Upoko 23
Whakaherenga
Ko te whakahere atu i tētahi mea ki te āwhina i tētahi atu tētahi wāhanga o te mahere o tō tātou Matua i te Rangi hei āwhina i a tātou kia meinga kia rite ki a Ia. Kua rongo koe i ngā wā o mua i te koanga i ahu mai ai i te whakahere atu i tētahi mea ki te āwhina i tētahi atu?
I Whakaherea atu e Ihu Tōna Oranga mō Tātou
Me āhua kaha whakahere tātou kia whakarongo ai ki tō tātou Matua i te Rangi. Ko te tukunga atu i tētahi mea ki te āwhina atu i tētahi atu te tikanga o te whakahere. Nā Ihu te whakaherenga nui rawa. I whakamamaetia Ia mō ō tātou hara. Kātahi ka whakaherea e Ia Tōna oranga mō tātou.
Nō te mea i whakaherea e Ihu Tōna oranga mā tātou, ka ora anō tātou katoa i muri i te mate. Ka whiwhi tātou katoa i tētahi tinana kohakore, e kore e mate anō. Kua mōhiotia tēnei ko te aranga. Waihoki, ko te hunga e whakapono ana ki a Ihu, ā, e rīpenetā ana i ō rātou hara, ka murua i o rātou hara nā tā Ihu i mahi ai, ā, ka āhei hoki rātou te hoki atu ki tō tātou Matua i te Rangi.
Mai i te wā i a Ārama tae noa atu ki te wā i a Ihu Karaiti, i whakaherehia ngā kararehe e ngā tāngata ki tō tātou Matua i te Rangi. I kōwhiria e ngā tāngata ngā kararehe papai rawa i ā rātou kāhui hei whakahere. Ko te taurawhi tōmua i ngā wā katoa. Whai muri iho i te kōwhiringa i ngā kararehe tika, ka whakamatea e ngā tāngata te kararehe me te tahu i ētahi wāhanga hei tāpaenga ki tō tātou Matua i te Rangi.
I whakaherea e ngā tāngata ēnei kararehe kia whakarongo ai ki te ture a tō tātou Matua i te Rangi. Mā reira rātou i whakaatu ai i tō rātou ngākaunui ki te whakarongo ki tō tātou Matua i te Rangi, ahakoa i ētahi wā me whakahere atu i tētahi mea e whakahirahira ana ki a rātou. I whakahau tō tātou Matua i te Rangi i a rātou kia whakahere kararehe ai hei whakamaharatanga i a rātou ka tukuna whakaherehia e Ia Tana Tama mō rātou. Ka tau mai a Ihu ki te ao nei, te Tama mātāmua a tō tātou Matua i te Rangi, ā, ka kohakore katoa Ia. Ka whakaae Ia kia whakaherea ai Ia mō ō tātou hara.
I muri tā Ihu whakahere i Tōna oranga, i whakahau Ia i ngā tāngata kia kaua e whakahere anō i ngā kararehe. I homai e Ia te hakarameta hei whakamahara i a tātou ki Tana whakaherenga nui mō tātou. He tohu te taro me te wai o te hakarameta mō te kikokiko me te toto o Ihu, Nāna i homai mō tātou i Tōna matenga.
Hei Matapaki
-
He aha te tikanga o te whakahere kararehe i ngā wā onamata?
E Whai wāhi Ana te Whakahere i tā tō Tātou Matua i te Rangi Mahere mō Tātou
Kua whakatau iho tō tātou Matua i te Rangi kia tukuna e tātou he whakahere rerekē ināianei. E whakahau mai ana Ia kia tukuna e tātou te whakaherenga o te ngākau marū me te wairua iro. Koinei ko te whakarērenga i ō tātou hara me ō tātou whakapehapeha. Koinei ko te ngākaunui ki te mahara i a Ihu i ngā wā katoa me te pupuri i Āna whakahaunga, ahakoa he aha te utu. Koinei tōna tikanga:
-
E whakapono ana tātou ki a Ihu, ka rīpenetā tātou i ō tātou hara, ka rumakina tātou, ā, ka pupuri tātou i ngā whakahaunga a Ihu.
-
Ka kōrero tātou ki ētahi atu mō tō tātou whakapono i a Ihu, kia meinga anō ai rātou hei kaiaru Āna me te hono mai ki Tana Hāhi.
-
E ngākaunui ana tātou ki te mahi i ngā mahi katoa i tā Ihu Hāhi e hiahia ana Ia hei mahi.
-
E ngākaunui ana ngā tāne ki te whakawhiwhi i te tohungatanga me te āwhina i tōna whānau kia whai i te āhuatanga o te ora e rite ai rātou ki te hoki atu ki tō tātou Matua i te Rangi hei te oranga kei tua.
Me ngākaunui tātou ki te tuku atu i ngā mea katoa e tonoa ai e Ihu kia hoki atu ai ki tō tātou Matua i te Rangi. I mea mai te Āpotoro a Pāora me whakapau ō tātou rā i runga i te whenua ki te mahi i ngā mea e taea ana ki te āwhina i te mahi a Ihu.
Hei Matapaki
-
Me pēhea koe e whakaatu ai i tō maumahara ki te whakahere o Ihu i tēnei rā?
I pātai atu tētahi tāne whairawa ki a Ihu me aha ia kia hoki atu ai mō āke tonu atu i te taha o tō tātou Matua i te Rangi. I kī atu a Ihu ki a ia me whakarongo ki nga whakahaunga katoa a tō tātou Matua i te Rangi. Ka whakautua e te tāne whairawa, nā, kua whakarongo ia ki ngā whakahaunga mai i te wā e tamariki ana ia. I kī a Ihu ki a ia, kotahi anō te mea hei mahi. Me hoko atu ia i ana rawa katoa. Kātahi ka hoatu e ia te moni ki te hunga rawakore me te aru i a Ihu. I te rongonga o te tāne whairawa i tēnei, ka pōuri ia. Kāore ia i hiahia ki te tuku atu i ana mea katoa ki te aru i a Ihu.
He tāne pai te tāne whairawa. I ngana ia ki te whakarongo ki ngā whakahaunga. Heoi, i te tohutohu a Ihu i a ia kia tuku atu i ana mea katoa me te aru i a ia, kāore ia mō te pērā.
I ngākaunui ngā Āpotoro tokorua a Ihu, arā, a Pita rāua ko Ānaru ki te tuku atu i ā rāua mea katoa ki te aru i a Ihu. I te wā i kī atu a Ihu ki a rāua kia arumia Ia, i whakarērea ā rāua mahi, ā, ka arumia atu Ia.
I ngākau mārie anō a Āperahama ki te tuku atu i ngā mea katoa i a ia ki tō tātou Matua i te Rangi. I noho ora mai a Āperahama i runga i tēnei ao i mua noa atu i te whānautanga mai a Ihu. I taua wā, i whakataua tonutia ngā tāngata e tō tātou Matua i te Rangi kia whakaherea ai ngā kararehe. I whakahaua e Ia a Āperahama kia whakaherea tana tama, hei whakamātau mehemea ka whakarongo a Āperahama. I whakarongo a Āperahama. I hangaia e ia tētahi ahurewa kātahi ka whakatakotohia tana tama ki runga rā. I rite a Āperahama ki te whakamate i tana tama, kātahi ka puta mai tētahi anahera ki te aukati i a ia. I kī atu te anahera ki a Āperahama kia kaua e whakahere i tana tama. I mōhio tō tātou Matua i te Rangi i te ngākau mārie o Āperahama ki te tuku i tāna katoa kua whakahaua e tō tātou Matua i te Rangi, tae atu ki tana ake tama. Nā tō Āperahama aroha nui ki tō tātou Matua i te Rangi i ngākaunui ia ki te mahi i ngā mea katoa i whakahaua e tō tātou Matua i te Rangi. I manaakitia a Āperahama e tō tātou Matua i te Rangi nā tana ngākaunui ki te whakahere i ngā mea katoa Mōna.
Hei Matapaki
-
Ko wai tētahi tauira mō tētahi tangata kāore i ngākaunui ki te hoatu i ngā mea katoa i whakahaungia ai ia e Ihu?
-
Ko wai tētahi tauira mō tētahi tangata i ngākaunui ai ki te hoatu i ngā mea katoa i whakahaungia ai ia e tō tātou Matua i te Rangi?
-
Kua aha koe mehemea ko koe tēnei?
Kāore i nui te whakapono o te kīngi rangatahi whairawa ki te whakahere i ana mea ki te aru i a Ihu.
Tērā Pea Me Whakahere Tātou Mō Ngā Mahi a Ihu
Tērā pea ka whakarērea tātou e ō tātou whānau mēnā rā ka aru tātou i a Ihu. Tērā pea ka katakata ētahi ki a tātou, ā, ka ngana rānei ki te whakamamae i a tātou ina whakarongo tātou ki Āna whakahaunga. Tērā pea ka ngaro i a tātou ā tātou mahi mō te whakahono atu ki te Hāhi o Ihu Karaiti.
Tērā pea me whakamahi tātou i ā tātou ake pūtea me ō tātou taima ki te whakaako haere i ētahi atu mō Ihu. Tērā pea me whakapau tātou i ō tātou taima ki te āwhina i ngā kaiārahi o te Hāhi ki te mahi i Āna mahi. Tērā pea me whakapau tātou i ō tātou taima me ā tātou ake pūtea ki te āwhina i ētahi atu mema whānau i a rātou e mahi ana i te mahi a Ihu. Ka hiahia pea tō tātou Matua i te Rangi kia tukuna ai tātou ō tātou oranga, mahue te whakakore i ō tātou whakaaturanga mō Ihu.
Hei Matapaki
-
Ka pēhea tō āhua mēnā ka tonoa koe kia whakarērea tō tino tāonga?
-
Ka pēhea te nui o āu mea whakahere i runga i te aroha mō tā Ihu mahi?
Nā te tino whakapono nui o Āperahama, whano ka whakaherea e ia tana tama a Īhaka i runga i tā te Ariki whakahau.
Mā te Whakahere ngā Manaakitanga e Tau ai Ehara mā Tētahi atu Huarahi
Mā te tikanga o te whakahere e āwhina ai i a tātou kia kaua e matapiko. Ka ākona tātou ki te mahi pononga ki tō tātou Matua i te Rangi me te āwhina atu i ētahi atu tāngata. Ka ākona tātou, nā, ka koa tātou i tā tātou āwhina i ētahi atu. Ka ākona tātou, nā, ko te mahi i tā Ihu e whakahaua ai tātou te mea nui ake i ngā taonga kei a tātou i tēnei ao. Ka ākona tātou, nā, he pai ake te mahi aroha mō ētahi atu i te whakaaro pū noa mō tātou ake anō. I a tātou e whakahere ana i runga i te ngākau aroha, ka kitea e tātou ngā manaakitanga nui e homai nei e tō tātou Matua i te Rangi he mea pai rawa ake i ā tātou mea kua riro atu.
Mā te whakahere mō ētahi atu, ka pai ake ō tātou māramatanga i tā Ihu i mahi ai mō tātou. I tukuna Tōna oranga mō tātou nā Tōna tino aroha mō tātou. I a tātou e whakahere ana i ngā mea mō tō tātou Matua i te Rangi, ā, mō ētahi atu tāngata rānei, ka nui ake aroha mō rātou. Ka meinga tātou he tangata ngākau aroha e tata atu ana ki te āhua o Ihu rāua ko tō tātou Matua i te Rangi.
Ehara te whai taonga maha i te mea kino. I ētahi wā ka tukuna mai ēnei mea e tō tātou Matua i te Rangi hei āwhina i ētahi atu. Engari he uaua rawa kia kaua e aroha tātou i ā tātou rawa me te moni. Kei te kaha tā tātou mahi kia hopuria ai ēnā. E tika ana ētahi o ēnei mea mō ō tātou oranga. Heoi anō, me kaua rawa tātou e nui rawa te aroha ki ēnei mea kua kore e tukuna katoatia atu e ai ki tā tō tātou Matua i te Rangi e hiahia ai hei āwhina i Āna tamariki.
Me whakamātāmuahia e ngā mema katoa o te Hāhi o Ihu Karaiti te mahi aroha mō tō tātou Matua i te Rangi rāua ko Ihu i ō rātou oranga. E whakaatu ana tātou he nui ake tō tātou aroha mō tō tātou Matua i te Rangi rāua ko Ihu i tō tātou aroha mō ō tātou rawa ina mahi i tā ngā kaiārahi o te Hāhi o Ihu Karaiti e tono ai hei mahi. Me whakahere atu i ō tātou taima ki te āwhina i a rātou ki te whakaako me te āwhina atu i runga i te ngākau aroha ki ētahi atu. Me ngākau mārie tātou ki te tuku atu i ō tātou rawa katoa ki te āwhina i tā Ihu mahi mēnā koinā Tana hiahia kia whai wāhi atu tātou ki te aroaro o tō tātou Matua i te Rangi.
Kua whakaaria mai nei e Ihu ngā manaakitanga nui ki te hunga e whakarongo ana me te mahi pononga ki a Ia. Kua mea mai Ia kāore e taea e tātou te whakaaro ake i ngā whiwhinga papai rawa atu ka whakawhiwhia a muri ake nei mēnā ka tuku whakahere tātou ināianei mō Āna mahi.