Ko te Pukapuka a Mōhia

1 Ā, kāore ianei he tautohetohenga i te whenua katoa o Harahemara, i waenganui i te iwi katoa o kīngi Peniamine, nō konei rā i tau tonu ai te maungārongo i ngā toetoenga rā katoa o kīngi Peniamine.

2 Ā, i pahawa ake, nā, tokotoru āna tama; ā, i karangatia ō rātou ingoa ko Mōhia, ko Herorumu, ko Heramana. Ā, i meatia e ia kia whakaakona rātou i roto katoa i te reo o ōna tūpuna, mā reira rātou e meinga he tāne mārama; ā, kia mōhio anō rātou e pā ana ki ngā poropititanga kua kōrerotia e ngā māngai o ō rātou tūpuna, kua tukuna ki a rātou e te ringa o te Ariki.

3 Ā, i whakaakona anōtia e ia e pā ana ki ngā tuhinga kua whaowhaoa ki runga i ngā papa parāhe, e mea ana: E aku tama, kei te hiahia au kia mahara koutou me i kore ēnei papa, e mau nei ēnei tuhinga me ēnei whakahaunga, kua noho pū tonu tātou i te kūaretanga, ā mohoa noa nei anō, kāore e mōhio ana ki ngā mea ngaro a te Atua.

4 Nā te mea kīhai i taea e tō tātou matua, e Rīhai, te maumahara ki ēnei mea katoa, hei whakaako ki āna tamariki, mehemea kīhai ia i āwhinatia ai e ēnei papa; nā te mea i ākona ia i roto i te reo o ngā Ihipiana, nō reira, i taea e ia te pānui i ēnei whaowhaonga, me te whakaako i ērā ki āna tamariki, mā konā, ka taea e rātou te whakaako ki ā rātou tamariki, e whakatutukihia ana i reira ngā whakahaunga a te Atua, ā mohoa noa nei.

5 Ko tāku ki a koutou, e aku tama, me i kore ēnei mea, kua puritia, ā, kua tiakina e te ringa o te Atua, kia pānuitia ai e tātou, ā, kia māramatia ai e tātou āna mea ngaro, kia tau ai āna whakahaunga ki mua i ō tātou karu i ngā wā katoa, kua memeha pū anō te whakapono o ō tātou tūpuna, ā, kua pērā tātou i ō tātou tuākana, ngā Rāmana, e korekore nei rātou i te mōhio e pā ana ki ēnei mea, e kore pū nei rānei e whakapono ki ēnā i a rātou e whakaakona ana, nā ngā whakarerenga iho a ō rātou tūpuna, kāore nei i te tika.

6 E aku tama, e hiahia ana au kia mahara ai koutou he pono ēnei kōrero, ā, he pono anō hoki ēnei tuhinga. Ā nana, ko ngā papa a Nīwhai anō hoki, e mau nei ngā tuhinga me ngā kōrero a ō tātou tūpuna mai i te wā i wehe atu rātou i Hiruharama tae noa mai ki nāianei, ā, he pono ērā; ā, ka taea e tātou te mōhio he pono aua mea nā te mea kei mua tonu ērā i ō tātou karu.

7 Ināianei ā, e aku tama, e hiahia ana au kia mahara ai koutou kia āta tirohia ēnei mea, kia puta he painga ki a koutou i konā; ā, e hiahia ana au kia puritia e koutou ngā whakahaunga a te Atua, kia whai painga koutou i runga i te whenua e ai ki ngā kupu whakaari i whakaaria mai nei e te Ariki ki ō tātou tūpuna.

8 Ā, he maha atu anō ngā mea i whakaakona ai e kīngi Peniamine ki āna tama, kāore nei i tuhia i roto i tēnei pukapuka.

9 Ā, i pahawa ake, nā, i muri iho i tā kīngi Peniamine whakakōpani i tana whakaako i āna tama, nā ka koroheketia ia, ā, ka kite anō ia meake haere ai ia i te huarahi o te ao katoa; nō reira, i whakaaro ia e tika ana kia tuku iho i te kīngitanga ki runga i tētahi o āna tama.

10 Nō reira, ka meatia e ia kia kūmea mai a Mōhia ki tōna aroaro; ā, koinei ngā kupu i kōrerotia ai e ia ki a ia, e mea ana: E taku tama, e hiahia ana au kia whakapuaki atu koe puta noa i tēnei whenua ki waenganui i tēnei iwi katoa, i te iwi rānei o Harahemara, me te iwi o Mōhia e noho ana i te whenua, mā reira rātou whakahuihuia tahitia ai; nā te mea hei āpōpō au e whakapuaki atu ai ki tōku iwi nei i tōku māngai ake māu hei kīngi, hei rangatira mō runga i tēnei iwi kua homai nei e te Ariki tō tāua Atua ki a tāua.

11 Hei āpiti atu, māku tētahi ingoa e tapa ki tēnei iwi, mā reira rātou e mōhiotia ai i tua atu i ngā iwi katoa kua kūmea mai nei e te Ariki te Atua i te whenua o Hiruharama; ā, e pēnei ana au nā te mea he iwi ū rātou ki te pupuri i ngā whakahaunga a te Ariki.

12 Ā, māku tētahi ingoa e tapa nei ki runga i a rātou kua kore rawa e murua atu, hāunga mā te mahi kino.

13 Āe rā, hei āpiti atu ko tāku e mea atu nei ki a koutou, nā, mēnā ka taka iho tēnei iwi tino makau nō te Ariki ki roto i ngā mahi kino, me te huri hei iwi whakarihariha me tētahi iwi pūremu nui, nā, ka tukua ake rātou e te Ariki, mā reira rātou meinga ai he iwi ngoikore pērā i ō rātou tuākana; ā, kua kore rātou e tiakina tonutia e tōna mana taurite kore, ā, e tōna mana whakamīharo, pērā i tana tiakanga i ō tātou tūpuna i mua ā mohoa noa nei.

14 Nā te mea ko tāku ki a koutou, nā, me i kore i torona atu e ia tōna ringa ki te tiaki i ō tātou tūpuna kua taka iho rātou ki ngā ringaringa o ngā Rāmana, ā, kua meinga hei marurenga nō tō rātou mauāhara.

15 Ā, i pahawa ake, nā, whai muri iho i tā kīngi Peniamine whakakōpani i ēnei kōrero ki tana tama, ka tukuna iho ki a ia te mana i runga i ngā āhuatanga katoa o te kīngitanga.

16 Ā, hei āpiti atu, i tukuna anōtia iho ki a ia te mana i runga i ngā tuhinga kua whaowhaoa ki runga i ngā papa parāhe; me ngā papa a Nīwhai anō hoki; waihoki, ko te hoari o Rāpana, me te pōtakataka, arā, te kaitohu nāna ō tātou tūpuna i ārahi mā roto i te koraha, kua whakaritea e te ringa o te Ariki mā reira rātou ārahina ai, e ai ki tō ia tangata āta aro me tō ia tangata ū i tukuna ki a ia.

17 Nō reira, i a rātou e kore nei e ū ana, kāore rātou i whai pai, kāore hoki rātou i kāneke whakamua i tō rātou haerenga, engari ka āia whakamuritia, ā, i kūmea iho e rātou te whakatakariri o te Atua ki runga i a rātou; ā, nō reira rātou i patua ai ki te hemokai me ngā whakamamaetanga kino, kia whakaohooho ai i a rātou kia mahara ki tō rātou haepapa.

18 Ināianei ā, i pahawa ake, nā, ka haere atu a Mōhia, ā, ka mahia tā tōna matua i whakahaua ai ia, ā, ka whakapuakina ki te iwi e noho ana i te whenua o Harahemara mā reira rātou whakahuihui tahi ai, kia haere ake ki te temepara ki te whakarongo ki ngā kupu e kōrerotia ai e tōna matua ki a rātou.