E āhei ana ngā whānau kia piri tahi mō āke tonu atu.
Upoko 29
He Whakahirahira ngā Whānau
He aha tō tātou Matua i te Rangi i whakamahere ai kia noho ā-whānau tātou i konei i runga i te whenua?
I Whakamahere Tō Tātou Matua i te Rangi kia Noho ā-Whānau Tātou
He rite tonu ō tātou whānau i konei i te ao nei ki tō tātou whānau rangi. Nō tētahi whānau rangi tātou i mua i tā tātou haerenga mai ki tēnei ao. He tamariki wairua tātou nā te Atua, koia tō tātou Matua i te Rangi. E aroha ana ia, ā, e whai whakaaro ana ia ki a tātou. Kei te hiahia Ia i ngā mea pai mō tātou, ā, kei te hiahia Ia kia hoki atu ai tātou me te noho tahi me Ia a tōna rā.
Nā tō tātou Matua i te Rangi te whānau tuatahi i waihanga i Tāna taumau atu i a Iwi ki a Ārama. I tohu Ia i a rāua kia whai tamariki. I pēnei tēnei kia whai tinana kikōiwi ngā tamariki wairua a tō tātou Matua i te Rangi. I kī atu Ia ki a rāua kia hoatu ai ki ā rāua tamariki ngā mea e tika ana mō rātou. I kī atu anō Ia ki a rāua kia whakaako ai rāua i te rongopai ki ā rāua tamariki me te āwhina i a rātou ki te whiwhi i ngā tikanga tapu o te rongopai.
He nui ngā take kua whakanohoia ā-whānau tātou e tō tātou Matua i te Rangi.
Tuatahi, nō ō tātou mātua ō tātou tinana kikōiwi. Me whai tinana kikōiwi tātou kia ako ai i ngā mea me mahi e tātou kia noho tahi ai me tō tātou Matua i te Rangi mō āke tonu atu.
Tuarua, ka taea e ngā whānau te tuku i ngā mea e tika ana mō tātou i tēnei ao. E taea ana e ngā mātua te tuku kai, ngā kākahu, te haumaru, te aroha, me ērā atu mea mō ā rāua tamariki. Nā wai rā, mā ngā tamariki ō rātou mātua e tiaki ina e kaumātua rawa ana ki te tiaki i a rāua anō.
Tuatoru, e taea ana e ngā mātua te whakaako i te rongopai a Ihu Karaiti ki ā rāua tamariki. Ka taea e rāua te whakaako i ā rāua tamariki ki te whakarongo ki ngā whakahaunga a tō tātou Matua i te Rangi. Ā, ka taea hoki e rāua te whakaū i ngā tamariki kia whiwhi ai rātou i ngā tikanga tapu i kī ai a Ihu me whiwhi e tātou.
Hei Matapaki
-
He aha tō tātou Matua i te Rangi i whakarite ai i a tātou kia haere ā-whānau mai ki tēnei ao?
-
Ko wai te whānau tuatahi i tēnei ao?
-
He aha te mahere o tō tātou Matua i te Rangi mō ō tātou whānau me ngā mahi a te whānau mō tātou?
Kei te Hiahia Tō Tātou Matua i te Rangi kia Aroha ngā Mema o te Whānau Tētahi ki Tētahi
E āhei ana tō tātou whānau i tēnei ao kia rite ki tō tātou whānau rangi i mua. E taea ana e te whānau te rongo i tētahi aroha e ākina ai rātou ki te āwhina tētahi i tētahi me te mahi, me te kī i ngā mea pai tētahi ki tētahi.
Me aroha te hoa tāne me te hoa wahine rāua ki a rāua. Me mahi pai, ā, me āwhina rāua ki a rāua. Me kaua rāua e kī, e mahi rānei i tētahi mea e pāmamae ai tētahi.
Me aroha ngā mātua i ā rāua tamariki. Me whakaako rāua i ā rāua tamariki kia aroha tētahi ki tētahi. Me whakaako rāua i ā rāua tamariki ki te āwhina, ki te atawhai tētahi ki tētahi.
Me aroha ngā tamariki i ō rātou mātua. Me whai whakaaro rātou, me whakarongo, ā, me āwhina i ō rātou mātua.
Hei Matapaki
-
Pānuitia a Epeha 4:29–32.
-
Me pēhea tātou e āwhina ai i ngā mema o te whānau ki te aroha tētahi ki tētahi?
-
He aha tō tātou Matua i te Rangi e hiahia ai i ngā mema o te whānau kia aroha tētahi ki tētahi?
Ko tā Tātou Mahi Tino Nunui Ko te Mahi mō te Whānau Harikoa me te Whānau Tika
Ko te mahi whakatupu i tētahi whānau tika te mahi tino nunui rawa e mahi ai tātou. Ahakoa pēhea te pai o tā tātou mahi i ērā atu mea, ki te kore tātou e whakaako i tō tātou whānau ki te aroha me te whakarongo ki tō tātou Matua i te Rangi, kua hē tātou i tā tātou tino mahi whakahirahira. I ētahi wā, ka kore ā tātou tamariki e whiriwhiri ki te aroha me te whakarongo ki tō tātou Matua i te Rangi, engari me ngana nui ngā mātua ki te mahi i tāna e taea ai ki te whakaako tika i ā rāua tamariki, e kore tō tātou Matua i te Rangi e whakahē i a rāua mō ngā mahi hē a ā rāua tamariki. Ka hē anake ngā mātua i te wā kua mutu i a rāua te ngana hei mātua pai.
Ka koa rawa tātou i ō tātou whānau i tēnei oranga. He nui tā tātou pai i a tātou e ū ana ki te whakatupu i ā tātou tamariki kia meinga ai he mema pai nō te Hāhi me te meinga anō hoki hei kirirarau pai i te whenua e noho nei rātou.
Ko te whānau te wāhi tino whakahirahira o te Hāhi. I whakaritea e tō tātou Matua i te Rangi Tana Hāhi ki te āwhina i ngā whānau kia mahi ai i ngā mea e tika ana ki te hoki atu ki a Ia. Kei te hiahia te Hāhi ki te āwhina i ngā whānau katoa kia piri tahi ai mō āke tonu atu.
E mōhio ana a Hātana i te whakahirahira nui o ngā whānau i roto i te mahere o tō tātou Matua i te Rangi. E whakawai ana ia i a tātou kia mahi ai i ngā mea e wāwahi atu ai ō tātou whānau.
Hei Matapaki
-
E pēhea ana te nui o te whakahirahira o tō whānau ki a koe?
Kua Whakamāramahia Tātou e Tō Tātou Matua i te Rangi Me Pēhea e Mahi Whānau Pai
Kei te hiahia katoa tātou kia whai whānau pai, ā, kia whai whānau harikoa. Ānei ētahi o ngā mea e āwhina ai i te whānau:
-
Me inoi tahi te whānau i te ata me te pō.
-
Me inoi tahi ngā mātua ia rā, ia rā.
-
Me whakaako ngā mātua i te rongopai ki ngā tamariki.
-
Me pānui karaipiture tahi te whānau ia rā, ia rā.
-
Me haere tahi te whānau ki ngā huinga Hāhi ia Rātapu, ia Rātapu.
-
Me nohopuku tahi te whānau i te wā kotahi ia marama ina kua pakeke pai ngā tamariki ki te nohopuku me te mārama he aha te take o te nohopuku.
-
Me hui tahi te whānau ia wiki, ia wiki mō tētahi huinga whānau e kīa ana ko te pō kāinga* kia kōrerohia ai ngā mahi pai i oti ai i te whānau. Me kōrero anō e rātou me pēhea e aro atu ki ngā uauatanga e pā ana ki ngā mema o te whānau. E taea ana te waiata, te whakaako, me te ako i ētahi whiti karaipiture, te purei kēmu, me te kai i ētahi paramanawa reka i roto i tēnei hui.
-
Me mahi tahi, ā, me pānui tahi te whānau.
-
Me pai, me manawanui ngā mema o te whānau tētahi ki tētahi.
-
Me mau i te whānau tētahi hītori mō ngā mea e mahi ai rātou.
Mēnā ka mahara tātou ki te inoi takitahi me te inoi taki whānau, ka tata mai tō tātou Matua i te Rangi ki a tātou. Ka whakarongo Ia ki ō tātou inoi, ā, ka whakautua e Ia i te āhuatanga e pai ana mō tātou.
Hei Matapaki
-
He aha ētahi mea e taea ai e tātou te mahi kia whai whānau pai?