1 Ināianei ā, i pahawa ake, nā, nō muri iho i ngā tau e toru i mau ai i a kīngi Mōhia te rangimārie tonutanga, i te hiahia ia kia mōhio ai e pā ana ki te iwi i haere ake ai ki te noho i te whenua o Rīhai-Nīwhai, i te pā rānei o Rīhai-Nīwhai; nā te mea kīhai tana iwi i rongo ai i te kupu kotahi i a rātou mai i te wā i wehe atu ai i Harahemara; nō reira, i hōhā ia i ā rātou whakapōreareatanga.

2 Ā, i pahawa ake, nā, ka whakaaehia e kīngi Mōhia kia haere ake ngā tāne kaha tekau mā ono ki te whenua o Rīhai-Nīwhai, kia rapu kōrero ai e pā ana ki ā rātou teina.

3 Ā, i pahawa ake, nā, ao ake te rā ka whakatika atu tā rātou haere ake, i tō rātou taha tētahi ko Amona, he tangata kaha ia, he tangata mārohirohi ia, ā, he uri ia nō Harahemara; ā, koia hoki tō rātou kaiwhakahaere.

4 Ināianei ā, kāore rātou i mōhio he aha te huarahi e haere ai rātou i roto i te koraha kia haere ake ai ki te whenua o Rīhai-Nīwhai; nō reira i ātiutiu rātou i te koraha mō ngā rā maha, arā, e whā tekau ngā rā i ātiutiu ai rātou.

5 Ā, i te wā i oti ngā rā e whā tekau e ātiutiu haere ana rātou ka tae rātou ki tētahi puke, kei te raki o te whenua o Hīroma, ā, i reira rātou whakatū ai i ō rātou tēneti.

6 Ā, ka mauria e Amona ana teina tokotoru, ā, ko ō rātou ingoa ko Āmareki, ko Herema rātou ko Hema, ā, ka heke iho rātou ki roto i te whenua o Nīwhai.

7 Ā, nana, i tutaki rātou ki te kīngi o te iwi e noho ana i te whenua o Nīwhai, i te whenua o Hīroma anō hoki; ā, i karapotia rātou e ngā kaitiaki o te kīngi, ā, ka kahakina atu rātou, ā, ka herea, ā, ka panaia ki te whareherehere.

8 Ā, i pahawa ake i te rā tuarua o tā rātou noho i te whareherehere ka mauria anōtia rātou ki te aroaro o te kīngi, ā, ka wetekina ō rātou here; ā, ka tū rātou i te aroaro o te kīngi, ā, i tukuna, i whakahaua rānei, kia whakautua e rātou ngā pātai e pātaihia atu ai rātou e ia.

9 Ā, ko tana kupu tēnei ki a rātou: Nana, ko Rimihi ahau, te tama a Noa, koia te tama a Hinihi, nāna i haere mai i te whenua o Harahemara kia nōhia ai tēnei whenua, koia te whenua o ō rātou tūpuna, kua whakatūria ia hei kīngi e te reo o te iwi.

10 Ināianei ā, e hiahia ana ahau kia mōhio ai he aha te take i māia ai koutou ki te whakatata atu ki ngā taiapa o te pā, i ahau anō, e haere tahi ana me aku kaitiaki i waho i te tomokanga?

11 Ināianei ā, nā tēnei take i tukua ai e au kia tiakina ai koutou, kia uiui atu au ki a koutou, me i kore pēnei kua meatia e au kia whakamatea koutou e aku kaitiaki. Kua tukuna koutou kia kōrero mai.

12 Ināianei ā, i te kitenga atu a Amona kua tukuna ia kia kōrero ai, ka haere atu ia, ā, ka tuohu iho ia i te aroaro o te kīngi; ā, i tana aranga ake anō ka mea ia: E te kīngi, he tino nui taku whakawhetai i mua i te Atua i tēnei rā kei te ora tonu ahau, ā, kua tukuna hoki ki te kōrero; ā, māku e ngana kia māia ai taku kōrero;

13 Nā te mea e mōhio tūturu ana ahau mehemea i mōhio koe ki ahau kua kore rawa i tukuna e koe kia mau ahau i ēnei herehere. Nā te mea ko Amona ahau, ā, he uri ahau nō Harahemara, ā, kua haere ake nei i waho i te whenua o Harahemara ki te rapu kōrero e pā ana ki ā mātou teina, nā Hinihi i kawe ake nei i waho i taua whenua.

14 Ināianei ā, i pahawa ake, nō muri iho i tā Rimihi rongo atu i ngā kupu a Amona, ka tino hari nui ia, a, ka mea: Ināianei, e mōhio tūturu ana ahau kei te ora tonu aku teina i te whenua o Harahemara. Ināianei ā, ka hari ahau; ā, hei āpōpō ka meatia e ahau kia hari anō taku iwi.

15 Nana rā, e noho herehere ana mātou ki ngā Rāmana, ā, kua whakatākehia ki tētahi tāke taumaha rawa hei pīkau. Ināianei ā, nana, mā ō mātou tuākana mātou e whakaputa atu i te hereheretanga, i waho rānei i ngā ringa o ngā Rāmana, ā, ka noho hei taurekareka ki a rātou; nā te mea he pai ake kia noho hei taurekareka ki ngā Nīwhai i te tuku takoha tatau pounamu ki te kīngi o ngā Rāmana.

16 Ināianei ā, i whakahau a kīngi Rimihi kia kaua e herea tonutia ai e rātou a Amona me ana teina, engari ka meatia kia haere atu rātou ki te puke i te raki o Hīroma, me te kawe mai i ana teina ki roto i te pā, mō konā rātou e kai, me te inu, me te whakatā i a rātou anō mai i ō rātou mamae i pā ai i tō rātou haerenga; nā te mea kua mamae rātou i ngā mea maha; i mamae rātou i te matekai, te matewai, me te ngenge.

17 Ināianei ā, i pahawa ake i te aonga ake o te rā, nā, i tukuna atu e kīngi Rimihi tētahi whakapuakitanga ki waenganui i tana iwi katoa, mā konā whakahuihui tahi ai rātou i a rātou anō ki te temepara, kia rongo ai i ngā kupu e kōrero ai ia ki a rātou.

18 Ā, i pahawa ake, nā, i te wā i whakahuihui tahi ai rātou i a rātou anō ka kōrero pēnei atu ia ki a rātou, e mea ana: E koutou, taku iwi, kia ara ake ō koutou māhunga, ā, kia tau ō koutou ngākau; nana rā, kua tae mai te wā, kāore rānei i te tawhiti, ka mutu tā tātou noho i raro i te mana o ō tātou hoariri, ahakoa ō tātou ngangana maha, kua auare ake nei; heoi, e whakapono ana ahau kei te toe tonu mai tētahi nganganatanga e whakamārie ai tātou.

19 Nō reira, kia ara ake ō koutou māhunga, kia hari hoki, me te whakawhirinaki atu ki te Atua, ki taua Atua koia te Atua o Aperahama, me Ihaka, me Hākopa; hei āpiti anō, ko taua Atua nāna nei ngā tamariki o Iharaira i ārahi mai i te whenua o Ihipā, ā, i meatia kia hīkoi mā roto i te Moana Whero i runga i te whenua maroke, ā, i whāngaia rātou ki te mana kia kore ai rātou e mate i te kōraha; ā, he maha noa atu ngā mea i mahia ai e ia mō rātou.

20 Hei āpiti anō, kua kawea mai e taua Atua anō ō tātou tūpuna i te whenua o Hiruharama, ā, nāna tana iwi i atawhai, i tiaki tae noa mai ki tēnei wā; ā nana, nā ō tātou hara me ō tātou mōrikarika kua kumea mai tātou e ia ki roto i te hereheretanga.

21 Ā, he kaiwhakaatu katoa koutou i tēnei rā, nā, ko Hinihi, te mea i whakatūria hei kīngi mō runga i tēnei iwi, i te ngākau whitawhita ia kia nōhia ai te whenua o ōna tūpuna, nō reira i māmingatia ia e ngā mahi tinihanga me ngā mahi nukarau a kīngi Rāmana, nāna i uru atu ki tētahi tiriti me kīngi Hinihi, ā, i tukuna atu ki roto i ōna ringaringa te mana whenua mō tētahi wahanga o te whenua, arā, ko te pā o Rīhai-Nīwhai, me te pā o Hīroma; me te whenua e karapotia ana—

22 Ā, nāna katoa ēnei i mahi i runga i te whakaaro kotahi kia kumea iho tēnei iwi ki raro i tōna mana, ki roto rānei i te hereheretanga. Ā nana, e tuku taonga tatau pounamu tātou ināianei ki te kīngi o ngā Rāmana, kia neke atu i te haurua o ā tātou kānga, ā tātou pāre, me ā tātou kākano katoa o ia āhua, o ia āhua, me te haurua o ngā hua o ā tātou kāhui katoa; me te haurua pū anō o ngā mea katoa kei a tātou, ā, me ō tātou mea ake, e tonoa mai nei e te kīngi o ngā Rāmana mai i a tātou, ki te kore ko ō tātou oranga.

23 Ināianei ā, he taumaha tēnei hei pīkau? Ā, ehara rānei tēnei, tō tātou whakamamaetanga, i te nui? Ināianei ā, anō te take nui kia tangi ai tātou.

24 Āe rā, ko taku kupu tēnei ki a koutou, he nui ngā take kia tangi ai tātou; nana rā, tokohia ō tātou teina kua whakamatea, ā, kua whakahekea noatia ō rātou toto, ā, kua pēnei katoa nā te hara.

25 Nā te mea mehemea kīhai tēnei iwi i taka iho ki te hē kua kore te Ariki i tuku kia tau iho ai tēnei kino nui ki runga i a rātou. Engari nana, kīhai rātou i whakarongo ki ana kupu; engari i tupu ake he tautohetohenga ki waenganui i a rātou, tae noa atu ki te whakahekenga i te toto i waenganui i a rātou anō.

26 Ā, kua whakamatea e rātou tētahi poropiti nā te Atua; āe rā, he tangata i kōwhiria e te Atua, nāna rātou i whakamōhio atu e pā ana ki ō rātou whakarihariha me ō rātou mōrikarika, ā, i poropititia mō ngā mea maha ka heke mai, āe rā, ko te haerenga mai pū anō o te Karaiti.

27 Ā, nā te mea i kī atu ia ki a rātou ko te Karaiti te Atua, te Matua o ngā mea katoa, ā, ka kī atu anō māna te āhua o te tangata e tango atu ki runga ki a ia, ā, ka rite ki te āhua i hangaia ai te tangata i te tīmatanga; arā, i kī ai ia kua hangaia te tangata kia rite ki tō te Atua āhua, ā, ka heke iho mai te Atua ki waenganui i ngā tamariki a te tangata, me te tango ki runga ki a ia te kikokiko me te toto, ā, ka haere whakamua atu ki runga i te mata o te whenua—

28 Ināianei ā, nā tēnei kōrero āna, i whakamatea ia e rātou; ā, he maha noa atu ngā mea i mahia ai e rātou nā konā tau iho ai te riri a te Atua ki runga i a rātou. Nō reira, ko wai e mīharo ana ki tō rātou hereheretanga, ki tō rātou patunga hoki ki te tino whakamamaetanga?

29 Nana rā, kua mea mai te Ariki: E kore ahau e atawhai i taku iwi i te rā o tō rātou haranga; engari māku ō rātou huarahi e taiapa kia kore ai rātou e whaioranga; ā, ka rite ā rātou mahinga me te mea nei he tūtukitanga waewae ki mua i a rātou.

30 Hei āpiti anō, e mea ana ia: Ki te ruirui taku iwi i te poke ka kokoti rātou i te pāpapa o reira i roto i te āwhiowhio; ā, ko tō reira hua ko te paitini.

31 Hei āpiti anō tāna e mea ai: Ki te ruirui taku iwi i te poke ka kokoti rātou i te marangai, e kawe mai ana i te whakangaromanga wawetanga.

32 Ināianei ā, nana, kua ea te kupu whakaari a te Ariki, ā, kua patua koutou, ā, kua whakamamaetia koutou.

33 Engari, ki te tahuri koutou ki te Ariki i runga i te ngākau ū, me te whakawhirinaki atu ki a ia, me te ngohengohe ki a ia i runga i te whakaaro pūmau katoa, ki te pēnei koutou, māna, e ai ki tōna ake hiahia me tōna ake āhuareka, e whakaputa i a koutou ki waho atu i te hereheretanga.