoatu Ia i ēnei mā ngā karaipiture me Āna poropiti. Ko ētahi o ngā whakahaunga ka homai takitahitia e Ia ki a tātou, mā roto i te Wairua Tapu. Hei tauira, e tohutohu mai ana ngā karaipiture me ngā poropiti ki a tātou me āwhina ngā mema katoa o te Hāhi ki te whakaako i te rongopai ki ētahi atu. Engari ka whakaako te Wairua Tapu i tēnā me tēnā o tātou me aha tātou ki te whakaako i te rongopai ki ō tātou nei mema whānau, hoa, me ō tātou hoa noho tata. Ki te ako tātou i ngā karaipiture, ki te whakarongo ki ngā kupu ā ngā poropiti, ā, me te whai i ngā kōhimuhimu o te Wairua Tapu, ka mōhio tātou i ngā wā katoa ngā mea me mahi tātou.
Hei Matapaki
-
Ka pēhea ngā whakahaunga a tō tātou Matua i te Rangi rāua ko Ihu e whakaatu mai ai i tō rāua aroha mō tātou?
-
Me pēhea tātou e mōhio ai he aha ngā mea kua tohutohua mai tātou hei mahi e tō tātou Matua i te Rangi rāua ko Ihu?
He Mea Nui Ngā Whakahaunga Katoa a Tō Tātou Matua i te Rangi
Me manawanui tātou ki te mahi i ngā mea katoa ka whakahaua tātou e Ihu kia mahia ai. E whai tikanga ana Āna whakahaunga katoa, ā, ka āwhina i a tātou kia whakarite ai mō te noho ki te taha o tō tātou Matua i te Rangi. E kōrero ana te Paipera mō tētahi tāne ko Naamana tōna īngoa. I te tino māuiui ia, ā, i hiahia ia kia whakaorangia ia e tētahi poropiti ko Eriha tōna ingoa. I wehe atu ia i tōna kāinga, ā, ka haere ki te whenua i noho ai a Eriha. I tono a Eriha i tētahi kaikawe karere kia kī atu ki a Naamana, me horoi ia kia whitu ngā wā i roto i te awa o Hōrano, ā, ka whakaorangia ia.
I pukuriri a Naamana i ēnei tohutohu kia pēnei ai. I whakaaro ia me aha ia e haere ai ki te awa o Hōrano mehemea he maha tonu ngā awa nunui i te wāhi i noho ai ia. Engari ahakoa i te pukuriri a Naamana, nāwai rā ka whakarongo ia. Nā tana whakarongo, i whakaorangia ai ia. Mehemea kāore ia i whakarongo, kīhai rawa ia i whakaorangia ai.
E whakaaro ana ētahi he uaua rawa ki te whakarongo ki ngā whakahaunga a Ihu. Tērā tētahi tama rangatahi ko Nīwhai tōna ingoa. I riro i a ia me ōna tuākana tētahi mahi tino uaua. I tohutohu a Ihu ki a rātou, kia hoki atu ki Hiruharama ki te tiki i ētahi karaipiture tino whakahirahira. I kī ōna tuakana tē taea e rātou te mahi. He uaua rawa. Heoi, i kī a Nīwhai ka mahi ia i tērā i tohutohungia ai ia e Ihu. I kī ia, ina tohutohungia tātou e Ihu kia mahia ai tētahi mea, ahakoa tōna uaua ki a tātou, nā, ka āwhina Ia i a tātou kia whakatutukihia.
Kua kōrero mai a Ihu ki a tātou kia whakapau kaha tātou kia meinga kia rite ki a Ia rāua ko tō tātou Matua i te Rangi. Kua kore Ia i tohua mai tātou ki te mahi i tēnei mahi mehemea kāore Ia i te mōhio e taea ana e tātou.
He pērā a Ihu me tō tātou Matua i te Rangi i te mea kāore kau noa Ia i hara. Kua hara tātou katoa, engari kua whakatakotohia te huarahi kia meinga tātou kia rite ki tō tātou Matua i te Rangi mā roto atu i te whakapono i a Ihu me te rīpenetātanga anō hoki.
I ētahi wā kāore tātou i te mārama ki te tino tikanga o tētahi o ngā whakahaunga a Ihu. Heoi, mehemea e aroha ana tātou ki a Ihu, ā, e whakawhirinaki ana hoki ki a Ia, ka mahi tātou i ngā mea ka tohutohu mai Ia ki a tātou. Ka whakarongo tātou, ahakoa kāore i te tino mārama ki te take kua tohutohu mai Ia kia mahia ai tētahi mea. I pēnei tonu a Ārama rāua ko Iwi. I tohutohu atu a Ihu ki a Ārama rāua ko Iwi kia tuku whakahere* ki tō tātou Matua i te Rangi. I tētahi rā i pātai atu tētahi anahera ki a Ārama he aha ia e tuku whakahere ai. Ka kī atu a Ārama kāore ia i te mārama he aha ai, heoi, nā Ihu ia i tohutohu kia pērā ai. Kātahi ka whakamōhio atu te anahera ki a Ārama he aha te tikanga mō te ture, ā, ka whakaako ki a Ārama i te rongopai. I koa a Ihu i a Ārama i te mea i whakarongo a Ārama ki a Ia, i mua hoki i tōna mārama he aha te tikanga mō te ture.
Me whakarongo tātou ki ngā whakahaunga a Ihu nō te mea e aroha ana tātou ki a Ia, ā, e hiahia ana tātou ki te whakarongo ki a Ia. Kua kī mai tō tātou Matua i te Rangi, e harikoa ana Ia i te hunga e hiahia ana ki te whakarongo ki a Ihu. Ka pōuri Ia i ngā wā kāore i te whakarongo Āna tamariki ki a Ihu kia tūpono mai anō ki tētahi āhuatanga e meinga ai rātou kia whakarongo ai. E hiahia ana tō tātou Matua i te Rangi kia ako Āna tamariki katoa ki te aroha ki a Ihu me te whakarongo ki a Ia, i te mea koinei anake te huarahi e hoki atu ai rātou ki tō tātou Matua i te Rangi.
Hei Matapaki
-
He aha e whai tikanga ai ki te whakarongo ki ā Ihu whakahaunga, ahakoa ngā wā e uaua ana kia ū ai ki ērā?
-
He aha te take me whakarongo tātou ki ngā whakahaunga ahakoa kāore tātou i te mārama?
-
He aha te hiranga nui o whakarongo nā tā tātou hiahia ki te whakarongo?
Ina Aroha Tātou Ki Tō Tātou Matua i te Rangi, Ka Hiahia Tātou Ki te Whakarongo Ki a Ihu
I mahi a Ihu i ngā mea katoa i whakahaua ai Ia e tō tātou Matua i te Rangi. I whakarongo a Ihu ki tō tātou Matua i te Rangi nō te mea i aroha Ia ki tō tātou Matua i te Rangi. I whakawai a Hātana i a Ihu kia kaua e whakarongo ki tō tātou Matua i te Rangi. Kāore a Ihu i mahi i ngā mea i whakawaia Ia e Hātana.
Ko te Whakahaunga Tuatahi, arā, ko te Whakahaunga Nui Rawa, ko te Aroha ki tō Tātou Matua i te Rangi
Ki te arohaina e tātou tō tātou Matua i te Rangi, ka hiahia ki te whakarongo ki a Ia pērā i tā Ihu. Me matua ako tātou mō tō tātou Matua i te Rangi. Mā te pānui i ngā karaipiture me te whakarongo ki ngā kaiārahi o te Hāhi o Ihu Karaiti tātou e ako ki te mahi pēnei. Ina arohaina e tātou tō tātou Matua i te Rangi, ka arohaina anōtia a Ihu nā tā Ihu i mahi ai hei āwhinatia tātou kia hoki atu ai ki tō tātou Matua i te Rangi. Ka mātau tātou ki te aroha ki a Ihu mā tā tātou mahi i Tāna e whakahau mai ai. Ina pakari tō tātou aroha mō tō tātou Matua i te Rangi rāua ko Ihu ka ngāwari haere tā tātou whakarongo ki ā Rāua whakahaunga.
Ko te Whakahaunga Nunui Tuarua, arā, Ko te Aroha Ki Ngā Tāngata Katoa
I mea mai a Ihu ki a tātou kia āwhinatia ētahi atu tāngata. Kua kī mai Ia me rite tā tātou ki a rātou ki tā tātou e pīrangi nei hei mahinga ki a tātou. Kua kī mai Ia me kaua tātou e kōrero kino mō rātou. Me muru e tātou ō rātou hē. Me āwhina e tātou ētahi atu i ngā mea e taea ai e tātou.
Ina aroha tātou ki tō tātou Matua i te Rangi rāua ko Ihu, ka aroha atu, ā, ka āwhina atu hoki tātou i ētahi atu. I a tātou e aroha ana, ā, e mahi pononga ana hoki ki a Ihu me ētahi atu tāngata, he ngāwari ake te mau ki ngā whakahaunga katoa a tō tātou Matua i te Rangi rāua ko Ihu.
Hei Matapaki
-
He aha ngā whakahaunga nunui e rua?
-
Me pēhea tā Ihu whakatauira e āwhina ai i a tātou ki te whakarongo ki ngā whakahaunga a tō tātou Matua i te Rangi?
-
Me pēhea tātou e ako ai ki te aroha ki tō tātou Matua i te Rangi rāua ko Ihu me te whakarongo hoki ki ā Rāua whakahaunga?
Ka Puta ngā Manaakitanga Katoa e Whiwhi ai Tātou i te Ngohengohenga
Ka manaaki tō tātou Matua i te Rangi i a tātou ina whakarongo tātou ki Āna whakahaunga. E whakaaria mai ana e Ia tētahi manaakitanga mō ia whakahaunga e puritia ai e tātou. Hei ia wā e puritia ai e tātou tētahi whakahaunga, ka whiwhi tātou i tētahi manaakitanga. Ki te kore tātou e whakarongo ki ngā whakahaunga, tē taea e tātou te kawatau ka whiwhi i ngā manaakitanga kua whakaaria mai nei.
Ko ētahi o ngā manaakitanga ka tau mai nā te ū ki ngā whakahaunga a tō tātou Matua i te Rangi, ko te haringa, ko te noho herekore i te mataku, ko te hauora pai, ā, ka mātau ake, ka nui ake hoki ngā pukenga. Ko te manaakitanga nui rawa e whakaaria mai nei e tō tātou Matua i te Rangi ki a tātou, ko tō tātou āhei kia meinga kia rite ki a Ia, ā, me te noho hoki ki Tōna taha mō āke tonu atu. Ka taea e tātou te whiwhi i tēnei manaakitanga mā te ū ki Āna whakahaunga katoa.
I a tātou e kaha ū ana ki te whakarongo ki ngā whakahaunga a tō tātou Matua i te Rangi, he mea whakahirahira kia mahara ai tātou e taea ana anake e tātou i runga i te āwhina a Ihu. Me mahara anō e tātou, nā, ki te kōtiti tātou, ka murua tātou e tō tātou Matua i te Rangi ina ū ō tatou whakapono i a Ihu Karaiti me te rīpenetā. Nā te mea kua hara katoa tātou, me whakamoemiti tātou i te Whakamārietanga a Ihu Karaiti. Nā Tana Whakamārietanga, ka taea e tō tātou Matua i te Rangi te muru, te manaaki me te āwhina i a tātou kia meinga hei mea kaha ki te ngohengohe. Kua kore rawa tātou e whai tika mō ngā manaakitanga a tō tātou Matua i te Rangi ko tātou anake.
Hei Matapaki
-
He aha ngā manaakitanga ka tau ki a koe nā te ngohengohe ki tō tātou Matua i te Rangi?
-
Ka pēhea a Ihu e āwhina ai i a tātou kia whiwhi ai i ēnei manaakitanga?
-
Me pēhea tātou e whiwhi ai i te takohatanga nunui rawa o tō tātou Matua i te Rangi?