1 Nā, kua whakatūpatoria a Arami e te Ariki ka haere mai ngā ope tauā o kīngi Noa ki runga i a rātou, ā, i te mea kua whakamōhiotia ki tana iwi, nō reira rātou i whakahuihui tahi ai i ā rātou kāhui, ka tīkina ētahi o ā rātou kākano, ā, ka wehe atu ki roto i te koraha i mua i ngā ope tauā o kīngi Noa.

2 Ā, ka whakapakari te Ariki i a rātou, kīhai i taea e te iwi o kīngi Noa te whakamau i a rātou kia whakangaromia ai rātou.

3 Ā, e waru ngā rā i tahuti atu ai rātou ki roto i te koraha.

4 Ā, ka tae atu rātou ki tētahi whenua, āe rā, he whenua tino ātaahua, ā, he whenua āhuareka, he whenua e parukore ana ōna wai.

5 Ā, ka whakatū rātou i ō rātou tēneti, ā, ka tīmata ki te ngaki i te whenua, ā, ka tīmata ki te waihanga whare, āe rā, he pukumahi rātou, ā, i tino kaha tā rātou mahi.

6 Ā, i te hiahia te iwi kia tū ai a Arami hei kīngi mō rātou, nā te mea i arohaina ia e tōna iwi.

7 Engari ka kī atu ia ki a rātou: Nana, kāore e tika ana kia whai kīngi koutou; nā te mea e pēnei ana te kupu a te Ariki: Kaua koe e whakatiketikehia tētahi kikokiko i tētahi atu, kaua rānei tētahi tangata e whakatiketikehia ia anō i tētahi atu; nō reira ko taku kupu tēnei ki a koutou kāore e tika ana kia whai kīngi koutou.

8 Hei aha koa, mehemea e taea ana e koutou ngā tāngata tika te rapu hei kīngi mō koutou i ngā wā katoa kua pai kia whai kīngi koutou.

9 Engari kia mahara ki te hē o kīngi Noa me ana pirihi; ā, ko au anō i mau ai i tētahi māhanga, ā, i mahia ngā mea maha e mōrikarika ana i te tirohanga a te Ariki, nā konā au i rīpenetā nui ai;

10 Hei aha koa, i muri i ngā pāweratanga nui, ka rongo te Ariki i aku tangi, ā, ka whakautua aku inoi, ā, kua meatia au hei taputapu i ōna ringaringa i te mauranga mai i te tokomaha o koutou ki tētahi mātauranga o tōna pono.

11 Hei aha koa, kāore au e whakamanamana i tēnei, nā te mea ehara au i te mea tika kia whakamanamana i ahau anō.

12 Ināianei ā, ko taku kupu tēnei ki a koutou, kua whakapēhia koutou e kīngi Noa, ā, kua noho hereheretia ki a ia me āna pirihi, ā, kua mauria koutou e rātou ki roto i te hē; nō reira i herea koutou ki ngā herehere o te hē.

13 Ināianei ā, i te mea kua whakaputaina koutou e te mana o te Atua i ēnei herehere; āe rā, i waho pū anō i ngā ringaringa o kīngi Noa me tana iwi, ā, i ngā hereherenga o te hē, waihoki e hiahia ana ahau kia tū kaha i tēnei herekoretanga mā konā kua herekoretia koutou, ā, kia kaua koutou e tuku ai i tētahi tangata kia tū ai hei kīngi i runga i a koutou.

14 Ā, kaua hoki e tuku i tētahi kia tū ai hei kaiako, hei kaiminita rānei mō koutou, hāunga he tangata nō te Atua ia, e hīkoi ana i ōna huarahi, ā, e pupuri ana i āna whakahaunga.

15 I whakaako pēnei a Arami i tana iwi, kia arohaina e ia tangata, e ia tangata tōna kiritata anō nei ko ia anō, kia kore ai tētahi tautohetohenga i waenganui i a rātou.

16 Ināianei ā, ko Arami tō rātou pirihi teitei, ko ia hoki te kaiwhakapūmau o tō rātou hāhi.

17 Ā, i pahawa ake, kāore tētahi i whiwhi i te mana ki te kauhau, ki te whakaako rānei ki te kore i homai e te Atua mā roto i a ia. Nō reira ka whakatapua e ia ō rātou pirihi katoa me ō rātou kaiako katoa; ā, kāore tētahi i whakatapua ki te kore rātou i te tangata tika.

18 Nō reira i mataara rātou i runga i tō rātou iwi, ā, i whāngaia rātou ki ngā mea e pā ana ki te tika.

19 Ā, i pahawa ake, nā, ka tīmata tā rātou kakenga nuitanga i te whenua; ā, ka karangatia e rātou te whenua ko Herama.

20 Ā, i pahawa ake, nā, ka tini haere rātou, ā, ka kake nui rātou i te whenua o Herama; ā, i hangaia e rātou tētahi pā, i karangatia ko te pā o Herama.

21 Hei aha koa e tika ana ki tā te Ariki titiro kia pāpaki i tana iwi; āe rā, ka whakamātautauria tō rātou manawanui me tō rātou whakapono.

22 Hei aha koa—ko te tangata e whakawhirinaki nei ki a ia ko ia anō e whakateiteingia ake hei te rā whakamutunga. Āe rā, i pēnei anō te āhua o tēnei iwi.

23 Nana rā, māku e whakaatu atu ki a koutou, nā, i kūmea iho rātou ki roto i te hereheretanga, ā, kīhai i taea e tētahi te whakaputa i a rātou hāunga ko te Ariki tō rātou Atua anake, āe rā, ko te Atua pū anō o Aperahama, o Ihaka me Hākopa.

24 Ā, i pahawa ake, nā, nāna rātou i whakaputa, ā, nāna i whakaatu atu ki a rātou tōna kaha nui, ā, i nui ā rātou haringa.

25 Nana rā, i pahawa ake, nā, i a rātou i te whenua o Herama, āe rā, i te pā o Herama, i a rātou e ngaki ana i te whenua e pātata ana, nana, kua kuhuna mai tētahi ope tauā a ngā Rāmana ki roto i ngā rohe o te whenua.

26 Nā, i pahawa ake, nā, i tahuti atu ngā teina o Arami i ngā pārae, ā, ka whakahuihui ngātahi i a rātou anō i te pā o Herama; ā, i tino mataku rawa rātou nā te āhua o ngā Rāmana.

27 Engari i haere whakamua atu a Arami, ā, ka tū ki waenganui i a rātou, ā, i ākina rātou kia kaua rātou e mataku, engari kia mahara rātou ki te Ariki tō rātou Atua, ā, māna rātou e whakaora.

28 Nō reira ō rātou wehi i mauru iho ai, ā, ka tīmata ki te karanga ake ki te Ariki kia whakangāwaritia e ia ngā ngākau o ngā Rāmana, kia tohungia rātou, me ā rātou hoawāhine, me ā rātou tamariki.

29 Ā, i pahawa ake, nā, i whakangāwaritia ngā ngākau o ngā Rāmana e te Ariki. Ā, ka haere whakamua atu a Arami rātou ko ana teina, ka tukuna rātou e rātou anō ki roto i ō rātou ringaringa; ā, ka riro i ngā Rāmana te whenua o Herama.

30 Nā, ko ngā ope tauā a ngā Rāmana, ko rātou i whaiwhai nei i te iwi o kīngi Rimihi, he maha ō rātou rā i ngaro ai i te koraha.

31 Ā nana, i kitea e rātou aua pirihi a Noa, i taua wāhi i karangatia ko Amurona; ā, kua tīmata rātou kia nōhia ai te whenua o Amurona, ā, kua tīmata te ngaki i te whenua.

32 Nā, ko te ingoa o te rangatira o aua pirihi ko Amurona.

33 Ā, i pahawa ake, nā, i inoi ake a Amurona ki ngā Rāmana; ā, i tukuna anōtia e ia ā rātou hoawāhine, ko rātou nei ngā tamāhine a ngā Rāmana, ki te inoi ki ō rātou tungāne, kia kaua rātou e whakangaro i ā rātou hoatāne.

34 Ā, ka aroha ngā Rāmana ki a Amurona rātou ko ana teina, ā, kīhai i whakangaro i a rātou, nā ā rātou hoawāhine.

35 Ā, ka whakauru atu a Amurona rātou ko ana teina ki roto i ngā Rāmana, ā, i te haere rātou i roto i te koraha e rapu ana i te whenua o Nīwhai i te wā i kite ai rātou i te whenua o Herama, kua nōhia e Arami rātou ko ana teina.

36 Ā, i pahawa ake, nā, i whakaari ngā Ramana ki a Arami rātou ko ana teina, nā, mēnā ka whakaaturia e rātou te huarahi ki a rātou e ārahina atu ai ki te whenua o Nīwhai ka tohungia e rātou ō rātou oranga me tō rātou herekoretanga.

37 Engari i muri iho i tā Arami whakaatu atu ki a rātou i te huarahi e ārahina ana ki te whenua o Nīwhai kāore i pūmau ki tā rātou i whakaari ai; engari ka whakatūria ngā kaitiaki taiāwhio noa i te whenua o Herama, i runga i a Arami rātou ko ana teina.

38 Ā, ka haere atu te toenga atu o rātou ki te whenua o Nīwhai; ā, ka hoki anō tētahi wāhi o rātou ki te whenua o Herama, ā, ka mauria anō hoki e rātou ngā hoawāhine me ngā tamariki a ngā kaitiaki kua mahue atu i te whenua.

39 Ā, ka tukuna e te kīngi o ngā Rāmana a Amurona kia tū ai hei kīngi, ā, hei kaiwhakahaere i runga i tana iwi, ko rātou nei e noho ana i te whenua o Herama; hei aha koa kāore ōna mana ki te mahi i tētahi mea kē atu i te hiahia a te kīngi o ngā Rāmana.