Upoko 7
Ko te Wairua Tapu
Kua kōwhiria e tō tātou Matua i te Rangi tētahi tangata hei whakamōhio mai ki a tātou he aha ngā mea e hiahia ana Ia kia mōhio ai tātou. Ko wai tēnei tangata, ā, ka pēhea tātou e ako ai ki te mārama i ngā karere a tō tātou Matua i te Rangi?
E mahi ngātahi ana te Wairua Tapu me tō tātou Matua i te Rangi rāua ko Ihu ki te āwhina i a tātou
E mahi ngātahi ana Wairua Tapu me tō tātou Matua i te Rangi rāua ko Ihu. Ka whakaatu mai Ia ki a tātou e ora ana Rāua, ā, e aroha ana Rāua i a tātou. Ka āwhina Ia i a Rāua ki te whakaako i a tātou i ngā mea me mōhio, i ngā mea me mahi, ā, kia mau hoki ki ā Rāua whakahaunga. Kāore Tōna tinana kikōiwi pērā ki tō tātou Matua i te Rangi rāua ko Ihu. He wairua Ia. He rite Tōna āhua ki tō te tangata.
He Mea motuhake tō tātou Matua i te Rangi, a Ihu Karaiti, me te Wairua Tapu. E mahi ngātahi ana Rātou ki te āwhina i a tātou ki te ako i ngā mea me mōhio, ā, ngā mea me mahi. Ki te whiwhi karere tātou i tō tātou Matua i te Rangi, i a Ihu rānei, ka kawea mai aua karere ki a tātou e te Wairua Tapu. Ka āwhina hoki Ia i a tātou, kia mau ki ā Rāua whakahaunga.
Hei Matapaki
-
E mahi ngātahi ana te Wairua Tapu ki a wai?
-
He aha ētahi rerekētanga o te Wairua Tapu ki tō tātou Matua i te Rangi rāua ko Ihu?
Te Mahi o te Wairua Tapu
Ka whakaako te Wairua Tapu i a tātou e pā ana ki tō tātou Matua i te Rangi rāua ko Ihu. Ka whakamōhio mai Ia, e ora ana Rāua, ā, e aroha ana Rāua ki a tātou. Ka whakamōhio mai Ia ki a tātou, ko tō tātou Matua i te Rangi te Matua o ō tātou nei wairua. Ka whakamōhio mai hoki Ia ki a tātou, ko Ihu tō tātou Kaiwhakaora.
Ka āwhina te Wairua Tapu i a tātou, kia mārama ai ko wai tō tātou Matua i te Rangi, ko wai hoki a Ihu Karaiti, ā, he aha hoki ngā mea me mahi tātou, kia hoki atu ai ki te Rangi. Ka āwhina hoki Ia i a tātou kia ako ai, ā, kia mārama ai ki ngā mea pono katoa.
Ka homai hoki te kaha ki a tātou e te Wairua Tapu, kia mau ki ngā whakahaunga o tō tātou Matua i te Rangi rāua ko Ihu. Ka āwhina Ia i a tātou ki te kōwhiri i te tika mehemea e rua ngā kōwhiringa. Nāna anō te rongomau e homai ai i ngā wā o te whakararunga.
Hei Matapaki
-
He aha te mahi a te Wairua Tapu?
-
He aha ngā mōhiotanga e puta ai ki a tātou i te āwhina a te Wairua Tapu?
-
Ka taea e te Wairua Tapu te aha hei āwhina i a tātou?
He tino kaha te āhuatanga whakaako a te Wairua Tapu i a tātou
Ka whakaako te Wairua Tapu i a tātou, he aha ngā mea tika, he aha hoki ngā mea hē. He tino kaha tēnei whakaakoranga, e kore e warewaretia e tātou. Kāore te Wairua Tapu e kōrero ki a tātou kia rangona ā taringa nei. Heoi, ka meinga tātou e ia e whai whakaaro ai, e rongo ā kare ā-roto nei hoki ki te pono o ngā mea ka pānuitia, ka rangona rānei. He tino kaha ēnei kare ā-roto.
Ka taea e te tokomaha te rongo i te kaha o te Wairua Tapu i te wā kotahi. Kia mārama ai tēnei, whakaarohia te rā. Kotahi anake te rā, heoi, ka rangona ngātahitia tōna māramatanga me tōna mahana e te tokomaha i ngā wāhi rerekē. Ka taea te whakataurite i tēnei āhuatanga ki te Wairua Tapu. Ka rangona ngātahitia tōna kaha e te tokomaha, ahakoa kei wāhi rerekē rātou, ā, kei te wāhi kotahi noa iho Ia.
Hei Matapaki
-
Ka whakamōhio pēhea te Wairua Tapu i a tātou i ngā mea me mōhio?
-
Ka āwhina pēhea te Wairua Tapu i te tokomaha i te wā kotahi?
Ka āwhina te Wairua Tapu i tēnā me tēnā o tātou
I muri iho i te peinga atu o Ārama rāua ko Iwi i te Kāri o Erene e tō tātou Matua i te Rangi, i inoi rāua ki a Ia kia mōhio rāua me aha. I tono tō tātou Matua i te Rangi i te Wairua Tapu kia whakaako i a rāua e pā ana ki a Rāua ko Ihu, me ngā mea hoki me mahi a Ārama rāua ko Iwi. I whakamōhio atu te Wairua Tapu i a rāua, he pono ngā akoranga o tō tātou Matua i te Rangi. I whakakahangia rāua e Ia kia mōhio ai ki ngā mea i hiahiatia e tō tātou Matua i te Rangi kia mahia ai e rāua.
I āwhina hoki Ia i a rāua kia whakaiti ai, ā, kia tuku whakamoemiti hoki mō ngā mea i mahia mā rāua e tō tātou Matua i te Rangi.
Nā te reo ārahi o te Wairua Tapu, i ako a Ārama rāua ko Iwi, ā tōnā wā, ka taea anō hoki e rāua te ora me tō tātou Matua i te Rangi, ki te aru rāua i a Ihu, ā, me te mau hoki ki āna whakahaunga. Nā te reo ārahi o te Wairua Tapu rāua i tino harikoa ai.
E aroha ana tō tātou Matua i te Rangi ki tēnā me tēnā o tātou. Ka tono Ia i te Wairua Tapu ki te ārahi i a tātou, ā, ki te whakaako hoki i a tātou i te pono. Heoi anō, ka āwhina anake te Wairua Tapu i a tātou mehemea e matenui pono ana tātou ki te whai i ngā whakahaunga me ngā tohutohu nā tō tātou Matua nui i te Rangi rāua ko Ihu. Mehemea kāore tātou e matenui pono ana kia ngohengohe ai ki ā rāua whakahaunga, ā, ki te kore rānei tātou e hiahia kia whakaakona ai e te Wairua Tapu, kāore Ia mō te tohutohu i a tātou. Ka pai ake tō tātou nei oranga, ki te whai tātou i ngā akoranga a te Wairua Tapu.
Hei Matapaki
-
I āwhina pēhea te Wairua Tapu i a Ārama rāua ko Iwi?
-
Me aha tātou kia āwhinatia ai e te Wairua Tapu?