1 Ināianei ā, i pahawa ake, nā, i te wā i whakakōpani a kīngi Peniamine i tana kōrero i ngā kupu kua tukuna ki a ia e tētahi anahera a te Ariki, nā, ka whiua tana titiro huri noa atu ki runga i te whakaminenga, nana, kua hinga iho rātou ki runga i te papa, nā te mea kua tau te wehi o te Ariki ki runga i a rātou.

2 Ā, kua kite rātou i a rātou anō i tō te kikokiko tino āhua, he iti rawa iho i te puehu o te whenua. Ā, kotahi anō tō rātou reo ki te karanga, e mea ana: Auē kia aroha mai, me te whakapā mai i ngā toto whakamārie o te Karaiti kia whiwhi ai mātou i tētahi murunga i ō mātou hara, ā, kia whakamākia ō mātou ngākau; nā te mea e whakapono ana mātou i a Ihu Karaiti, te Tama a te Atua, nāna te rangi me te whenua i hanga, me ngā mea katoa; ko ia anō e heke iho mai ai ki waenganui i ngā tamariki a te tangata.

3 Ā, i pahawa ake i muri iho i tana kōrerotanga i ēnei kupu ka tau iho te Wairua o te Ariki ki runga i a rātou, ā, i kikī rātou i te hari, kua whiwhi rātou i tētahi murunga i ō rātou hara, ā, kua mārie ō rātou hinengaro, nā tō rātou tino whakapono nui i a Ihu Karaiti ko ia ka haere mai, e ai ki ngā kupu kua kōrerotia ki a rātou e kīngi Peniamine.

4 Ā, ka tūwhera anō a kīngi Peniamine i tōna māngai, ā, ka tīmata tana kōrero atu ki a rātou: E aku hoa me aku teina, e aku huānga me taku iwi, kei te hiahia au kia aro mai anō koutou, kia rongo ai, ā, kia mārama ai koutou i te toenga o aku kupu e kōrero atu ai au ki a koutou.

5 Nana rā, mehemea kua whakaohokia koutou i tēnei wā e te mātauranga o te painga o te Atua ki tō koutou korehanga, me tō koutou āhuatanga tikanga kore me tō koutou āhuatanga taka—

6 Ko taku kupu tēnei ki a koutou, mehemea kua tau mai koutou ki tētahi mātauranga o te painga o te Atua, me tōna kaha taurite kore, me tōna mātauranga, me tōna manawanui, me tōna manawaroa ki ngā tamariki a te tangata; waihoki, ko te whakamārietanga kua whakaritea mai i te orokohanganga rā anō o te ao, mā reira tau ai te whakaoranga ki te tangata e whakawhirinaki ai ki te Ariki, me te ū ki te pupuri i āna whakahaunga, me te ū tonu i roto i te whakapono tae atu anō ki te mutunga o tōna oranga, ko tāku e kī nei te oranga o te tinana ira tangata—

7 Ko tāku, ko tēnei te tangata e whiwhi nei i te whakaoranga, mā roto i te whakamārietanga kua whakaritea mai nei mai i te orokohanganga rā anō o te ao mō ngā tāngata katoa, te hunga i ora mai nei nō te takanga o Arama, te hunga rānei e ora ana ināianei, te hunga rānei meake whānau mai ai, tae atu pū anō ki te mutunga o te ao.

8 Ā, mā konei tonu e puta mai ai te whakaoranga. Ā, kāore he whakaoranga kē atu anō hāunga tēnei kua kōrerotia nei; kāore rānei he huarahi kē atu anō e whakaorangia ai te tangata atu i te huarahi anake kua kōrerotia atu e au ki a koutou.

9 Me whakapono ki te Atua; me whakapono he tūturu ia, ā, nāna ngā mea katoa i hanga, i te rangi me te whenua; me whakapono kei a ia te mātauranga katoa, te mana katoa, i te rangi me te whenua; me whakapono kāore e mārama ana te tangata i ngā mea katoa e taea ana e te Ariki te mārama.

10 Hei āpiti anō, me whakapono, nā, me rīpenetā koutou i ō koutou hara me te whakarērea anō hoki ēnā, me te whakaiti i a koutou anō i te aroaro o te Atua; me te inoi i runga i te ngākau pono kia murua koutou e ia; ināianei ā, mehemea e whakapono ana koutou i ēnei mea katoa, tēnā, mahia.

11 Ā, koinei anō tāku kupu ki a koutou pēnā anō i tāku i mua, nā te mea kua tau mai koutou ki tētahi mātauranga o te korōria o te Atua, mehemea rānei kua mōhio koutou i tōna painga, ā, kua rongo rānei i tōna aroha, ā, kua whiwhi anō i tētahi murunga i ō koutou hara, nā konā pupū ai te harikoa tino nui rawa i ō koutou wairua, ahakoa tēnā kei te hiahia au kia mahara koutou, me te mau tonu i ngā wā katoa i te rokiroki o mahara, te tino nui o te Atua, me tō koutou ake korehanga, me tōna painga me tōna manawaroa ki a koutou, ngā tāngata tikanga kore, me te whakaiti i a koutou anō i roto pū anō i ngā hōhonutanga o te whakaiti, e karangatia ana te ingoa o te Ariki ia rā, ia rā, me te pūmau i runga i te whakapono ki taua mea e puta mai ai, kua kōrerotia e te māngai o te anahera.

12 Ā, nana, ko taku kupu tēnei ki a koutou, nā, ki te pēnei koutou ka hari tonu koutou i ngā wā katoa, ā, ka kikī anō koutou i te aroha o te Atua, me te mau tonu tētahi murunga i ō koutou hara; ā, ka tupu koutou i te mātauranga o tana korōria nāna koutou i hanga, i te mātauranga rānei o taua mea e tika ana, ā, e pono ana.

13 Ā, ka kore ō koutou hiahia ki te tūkino tētahi i tētahi, engari kia noho i runga i te rangimārie, me te hoatu ki tēnā tangata, ki tēnā tangata tāna e tika ai.

14 Ā, kāore koutou e tuku kia matekai ā koutou tamariki, kia tahanga rānei; kāore rānei koutou e tuku kia takahia e rātou ngā ture a te Atua, kia kakari me te tautohetohe hoki tētahi ki tētahi, kia mahi mō te rēwera, koia te rangatira o te hara, koia rānei te wairua kino kua kōrerotia e ō tātou tūpuna, koia tētahi hoariri ki te tika katoa.

15 Engari mā koutou rātou e whakaako kia hīkoi ai i ngā huarahi o te pono me te whaiwhakaaro; mā koutou rātou e whakaako kia aroha tētahi i tētahi, me te mahi whakarato tētahi ki tētahi.

16 Hei āpiti atu, mā koutou ake anō e atawhai te hunga e hiahia ana i tā koutou atawhai; mā koutou ā koutou rawa e tuku ki te tangata e hiahia ana; ā, e kore koutou e tuku kia inoi noa ake te tangata pīnono ki a koutou, ā, kia panaia atu ia ki waho kia mate.

17 Tērā pea ka kī ake koutou: Nā te tangata tonu tōna pōuri i tō ai; nō reira māku tōku ringa e kaiponu, ā, kāore au e hoatu ki a ia aku kai, kāore rānei au e wāwāhi atu ki a ia aku rawa kia kore ai ia e mamae, nā te mea he tika ōna whiunga—

18 Engari ko taku kupu tēnei ki a koutou, E te tangata, ko te tangata e pēnei ai he take nui tāna kia rīpenetā ai; ā, ki te kore ia e rīpenetā mō ngā mea kua mahia e ia ka mate ia āke tonu atu, ā, kāore ia e whai wāhi atu ki te kīngitanga o te Atua.

19 Nana rā, ehara rānei tātou katoa i te tangata pīnono? Kāore rānei tātou katoa e whakawhirinaki atu ki runga i te Mea kotahi anō, arā, te Atua, mō ngā rawa kei a tātou, mō te kai me te kākahu, ā, mō te kōura, ā, mō te hiriwā, ā, mō ō tātou taonga o ia āhua, o ia āhua?

20 Ā, nana, hei tēnei wā pū anō, i te karanga ake koutou i tōna ingoa, me te pīnono atu mō tētahi murunga i ō koutou hara. Ā, kua tukuna e ia kia pīnono noa atu koutou? Kāo; kua maringi iho tōna Wairua ki runga i a koutou, ā, kua meatia kia kikī ō koutou ngākau i te koa, ā, kua meatia kia kōpanihia ō koutou māngai kia kore ai koutou e kuihi te waha i te tino nui o tō koutou koa.

21 Ināianei ā, mehemea te Atua, nāna koutou i hanga, koia hoki te mea e whakawhirinaki nei koutou mō ō koutou oranga, ā, mō ngā mea katoa kei a koutou, ā, mō koutou anō hoki, e hoatu ana ki a koutou ngā mea tika katoa e inoi nei koutou i runga i te whakapono, e whakapono ana ka whiwhi koutou, Nā konei anō, me wāwāhi atu i ō koutou rawa tētahi ki tētahi.

22 Ā, mehemea ka whakawākia e koutou te tangata e inoi ake ai ki a koutou mō ō koutou rawa kia kore ai ia e mate, ā, ka whakahē i a ia, tērā noa ake te tika o tā koutou whakahēnga mō koutou i kaiponu ō koutou rawa, ehara noa nei nō koutou engari kē nō te Atua, nōna anō hoki ō koutou oranga; ahakoa rā tērā kāore tonu koutou e tuku inoi ake, e rīpenetā rānei mō te mea kua mahia e koutou.

23 Ko taku kupu tēnei ki a koutou, auē te mate mō taua tangata, nā te mea ka ngaro ngātahi atu rāua ko ana rawa; ināianei ā, ka kōrero atu au i ēnei mea ki te hunga e whairawa ana i ngā mea o te ao nei.

24 Hei āpiti, ko tāku ki te hunga rawakore, koutou kāore nei ō koutou rawa engari kua ranea, kia ora tonu ia rā, ia rā; ko te tikanga o tāku, ko koutou katoa e whakaparahako atu i te tangata pīnono, nā te mea kāore ō koutou rawa; e hiahia ana ahau kia kī ake ai i ō koutou ngākau: Kāore au e hoatu nā te mea kāore aku rawa, engari mehemea he rawa ōku kua hoatu au.

25 Ināianei ā, mehemea ka kī koutou i tēnei i roto i ō koutou ngākau kua hē kore tonu koutou, ki te kore kua whakahēngia koutou; ā, e tika ana tō koutou whakahēnga nā te mea e apo ana koutou ki taua mea kāore anō kia riro atu i a koutou.

26 Ināianei ā, mō te whakaaro ki ēnei mea kua kōrero atu nei au ki a koutou—arā, mō te whakaaro kia mana tonu ai te murunga i ō koutou hara mai i tētahi rā ki tētahi rā, kia hīkoi hē kore koutou i te aroaro o te Atua—e hiahia ana ahau kia wāwāhi atu koutou i ō koutou rawa ki te hunga rawakore, tēnā tangata, tēnā tangata e ai ki ngā rawa kei a ia, pērā i te whāngai i te hunga hiakai, te whakakākahu i te hunga tahanga, te torotoro atu ki te hunga tūroro me te āwhina atu hei mauru i te mamae, ā-wairua mai, ā-tinana mai, e ai ki ō rātou hiahia.

27 Ā, kia tika te whakamahi i ēnei mea katoa i runga i te whai mātauranga me te tika; nā te mea ehara i te mea me tere ake tā te tangata oma i tāna e taea ai. Hei āpiti anō, me tika pū tana pukumahi, kia toa ai ia i reira i te taonga whakaihuwaka; nō reira, me tika te whakamahi i ngā mea katoa.

28 Ā, e hiahia ana ahau kia mahara koutou, ko ngā tangata kei waenganui i a koutou e mino ana i tana kiritata me whakahoki atu i taua mea kua minoa nei e ia, e ai ki tāna i whakaae ai, ki te kore rānei ka hara koutou; ā, tērā pea nā tāu mahi ka hara anō hoki tō kiritata.

29 Ā, kāti ake, kāore e taea ana e au te kōrero atu ki a koutou i ngā mea katoa mā konā koutou hara ai; nā te mea he huhua ngā huarahi me ngā ara, nā, he huhua noa atu nā konā tē taea e au te tatau.

30 Engari e taea noatia ana tēnei e au te kōrero ki a koutou, nā, ki te kore koutou e hopohopo i a koutou anō, me ō koutou whakaaro, me ā koutou kupu, me ā koutou mahinga, me te ū ki ngā whakahaunga a te Atua, me te ū tonu i runga i te whakapono ki aua mea kua rangona e koutou e pā ana ki te haerenga mai a te Ariki, tae atu ana ki te mutunga o ō koutou oranga, me mate koutou. Ināianei ā, E te tangata, mahara, kaua hoki e ngaro.