Upoko 25
Te Ture o te Tapu o te Tinana
Kua tukuna mai e tō tātou Matua i te Rangi ki a tātou, te mana tapu kia whakawhānau ai i ngā tamariki. Kua tohua mai e Ia me pēhea te whakamahi i tēnei mana. Ki te whakamahi tikahia e tātou, ka tino harikoa tātou.
Kua Tohua mai tātou e Tō Tātou Matua i te Rangi kia Whakawhānau ai i ngā Tamariki me te Ngohengohe ki te Ture o te Tapu o te Tinana
I muri iho i te mārenatanga o Ārama rāua ko Iwi, i tohua rāua e tō tātou Matua i te Rangi kia whakawhānau ai i ngā tamariki. I tohua e Ia a Ārama rāua ko tana hoa rangatira a Iwi, kia whakawhānau i ngā tamariki, kia taea ai e ngā wairua i te rangi te haere mai ki te ao me te whiwhi i ngā tinana kikōiwi. Ko te tinana kikōiwi tētahi o ngā tino taonga kua homai e tō tātou Matua i te Rangi ki a tātou. He tinana kikōiwi tō tō tātou Matua i te Rangi, ā, e hiahia ana Ia kia meinga ai Āna tamariki kia rite ki a Ia.
He tino tapu te mana ki te whakawhānau tamariki. Kua homai e tō tātou Matua i te Rangi tētahi ture ki a tātou e whakamārama ana me pēhea e whakamahi ai i tēnei mana. Kua karangatia tēnei ture, ko te ture o te tapu o te tinana. E tohutohu ana te ture nei i a tātou kia ai anake te tangata kua mārena nei tātou i raro i ngā tikanga o te ture. Ko tōna tikanga, me kaua tātou e ai ki tētahi i mua noa atu i te mārenatanga, ā, i muri iho i te mārenatanga me ai anake i tō hoa rangatira.
E hē ana te whakatahe, te tango rānei i te pepe mai i te kōpū o tōna māmā kia mate ai, ā, kia whakamate ai rānei i te pepe i a ia i roto tonu i te kōpū o tōna māmā. mehemea rānei he tūāhuatanga motuhake, he rerekē, me āta whai whakaaro tonu i runga i te inoi me te āwhina hoki a te pīhopa, a te tumuaki rānei o te peka. Me kaua tātou e āwhina i tētahi atu ki te whakatahe pepe.
Mā ngā mātua te ture o te tapu o te tinana e whakaako ki ā rāua tamariki. Me whakaako ngā mātua i ā rāua tamariki e pā ana ki te tapu o ō rātou tinana kia kaua hoki rātou ngā tamariki e whakaae kia pā ai tētahi i ētahi wāhanga o ō rātou tinana. Me whakatikatika rāua i ngā whakaaro me ngā kupu e hē ana kua ākona nei ā rāua tamariki mai i ētahi atu.
I ngā tamariki e pakeke ana, e tika ana kia whakaakona rātou kua tukuna tēnei mana e tō tātou Matua i te Rangi ki a tātou kia whakawhānau ai i ngā tamariki, ā, e pai ana te whakamahi i tēnei mana a muri iho i te mārenatanga. Hei te wā e 12, 13 rānei ngā tau te pakeke, ko te tikanga ia kua āwhina kētia rātou kia mārama ai me pēhea e hangaia ai ngā tamariki. Me āta whakaako moata tātou i a rātou kia haumaru ai rātou i ngā mōrearea, i ngā akoranga teka rānei.
Hei Matapaki
-
He aha tō tātou Matua i te Rangi i tukuna mai ai ki a tātou te mana whakawhānau tamariki?
-
He aha te ture o te tapu o te tinana?
-
Me whakaako tātou i te aha ki ā tātou tamariki e pā ana ki ō rātou tinana?
E Hiahia Ana a Hātana Kia Takahia e Tātou Te Ture o Te Tapu o Te Tinana
E hiahia ana a Hātana kia ārai atu i tā tātou hokinga atu ki tō tātou Matua i te Rangi. E hiahia ana a Hātana kia takahia e tātou te ture o te tapu o te tinana. E hiahia ana ia kia whakaaro tātou kāore te mana whakawhānau tamariki i te tapu. E hiahia ana ia kia whakaaro tātou, ehara te takahi i te ture o te tapu o te tinana i te hara.
Ka whakamahi a Hātana i ngā huarahi mūrere kia whakawai i a tātou ki te takahi i tēnei ture. E ngana ana ia ki te whakaawe i ō tātou whakaaro kia whakaaro kē tātou he pai noa kia tirohia, ā, kia pāngia hoki ō tātou tinana e ētahi atu. E hiahia ana a Hātana kia kino ai ō tātou whakaaro. E akiaki ana ia i a tātou kia tirohia ngā pikitia, ngā kiriata, me ngā momo kanikani hoki e whakawai ana i a tātou kia urutapu-kore ai. E akiaki ana hoki ia i a tātou kia whai wāhi atu i ngā momo kanikani, kia whakarongo ki ngā pūrākau, ki ngā kōrero whakakata, ā, ki ngā waiata hoki e whakawai ana i a tātou kia urutapu-kore ai. E hiahia ana a Hātana kia mahi tātou i ēnei mea, kia tānoanoa ai te tapu o ō tātou tinana, ā, kia hē ai te whakamahi i te mana whakawhānau tamariki.
I ētahi wā ka whakawai a Hātana i a tātou mā ō tātou kare ā-roto. E mōhio ana a Hātana i ngā wā e mokemoke ana tātou, e rangirua ana, ā, e pōuri ana rānei. Ka kōwhiri ia i ēnei wā ngoikore kia meinga tātou kia hiahia ki te takahi i te ture o te tapu o te tinana. E hiahia ana ia kia whakaaro ai tātou, kei a tātou tonu te tikanga ki te whakahaere i te mana whakawhānau tamariki e ai ki ō tātou ake hiahia. E ngana ana ia ki te rāweke i ō tātou whakaaro kia whakaarohia ai kāore he mea kino e pā ai ki a tātou ki te takahi i te ture o te tapu o te tinana.
Ka taea e tō tātou Matua i te Rangi te whakakaha i a tātou kia kaupare atu i ngā whakawainga a Hātana. Kāore Ia i te hiahia kia kite tātou i ngā mea kino, kia whakaaro kino rānei. Kua whakaaria mai e Ia, e kore Ia e tuku kia kaha ake ngā whakawainga a Hātana i tēnā e taea ai e tātou te kaupare. Kua whakarite Ia i tētahi huarahi kia kauparetia atu ai ngā whakawainga.
Ka taea e tātou te inoi ki tō tātou Matua i te Rangi kia āwhina Ia i a tātou ki te kaupare i a Hātana. I a tātou e inoi ana, ka tono tō tātou Matua i te Rangi i te Wairua Tapu hei āwhina i a tātou. Ka āwhina te Wairua Tapu i a tātou kia mahara ai tātou ki te tapu o ō tātou tinana, ki te tapu hoki o te mana whakawhānau tamariki. Ka āwhina te Wairua Tapu i a tātou, kia kaua e tūkinotia e tātou tēnei mana. Māna tātou e āwhina kia kōwhiri i ngā mea pai hei kitenga, hei pānuitanga, hei whakaarohanga hoki. Māna tātou e āwhina kia mahara ai ka pōuri tātou i te takahitanga i te ture o te tapu o te tinana, heoi, ka harikoa tātou i te ngohengohe ki tēnei ture.
Hei Matapaki
-
He aha te take e hiahia ana a Hātana kia takahia ai e tātou te ture o te tapu o te tinana?
-
He aha ngā mea e taea ana e tātou kia kauparetia ngā whakawainga a Hātana?
-
Ka pēhea tō tātou Matua i te Rangi e āwhina ai i a tātou kia ngohengohe tātou ki te ture o te tapu o te tinana?
He Hara Tino Nui Te Takahi i Te Ture o Te Tapu o Te Tinana
He mea pai, ā, he mea kinokore hoki te ai i ngā wā e mahia ana i waenganui i te hoa tāne me tāna hoa wahine e aroha ana, e whakaute ana hoki rāua i a rāua. Koinā te huarahi i homai e tō tātou Matua i te Rangi kia whakawhānau tamariki ai tātou. He huarahi anō tēnei kia whakaatu ai te hoa tāne me te hoa wahine i tō rāua aroha rāua ki a rāua, ā, kia whakatata atu anō hoki ō rāua kare ā-roto. Engari, he hara tino nui te ai kei waho atu i ngā herenga o te mārena.
Ka pōuri tātou ina takahia te ture o te tapu o te tinana. Ina mōhio tātou kāore tātou i ngohengohe ai ki tō tātou Matua i te Rangi, ka kaniawhea, ā, ka whakamā tātou. Ka mōhio hoki tātou kua whakamahi hē tātou i tēnei mana tapu i homai e Ia ki a tātou, ā, kua pōuri ētahi atu tāngata i a tātou. Mā te takahi i te ture o te tapu o te tinana, ka whānau mai pea tētahi pēpi kāore nei he whānau tūturu tōna.
E rua anake ngā hara kino ake i tā te takahi i te ture o te tapu o te tinana. Nā, ko te whakakāhore i te Wairua Tapu me te kōhuru. E taea ana ngā hara o te hunga i takahi te ture o te tapu o te tinana te muru. Kua kī mai tō tātou Matua i te Rangi, ina whakapono ērā hunga ki a Ihu me te rīpenetā i ō rātou hara, ka whakamuru Ia i a rātou. Ko te hunga e takahi ana i te ture o te tapu o te tinana, engari, kīhai i rīpenetā, tē taea e rātou te hoki atu ki tō tātou Matua i te Rangi noho ai.
Ko te hunga i pāwheratia, ā, i taitōkaitia rānei, kāore rātou i te hē i te ture o te tapu o te tinana.
Ka tau anake te murunga hara mā roto i te whakapono i a Ihu me te rīpenetātanga. Me mōhio tātou kua hara tātou, ā, me tino pāmamae te ngākau i ngā hē kua meatia e tātou. Me mutu i a tātou taua mahi hē me te whāki atu i taua hē ki tō tātou Matua i te Rangi, ki ngā tāngata kua whakamamaetia pea e tātou, ā, ki te mana tohungatanga tika (pīhopa, tumuaki o te peka, tumuaki pou ā-rohe, tumuaki mīhana rānei). Kua mea mai tō tātou Matua i te Rangi Māna e muru te hunga e whakapono ana ki a Ihu, e whāki i ō rātou hara ki tō tātou Matua i te Rangi, ki te kaiārahi Hāhi e tika ana anō hoki me te tino rīpenetā pono. Ko te hunga e kore nei e mahi i ēnei mea katoa kāore anō rātou kia tino rīpenetātia, ā, kua kore nei e murua.
Hei Matapaki
-
He aha e tino hara nui ai te takahi i te ture o te tapu o te tinana?
-
He aha ngā mea ka pā mai pea ki a tātou ina takahia ai te ture o te tapu o te tinana?
-
Me aha tātou e ngohengohe ai ki te ture o te tapu o te tinana?
-
Me aha tātou kia rīpenetā ai mō te takahi i te ture o te tapu o te tinana?
Ka Harikoa Tātou i te Ngohengohe ki Te Ture o Te Tapu o Te Tinana
I a tātou e ngohengohe ana ki te ture o te tapu o te tinana, ka whakaatu tātou i tētahi tauira pai hei whāinga mō ā tātou tamariki. Ka mōhio tātou e harikoa ana to tātou Matua i te Rangi mō tā tātou ngohengohe ki a Ia. Ina ngohengohe tātou ki te ture, e mōhio ana ngā mema o tō tātou whānau e aroha ana tātou ki a rātou, ā, kāore hoki he take kia kaniawhea, kia whakamā rānei tātou. Ka meinga tātou pērā ki tō tātou Matua i te Rangi. Ka manaaki tō tātou Matua i te Rangi i a tātou me ā tātou tamariki, otirā, ngā tamariki rānei ka whānau mai ina mau te ture o te tapu o te tinana.
Ka harikoa tātou ina whakamahia e tātou te mana kua whakatōngia e tō tātou Matua i te Rangi ki roto i a tātou, i roto tonu i te mārenatanga. Ka puta mai te haringa ngākau i te mahi ai ki tētahi tokorua kua mārena. Mā konei rāua e tata ake ai, ā, e pupū ake ai te aroha. He manaakitanga ngā tamariki ka whānau mai i taua mahi nā tō tātou Matua i te Rangi. Ahakoa i ētahi wā ka nui te āwangawanga me te pōuri o ngā mātua i ā rāua tamariki, ka nui hoki te koa i a rātou. Ka tau mai ētahi o ngā āhuatanga koa rawa atu e kite ai tātou i ō tātou oranga i ngā tamariki e tipu ana, e ako ana, e mārena ana, ā, e whakawhānau ana i ā rātou ake tamariki.
Hei Matapaki
-
He aha ngā manaakitanga ka whiwhi nei tātou ina ngohengohe ki te ture o te tapu o te tinana?
-
He aha tātou e koa ake ai i a tātou e ngohengohe ana ki te ture o te tapu o te tinana i ō ngā wā kāore tātou i te ngohengohe?