1 Ā, i pahawa ake, nā, i te otinga ake o ngā tau e rua ka puta āhua kē mai a Apinati ki waenganui i a rātou, kīhai rātou i mōhio ki a ia, ā, ka tīmata ki te poropiti ki waenganui i a rātou, e mea ana: Kua whakahaua pēneitia ahau e te Ariki, e mea ana—E Apinati, haere, poropiti atu ki tēnei taku iwi, nā te mea kua whakapakekehia e rātou ō rātou ngākau ki aku kupu; kīhai rātou i rīpenetā i ō rātou mahinga kino; nō reira, ka toro atu au ki a rātou i runga i taku riri, āe rā, ka toro atu au ki a rātou i roto i ō rātou hara me ō rātou mōrikarika i runga i taku riri nui.

2 Āe rā, auē te mate mō tēnei whakatipuranga! Ā, ka mea mai te Ariki ki ahau: Torona atu tō ringa me te poropiti, e mea ana: Ko te kupu tēnei a te Ariki, ka pahawa ake i tēnei whakatipuranga, nā ō rātou hara, ka kukume iho ki roto i te hereheretanga, ā, ka pākia te pāpāringa; āe rā, ka āia atu e te tangata, ā, ka patua; ā, mā ngā whatura o te rangi, me ngā kurī, āe rā me ngā kararehe mohoao, e kai ō rātou kikokiko.

3 Ā, ka pahawa ake, nā, ka rite te wāriu o te oranga o kīngi Noa ki tētahi kākahu pū anō i roto i te oumu wera; nā te mea ka mōhio ia ko au te Ariki.

4 Ā, ka pahawa ake, nā, māku taku iwi nei e patu ki ngā whakamamaetanga nui, āe rā, ki te matekai me te mate urutā; ā, māku rātou e mea kia auē rātou mō te roanga katoa o te rā.

5 Āe rā, ka meatia e au kia herea ai ngā pikaunga ki runga i ō rātou tuarā; ā, ka āia atu rātou anō nei he kaihe reokore.

6 Ā, ka pahawa ake, nā, ka tukuna atu e au te ua whatu ki waenganui i a rātou, ā, ka patua rātou; ā, ka patua anōtia rātou e te marangai; ā, ka autaia ngā ngārara i ō rātou whenua, me te horo i ā rātou kākano.

7 Ā, ka patua rātou ki tētahi mate urutā nui—ā, māku katoa ēnei nā ō rātou hara me ō rātou mōrikarika.

8 Ā, ka pahawa ake, nā, ki te kore rātou e rīpenetā māku rātou e whakangaro mai i te mata o te whenua; heoi, ka mahue i a rātou tētahi tuhinga i muri i a rātou, ā, māku ēnā e tiaki mō ērā atu iwi e nōhia ai te whenua; āe rā, ka pēnei pū anō au kia hura atu ai au i ngā mōrikarika o tēnei iwi ki ērā atu iwi. Ā, he maha ngā mea i poropititia ai e Apinati e tauaro ana ki tēnei iwi.

9 Ā, i pahawa ake, nā, i te riri rātou ki a ia; ā, ka mau ia i a rātou, ā, ka mauria hereheretia atu ia ki te aroaro o te kīngi, ā, ka kī atu ki te kīngi: Nana, kua mauria mai tētahi tangata ki mua i tō aroaro, nāna i poropiti kino e pā ana ki tō iwi, ā, e mea ana ka whakangaro te Atua i a rātou.

10 Ā, e poropiti kino ana anō hoki ia e pā ana ki tō oranga, ā, e mea ana ka rite tō oranga ki tētahi kākahu i roto i te oumu ahi.

11 Hei āpiti anō, e mea ana ia ka rite koe ki tētahi kakau tupu, ki tētahi kakau maroke pū anō o te whīra, kua omahia nei e ngā kararehe, ā, takatakahia kau ana e te waewae.

12 Hei āpiti anō, e mea ana ia ka rite koe ki ngā puāwai o te tūmatakuru, ina tino pakari, ki te pupuhi te hau, ka āia atu ki runga i te mata o te whenua. Ā, kei te whakataruna ia nā te Ariki i kōrero. Ā, ka mea ia ka tau katoa iho tēnei ki runga i a koe ki te kore koe e rīpenetā, ā, ka pēneitia nā ōu hara.

13 Ināianei ā, E te kīngi, he aha te kino nui kua mea nei koe, he aha rānei ngā hara nui kua meatia e tō iwi, kia whakahēngia ai tātou e te Atua, kia whakawākia ai rānei e tēnei tangata?

14 Ināianei ā, E te kīngi, nana, he harakore mātou, ā, ko koe, E te kīngi, kīhai nei i hara; nō reira, kua rūkahu tēnei tangata e pā ana ki a koe, ā, auare ake ana tāna i poropiti ai.

15 Ā, nana, he kaha tātou, e kore tātou e heke atu ki roto i te hereheretanga, e kahakina hereheretia atu rānei e ō tātou hoariri; āe rā, kua kake koe i tēnei whenua, ā, ka kake tonu koe.

16 Nana, anei te tangata, e tukuna atu ana ia e mātou ki roto i ō ringaringa; māu e mahi tāu e pai ai ki a ia.

17 Ā, i pahawa ake, nā, ka meatia e kīngi Noa kia panaia atu a Apinati ki roto i te whareherehere; ā, ka whakahaua e ia kia huihui tahi ai ngā pirihi i a rātou anō e wānanga tahi ai rātou me aha ki a ia.

18 Ā, i pahawa ake, nā, ka kī atu rātou ki te kīngi: Haria mai ia ki konei kia uiuitia ia e mātou; ā, ka whakahau te kīngi kia haria ia ki mua i a rātou.

19 Ā, ka tīmata rātou ki te uiui i a ia, kia whakatapepatia ia, mā konā whai mea ai rātou hei take whakahē mōna engari i māia tana whakahoki ki a rātou, ā, me te urupare i ā rātou pātai katoa, āe rā, ka mīharo rātou; nā te mea i urupare atu ia i ā rātou pātai katoa, ā, i whakapōauautia ā rātou kupu katoa.

20 Ā, i pahawa ake, nā, ka kī atu tētahi o rātou ki a ia: He aha te tikanga o ngā kupu kua tuhia, kua whakaakona hoki e ō tātou tūpuna, e mea ana:

21 Anō te ātaahua o ngā waewae kei runga i ngā maunga o te tangata e kawe mai nei i te rongopai; e kauhau ana i te maungārongo; e kawea mai ana te rongopai o te pai; e kauhau ana i te whakaoranga; e mea ana ki a Hīona, e whakahaere ana Tō Atua;

22 Ka whakanuia te reo o ō tūtei; kotahi tonu te reo e waiata ai rātou; nā te mea ka kite rātou kanohi ki te kanohi ina whakahoki anō te Ariki i a Hīona;

23 Papahū atu i te hari; waiatahia ngātahitia e koutou ngā wāhi ururua o Hiruharama; nā te mea kua whakaahuru te Ariki i tana iwi, kua hokona a Hiruharama e ia;

24 Kua hura te Ariki i tōna ringa tapu i ngā karu o ngā iwi katoa, ā, ka kite ngā tōpito katoa o te ao i te whakaoranga o tō tātou Atua?

25 Ināianei ā, ka kī atu a Apinati ki a rātou: He tohunga koutou, engari, e whakataruna ana me te mea nei kei te whakaako i tēnei iwi, me te mārama i te wairua o te poropititanga, engari, kei te hiahia kia mōhio ai koutou i ahau he aha te tikanga o ēnei mea?

26 Ko taku kupu tēnei ki a koutou, auē te mate mō koutou i whakapeau i ngā huarahi a te Ariki! Nā te mea mēnā kei te mārama koutou i ēnei mea kāore i whakaakona ēnā e koutou; nō reira, kua whakapeau koutou i ngā huarahi a te Ariki.

27 Kāore koutou i whakahāngai atu i ō koutou ngākau ki te māramatanga; nō reira, kāore koutou i whaiwhakaaro. Nō reira, he aha tā koutou e whakaako nei ki tēnei iwi?

28 Ā, ka kī rātou: E whakaako ana mātou i te ture a Mohi.

29 Ā, ka kī atu anō ia ki a rātou: Mehemea kei te whakaako koutou i te ture a Mohi he aha koutou e kore ai e pupuri? He aha koutou e whakatau atu ai i ō koutou ngākau ki ngā taonga? He aha koutou e mahi pūremu ai me te whakapau i ō koutou kaha ki ngā wāhine pūremu, āe rā, me te mea anō i tēnei iwi kia hara ai, nā, kua whaitake te Ariki kia tonoa au ki te poropiti i te hē mō tēnei iwi, āe rā, i te kino nui pū anō mō tēnei iwi?

30 Kāore rānei koutou e mōhio ana he pono aku kōrero? Āe rā, e mōhio ana koutou he pono aku kōrero; ā, me tāwiriwiri koutou i te aroaro o te Atua.

31 Ā, ka pahawa ake, nā, ka patua koutou mō ō koutou hara, nā te mea kua kī mai koutou kei te whakaako koutou i te ture a Mohi. Ā, he aha tā koutou e mōhio nei e pā ana ki te ture a Mohi? Ka puta te whakaoranga i te ture a Mohi? He aha tā koutou kī?

32 Ā, ka whakautua e rātou, ā, ka kī ake, nā, ka puta te whakaoranga i te ture a Mohi.

33 Engari ka kī atu a Apinati ināianei ki a rātou: E mōhio ana ahau mēnā ka pupuri i ngā whakahaunga a te Atua ka whakaorangia koutou; āe rā, mehemea e pupuri ana koutou i ngā whakahaunga i tukuna ai e te Ariki ki a Mohi i te maunga o Hinai, e mea ana:

34 Ko au te Ariki tō Atua, nāna nei koe i hari mai ki waho i te whenua o Īhipa, ki waho i te whare o te hereheretanga.

35 Kaua tētahi Atua kē atu mōu ki mua i ahau.

36 Kaua koe e hanga mōu tētahi whakapakoko, tētahi ritenga rānei o ngā mea i te rangi kei runga, o ngā mea rānei i te whenua kei raro.

37 Nā, ka kī atu a Apinati ki a rātou, Kua meatia ēnei mea katoa? ko taku kupu tēnei ki a koutou, Kāo, kīhai rawa koutou. Ā, kua whakaakona e koutou tēnei iwi kia mahi ai i ēnei mea katoa? Ko taku kupu tēnei ki a koutou, Kāo, kīhai rawa koutou.