Me whiwhi tātou i te takohatanga o te Wairua Tapu mā te whakapānga o ngā ringringa.
Upoko 16
Te Takohatanga o te Wairua Tapu
Ka āwhina te Wairua Tapu i a tātou kia mārama ai ki ngā mea pono. Ka whiwhi pēhea tātou i te takohatanga o te Wairua Tapu?
Ka taea e te Wairua Tapu te arahi i a tātou ki te pono
Ka taea e te Wairua Tapu te āwhina i ngā tāngata i mua tonu i tō rātou rumakitanga. Ka taea e Ia te whakamōhio atu ki te tangata i te pono o ngā whakaakoranga a Ihu. I ētahi wā, ka kī mai Ia ki hea kimihia ai te Hāhi tūturu o Ihu Karaiti. Heoi, e kore te Wairua Tapu e noho pūmau ki tō tātou taha, kia rumakina rāno, ā, kia whiwhi ai hoki ki te takohatanga o te Wairua Tapu.
I roto i te Kawenata Hou, ka ako tātou mō tētahi tāne ko Koroniria tōna ingoa. Kāore anō Ia kia rumakina ai. I kī te Wairua Tapu ki a Ia, he pono ngā whakaakoranga a Ihu. Ā tōna wā, i rumakina a Koroniria, ā, i whiwhi i te takohatanga o te Wairua Tapu.
Kua tukuna mai e tō tātou Matua i te Rangi ki a tātou, tētahi huarahi kia whiwhi ai tātou ki te takohatanga o te Wairua Tapu
Kia ako ai tātou mō te mahere ō tō tātou Matua i te Rangi mō tātou, ka hiahia tātou ki te rīpenetā i ō tātou hara, me te whakarongo ki ngā mea katoa ka tohungia mai e Ihu kia mahia ai e tātou. Heoi, tē taea e tātou te mahi i tēnei mehemea kāore he āwhina. Ko te takohatanga o te Wairua Tapu, te tika kia whiwhi ai ki te āwhina o te Wairua Tapu i ngā wā katoa. Ka whiwhi tātou i tēnei tākoha i muri tata iho i tō tātou rumakitanga.
Me whakarite tātou i a tātou anō kia whiwhi ai ki te takohatanga o te Wairua Tapu. Me whakapono tātou ki a Ihu, ā, me ngana hoki ki te mahi i ngā mea ka whakahaungia mai e Ia ki a tātou. Me rīpenetā e tātou i ō tātou hara.
I muri i tō tātou rumakitanga, ka whakapā ngā tāne e mau ana i te mana o tō tātou Matua i te Rangi i ō rātou ringa ki o tātou māhunga, ā, ka homai ki a tātou i te takohatanga o te Wairua Tapu. Ka whakatapu hoki rātou i a tātou hei mema tūturu o Te Hāhi o Ihu Karaiti o te Hunga Tapu o Ngā Rā o Muri Nei. Ka manaaki hoki rātou i a tātou.
Hei Matapaki
-
Ka pēhea tātou e whiwhi ai ki te takohatanga o te Wairua Tapu?
He maha ngā huarahi e āwhinatia ai tātou e te takohatanga o te Wairua Tapu. Ka taea e Ia te mau mai i ētahi karere nā Ihu ki a tātou. Ka taea e Ia te whakaako mai ki a tātou i ngā mea maha mō Ihu rāua ko tō tātou Matua i te Rangi.
Ka taea e Ia te āwhina i a tātou kia mōhio ai me pēhea e whakatika ai i ō tātou raruraru. Ka taea e Ia te whakaahuru i a tātou. Ka taea e Ia te āwhina i a tātou ki te whakatika i ō tātou hara. Ka taea e Ia te āwhina i a tātou ki te mahi i ngā mea tika.
Ka āwhina te Wairua Tapu i a tātou kia mārama ai, ā, kia aroha ai hoki ki ētahi atu tāngata. Māna tātou e mōhio ai me pēhea te āwhina i a rātou. Ka taea e Ia te āwhina i a tātou kia mārama ai tātou ki ngā whakaakoranga a Ihu. Ka taea e Ia te āwhina i a tātou kia mōhio ai tātou ki ngā mea me kōrero, kia whakaako i ētahi atu tāngata mō tō tātou Matua i te Rangi rāua ko Ihu.
Hei Matapaki
-
He aha ētahi huarahi e whakaawengia ai te takohatanga o te Wairua Tapu i ō tātou nei oranga?
Me rīpenetā tātou i ō tātou hara kia whiwhi ai ki tēnei takohatanga
Mā te takohatanga o te Wairua Tapu, ka meinga ai tātou kia tangata pai ake, ā, kia mahi hoki i ngā mea pai. Ka meinga ai tātou kia pērā tonu ki tō tātou Matua i te Rangi. Heoi, me ngana tātou i ngā wā katoa ki te mahi i ngā mea pai, mei kore ake te Wairua Tapu e noho ki tō tātou taha. Me ngana tātou ki te whakaaro pai. Me ngana tātou ki te whai i ngā whakaakoranga a Ihu. Ki te mahi hē tātou, me rīpenetā tātou. Kia ngana ai tātou ki te mahi i ēnei mea katoa, ka āwhina te Wairua Tapu i a tātou.
I ētahi wā, ka ārahi te Wairua Tapu i a tātou mā te whakamahana me te whakaāio i ō tātou ngākau. Ki te tīmata tātou ki te mahi i tētahi mea hē, ka wehe atu ēnei kare ā roto i a tātou. I ētahi wā pea, ka rongo tātou i tētahi reo i ō tātou hinengaro e whāki mai ana i ngā mea me mahi, kia kaua rānei e mahi. Me rite tātou i ngā wā katoa ki te whakarongo me te mahi i ngā mea ka tohutohu mai e te Wairua Tapu ki a tātou, nō te mea, ka whakamōhio mai te Wairua Tapu i a tātou i ngā mea e hiahia ana a Ihu kia mahi ai tātou, ā, mā te whakarongo ki a Ia tātou e hoki atu ai ki tō tātou Matua i te Rangi.
Ki te kore tātou e whakarongo ki te Wairua Tapu, ā, ki te tīmata tātou ki te mahi i ngā mea hē, ka wehe atu te Wairua Tapu i a tātou. E kore Ia e noho ki tō tātou taha, e kore rānei Ia e āwhina i a tātou ki te kore tātou e mahi i ngā mea tika. Heoi, ki te whakarongo tātou ki Āna tohutohu, ka noho mai te Wairua Tapu ki tō tātou taha i ngā wā katoa. Ka āwhina Ia i a tātou kia meinga ai hei tangata pai ake, ā, ka āwhina hoki Ia i a tātou kia whakarite ai tātou mō tētahi oranga ki te taha o tō tātou Matua i te Rangi.
Hei Matapaki
-
Me aha tātou kia āwhinatia ai tātou e te Wairua Tapu?
Ka Whiwhi tātou i Ētahi Atu Manaakitanga Motuhake mā roto i te Wairua Tapu
Ko ētahi o ngā manaakitanga motuhake ka whiwhi tātou nā te Wairua Tapu, e kīa nei he takohatanga ā-wairua. Ka hoatu a Ihu i ēnei takohatanga ki ngā mema o Tōna Hāhi tūturu ia wā e kitea ai Tōna Hāhi ki te ao. Ka homai Ia i ēnei takohatanga nā te kaha o te Wairua Tapu. Me mārama tātou ki ēnei takohatanga kia whakamahia tikahia ai tātou i ngā takohatanga nei.
Te Takohatanga o te Kōrero ki ngā Reo Kē Atu
Ka āwhina tētahi o ngā takohatanga i ngā tāngata ki te kōrero i ētahi atu reo. Ko tētahi take ka hoatu a Ihu i tēnei takohatanga ki ngā tāngata, kia āwhina i a rātou ki te whakaako i te rongopai ki ngā tāngata e kōrero ana i ngā reo kē atu.
Te Takohatanga o te Māramatanga ki Tētahi Atu Reo
Ka āwhina tētahi atu takohatanga i ngā tāngata e ako ana e pā ana ki te rongopai. Ko tā te takoha o te māramatanga ki ētahi atu reo, he āwhina i a rātou kia mārama ai ki te akoranga nā Ihu e kōrerotia ana ki tētahi reo kāore rātou i te mōhio.
Te Takohatanga o te Mōhiotanga ko Ihu te Tama a tō tātou Matua i te Rangi
Ka āwhina tētahi atu takohatanga i ngā tāngata kia mōhio ai ko Ihu te Tama a tō tātou Matua i te Rangi. E ai ki ngā karaipiture, ka taea anake e ngā tāngata te mōhio ko Ihu te Kaiwhakaora mehemea ka āwhinatia rātou e te Wairua Tapu. He whakaaturanga tēnei takohatanga nā te Wairua Tapu, he pono, ko Ihu te Tama o tō tātou Matua i te Rangi, ā, ko Ia te Kaiwhakaora o te ao.
Te Takohatanga o te Whakapono ki ngā Whakaaturanga o Ētahi kē atu
Ka āwhinatia ngā tāngata e te takohatanga o te whakapono ki ngā whakaaturanga o hunga kē atu, kia mōhio ai rātou mehemea he pono ngā kōrero ā ētahi atu mō Ihu. Ka āwhina te Wairua Tapu i a tātou kia mōhio ai ki tētahi whakaaturanga pono, ā, kia whakapono hoki ki taua whakaaturanga.
Te Takohatanga o te Whakapono
Ka āwhina te takohatanga o te whakapono i a tātou kia mau Caai ki ngā whakahaunga a Ihu. Tē taea e tātou te whiwhi i ērā atu takohatanga ā-wairua mehemea kāore tō tātou whakapono. Mei kore ake hoki tō tātou whakapono, tē taea e tātou te hoki atu ki tō tātou Matua i te Rangi noho ai. He tokomaha ngā tāngata e tino whakapono ana ki a Ihu. He tino kaha te whakapono o tētahi o ngā poropiti i roto i te Pukapuka a Moromona, nā wai rā i whakakitea atu a Ihu i a Ia anō ki a ia. He tino kaha te whakapono o te Poropiti Hōhepa Mete i a Ihu Karaiti nā konā ka whakakitea atu tō tātou Matua i te Rangi rāua ko Ihu i a Rāua anō ki a ia.
Te Takohatanga o te Whakamāoritanga
Ka āwhina te takohatanga o te whakamāoritanga i ngā tāngata kia whakamāori i ngā kupu ā-tuhi nei o tō tātou Matua i te Rangi, otirā ngā kupu hoki o Ihu me Āna kaiaru mai i tētahi reo ki tētāhi atu. I mauria tēnei takohatanga e te poropiti a Hōhepa Mete i tāna whakamāoritanga o Te Pukapuka a Moromona. Ka āwhina tēnei takohatanga i te kaiwhakamāori kia mārama ai ki te tikanga tūturu o te kōrero, ā, kia tika anō hoki te whakamāoritanga.
Te Takohatanga o te Mātauranga
Ka āwhina te takohatanga o te mātauranga i ngā tāngata kia mārama ai ki te mahi a tō tātou Matua i te Rangi rāua ko Ihu. Kua kī mai tō tātou Matua i te Rangi, tē taea e tātou te hoki atu ki Tana taha noho ai, ki te kore tātou e mārama ki ngā mea e hiahiatia ana e Ia kia mahi ai tātou. Me mōhio tātou ki te mahere kua homai ki a tātou e tō tātou Matua i te Rangi, kia āhei ai tātou te hoki atu ki a Ia.
Kua kī a Ihu, ka āwhina te mātauranga ka whiwhi tātou i tēnei oranga i a tātou i roto i te ao wairua i muri ake o tō tātou matenga. E hiahia ana Ia kia mōhio ai tātou mō Āna whakaakoranga me Āna whakahaunga, mō te Rangi me te ao, mō ngā mea o mua kua mahia ai, ā, me ngā mea hoki e whai pānga ai ki ō tātou ake whenua me ērā atu whenua. Kua kī mai Ia, me tika tonu te whakamahi i te mātauranga nei. Me tono āwhina tātou i te Wairua Tapu i a tātou e kimi mātauranga ana.
Te Takohatanga o te Whaimōhiotanga
Ka āwhina tēnei takohatanga i ngā tāngata, kia tika ai te whakamahinga o te mātauranga ka hoatungia ki a rātou e tō tātou Matua i te Rangi. Me whakamahi tātou i tēnei takohatanga kia whakapai ake i ō tātou oranga, ā, kia whakaako hoki i ngā mea tika ki ētahi atu tāngata.
Te Takohatanga o te Whakaako
Ka āwhina te takohatanga o te whakaako i ngā tāngata, kia whakaako i te rongopai ki ētahi atu i runga tonu i te māramatanga. Ka whiwhi anake tātou i te takohatanga nei mā te whakapono ki a Ihu, ā, mā te ako me te inoi hoki.
Te Takohatanga o te Poropititanga
Ka āwhina te takohatanga o te poropititanga i ngā tāngata, kia mōhio ai, ā, kia mārama ai hoki ki ngā mea kua hipa nei, ngā mea o tēnei wā tonu, me ngā mea hoki o anamata. Ka hoatungia tēnei takohatanga ki ngā poropiti, heoi, ka taea hoki e tātou te whiwhi i te takohatanga nei hei ārahi i a tātou i ō tātou nei oranga.
Te Takohatanga o te Whakakitenga*
Ka whakakitea e te Wairua Tapu ki ngā tāngata i ngā mea ka āwhina i a rātou. Ka taea e tēnā me tēnā o tātou te whiwhi whakakitenga hei painga mō tātou ake. Heoi, ka hoatungia anake ngā whakakitenga mō te Hāhi katoa ki te poropiti. Tē taea e tātou te whiwhi whakakitenga mō tētahi o ō tātou kaiārahi i roto i te Hāhi. Ka hāngai tonu ngā whakakitenga katoa o te Wairua Tapu ki a tātou ki ngā whakahaunga me ngā whakaakoranga katoa o tō tātou Matua i te Rangi rāua ko Ihu.
Te Takohatanga o te Whakaoranga
Ka āwhina te takohatanga o te whakaoranga i ngā tāngata e mauiui ana kia whakaorangia ai rātou. Kei a ētahi te whakapono kia whakaorangia ai rātou anō, ā, kei a ētahi atu te whakapono kia whakaorangia ai ētahi atu tāngata.
Te Takohatanga o te Mahi Merekara
Ka hoatungia te takohatanga o te mahi merekara hei āwhina i ngā tāngata. Ko te merakara, he mea ka mahia ai e tō tātou Matua i te Rangi mō tātou, me te kaha nui i tēnā ka taea e tātou te mahi ko tātou anake. I kī a Ihu i roto i te Kawenata Hou, ā, i roto hoki i te Pukapuka a Moromona, ka mahia ai ngā merekara i waenganui i a rātou e whakapono ana ki a Ia.
Ka taea e Hātana te whakataurite i ēnei kaha ā-wairua
Ka taea e Hātana te mahi i ētahi mea e rite nei te āhua ki ngā takohatanga ā-wairua tūturu. Ka taea e ia te whakataurite i a ia anō kia tata ōrite tana āhua ki tētahi anahera. Ka taea e ia te whakataurite i ngā mea kino, kia pai ai, ā, kia tika ai hoki te āhua. Ka taea e ia te whakataurite i tētahi poropiti parau kia rite tōna āhua ki tētahi poropiti tūturu. Ka taea e ia te mahi merekara hei tinihanga i ngā tāngata. Ko ngā kaimākutu, ko ngā kauwaka, ko ngā kaiwhakakite-momoho, me ērā atu tāngata e pērā ana, ka whiwhi i tō rātou kaha i a Hātana, ā, ehara i te kaiaru o Ihu. Me noho mamao atu tātou i a rātou.
Ka taea e Hātana te whakataurite i ētahi mea kia pono nei te āhua, ā, mā te pātai anake ki tō tātou Matua i te Rangi tātou e mōhio ai mehemea he mea teka. Ka rongo tātou i tētahi kare ā-roto me te mea nei e ngākaurua ana, e kore tātou e rongo i te rongomau i te wā e whakataurite ana a Hātana, āna kaiaru rānei i ngā takohatanga o te wairua. Ko te takohatanga e whakamōhio ai i a tātou i te rerekētanga o ngā takohatanga ā-wairua tūturu, me ngā takohatanga whakataurite noa iho a Hātana, e kīa nei ko te takohatanga o te aroātanga.
Hei Matapaki
-
He aha ngā takohatanga ā-wairua?
-
Me pēhea tātou e mōhio ki te rerekētanga o ngā takohatanga ā-wairua tūturu, me ngā whakatauritetanga o Hātana?
Me kaha tātou kia whakawhanaketia ai, ā, kia whakamahia ai hoki ngā takohatanga e mau nei i a tātou
Ka taea e tātou te ako i ngā takohatanga e mauria nei e tātou mehemea ka ako tātou, ka nohopuku, ā, ka inoi hoki. Ka taea anake e tātou te whakamahi i ō tātou takohatanga mehemea ka whakarongo tātou ki ngā whakahaunga o Ihu. Kātahi ka hiahia tātou ki te whakamahi i ngā takohatanga hei āwhina i ētahi atu, ā, hei whakatipu hoki i Te Hāhi o Ihu Karaiti o te Hunga Tapu o ngā Rā o Muri Nei. Ki te kore tātou e whakawhanake, ā, e whakamahi rānei i ō tātou takohatanga, ka ngaro ērā i a tātou.
I kī a Ihu, kia kaua tātou e whakapehapeha i ngā takohatanga ā-wairua kua manaakitia ai tātou. Kia kaua tātou e kōrero mō ngā takohatanga nei ki ngā tāngata e kore e kite i ngā takohatanga nei hei mea tapu. Kua homai ēnei takohatanga hei painga mā tātou, ā, hei manaaki hoki i ētahi atu tāngata. Me maumahara tātou he tapu ēnei takohatanga. Ka homai ēnei takohatanga e Ihu mā te Wairua Tapu. Ka pātai anake Ia kia tuku whakamoemiti atu tātou ki a Ia, ā, kia whakamahia ai hoki ēnei takohatanga e ai ki Tāna e hiahiatia ana.
Hei Matapaki
-
Me pēhea tātou e mōhio ai ki ngā takohatanga e mau nei i a tātou?
-
Me pēhea tātou e tiaki ai i ngā takohatanga ā-wairua kia tapu tonu?
He mea whai tikanga nui te takohatanga o te Wairua Tapu ki a tātou
Me ngana tātou i ngā wā katoa ki te mahi i ngā mea pai me te whakarongo ki a Ihu, ki te kore, e kore te whakaawenga o te Wairua Tapu e noho ki tō tātou taha. Me ngana tātou ki te whakaaro pai. Ki te mahi hē tātou, me rīpenetā tātou. Me ngana tātou kia whai māramatanga ai ki ngā kōrero a te Wairua Tapu ki a tātou. Me whai tātou i Āna tohutohu.
Mehemea he pono tō tātou hiahia ki te whakarongo atu ki a Ihu, ka manaaki te takohatanga o te Wairua Tapu i ō tātou nei oranga. Ka āwhina Ia i a tātou kia harikoa ai ō tātou oranga inaianei, ā, kia whakarite hoki mō tētahi oranga ki te taha o tō tātou Matua i te Rangi.
Hei Matapaki
-
Me aha tātou kia āwhinatia ai tātou e te Wairua Tapu?