Te temepara i Portland, Oregon, Amerika.
Upoko 32
Te Noho ā-Whānau mō Āke Tonu atu
Me pēhea ngā whānau e noho tahi mō āke tonu atu, whai muri tonu iho i te oranga i runga i te whenua?
I Whakamahere te Atua kia Noho Tahi ai ngā Whānau mō Āke Tonu Atu
Ko te whānau te rōpū whakahirahira rawa i te ao. Kua whakaritea tō tātou whānau ā-ao hurihuri ki tō tātou whānau ā-rangi. He teina, tuakana, tungāne, tuahine tātou katoa i te rangi. He tamariki tātou nā te Atua. Ko te Atua te rangatira o tō tātou kāinga ā-rangi. I atawhaitia, i ārahina tātou e ō tātou mātua ā-rangi.
I tukuna tātou katoa e te Atua ki tētahi whānau i runga i te whenua. Kua tukuna atu te haepapa e Ia ki ngā mātua ki te tiaki i ia o Āna tamariki i a rātou i konei i tēnei ao. Me aroha ngā mātua i ā rāua tamariki me te tuku kai mā rātou, he kākahu, me tētahi kāinga. Me whakaako rāua i ā rāua tamariki mō te Atua me pēhea hoki rātou e meinga ai kia rite ki a Ia.
I whakapuarehia te huarahi e te Atua kia noho tahi ai ngā whānau mō āke tonu atu. Kua tukuna atu e Ia te mana ki ngā kaiārahi o Tana Hāhi ki te whakakotahi i ngā whānau mō āke tonu atu. Ko te hīritanga te ingoa o tēnei whakakotahitanga. Ka mahia anake tēnei hīritanga i roto i tētahi temepara. He whare tapu ngā temepara e kuhuna anake ai e ngā mema o te Hāhi e ū ana ki ōna tikanga. Ina hīria tētahi tāne me tētahi wahine i roto i te temepara e tētahi e mau nei te tohungatanga, ā, e mau anō te mana tapu ki te whakahīri, kua kore tō rāua mārenatanga e motu ina mate rāua. Ka mana tonu tō rāua mārenatanga mō āke tonu atu mēnā ka ū ki ngā oati i meatia e rāua i te temepara. Ko te mārenatanga tonutanga te ingopa o tēnei.
Mēnā kāore tētahi tāne me tētahi wahine i hīria i te temepara, ka mutu te mārenatanga i te wā e mate ai tētahi. Mēnā ka hīria tātou i te temepara, ā, ki te ū tātou ki te whai i a Ihu Karaiti tae atu ki te mutunga o ō tātou oranga, ka āhei ō tātou whānau ki te noho tahi mō āke tonu atu.
E āhei ana i tētahi tokorua ki te haere atu ki te temepara kia hīria ai mēnā he kaiaru pono rāua nō Ihu. I reira, ka hīria rāua e tētahi kaipupuri tohungatanga kua whakamanahia ki taua mana tapu. Ka taea anōtia e ia te hīri i ā rāua tamariki ki a rāua anō. Hei muri i tā rāua hīringa tahitanga, ka āhei rāua ki te noho tahi mō āke tonu atu, e pērā ana mehemea kua mārenatia rāua i te temepara mai i te tīmatanga.
Kei te hiahia te Atua kia whakariterite Āna tamariki katoa kia hīria ai i te temepara me te whakatupu i tētahi whānau ngohengohe. Me ārahi e ngā mātua ā rāua tamariki kia rite ai rātou ki te haere atu ki te temepara kia hīria rāua ina mārenatia. Ki te hīria tētahi tāne me tētahi wahine i te temepara, ka hīria katoatia ngā tamariki e whānau mai ai i a rāua ki a rāua anō whai muri i tō rāua hīringa.
Hei Matapaki
-
I pēhea te Atua i whakapuare ai i te huarahi mō tātou kia noho tahi hei whānau mō āke tonu atu?
-
He aha e tika ana kia hīria tātou i tētahi temepara?
Ko ngā Mema Pono Anake o te Hāhi e Taea ana te Kuhu i te Temepara
He wāhi tapu ngā temepara. Ko ngā mema o Te Hāhi o Ihu Karaiti o te Hunga Tapu o ngā Rā o Muri Nei kua whakaatuhia tō rātou whakapono i a Ihu Karaiti i runga i tā rātou ngohengohe ki Āna whakahaunga e āhei ana kia kuhu atu i reira. Kua meinga ēnei tāngata he mea tika kia haere ai ki te temepara. I mua i tā tētahi kuhu atu i te temepara, me hipa atu tōna mematanga o te Hāhi i te tau kotahi. Me whiwhi kē ngā tāne i te Tohungatanga o Merekihereke.
Nā, kia kite mēnā e tika ana rāua kia haere atu ki te temepara, me kōrero te tāne me te wahine ki te pīhopa, ki te tumuaki o te peka rānei. Mēnā ka kite te pīhopa, te tumuaki o te peka rānei e tika ana te tangata, ka hoatu e ia tētahi pepa kua hainatia e kīa ana he whakaaetanga temepara. Kātahi ka uia ia e tētahi tumuaki o te pou ā-rohe, e tētahi tumuaki mīhana rānei anō hoki. Māna anō te whakaaetanga temepara e haina mēnā ka kite ia e tika ana te tangata. Me hari e te tangata tana whakaaetanga temepara ki te temepara e kuhu atu ai ia i reira.
E rite ana ngā pātai e whai ake nei ki ērā e uia ai e te pīhopa, e te tumuaki o te peka rānei kia kite ai mēnā e tika ana tētahi mema o te Hāhi kia haere atu ai ki te temepara:
-
E whakapono ana rānei koe i te Atua; i Tana Tama, a Ihu Karaiti; me te Wairua Tapu?
-
E whakaae ana rānei koe ko te Tumuaki o Te Hāhi o Ihu Karaiti o te Hunga Tapu o ngā Rā o Muri Nei hei poropiti, matakite, ā, hei kaiwhakakite? E whakaae ana rānei koe ko ia anake te tangata i runga i te whenua e mau nei te mana ki te whakamahi i ngā kī katoa o te tohungatanga?
-
E tuku atu ana rānei koe i te whakatekau nō āu rironga ki te Hāhi?
-
E ngohengohe ana rānei koe ki te Kupu Whai Mātauranga?
-
E ngana ana rānei koe ki te mahi pono ki ētahi atu tāngata?
-
E kaha ngana ana rānei koe ki te mahi i tāu mahi i te Hāhi i runga i tō haere ki ngā huinga me te ngohengohe ki ngā whakahaunga?
-
E ngohengohe ana rānei koe ki te ture o te tapu o te tinana?
-
Kua mahia rānei e koe i ngā wā o mua tae noa mai ki tēnei wā tētahi hara nui kīhai i whākina atu ki ngā kaiārahi tohungatanga e tika ana?
He hōnore tapu te kuhutanga atu i tētahi temepara. Me tōtika tātou, ā, me hiahia tātou ki te ngohengohe ki ia oati tapu e meatia ai e tātou me te Atua i te temepara. Me mahara tātou he mea tapu te hīringa tonutanga i mea ai i te temepara. Koia te huarahi anake e taea ai e tātou te nohotahi hei whānau mō āke tonu atu. Koia te huarahi anake e whiwhi ai tātou i ngā manaakitanga kei a te Atua mō tātou. He whakahirahira nui rawa mō ō tātou hari tonutanga kia ngana tātou ki te haere ki te temepara kia hīria ai.
Hei Matapaki
-
Ko wai e āhei ana ki te kuhu atu i te temepara?
-
He aha ngā mea me mahi e tētahi e tika ai kia kuhuna te temepara?
-
He aha e whai tikanga ai kia haere tātou ki tētahi temepara, ā, kia hīria ai?
Ko te Whakarite i Tō Whānau kia Noho Tahi mō Āke Tonu Atu
Mā te hīringa i te temepara e taea ana e tātou te noho tahi hei whānau mō āke tonu atu, engari he mahi atu anō me mahi e tātou mēnā kei te hiahia tātou ki te whakawhiwhi i tēnei manaakitanga nui. Me ū tonu tātou ki te aruaru pono i a Ihu. Me pupuri e tātou ngā oati i oati ai tātou i te temepara. Me ako tātou kia mema whānau pai tātou e aroha ana, ā, e mahi aroha ana tētahi i tētahi. Me inoi tātou ki te Atua kia āwhinatia ai tātou e te Wairua Tapu e tika ai ā tātou whiriwhiringa i roto i ngā mea katoa e mahi nei tātou. Me ngana tātou i ngā wā katoa ki te āwhina i ō tātou whānau kia pai ai rātou ki te hoki atu ki te noho tahi me te Atua.
Hei Matapaki
-
Hāunga te hīringa i te temepara, me aha tētahi whānau kia noho tahi ai mō āke tonu atu?
Kua Whakapuare te Atua i te Huarahi kia Whakaora Tātou i Ō Tātou Tūpuna
Kua matemate ngā tamariki manomano a te Atua kīhai i rongo i Tana rongopai. Kāore i whiwhi i ngā tikanga tapu e tika ana kia murua ō rātou hara, ā, kia noho tahi anō me te Atua. E aroha ana te Atua i Āna tamariki katoa, ā, e hiahia ana kia hoki rātou katoa ki a Ia, nō reira, Nāna te huarahi i whakapuare kia mahia ai ngā tikanga tapu o te rongopai mō rātou. Me mahi tēnei mahi i roto i te temepara.
Koinei ētahi o ngā tikanga tapu e mahia ana i roto i te temepara mō te hunga kua mate, ko te rumakitanga, te takohatanga i te Wairua Tapu, me te hīringa i ngā whānau mō āke tonu atu. Nā te mea me mātua mahi ēnei tikanga tapu e te hunga katoa e hiahia ana kia noho tahi anō me te Atua.
Hei Matapaki
-
Me pēhea te hunga mate kīhai i rongo i te rongopai e whiwhi i ngā tikanga tapu e tika ana mō rātou ki te hoki atu ki te Atua?
-
Nō wai te haepapa kia tirohia ai mēnā rānei kua meatia ngā tikanga tapu e tika ana mō te hunga kua mate?
Mā te Hunga Ora ngā Tikanga Tapu e Mahi mō te Hunga Mate
Kei reira ētahi mea e taea ana e tātou te mahi kia taea ngā tikanga tapu te mahi mō ō tātou whanaunga kua mate. Me tautohu tātou i a rātou i runga i ō rātou ingoa, te rā me te wāhi i whānau mai ai me te rā i mate ai. Ki te kore e taea e tātou ēnei mōhiohio te kimi, e taea tonutia ana e tātou te tautohu i a rātou mā te tuhi i ngā mea katoa e mōhio nei tātou e pā ana ki tētahi whānau (he matua, he whaea, me ā rāua tamariki).
Ko te mahi kimikimi ingoa o ō tātou tūpuna kua mate me ngā mōhiohio mō rātou e kīa ana ko te whakapapa, ko te whakapapa ā-whānau rānei.
E rua ngā momo, e kīa ana he mahere kāwai me te tuhinga rōpū whānau, e āhei ana i konei te tuhi i ēnei mōhiohio ki runga. Ka tīkina ngā kape o ēnei pepa mai i tō kaiārahi tohungatanga. Māna tētahi e whakarite kia āwhinatia koe ki te tuhituhi i ēnei mōhiohio. Kātahi ka taea e koe ēnei mōhiohio te tuku, te hari rānei ki tētahi temepara, i reira meatia ai ngā tikanga tapu.
Mēnā kāore i tētahi o ō tātou whanaunga ēnei mōhiohio e tika ana mō tā tātou mahi, ka hopukina ērā mōhiohio mai i ngā tuhinga kāwana, mai i ngā tuhinga nā ngā hāhi i uru atu ai ō tātou tūpuna, mai i ngā urupā, mai i ngā wāhi katoa rānei e wātea ana ngā mōhiohio ki a tātou.
Mēnā e tika ana tātou, ka taea e tātou te haere ki te temepara ki te mahi i ngā tikanga tapu mō ō tātou ake tūpuna. Ki te kore e taea e tātou te haere ki te temepara, mā ētahi atu ngā tikanga tapu e mahi mō rātou. Me kaha hāereere tātou ki te temepara ki te mahi i ngā tikanga tapu mō te hunga mate.
Hei Matapaki
-
He aha ngā mea me mahi i mua i te meatanga atu i ngā tikanga tapu i te temepara mō ō tātou tūpuna kua mate?
-
He aha ngā mōhiohio e tika ana kia taea ai te mahi i ēnei tikanga tapu?
-
Ko wai e taea ana te mahi i ēnei tikanga tapu mō ō tātou tūpuna kua mate?
He Whakahirahira ngā Hītori Tuku Iho
Ki te pānui tātou i ngā mea i tuhia ai e tētahi mema o tō tātou whānau mōna ake anō, ka nui ake tō tātou mōhio, tō tātou aroha ki a Ia. Atu i te ako mō ō tātou whanaunga kua mate me te mahi i ngā tikanga tapu mō ratou, me tuhituhi e tātou tētahi tuhituhinga mō ō tātou ake oranga. Me tuhituhi tātou mō ō tātou mātua, ō tātou whānautanga mai, me ngā mea kua pā mai nei ki a tātou i roto i ō tātou oranga. Me tuhi e tātou ō tātou whakaaro e mōhio ake ai ā tātou tamariki me ā tātou mokopuna ki a tātou, ā, kia ākina rātou ki te mahi i ngā mea pai pērā i a tātou.
I tohua a Ārama e te Atua kia tuhia ai he tuhinga mō tōna oranga mō āna tamariki. I tuhia pērātia atu anō e ngā poropiti, ā, me pērā anō tātou. Mā te pānui i te tuhinga a Ārama me ērā atu tuhinga i tuhia ai e ērā atu poropiti, ka ako tātou i ngā manaakitanga me ngā whakahaunga i whakawhiwhia ki a rātou nā te Atua. Ka āwhina tēnei i a tātou ki te mahi tika. Me āwhina tātou i ā tātou tamariki mā te tuhituhi i ngā tuhinga mō ō tātou oranga.
Hei Matapaki
-
He aha te Atua i tohua ai Tana iwi kia tuhia he tuhinga mō ō rātou oranga?
-
He aha ngā manaakitanga e puta ai ki āu tamariki, mokopuna nā tō ake tuhinga?